2 Kronikul
1 Sɔlɔmɔn we na Devid in bɔypikin in kiŋdɔm bin de strɔng mɔ ɛn mɔ, ɛn in Gɔd Jiova bin de wit am ɛn i mek i rili pawaful.+
2 Sɔlɔmɔn sɛn kɔl ɔl di Izrɛlayt dɛn, di lida dɛn fɔ wan tawzin man dɛn ɛn di lida dɛn fɔ ɔndrɛd man dɛn, di jɔj dɛn, ɔl di chif* dɛn na Izrɛl, di wan dɛn we de bifo na dɛn papa say. 3 Dɔn Sɔlɔmɔn ɛn ɔl di pipul dɛn go na di ay ples we de na Gibyɔn,+ bikɔs na de di tru Gɔd in mitin tɛnt bin de, dat na, di tɛnt we Jiova in savant we na Mozis bin dɔn mek na di wildanɛs.* 4 Bɔt Devid bin dɔn pul di tru Gɔd in Agrimɛnt Bɔks* na Kiriat-jiarim,+ ɛn i kɛr am go ɔp na di ples we i bin dɔn mek fɔ am; i bin dɔn mek tɛnt na Jerusɛlɛm+ fɔ di Agrimɛnt Bɔks.* 5 Ɛn dɛn put di kɔpa ɔlta+ we Bɛzalɛl+ we na Yuray in bɔypikin ɛn we na Ɔ in granpikin bin dɔn mek bifo Jiova in tabanakul; Sɔlɔmɔn ɛn di pipul dɛn bin de pre bifo de.* 6 Sɔlɔmɔn mek sakrifays dɛn na da ples de bifo Jiova, ɛn i mek 1,000 bɔn sakrifays dɛn na di kɔpa ɔlta+ na di mitin tɛnt.
7 Da nɛt de, Gɔd apia to Sɔlɔmɔn ɛn tɛl am se: “Tɛl mi wetin yu want lɛ a gi yu.”+ 8 Na de Sɔlɔmɔn tɛl Gɔd se: “Yu dɔn rili sho lɔv we nɔ de chenj to mi papa Devid,+ ɛn yu dɔn mek a tek in ples as kiŋ.+ 9 E Jiova Gɔd, du wetin yu dɔn prɔmis mi papa Devid,+ bikɔs yu dɔn mek mi kiŋ oba pipul dɛn we bɔku lɛk di dɔst na di wɔl.+ 10 Gi mi sɛns ɛn mek lɛ a no+ aw fɔ lid dɛn pipul dɛn ya, bikɔs udat go ebul fɔ jɔj dɛn yu bɔku bɔku pipul dɛn ya?”+
11 Dɔn Gɔd tɛl Sɔlɔmɔn se: “Bikɔs na dis yu want ɛn yu nɔ aks fɔ jɛntri, prɔpati, ɔnɔ, ɔ fɔ mek di wan dɛn we et yu day, ɔ fɔ lɔng layf, bɔt yu aks fɔ sɛns ɛn fɔ no aw fɔ jɔj mi pipul dɛn we a dɔn mek yu kiŋ oba,+ 12 a go gi yu sɛns ɛn mek yu no bɔt tin dɛn; dɔn bak a go gi yu jɛntri, prɔpati dɛn, ɛn ɔnɔ we no kiŋ bifo yu nɔ ɛva gɛt ɛn we no kiŋ afta yu nɔ go ɛva gɛt.”+
13 So Sɔlɔmɔn kɔmɔt na di ay ples na Gibyɔn+ usay di mitin tɛnt de ɛn kam na Jerusɛlɛm ɛn i rul oba Izrɛl. 14 Ɛn Sɔlɔmɔn kɔntinyu fɔ gɛda chariɔt dɛn ɛn ɔs dɛn;* i bin gɛt 1,400 chariɔt dɛn ɛn 12,000 ɔs dɛn.*+ I kip dɛn na di chariɔt siti+ dɛn we bin de nia am na Jerusɛlɛm.+ 15 Di kiŋ mek silva ɛn gold bɔku na Jerusɛlɛm lɛk ston+ dɛn, ɛn i mek sida bod dɛn bɔku lɛk di sikamɔ stik dɛn na di Shɛfila.+ 16 Na Ijipt+ dɛn bin de pul Sɔlɔmɔn in ɔs dɛn, ɛn di biznɛsman dɛn we i bin de sɛn fɔ bay di ɔs dɛn bin de pe wan prayz fɔ dɛn bay grup.*+ 17 Di prayz fɔ ɛniwan pan di chariɔt dɛn we bin de kɔmɔt na Ijipt na 600 silva mɔni, ɛn di prayz fɔ wan ɔs na 150 silva mɔni; dɔn dɛn bin de sɛl dɛn to ɔl di Itayt kiŋ dɛn ɛn di kiŋ dɛn na Siria.