2 Kronikul
17 Ɛn in bɔypikin Jɛoshafat+ tek in ples as kiŋ, ɛn i gɛt mɔ pawa na Izrɛl. 2 I put fɛtman dɛn na ɔl di strɔng siti dɛn na Juda, ɛn i put bes dɛn fɔ in sojaman dɛn na Juda ɛn na di siti dɛn na Ifrem we in papa Esa bin dɔn kapchɔ.+ 3 Jiova kɔntinyu fɔ de wit Jɛoshafat, bikɔs i bin de du di sem tin dɛn we in gret gret granpa Devid+ bin de du ɛn i nɔ bin wɔship di Beal dɛn. 4 I luk fɔ in papa in Gɔd+ ɛn i obe in kɔmandmɛnt ɛn i nɔ fala di tin dɛn we di pipul dɛn na Izrɛl bin de du.+ 5 Jiova kɔntinyu fɔ mek Jɛoshafat in kiŋdɔm tinap tranga wan;+ ɛn ɔl di pipul dɛn na Juda kɔntinyu fɔ gi am gift dɛn, ɛn i bin jɛntri pasmak ɛn dɛn bin rili rɛspɛkt am.+ 6 I bin gɛt maynd fɔ du wetin Jiova want, ɛn i ivin pul di ay ples+ dɛn ɛn di oli pol*+ dɛn na Juda.
7 Insay di tɔd ia we i bin de rul, i sɛn kɔl in prins dɛn we na Bɛn-eil, Obadaya, Zakaraya, Nɛtanɛl, ɛn Mikaya, fɔ tich na di siti dɛn na Juda. 8 Sɔm Livayt dɛn bin de wit dɛn, dat na: Shimaya, Nɛtanaya, Zɛbadaya, Asaɛl, Shɛmiramɔt, Jɛonatan, Adonayja, Tobayja, ɛn Tob-adonayja, dɔn bak Ɛlishama ɛn Jɛoram we na prist dɛn dɛnsɛf bin de wit dɛn.+ 9 Dɛn bin tek di buk we gɛt Jiova in Lɔ+ ɛn bigin tich na Juda, ɛn dɛn bin go na ɔl di siti dɛn na Juda fɔ tich di pipul dɛn.
10 Ɛn Jiova mek ɔl di kiŋdɔm dɛn we de arawnd Juda fred, ɛn dɛn nɔ fɛt Jɛoshafat. 11 Ɛn di Filistin dɛn kam wit gift dɛn ɛn mɔni as taks to Jɛoshafat. Di Arab dɛn gi am 7,700 man ship dɛn ɛn 7,700 man got dɛn frɔm dɛn animal dɛn.
12 Jɛoshafat bin de pawaful mɔ ɛn mɔ,+ ɛn i kɔntinyu fɔ bil strɔng ples+ dɛn ɛn siti dɛn fɔ kip tin+ dɛn na Juda. 13 I bin de du big big wok dɛn na di siti dɛn na Juda, ɛn i bin gɛt sojaman dɛn we na pawaful fɛtman dɛn na Jerusɛlɛm. 14 Dɛn bin sheb dɛn bay grup akɔdin to dɛn papa say: na Juda, dɛn bin gɛt lida dɛn fɔ grup dɛn we gɛt 1,000 man dɛn, Adna na bin lida, ɛn i bin gɛt 300,000 pawaful fɛtman+ dɛn. 15 Ɛn Jɛoenan we na lida bin de ɔnda am, ɛn i bin gɛt 280,000 man dɛn. 16 Dɔn bak Amasaya we na Zikray in bɔypikin insɛf bin de ɔnda am. Amasaya bin gri fɔ wok fɔ Jiova, ɛn i bin gɛt 200,000 pawaful fɛtman dɛn. 17 Ɛn frɔm Bɛnjamin,+ dɛn bin gɛt Ilayada we na pawaful fɛtman, ɛn in bin gɛt 200,000 man dɛn we gɛt bo ɛn shild.+ 18 Ɛn Jɛɔzabad bin de ɔnda am, ɛn in bin gɛt 180,000 man dɛn we rɛdi fɔ fɛt. 19 Dɛn man dɛn ya bin de wok fɔ di kiŋ apat frɔm di wan dɛn we di kiŋ bin dɔn put na di strɔng siti dɛn ɔlsay na Juda.+