Yac Fototo Lom Nuh Sin Jeova uh Pwacye Sum?

1. Efuh kuht enenuh in karihngihn fototo lasr nuh sin Jeova in kuh?

KOM fin bacptaislac oacna sie Mwet Loh luhn Jeova, oasr yurum sie ma suc arlacna sacohk. Sie fototo na wowo yurin Jeova. Tuhsruhktuh fototo se lomtacl inge ahkkulukyeyuck ke facl lal Satan uh ac ma inge kuh pac in muhnahslah ke srihpen sesuwohs lasr sifacna. Pa inge srihpac pwacnacng kuht nuhkewa enenuh in karihngihn fototo lasr nuh sin Jeova in kuh pacl nuhkewa.

2. Meac kuht enenuh in oruh tuh fototo lasr nuh sin Jeova in kuhi?

² Yac Jeova el pwacye sum? Yac kom puhla muh el Kawuck se lom? Yac kom luhngse fototo lom nuh sel uh in kuhi liki meet ah? James 4:8 fahk lah meac kom enenuh in oruh: “Kowos in kaluckyang nuh yurin God, ac El ac fah apkuhranwot nuh yuruwos.” Kom fin oruh ma kom enenuh in oruh tuh kom in fototo nuh sin God, el ac fah oruh pac ip lal kac tuh el in fototo nuh sum. Kom fin oruh ma inge pacl nuhkewa, el ac fah pwacye sum, ac inmahsrlomtacl ac arlacna fototo ac kom fah puhla oacna ma Jesus el puhla ke el fahk muh: “El suc suhpweyucme El pwacyena . . . nga etwacl.” (John 7:28, 29) Tuhsruhktuh meac kuhtuh ma suc kom kuh in oruh tuh kom in fototo nuh sin Jeova?

3. Kuht ac sramsram fuhkah nuh sin Jeova, ac el nuh sesr?

³ Kom fin luhngse kaluckyang nuh yurin Jeova, arlacna yohk srihpac komtacl in sramsram pacl nuhkewa. Tuhsruhktuh kom ac oruh fuhkah? Koacl, nuhnkuh ke inkacnek in sramsram lom nuh sin sie kawuck suc muhta loes liki kom. Komtacl kuh in sihm nuh sin sie sin sie inkaiyen pacl uh ac sramsram ke telefon. Kom sramsram nuh sin Jeova ke kom puhruhe nuh sel pacl nuhkewa. (Riti Psalm 142:2.) Tuhsruhktuh fuhkah kom kuh in lwelah Jeova elan sramsram nuh sum? Ke kom riti kahs lal in Bible pacl nuhkewa, ac ke kom nuhnkuh kac. (Riti Isaiah 30:20, 21.) Kuht kuh in liye lah fuhkah sramsram inmahsrlom ac Jeova uh ac kuh in ahkkweye fototo lom nuh sel ac oruh elan Kawuck na pwacye se lom.

LWELAH JEOVA ELAN KAHSKAHS NUH SUM KE PACL SE KOM RIT BIBLE

4, 5. Jeova el kahskahs nuh sum fuhkah ke pacl se kom rit Bible? Sang sie mwe puhpuhlyuck ah.

⁴ Kuht etuh lah Bible uh pa kahs luhn God nuh sin mwet nuhkewa. Tuhsruhktuh, yac Bible uh kuh in kahsre kom in kaluckyang nuh sin Jeova? Ahok! Ke kom rit ac lutlut Bible pacl nuhkewa, lohacng ahkwoyac nuh ke puhlakihn lom ke ma kom riti uh. Ac nuhnkuh lah kom ac orekmakihn fuhkah ma kom lotwelah an. Ke kom oruh ouingacn, kom lwelah Jeova elan sramsram nuh sum. El eklac sie Kawuck na fototo suc kahsre kom, ac kom kaluckyang pac nuh yohrohl.​—Hebrew 4:12; James 1:23-25.

⁵ Ke sie mwe puhpuhlyuck, meac kom puhla ke kom riti kahs lal Jesus inge: “Nimet elohsack mwe kahsruhp nuh suwos fin facluh”? Kom fin sang kuhiyom kewa in fihlilyac Jeova meet liki ma nuhkewa in moul lom, kom ac fah puhla lah el insewowo na pwacye sum. Tuhsruhktuh sahp kom riti kahs lal Jesus inge ac akihlen lah kom enenuh in ahkfalye moul lom nuh ke kahs lal inge ac lohacng ahkwoyac nuh ke orekma in kuhlwacnsap lom nuh sin God yohk liki meet ah. Fin ouinge, na Jeova el kahsre kom in kahlwem ke ma kom kuh in oruh tuh kom in kaluckyang nuh yohrohl.​—Matthew 6:19, 20.

6, 7. (a) Ke pacl se kuht lutlut Bible uh, meac sikyak nuh ke luhngse lasr nuh sin Jeova ac ke luhngse lal nuh sesr? (b) Meac finsrak yohk lasr ke kuht lutlut Bible uh?

⁶ Pwacye lah ke pacl se kuht lutlut Bible uh kuht etwaclah ma kuht enenuh in ekuhllah tuh kuht in kuhlwacnsuhpuh Jeova wo liki meet ah. Kuht oacyacpac etwaclah ma wowo pucspucs el oruh suc ahkkahlwemye luhngse lal ac ohiyacl, suc oruh kuht luhngse el na pwacye. Ac ke luhngse lasr nuh sel uh yohkwelihk, luhngse lal nuh sesr uh yohkwelihk pac ac fototo lasr nuh sel uh kuhi liki meet ah.​—Riti Sie Corinth 8:3.

⁷ Kuht fin ke kaluckyang nuh yurin Jeova, arlacna yohk srihpac kuht in lutlut Bible ke srihpac wo. Jesus el fahk: “Ac kalmacn moul ma pahtpaht pa inge: in etwekom, God pwacye sefanna, ac in etuh Jesus Christ, suc kom suhpwacma.” (John 17:3) Kuht kuh in etwaclah ma sasuc pucspucs ac ma usrnguck ke pacl se kuht riti Bible uh, tuhsruhktuh finsrak yohk lasr uh pa in etwacllah na pwacye Jeova, oacna sie mwet kuht kuh in fototo nuh se.​—Riti Exodus 33:13; Psalm 25:4.

8. (a) Meac kuhtuh mwet uh kuh in nuhnkuh ke inkacnek ma Jeova el ahkkahlwemye nuh sel Tohkohsrah Azariah? (b) Kom fin etwacl Jeova, meac kom ac puhla ke ma el oruh uh?

⁸ Ke kuht etwacllah Jeova oacna sie Kawuck, kuht ac tiac elyah fin Bible uh tiac ahkuhtweyac srihpac pwacnacng el oruh sie ma. Ke sie mwe puhpuhlyuck, ke pacl se Tohkohsrah Azariah el kol acn Judah, mwet we ah alu nuh sin ma sruhloaclah. Azariah el tiac weluhltahl. “A el oruh ma wo ye muhtuhn Jeova.” (Luo Tokosra 15:1-5, BMK) Tuhsruhktuh, Jeova el kael Azariah ke mihsen lepa. Efuh? Tiac fwack ke sramsram inge lah efuh. Pwacnacng meac kom puhla ke ma Jeova el oruh inge? Yac kom elyah ke ma inge ac oruh kom in puhla muh Jeova el sesuwohs ke nuhnuhnkuh lal, muh wacngihn srihpac wo elan tuh kael Azariah? Moh. Kom fin etwacl Jeova na pwacye, kom ac etuh pac lah kaiyuck lal uh pwacye pacl nuhkewa. Pacl nuhkewa el kai “fal nuh ke ma suwohs.” (Jeremiah 30:11) Pwacnacng, kom finne nihkihn lah efuh Jeova el kael Azariah, kom kuh in luhlahlfongi na pwacye lah ma Jeova el oruh ah suwohs.

9. Kahs in ahkuhtweyac fuhkah kahsre kuht in kahlwem kac lah efuh Jeova el kael Azariah ke mas lepa?

⁹ Bible uh use nuh sesr kuhtuh pac mwe ahkuhtweyac ke moul lal Tohkohsrah Azariah, suc etweyuck pac muh Tohkohsrah Uzziah. (Luo Tokosra 15:7, 32) Sramsram soko ke Luo Chronicle 26:3-5 ac 16-21 fahk lah el oruh ma wo ye muhtuhn Jeova. Tuhsruhktuh, ma suhmuhslah inge fahk pac lah tok, “el inse fuhlwactyak, ac ma inge kohluhllah nuh ke muhsahllah.” Tohkohsrah se inge el srihke in oruh sie ma suc mwet tol muhkwena kuh in oruh. Mwet tol oalngucul sie fahk nuh sel lah el suhtuh ac eltahl srihke in tulokihnilyac. Ohiyac fuhkah el ahkkahlwemye? El tuh eklac inse fuhlwact na pwacye pwacnacng el foloyak seltahl. Kahs in ahkuhtweyac inge kahsre kuht in kahlwem kac lah efuh Jeova el kael Tohkohsrah ke mihsen lepa.

10. Efuh kuh kuht tiac enenuh in etuh srihpac nuhkewa luhn Jeova ke ma el oruh uh? Kuht ac luhlahlfongi fuhkah lah pacl nuhkewa Jeova el oruh ma wo?

¹⁰ Mwe lutlut yohk srihpac fuhkah kuht lotwelah uh? Ke mwe sramsram kacl Tohkohsrah Azariah, fal tari mwe ahkuhtweyac in kahsre kuht kahlwem kac lah efuh Jeova el kael. Tuhsruhktuh, ke pacl se Bible uh tiac use mwe ahkuhtweyac nuhkewa nuh sesr, meac kom ac fah oruh? Yac kom ac nuhnkuh fin pwacye lah wo kuh suwohs ma Jeova el oruh uh? Kuh yac kom ac puhla muh fal tari mwe ahkuhtweyac ke Bible uh kom in luhlahlfongi lah pacl nuhkewa God el oruh ma wo? (Deuteronomy 32:4) Ke kom ahkyohkye etuh lom kacl Jeova oacna sie Mwet, ac fah yohkwelihk pac luhngse ac luhlahlfongi lom nuh sel uh. Oacyacpac, kom ac tiac enenuh in etuh srihpac nuhkewa ke ma el oruh uh. Ke kom lutlut Bible uh, Jeova el ac eklac pwacye nuh sum liki meet ah ac kom ac fah fototo nuh sel.​—Psalm 77:12, 13.

KOM SRAMSRAM NUH SIN JEOVA KE PACL SE KOM PUHRUHE

11-13. Kom etuh fuhkah lah Jeova el lohng puhruhe uh? (Liye petsac se meet ke mwe lutlut inge.)

¹¹ Ke pacl se kuht puhruhe uh, kuht kaluckyang nuh yurin Jeova. Kuht kaksakuhnuhl, sang kuloh lasr, ac siyuck kahsruh lal. (Psalm 32:8) Tuhsruhktuh, kom fin luhngse in arlacna fototo inmahsrlom nuh sin Jeova, kom enenuh in luhlahlfongi na pwacye lah el lohng puhruhe uh.

¹² Kuhtuh mwet uh fahk muh God el tiac lohng puhruhe uh ac lah puhruhe uh sie ma suc oruh na in wolac puhla lom uh. Eltahl luhlahlfongi muh puhruhe uh mwe na kahsre kom in nuhnkaclah ahkwoyac ma upac lom ac in konwacack top nuh kac uh. Pwacye lah puhruhe uh ac kuh in kahsre kom ke inkacnek inge nuhkewa. Tuhsruhktuh ke kom sramsram nuh sin Jeova ke inkacnek luhn puhruhe, el lohng kom na pwacye. Efuh kuht kuh in luhlahlfongi ma inge?

¹³ Nuhnkuh ke ma inge: Meet liki Jesus el tuhkuh nuh facluh, el liye lah Jeova el topuk puhruhe luhn mwet kuhlwacnsap lal. Ke pacl se Jesus el muhta facluh, el puhruhe nuh sin Pahpah tuhmwacl inkuhsrao ke nuhnak ac puhlakihn lal uh. Ke sie pacl ah el tuh puhruhe fong na fohn se. (Luke 6:12; 22:40-46) Yac Jesus el ac oruh ma inge fin el etuh lah Jeova el tiac lohng na pwacye? Jesus el oacyacpac luti mwet tuhma lutlut lal ah in puhruhe nuh sin Jeova. Yac el ac oruh ma inge fin el etuh lah Jeova el tiac lohng puhruhe uh? Kahlwem lah Jesus el etuh lah Jeova el lohng na pwacye puhruhe uh. El fahk pac nuh sin Pahpah tuhmwacl ah: “Kom porongeyuc pacl nuhkewa.” Kuht kuh pac in luhlahlfongi lah Jeova el “lohng puhruhe lasr uh”.​—John 11:41, 42; Psalm 65:2.

14, 15. (a) Meac wo ke kuht fahk in arlac kahlwem ma kuht siyuck ke puhruhe lasr uh? (b) Puhruhe lal Kathy ah kahsrel fuhkah in kaluckyang nuh yurin Jeova?

¹⁴ Top nuh ke puhruhe lom uh sahp tiac kahlwem pacl nuhkewa. Tuhsruhktuh ke pacl se kom fahk arlac kahlwem ma kom siyuck ke puhruhe lom uh, kom fah liye top luhn Jeova uh arlac kahlwem, ac el fah ma na pwacye se sum. Kom fin fahk nuh sin Jeova fosrngah nuhkewa lom uh, el ac fah kaluckoht nuh yurum.

¹⁵ Ke sie mwe puhpuhlyuck, Kathy el kwacna som wi ke orekma in luti uh, tuhsruhktuh el tiacna arlac engankihn.a (Liye footnote.) El fahk muh: “Nga tuh sruhnga forfor. Nga sruhnga na pwacye.” Ke pacl se el sahflah ke orekma lal ah, mwet elder se ahkkweyacl elan regular pioneer. El fahk: “El use pac form ah nga in nwacklah. Nga sulaclah nga in pioneer, ac nga oacyacpac muhtwacwack puhruhe ke kais sie lwen tuh Jeova elan kahsreyuc tuh nga in luhngse wi forfor.” Yac Jeova el tohpohklah puhruhe lal uh? Tukun el pioneer ke lusen yac tolu, el fahk: “Ke nga kwacna wi ke orekma in luti ac lutlut sin muhtwacn lili wiyuck uh, nga kais kuhtuh na kapwack in sang ma loh. Mihsenge, nga luhngse na pwacye forfor uh. Yohk liki pacna, fototo luhk nuh sin Jeova uh kuh liki meet ah.” Puhruhe lal Kathy ah kahsrel elan kaluckyang nuh yurin Jeova.

ORUH IP KUNOM

16, 17. (a) Meac kuht enenuh in oruh kuht in tahfwelah na ahkkweye fototo lasr nuh sin Jeova uh? (b) Meac kuht ac fah sramsramkihn ke mwe lutlut se tok uh?

¹⁶ Kuht kuh in tahfwelah na kaluckyang nuh yurin Jeova nwe tok. Pwacnacng lwelah kuht in tahfwelah na lohngohl ke kuht lutlut Bible pacl nuhkewa. Ac lwelah kuht in tahfwelah na sramsram nuh sel ke inkacnek luhn puhruhe. Kuht fin oruh ma inge, fototo lasr nuh sin Jeova uh ac kuhi liki meet ah, ac ke kahsruh lal uh kuht ac fah kuh in muhtwacnglah mwe ongaiyac uh.

¹⁷ Tuhsruhktuh, kuht finne tahfwelah na puhruhe pacl nuhkewa, kuhtuh pacl uh kuht elyahlac ke ma upac suc kuht sun uh. Ke kain in pacl se inge, luhlahlfongi lasr nuh sin Jeova uh ac muhtwacwack in tuhlac. Kuht ac kuh in puhla muh Jeova el tiac lohng puhruhe lasr uh ac kuht muhtwacwack nuhnkuh fin kuht kawuck na pwacye lal. Kom fin muhtwacwack in puhla ouinge, meac kom ac kuh in oruh? Mwe lutlut se tok uh ac fah kahsre kom.