2 Kronikul

12 Jɔs afta Rɛoboam in kiŋdɔm dɔn tinap tranga wan+ ɛn i dɔn strɔng, i lɛf fɔ fala Jiova in Lɔ,+ ɛn ɔl di Izrɛlayt dɛn du di sem tin. 2 Insay di ia we mek fayv we Kiŋ Rɛoboam de rul, Kiŋ Shayshak+ we de rul na Ijipt kam fɛt di pipul dɛn na Jerusɛlɛm, bikɔs dɛn nɔ bin fetful to Jiova igen. 3 I bin gɛt 1,200 chariɔt dɛn, 60,000 man dɛn we de rayd ɔs; ɛn bɔku bɔku trup dɛn we pɔsin nɔ go ebul fɔ kɔnt bin kam wit am frɔm Ijipt, dat na, Libian dɛn, Sɔkim, ɛn Itiopian+ dɛn. 4 I kapchɔ di strɔng siti dɛn na Juda ɛn faynali i rich na Jerusɛlɛm.

5 Prɔfɛt Shimaya+ kam to Rɛoboam ɛn di prins dɛn na Juda we dɔn gɛda na Jerusɛlɛm bikɔs ɔf Shayshak, ɛn i tɛl dɛn se: “Na dis Jiova se, ‘Una dɔn lɛf mi, so misɛf dɔn lɛf una+ na Shayshak in an.’” 6 Na de di prins dɛn na Izrɛl ɛn di kiŋ put dɛnsɛf dɔŋ+ ɛn tɔk se: “Jiova de du wetin rayt.” 7 We Jiova si se dɛn dɔn put dɛnsɛf dɔŋ, Jiova tɛl Shimaya se: “Dɛn dɔn put dɛnsɛf dɔŋ. A nɔ go dɔnawe wit dɛn,+ ɛn i nɔ go te igen a go sev dɛn. A nɔ go yuz Shayshak fɔ pul mi wamat pan Jerusɛlɛm. 8 Bɔt dɛn go bi in savant dɛn, so dat dɛn go no di difrɛns bitwin we dɛn de sav mi ɛn we dɛn de sav di kiŋ* dɛn na ɔda land dɛn.”

9 So Kiŋ Shayshak na Ijipt kam fɛt di pipul dɛn na Jerusɛlɛm. I tek di valyu tin dɛn na Jiova in os+ ɛn di valyu tin dɛn na di kiŋ in os.* I tek ɔltin, i ivin tek di gold shild dɛn we Sɔlɔmɔn bin dɔn mek.+ 10 So Kiŋ Rɛoboam mek kɔpa shild dɛn bikɔs dɛn bin dɔn tek di gold shild dɛn, ɛn i gi dɛn to di edman dɛn fɔ di gaydman dɛn,* we bin de gayd di domɔt na di kiŋ in os. 11 Ɛnitɛm di kiŋ de go na Jiova in os, di gaydman dɛn bin de kam insay ɛn kɛr dɛn go, dɔn dɛn bin de kam wit dɛn bak na di gaydman dɛn os. 12 Bikɔs di kiŋ put insɛf dɔŋ, Jiova bin lɛf fɔ vɛks pan am,+ ɛn i nɔ dɔnawe wit dɛn kpatakpata.+ Pantap dat, sɔm gud tin dɛn bin de apin na Juda.+

13 Kiŋ Rɛoboam gɛt mɔ pawa na Jerusɛlɛm ɛn kɔntinyu fɔ rul; Rɛoboam bin ol 41 ia we i bi kiŋ, ɛn i rul fɔ 17 ia na Jerusɛlɛm, di siti we Jiova bin dɔn pik pan ɔl di trayb dɛn na Izrɛl fɔ put in nem de. Rɛoboam in mama na bin Amɔnayt+ ɛn in nem na Neama. 14 Bɔt Rɛoboam bin de du wetin bad, bikɔs i nɔ mek-ɔp in maynd fɔ luk fɔ Jiova.+

15 As fɔ Rɛoboam in istri, frɔm di biginin to di ɛnd, i rayt pan di tin dɛn we Prɔfɛt Shimaya+ ɛn Ido+ we de si vishɔn rayt pan di famili list. Ɛn wɔ bin de bitwin Rɛoboam ɛn Jɛroboam ɔltɛm.+ 16 Dɔn Rɛoboam day jɔs lɛk in gret gret granpa dɛn, ɛn dɛn bɛr am na Devid in Siti;+ ɛn in bɔypikin we nem Abayja+ tek in ples as kiŋ.