1 Kronikul

10 Di Filistin dɛn bin de fɛt di Izrɛlayt dɛn. Ɛn di man dɛn na Izrɛl rɔnawe pan di Filistin dɛn, ɛn bɔku pan dɛn day na Mawnt Gilboa.+ 2 Di Filistin dɛn bin de rɔnafta Sɔl ɛn in bɔypikin dɛn, ɛn dɛn kam nia dɛn. Di Filistin dɛn kil Jonɛtan, Abinadab, ɛn Malkay-shua,+ we na Sɔl in bɔypikin dɛn. 3 Di fɛt bin tɛns pan Sɔl, ɛn di wan dɛn we de yuz bo ɛn aro fɔ fɛt si am, dɔn dɛn wund am.+ 4 Na de Sɔl tɛl di pɔsin we de ol in wɛpɔn dɛn se: “Tek yu sɔd ɛn kil mi, so dat dɛn man dɛn ya we nɔ sakɔmsayz nɔ go kam wikɛd mi+ bifo dɛn kil mi.” Bɔt di pɔsin we de ol in wɛpɔn dɛn nɔ bin want fɔ du am, bikɔs i bin de fred pasmak. So Sɔl tek di sɔd ɛn fɔdɔm pan am.+ 5 We di man we de ol Sɔl in wɛpɔn dɛn si se Sɔl dɔn day, insɛf tek in sɔd ɛn fɔdɔm pan am ɛn day. 6 So Sɔl ɛn in tri bɔypikin dɛn ɛn ɔl di wan dɛn nain famili* we bin de wit am day togɛda.+ 7 We ɔl di pipul dɛn na Izrɛl we bin de na di vali* si se ɔlman dɔn rɔnawe, ɛn Sɔl ɛn in bɔypikin dɛn dɔn day, dɛn bigin fɔ lɛf dɛn siti dɛn ɛn rɔnawe. Dɔn di Filistin dɛn kam de de.

8 Di nɛks de, we di Filistin dɛn kam fɔ tek di wan dɛn we dɔn day dɛn tin dɛn, dɛn si Sɔl ɛn in bɔypikin dɛn na Mawnt Gilboa+ dɛn day wan. 9 So dɛn tek in tin dɛn, di tin dɛn we i de yuz fɔ fɛt, ɛn dɛn kɔt in ed. Dɔn dɛn sɛn mɛsej ɔlsay na di Filistin dɛn land fɔ skata di nyuz to dɛn aydɔl+ dɛn ɛn to di pipul dɛn. 10 Dɔn dɛn put di tin dɛn we i bin de yuz fɔ fɛt na dɛn gɔd in os,* ɛn dɛn nel in skɔl na Degɔn in os.+

11 We ɔl di pipul dɛn na Jebɛsh+ we de na Giliad yɛri bɔt ɔl wetin di Filistin dɛn dɔn du to Sɔl,+ 12 ɔl di fɛtman dɛn grap ɛn go tek Sɔl ɛn in bɔypikin dɛn dedebɔdi. Dɛn kɛr dɛn go na Jebɛsh+ ɛn bɛr dɛn bon dɛn ɔnda di big stik we de de, dɔn dɛn fast fɔ sɛvin dez.

13 So Sɔl day bikɔs i nɔ bin fetful to Jiova bay we i nɔ bin obe Jiova,+ ɛn we i go aks sɔmbɔdi we de tɔk to dayman+ fɔ no wetin i fɔ du, 14 bifo i aks Jiova fɔ no wetin i fɔ du. So I mek i day ɛn mek Devid we na Jɛsi in bɔypikin bi kiŋ.+