1 Kronikul
15 Ɛn Devid kɔntinyu fɔ bil os dɛn fɔ insɛf na Devid in Siti, ɛn i mek ples fɔ di tru Gɔd in Agrimɛnt Bɔks,* ɛn i put tɛnt+ de fɔ di Agrimɛnt Bɔks.* 2 Na da tɛm de Devid tɔk se: “Nɔbɔdi nɔ fɔ tot di tru Gɔd in Agrimɛnt Bɔks* pas di Livayt dɛn bikɔs na dɛn Jiova dɔn pik fɔ tot Jiova in Agrimɛnt Bɔks* ɛn fɔ wok fɔ am ɔltɛm.”+ 3 Na de Devid kɔl ɔl di Izrɛlayt dɛn fɔ gɛda na Jerusɛlɛm fɔ kɛr Jiova in Agrimɛnt Bɔks* ɔp na di ples we i bin dɔn mek fɔ am.+
4 Devid gɛda Erɔn in pikin+ dɛn ɛn di Livayt+ dɛn: 5 frɔm di Koatayt dɛn, dɛn bin gɛt Yurayɛl we na di edman ɛn 120 pan in brɔda dɛn; 6 frɔm di Mɛrarayt dɛn, dɛn bin gɛt Asaya+ we na di edman ɛn 220 pan in brɔda dɛn; 7 frɔm di Gashɔmayt dɛn, dɛn bin gɛt Joɛl+ we na di edman ɛn 130 pan in brɔda dɛn; 8 frɔm Ɛlizefan+ in pikin dɛn, dɛn bin gɛt Shimaya we na di edman ɛn 200 pan in brɔda dɛn; 9 frɔm Ibrɔn in pikin dɛn, dɛn bin gɛt Iliɛl we na di edman ɛn 80 pan in brɔda dɛn; 10 frɔm Ɔziɛl+ in pikin dɛn, dɛn bin gɛt Aminadab we na di edman ɛn 112 pan in brɔda dɛn. 11 Pantap dat, Devid kɔl di prist dɛn we na Zedɔk+ ɛn Abayata+ ɛn di Livayt dɛn we na Yurayɛl, Asaya, Joɛl, Shimaya, Iliɛl, ɛn Aminadab, 12 ɛn i tɛl dɛn se: “Una na di edman dɛn na di papa say fɔ di Livayt dɛn. Una fɔ mek una ɛn una brɔda dɛn oli ɛn kam wit Jiova, we na Izrɛl in Gɔd, in Agrimɛnt Bɔks* ɔp na di ples we a dɔn mek fɔ am. 13 We nɔto una bin tot am di fɔstɛm,+ Jiova wi Gɔd bin vɛks bad bad wan pan wi+ bikɔs wi nɔ bin tray fɔ no di kɔrɛkt we fɔ du am.”+ 14 So di prist dɛn ɛn di Livayt dɛn mek dɛnsɛf oli fɔ kam wit Jiova, we na Izrɛl in Gɔd, in Agrimɛnt Bɔks.*
15 Dɔn di Livayt dɛn yuz di pol dɛn+ fɔ tot di tru Gɔd in Agrimɛnt Bɔks* na dɛn sholda jɔs lɛk aw Jiova bin dɔn tɛl Mozis fɔ tɛl dɛn. 16 Na de Devid tɛl di edman dɛn fɔ di Livayt dɛn fɔ pik dɛn brɔda dɛn we de siŋ, fɔ siŋ wit gladi-at, ɛn dɛn fɔ yuz myuzik instrumɛnt dɛn: ap,+ simbal,*+ ɛn myuzik instrumɛnt dɛn we gɛt string.
17 So di Livayt dɛn pik Iman+ we na Joɛl in bɔypikin ɛn frɔm in brɔda dɛn, dɛn pik Esaf+ we na Bɛrikaya in bɔypikin ɛn frɔm di Mɛrarayt dɛn we na dɛn brɔda dɛn, dɛn pik Itan+ we na Kushea in bɔypikin. 18 Dɛn bin de wit dɛn brɔda dɛn we de na di sɛkɔn grup+ we na, Zakaraya, Bɛn, Jaeziɛl, Shɛmiramɔt, Jehaɛl, Ɔnay, Ɛlayab, Bɛnaya, Measaya, Matitaya, Ɛlifɛlɛu, ɛn Mɛkniya, ɛn di getman dɛn we na Obɛd-idɔm ɛn Jeaɛl. 19 Di man dɛn we de siŋ we na Iman,+ Esaf,+ ɛn Itan fɔ ple di kɔpa simbal*+ dɛn; 20 ɛn Zakaraya, Eziɛl, Shɛmiramɔt, Jehaɛl, Ɔnay, Ɛlayab, Measaya, ɛn Bɛnaya bin de ple myuzik instrumɛnt dɛn we gɛt string we dɛn tyun to Alamɔt;*+ 21 di wan dɛn we bin de ple di ap we tyun to Shɛminit*+ ɛn we na dayrɛktɔ dɛn na Matitaya,+ Ɛlifɛlɛu, Mɛkniya, Obɛd-idɔm, Jeaɛl, ɛn Azazaya. 22 Kɛnanaya+ we na di edman fɔ di Livayt dɛn bin de supavays di wan dɛn we de kɛr tin dɛn bikɔs i bin rili sabi, 23 Bɛrikaya ɛn Ɛlkena na bin getman dɛn fɔ di Agrimɛnt Bɔks.* 24 Di prist dɛn we na Shɛbanaya, Jɔshafat, Nɛtanɛl, Amesay, Zakaraya, Bɛnaya, ɛn Ɛlieza bin de blo di trɔmpɛt lawd wan bifo di tru Gɔd in Agrimɛnt Bɔks.*+ Obɛd-idɔm ɛn Jɛaya dɛn bak na bin getman dɛn fɔ di Agrimɛnt Bɔks.*
25 Dɔn Devid, di bigman dɛn na Izrɛl, ɛn di lida dɛn fɔ wan tawzin dɛnsɛf bin de kam ɛn gladi+ as dɛn de waka nia di wan dɛn we de go tek Jiova in Agrimɛnt Bɔks* na Obɛd-idɔm in os.+ 26 We di tru Gɔd ɛp di Livayt dɛn we bin de kɛr Jiova in Agrimɛnt Bɔks,* dɛn sakrifays sɛvin yɔŋ man kaw dɛn ɛn sɛvin man ship+ dɛn. 27 Devid bin wɛr klos we nɔ gɛt sliv we dɛn mek wit fayn matirial jɔs lɛk di Livayt dɛn we bin de kɛr di Agrimɛnt Bɔks,* di man dɛn we bin de siŋ, ɛn Kɛnanaya we na di edman fɔ di wan dɛn we de kɛr tin dɛn ɛn di wan dɛn we bin de siŋ. Devid bin wɛr bak linin ɛfɔd.+ 28 Ɔl di Izrɛlayt dɛn bin de gladi ɛn ala+ as dɛn de kam wit Jiova in Agrimɛnt Bɔks.* Dɛn bin de blo ɔn, trɔmpɛt,+ ɛn dɛn bin gɛt simbal* dɛn, ɛn dɛn bin de ple ap ɛn myuzik instrumɛnt dɛn we gɛt string lawd wan.+
29 Bɔt we Jiova in Agrimɛnt Bɔks* rich na Devid in Siti,+ Sɔl in galpikin we na Maykal+ bin luk dɔŋ di winda. I si Kiŋ Devid de jomp jomp ɛn de sɛlibret, ɛn i bigin fɔ mɔlɛs am nain at.+