Mwet Elder Eltahl Ahkpahye Mukul Lili uh Fuhkah in Pah ke Orekma?
“Mwe luti suc kom lohng sihk . . . sang ma inge nuh sin mwet kom luhlahlfongi.”—LUO TIMOTHY 2:2.
1. (a) Meac mwet luhn God uh etuh emeet me na ke mwe ahkpah uh, ac fuhkah ma inge fal nuh sesr mihsenge? (b) Meac kuht ac fah ahkuhtweyac ke mwe lutlut se inge?
MWET luhn God uh etuh na emeet me lah ahkpah uh use mwe insewowo. Ke sie mwe puhpuhlyuck, Abram el “pahngoneni mukul nuhkewa . . . suc etuh mweun” in molwelah Lot, ac mukul inge kuhtanglah. (Genesis 14:14-16) Mwet in on ke lwen lal Tohkohsrah David ah sang kaksak nuh sin Jeova mweyen eltahl “pah in sritacl ke mwe on.” (Sie Chronicle 25:7) Mihsenge, kuht enenuh in lainuhl Satan ac facl se lal inge. (Ephesus 6:11-13) Oacyacpac, kuht kwacfeacng in kaksakihn Jeova ke kuht sramsram ke inel nuh sin mwet sahyac uh. (Hebrew 13:15, 16) In oacna mwet kuhlwacnsap luhn God in pacl meet ah, kuht enenuh in eis ahkpah kuht fin ke insewowo. Ke congregation uh, Jeova el sang kunohkohn inge nuh sin mwet elder uh eltahl in ahkpahye mwet sahyac. (Luo Timothy 2:2) Kain in inkacnek fuhkah kuhtuh sin mwet elder eltahl orekmakihn in ahkpahye mukul lili in kahsruh karihngihn mwet luhn Jeova uh?
AHKKWEYE LUHNGSE LUHN MWET LUTLUT NUH SIN JEOVA
2. Meet liki sie mwet elder el luti sie mwe lutlut sasuc nuh sin mwet lutlut lal, meac el ke oruh, ac efuh?
2 Mwet elder se ac kuh in luhmweyuck nuh ke sie mwet imac. Meet liki el yukwiyac fihtac lal, el enenuh in sang mwe ahkmongo nuh ke fohk uh in kahsruh fukun sahk suhnwacl in muh kapwack wo ac kuh. Ke inkacnek sepacna inge, meet liki mwet elder se el luti ma sasuc se nuh sin mwet lutlut lal, sahp el ac ke sruhmuhn kuhtuh kahs in kahsruh in Bible suc ac kuh in kahsruh mwet lutlut sacn in ahkolah elan orekmakihn ma el lotwelah uh.—Sie Timothy 4:6.
3. (a) Ke sie sramsram nuh sin sie mwet lutlut, kahs lal Jesus ke Mark 12:29, 30 ac orekmakihnyuck fuhkah? (b) Puhruhe luhn sie mwet elder ac kahsruh fuhkah sie mwet lutlut?
3 Arlacna yohk srihpac in kahlwem kac lah fuhkah ma pwacye uh kihfucs puhlakihn ac nuhnak luhn mwet lutlut se. In oruh ma inge, kom kuh in siyuck sel lah fuhkah wuhlelah lal nuh sin Jeova uh kihfucs sulaclah pucspucs ke moul lal uh. Kihsen siyuck se inge kuh in kol nuh ke sie sramsram lah fuhkah kuht kuh in kuhlwacnsuhpuh Jeova ke insiacsr kewa. (Riti Mark 12:29, 30.) Sahp tukun sramsram lomtacl uh, kom kuh in puhruhe ac siyuck Jeova elan sang ngun muhtahl nuh sel in kahsrel ke ahkpah lal uh. Mukul lili se ingacn fin lohng lah kom puhruhe kacl, ma ingacn ac ahkkweyacl in ahkyohkye orekma in kuhlwacnsap lal uh.
4. (a) Sang sie mwe srihkasrak ke ma suhmuhslah in Bible suc kuh in kahsruh sie mwet lutlut elan kapkapack. (b) Finsrak fuhkah enenuh in oasr yurin mwet elder ke pacl eltahl ahkpahye mwet sahyac uh?
4 Ke kom muhtwacwack in ahkpah ke pacl se meet, wo in sramsramkihn ma suhmuhslah in Bible suc kahsruh mwet lutlut sacn in akihlen ke yohk srihpaciyac in sang kahsruh, in luhlahlfongiyuck ac in puhsisacl. (Sie Tokosra 19:19-21; Nehemiah 7:2; 13:13; Orekma 18:24-26) Ohiyac inge yohk srihpac nuh sin mwet lutlut se oacna ke fohk uh enenuh mwe ahkmongo. Ma inge ac kuh in kahsruh mwet lutlut se in sa na kapkapack. Jean Claude, sie mwet elder fin acn France, finsrak lal ke pacl se el ahkpahye mwet uh pa in kahsreltahl etwaclah in oruh sulaclah suc fal nuh ke kahs in kahsruh ke Bible uh. El fahk: “Nga sukok pacl kuht in tuhkweni riti sie fuhs suc ‘ikacslah muhtuhn’ mwet lutlut se nuh ke ma ‘wolacna’ suc konweyuckyak ke Kahs luhn God.” (Psalm 119:18) Meac kuhtuh pac inkacnek in ahkkweye luhlahlfongi luhn sie mwet lutlut?
AHKKAHLWEMYE KUHTUH FINSRAK AC SANG SRIHPAC NUH KAC
5. (a) Fuhkah luhpan yohk srihpaciyac in sramsram nuh sin sie mwet lutlut ke finsrak lal ke kuhlwacnsap lal nuh sin Jeova uh? (b) Efuh mwet elder uh enenuh in ahkpahye mwet fuhsr uh? (Liye footnote.)
5 Siyuck sin sie mwet lutlut lah meac finsrak lal ke kuhlwacnsap lal nuh sin Jeova uh. Fin soenna oasr ma el konwacack, kahsrel in oakiyac sie finsrak ma el ac kuh in sun an. Ahkkahlwemye pwacr lom ke kom sruhmuhn nuh sel ke sie finsrak ma kom tuh oraclah ac ma kom puhla ke kom sun finsrak se lom ah. Inkacnek se inge arlac fihsracsr ac orekma na pwacye. Victor, sie mwet elder ac pioneer fin acn Africa el fahk: “Ke pacl se nga fuhsr ah, sie mwet elder el kihsen siyuck nuh sihk ke finsrak luhk. Kihsen siyuck lal ah tuh kahsreyuc in muhtwacwack nuhnkuh yohk ke orekma in luti uh.” Mwet elder ma pah tari ke orekma eltahl fahk lah arlac yohk srihpac in ahkpahye mukul lili uh ke eltahl srackna srihk, sahp ke pacl eltahl srackna fuhsr. Kom kuh in sang nuh seltahl orekma in congregation uh fal nuh ke matwacltahl. Mukul lili uh fin ahkpahyeyuck ke eltahl srackna fuhsr, ma inge ac kuh in kahsreltahl in lohacng ahkwoyac nuh ke finsrak laltahl uh eltahl finne mahtuhoh ac nwacnwaclah ke mwe ahkfohs.—Riti Psalm 71:5, 17.a (Liye footnote.)
6. Inkacnek yohk srihpac fuhkah se Jesus el orekmakihn in ahkpahye mwet sahyac?
6 Kom fin ahkuhtweyac nuh sel lah efuh el enenuh in oruh ac tiac fahk muhkwena lah meac el enenuh in oruh, ma ingacn ac mokle mwet lutlut se in oruh orekma in kuhlwacnsap. Jesus, suc Mwet Luti Wo Emeet, el fahk nuh sin mwet sap lal ah in som fahkwack. Tuhsruhktuh, el ahkuhtweyac meet ke srihpac pwacnacng eltahl enenuh in ahkos. El fahk: “Kuh nuhkewa inkuhsrao ac fin facluh ituckuh nuh sihk.” Na el fahk pac: “Ke ma inge kowos som nuh yurin mwet in muhtuhnfacl nuhkewa fin facluh, ac oruh tuh elos in mwet tuhmuhk lutlut.” (Matthew 28:18, 19) Kom ac etahi fuhkah inkacnek in ahkpah lal Jesus inge?
7, 8. (a) Mwet elder ke pacl inge uh ac etahi inkacnek in ahkpah lal Jesus uh fuhkah? (b) Efuh yohk srihpac in sang kahs in kaksak nuh sin mwet lutlut uh? (c) Kahs in kahsruh fuhkah kuh in kahsruh mwet elder se in ahkpahye mwet sahyac?(Liye pohk se inge, “Fuhkah in Ahkpahye Mukul Lili uh.”)
7 Ke pacl se kom siyuck sin sie mukul lili elan oruh sie orekma, ahkuhtweyac nuh sel ke Bible lah efuh orekma se inge yohk srihpac. Ke kom oruh ma inge, kom luti nuh sel elan oruh ma fal nuh ke kahs in kahsruh suc tuhkuh ke Bible ac tiac ke na srihpen oasr masap kac. Ke sie mwe puhpuhlyuck, kom fin siyuck sie mukul lili elan liye motonoac ke Lohm in Toeni uh in nwacsnwacs ac tiac mwe sensen in fahsr kac, sahp kom kuh in ahkkahlwemye nuh sel Titus 2:10. Ahkuhtweyac lah fuhkah orekma lal uh nahwelah pweng ke Tohkohsrahi uh. Oacyacpac, siyuck sin mwet lutlut sacn in nuhnkuh ke mwet mahtuh ke congregation uh ac lah fuhkah orekma se inge ac kahsreltahl. Kain in sramsram inge ac kuh in sang mwe ahkpah suc ac kuh in kahsrel in nuhnkuh yohk ke mwet uh ac tiac masap kac uh. Ke el liye ma wowo suc mwet lili uh engankihn ke orekma lal uh, el ac engan ke srihpen el kuhlwacnsuhpuh mwet sahyac.
8 Oacyacpac, esam kom in sang kahs in kaksak nuh sin mwet lutlut sacn ke el orekmakihn kahs in kahsruh lom. Efuh yohk srihpac in oruh ma inge? Oacna ke kof uh kahsruh sahk uh in kap ac wo fahko, ke pacl se kom sang kahs in kaksak nuh sin sie mwet lutlut, ma inge kahsrel elan kapkapack ke orekma in kuhlwacnsap lal nuh sin Jeova.—Liye Matthew 3:17.
SIE PAC MA UPAC
9. (a) Meac kuhtuh srihpac oruh upac kuhtuh nuh sin mwet elder ke acn kahsruhp uh in ahkpahye mwet sahyac? (b) Efuh kuh orekma in kuhlwacnsap nuh sin God uh tiac ma yohk srihpac nuh ke moul luhn kuhtuh mukul lili fuhsr inge?
9 Mwet elder ma muhta ke acn kahsruhp uh konwacack lah arlac upac in ahkkweye mukul lili ma bacptaislac ke matwac 20 kuh 30 in ahkyohkye orekma laltahl ke congregation uh. Apkuhran nuh ke acn 20, mwet elder an inge suc pah tari eltahl fahk nuh sesr lah efuh eltahl luhlahlfongi muh kuhtuh mukul lili fuhsr kac uh tiac ahkyohkye orekma in kuhlwacnsap laltahl ke congregation uh. Inkaiyacltahl fahk lah ke kuhtuh mukul lili inge srackna fuhsr, pahpah ac ninac kiyacltahl ah tiac na ahkkweyacltahl in oakiyac finsrak ma eltahl ke sun ke orekma in kuhlwacnsap laltahl nuh sin Jeova uh. Ac nuh sin kuhtuh mukul lili fuhsr uh eltahl ke ahkyohkye orekma in kuhlwacnsap laltahl oruh pahpah ac ninac kiyacltahl inge ahkkweyacltahl in oakiyac kain in finsrak suc enenuh lutlut fuhlwact kuh sie orekma luhn facluh. Pwacnacng orekma in kuhlwacnsap nuh sin God uh tiac pa ma yohk srihpac emeet nuh ke moul laltahl uh.—Matthew 10:24.
10, 11. (a) Sie mwet elder el kuh in kais kuhtuh na ekuhllah fuhkah inkacnek in nuhnak luhn sie mukul lili? (b) Ma suhmuhslah fuhkah sie mwet elder el kuh in orekmakihn in sun insiacn sie mukul lili, ac efuh? (Liye footnote.)
10 Atacn sie mukul lili fin ahkkahlwemye lah el tiac ke ahkyohkye orekma in kuhlwacnsap lal ke congregation uh, yohk orekma ac mongfihsracsr ma enenweyuck in ekuhllah nuhnak lal uh, tuhsruhktuh ac kuh in orek. Sie mwet imac el ac kuh in kahsruh sahk soko in kapwack suwohs ke el kais kuhtuh na ukwacack srohpoh an in ahksuwohsye. Ke inkacnek se pacna inge, kom kuh in kais kuhtuh na kahsruh sie mukul lili elan liye lah el enenuh in ekuhllah nuhnak lal uh ac eis kuhtuh kunohkohn ke congregation uh. Tuhsruhktuh, fuhkah?
11 Sang pacl lom kom in muh kuh in kawuckyak nuh sin mukul lili sacn. Fahk lah congregation uh enenwacl, el in etuh. Na, tok kuhtuh, weluhl muhta ac sramsram nuh sel ke ma suhmuhslah uh suc kuh in kahsrel in nuhnkuh ke wuhlelah lal nuh sin Jeova uh. (Ecclesiastes 5:4; Isaiah 6:8; Matthew 6:24, 33; Luke 9:57-62; Sie Corinth 15:58; Luo Corinth 5:15; 13:5) Srihke in sun insiacl ke kom kihsen siyuck nuh sel, oacna: ‘Meac wuhlelah lom nuh sin Jeova ke pacl se kom kihsackihnkomyang nuh sel? Meac kom nuhnkuh, meac puhlakihn luhn Jeova ke pacl se kom bacptaislac?’ (Soakas 27:11) ‘Meac Satan el puhla?’ (Sie Peter 5:8) Kain in ma suhmuhslah inge arlacna kuh in mokle insiacn mukul lili se.—Riti Hebrew 4:12.b (Liye footnote.)
MWET LUTLUT, AHPWACYEYE OHIYACN OARU
12, 13. (a) Kain in ohiyac fuhkah Elisha el ahkkahlwemye oacna sie mwet lutlut? (b) Jeova el ahkinsewowoyacl Elisha fuhkah ke oaru lal?
12 Mukul lili fuhsr, congregation uh enenuh kahsruh lom! Ohiyac fuhkah ac fah kahsre kom in insewowokihn orekma in kuhlwacnsap lom nuh sin Jeova? In konwacack top uh, kuht sruhmuhn kuhtuh ma sikyak ke moul lal Elisha, sie mwet lutlut in pacl meet ah.
13 Apkuhran nuh ke yac 3,000 somlah ah, mwet pahluh Elijah el siyuck Elisha, suc srackna fuhsr, elan eklac mwet in kahsruh se lal. In pacl sac na Elisha el insese nuh kac, ac el oaru in oruh orekma na puhsisacl nuh sin mwet pahluh sac. (Luo Tokosra 3:11) Elijah el ahkpahyacl Elisha ke lusen yac ohnkohsr. Ac ke orekma lal Elijah fin acn Israel apkuhran in sahflah, el fahk nuh sin mwet in kahsruh se lal inge lah el kuh in tui ke kuhlwacnsap lal uh. Tuhsruhktuh, pacl tolu Elisha el fahk: “Nga ac fah tiac na som liki kom.” El tu na kuh muh el ac muhta na yurin mwet luti se lal inge. Jeova el ahkinsewowoye oaru lal Elisha ke el lwelah elan liye ke eng for se ma usacllah Elijah.—Luo Tokosra 2:1-12.
14. (a) Mwet lutlut ke pacl inge eltahl etahel Elisha fuhkah? (b) Efuh arlacna yohk srihpac sie mwet lutlut elan ahkkahlwemye oaru?
14 In oacna sie mwet lutlut, kom ac etahel Elisha fuhkah? Suhlahklahk sruokyac kain in kunohkohn nuhkewa, finne orekma na srihsrihk. Esam lah mwet luti lom uh kawuck se lom. Fahk nuh sel lah kom srui ma el oruh nuh sum an, ac ahkkahlwemye nuh sel lah kom ke tahfwelah na lutlut sel. Yohk liki nuhkewa, oaru in oruh kunohkohn kuh orekma lom uh. Efuh? Ke kom ahkpwacyeye lah kom oaru ac kuh in luhlahlfongiyuck, mwet elder uh ac kuh pac in luhlahlfongi lah Jeova el luhngse in puhseni kunohkohn lom ke congregation uh.—Psalm 101:6; riti Luo Timothy 2:2.
SUHNAKIHN MWET ELDER SUC PAH IN OREKMA
15, 16. (a) Ke inkacnek pucspucs fuhkah Elisha el ahkkahlwemye suhnak nuh sin mwet luti lal? (Liye petsac se meet ke mwe lutlut inge.) (b) Efuh mwet pahluh sahyac ah luhlahlfongel Elisha?
15 Ma suhmuhslah kacl Elisha uh oacyacpac ahkkahlwemye lah yohk srihpac mukul lili ke pacl inge in ahkkahlwemye suhnak nuh sin mwet elder suc pah in orekma. Tukun Elijah ac Elisha som muhtwacta yurin un mwet pahluh fin acn Jericho, eltahl tuhkuh nuh ke Infacl Jordan. Na, “el sahruhklah nuknuk lihk lal, luhmlah ac sang srihngihlyac kof ah. Na kof ah fahsrelihk.” Mukul luo inge fani ac fahsr sahslah Jordan ke acn paho, ac “eltahl fahsr na sramsram.” Elisha el arlacna lohacng ahkwoyac nuh ke ma nuhkewa suc mwet luti se lal inge fahk ac el tahfwelah na in lutlut sel. Elisha el tiac nuhnkuh muh el etuh ma nuhkewa. Na ke utucklac Elijah ke eng for na upac sac, Elisha el fohlohk nuh Infacl Jordan. Ke el muhta we el srihngihlyac kof ah ke nuknuk lal Elijah ah ac fahk: “El ayac LEUM GOD, God lal Elijah?” Na kof ah sifwil pacna fahsrelihk.—Luo Tokosra 2:8-14.
16 Yac kom akihlen mwenmwen se emeet lal Elisha ngacn lah pa pacna mwenmwen sahflah lal Elijah ah? Meac ma inge luti nuh sesr? Elisha el tiac puhla muh ke srihpen el pa kol ingena uh, el enenuh in oruh siena liki ma Elijah el oruh ah. Tuhsruhktuh, ke el ukwe inkacnek lal Elijah ah, el ahkkahlwemye lah el suhnakihn mwet luti se lal ah, ma kahsruh mwet pahluh ah in luhlahlfongel Elisha. (Luo Tokosra 2:15) Elisha el sie mwet pahluh ke lusen yac 60, ac Jeova el sang nuh sel kuh elan oruh mwenmwen yuh in puhs liki ma Elijah el oruh. Meac mwe lutlut ke pacl inge kuh in lotwelah kac?
17. (a) Mwet lutlut ke pacl inge ac etahi ke ohiyac lal Elisha fuhkah? (b) Ke pacl fal, Jeova el ac fah orekmakihn mwet lutlut oaru uh fuhkah?
17 Ke puhseni kunohkohn ma kom eis ke congregation uh, nimet nuhnkuh muh kom enenuh in oruh siena liki inkacnek ma orek in pacl meet ah. Esam lah, srihpac pwacnacng enenuh in oasr ekyek uh ma ke enenuh se suc oasr ke congregation kuh ke srihpen ma tuhkuh sin u luhn Jeova me. Kom tiac enenuh in ekuhllah kuhtwena ma ke srihpen kena lom in oruh. Ke Elisha el tahfwelah na orekmakihn inkacnek lal Elijah ah, el kahsruh mwet pahluh sahyac ah in luhlahlfongel ac el ahkkahlwemye suhnak nuh sin mwet luti se lal ah. Ke inkacnek se pacna inge, kom fin tahfwelah na in orekmakihn inkacnek luhn mwet luti lom suc tuhkuh ke Bible, kom ahkkahlwemye lah kom suhnakihn mwet elder suc pah tari ke kunohkohn la, ac mwet lili wiyom uh ac luhlahlfongi kom. (Riti Sie Corinth 4:17.) Ke kom kapkapack ac pah in orekma, kom fah orekmakihn ma eklac suc kuh in kahsruh congregation uh in ukwe u luhn Jeova, suc mukui pacl nuhkewa. Ac ke pacl fal, Jeova el ac fah kahsre kom in oruh orekma suc yohk liki mwet luti lom, oacna ke el oruh nuh sel Elisha.—John 14:12.
18. Efuh kuh yohk srihpac in ahkpahye mukul lili ke congregation uh?
18 Kuht puhruhe tuh kahs in kahsruh ke mwe lutlut se inge ac ke mwe lutlut tari ah in mokle mwet elder pucspucs in oraclah pacl in ahkpahye mukul lili uh. Ac kuht puhruhe tuh mukul lili uh eltahl in engan in ahkpahyeyuck ac in orekmakihn ma eltahl lotwelah uh in karihngihn mwet luhn Jeova uh. Mwe ahkpah uh ac fah ahkkweye congregation pucspucs fin facluh nohfohn ac fah oacyacpac kahsruh kais sie sesr in oaru na ke pacl in engan ke pacl fahsruh uh.
a Sie mukul lili fuhsr el fin ahkkahlwemye lah el etuh nuhnak ac el puhsisacl ac oasr yohrohl ohiyac sahyac ma enenweyuck in kuhlwacnsuhpuh congregation uh, sahp mwet elder uh ac kuh in oraclah recommendation elan srihsrngiyucki oacna sie mwet in kahsruh mwet elder, el finne soenna sun yac 20.—Sie Timothy 3:8-10, 12; liye Orekma Luhn Tohkohsrahi Lasr January 1, 2001, sra 3.
b Kom kuh in tuhkweni sruhmuhn mwe lutlut suc oasr ke The Watchtower ke April 15, 2012, sra 14-16, paragraph 8-13; ac “Keep Yourselves in God’s Love,” sapta 16, paragraph 1-3.