Su Ku In Moula Liki “Len Lun Jeova”?
“Yen met su fwa fwal nu sumwos in muta in moul mutal a sumwosmwos, in sano a tawi ke tuku lun len lun Jeova!”—2 PITER 3:11, 12.
JEOVA GOD el sulela inmaslon metu kutu met su e fwa ekla met usru yurin Mwen nutul, Jisus Kraist ke Togusrai in kosrao. (Rom 8:16, 17) Ke pal se ma elos srakna muta fwin fwalu, met Kristian akmusrala elos oru orekma wikin ngun a ku lal Elaija. (Luk 1:17) Ke me lutlut se meet, kut liye ma oanu sie inmaslon orekma lalos a orekma lal met palu Elaija. Tusruktu fuka orekma lun met palu su ayaola Elaija, met palu Elaisa?—1 Togusra 19:15, 16.
2 Menmen safla su Elaija el oru pa fwasrelik lun infwal Jordan ke pal se ma el poukye kofu ke nuknuk lik lal. Ma inge orala Elaija a Elaisa in alukela fwin fok pao. Ke elos alukela tari a fwasr nu liyen kutulap lun infwal, sie foru el wisla Elaija nu ke kutu an fwin fwalu. (Srike liye pok ke sra 15 su oasr sifwe “Elaija El Somwak nu ke Kain in Kosrao Fuka?”) Nuknuk lik lal Elaija putatla. Ke pal se ma Elaisa el orekmakin ma inge in poukye infwal Jordan, kof ka sifwil fwasrelik, oru lan sasla fwin fok pao. Menmen inge akkalemye la Elaisa el ekla met aolul Elaija ke orekma in akkeye alu paye fwin an Israel.—2 Togusra 2:6-15.
Oiye Mutal Yok Sripe
3 Century puspis somla tukun len lal Elaija a Elaisa, met sap Poul a met sap Piter elos kapsreni tuku lun “len lun Jeova” ke oasr tari lal Kraist a “kosrao sasu a fwalu sasu” ke pal fwasru. (2 Tessalonika 2:1, 2; 2 Piter 3:10-13) Tu in moula liki len lulap lun Jeova—ke pal se God el kunausla met lokwalok lal a molela met lal—kut enenu in suk Jeova a akkalemye oiye fwokpap a sumwosmwos. (Zefenaia 2:1-3) Tusruktu, oasr pa kutu oiye su kut ku in akilenyuk ke kut tuni ma sikyuk puspis su oasr ip lal met palu Elaisa.
4 Moniyuk ke orekma lun God arulanu yok sripe kut fwin lungse in moul ke “len lun Jeova.” Elaija a Elaisa elos kemwanu moniyuk ke orekma lun Jeova. Ke moniyuk lalos su oanu ou inge, met lula ke met akmusrala Kristian elos oru orekma mutal nu sin Jeova a elos kol ke orekma in luti ke peng mwo.a Mutamwauk ke infulwen 1930 kutu, elos kaifwe nu sin met nu kemwa su eis peng mwo lun Togusrai a oasr fwinsrak in moul ma patpat fwin fwalu in mwolela moul lalos nu sin Jeova a in baptaisla. (Mark 8:34; 1 Piter 3:21) Million puspis elos topuk nu ke kas in akkeye inge. Ke sie pal elos muta in losr in ngun a oanu mise in ma koluk, tusruktu elos ingenu etu ma paye lun God, a elos srukye fwinsrak in moul ma patpat ke sie paredais fwin fwalu, a moniyuk ke orekma lun Jeova. (Sam 37:29; Fwakyuk 21:3-5) Ke moniyuk lalos, akesrui, kulang, a kutu orekma mwo, elos sang mongle lulap nu sin ma wiel Kraist in ngun su srakna muta fwin fwalu—Mattu 25:31-46.
5 Elos oru orekma mwo nu sin “ma wiel” Kraist meyen met akmusrala inge elos met tumal lutlut lal su oasr fwinsrak in moula liki “len lun Jeova.” Sie seanyen ke mura lun Shunem arulanu akinsemwomwoyeyuk ke sripen elos kulang a mwo nu sel Elaisa a met kulansap lal. Wangin tulik nutin seanyen se inge, a mokul el matuo. Tusruktu, Elaisa el mwolela nu sin mutan Shunem inge la el e fwa isusla sie mwen, a ma inge el sikyuk na paye. Ke pal se ma tulik mokul inge el mise tukun yiu ekasr somla, Elaisa el tuku ke mura lun Shunem a akmoulyeyuk tulik mokul se inge. (2 Togusra 4:8-17, 32-37) Fuka sie me sang lulap pa inge su tuku ke orekma in akkalemye kulang nu sel Elaisa!
6 Inse pusisel eneneyuk nu sin sie met tu lan eis kas in kol su tuku ke Baibel sin “ma wiel” Kraist wikin fwinsrak in moula liki “len lun Jeova.” Met lulap ke solse lun an Syria su oasr leper pangpang Naaman el enenu in akkalemye inse pusisel tu lan loang nu ke kas in kaifwe lun tulik mutan Israel su muta in sruo, su fwakak nu sel lan som nu an Israel in sukok Elaisa. Elaisa el tianu tofwoki in loom in sonol Naaman, a el supwela na kas lal ou inge: “Fwala a yuyu in Jordan pal itkosr, a ikwom fwa sifwil tuku nu yurom; a kom fwa nasnas.” (2 Togusra 5:10) Ma inge akkoskosrokyel Naaman meyen el met lulap, tusruktu tok el akkalemye inse pusisel a el som nu ke infwal Jordan a yuyu pal itkosr, “a ikwel sifwil tuku oanu ikwen sie tulik fwusr a el nasnas.” (2 Togusra 5:14) Meet liki el folokla nu in loom sel, Naaman el sifwil fwafwasryesr a som folok nu an Samaria in akkalemye kulo lal nu sin met palu lun Jeova. Meyen el tia lungse in eis kutena me mol ke ku su tuku sin God, paenang Elaisa el tofwoki in osun nu sel Naaman tusruktu el tia eis kutena me sang lal. Naaman el pusisel in fwak nu sel Elaisa: “Tu ingela met kulansap lom el e fwa tia kisekin me kise furor ku me kise nu sin kutena God, a nu sin Jeova.”—2 Togusra 5:17.
7 Meyen elos inse pusisel in akos kas in kai su tuku ke Baibel sin met akmusrala, paenang million puspis sin met akinsemwomwoyeyuk misinge. Sayen ma inge, ke pal se ma elos akkalemye lalalfongi ke me kise lal Kraist, met inse pusisel inge aknasnasyeyuk tari in ngun. Elos ingenu insemwomwo in ekla kamwuk lun Jeova a Jisus Kraist. (Sam 15:1, 2; Luk 16:9) Oaru lalos nu sin God a ke orekma lal e fwa akinsemwomwoyeyuk ke pal se ma elos moleyukla liki kunausten ma patpat su apkurun in tuku nu sin met inse fulat, met koluk su srunga in auliyuk ke “len lun Jeova”.—Luk 13:24; 1 Jon 1:7.
“Su Met Wileik? Su?”
8 Elos nu kemwa su fwinsrak in moul ke “len lun Jeova” elos ouyepa enenu in akkalemye moniyuk in oru ma lungse mutal. Elaija el pulaik in akkalemye kunanela lun sou lal Togusra Ehab su lungse akmas a alu nu ke me srulela. (1 Togusra 21:17-26) Meet liki kunanela se inge tuku, met su aolul Elaija pangpang Elaisa el enenu meet in aksafyela kutu orekma su el sonna tari. (1 Togusra 19:15-17) Ke pal se ma pal lun Jeova tuku, Elaisa el sapkin nu sin met kulansap lal in som in akmusrala met kol lun solse inge Jehu, tu lan ekla togusra sasu lun Israel. Tukun el moswela sifwel Jehu ke oil, met kulansap lal Elaisa el fwak nu sel: “Jeova God lun Israel el fwak ou inge, Nga moswekomla togusra fwin met lun Jeova, aok fwin Israel. A kom fwa uniye loom sel Ehab leum lom, tu Nga fwa eis foloksak ke sran met kulansap luk met palu, a sran met kulansap lun Jeova nu kemwa ke paul Jesebel. Tu loom sel Ehab nu fon fwa wanginla.’ ” Kasra koluk inge Jesebel e fwa sisila nu ke kosro ngalngal a wangin met fwa puknilye.—2 Togusra 9:1-10.
9 Met lal Jehu elos akilen la arulanu paye akmusra se su orek a elos sulkakin el oanu togusra sasu lun Israel. In akkalemye moniyuk lal ke orekma, Jehu el silaklak in som nu an Jezreel in mutamwauk ke orekma lal in uniye met kol puspis ke alu lal Beal. Met se meet su su sun a ikori ke me pus lal pa tulik nutul Ehab, Togusra Jehoram. El illa liki siti in siyuk sel Jehu el fwin tuku ke misla. “Misla su, ke kosro lun nine kiom Jesebel, a susfwe lal puslanu?” Jehu el fwak. Na, el fwaksilye Jehoram ke inse ke me pus lal.—2 Togusra 9:22-24.
10 Mutan nu kemwa su sangeng sin God elos taran in tia etawi Jesebel ku kutena met su oanu el. (Fwakyuk 2:18-23) Ke pal se ma Jehu el sun an Jezreel, el nawela tari lumal tu lan kato ye mutun met. El ngetla ke windou, a paingnul ke kas in aksangeng, sie kas in akismakinyel ke ongoiye su sikyuk nu sel Zimri. [(2 Togusra 9:31)]El siyuk nu sin met kulansap lal: “Su met wileik? Su?” A luo ku tulo yunuk ngetla nu sel. Ya elos wilul Jehu? “Sisilla!” El fwak nu selos. Ke ma inge, elos tia alollo, elos sisella Jesebel nu ke windo. A orsu, longilye. Ke pal se ma elos tuku in puknilye, a elos tia konoiyuk sie ma a srin sifwel, a niel, a inpaul.’ Fuka sie akpayeyuk na paye pa inge ke kas lal Elaija. “Kosro ngalngal fwa kang ikwel Jesebel”!—2 Togusra 9:30-37.
Kasru ke Alu Paye Su Tuku ke Inse
11 Elos nu kemwa su fwinsrak in moula liki “len lun Jeova” a moul ma patpat fwin fwalu elos enenu in akkalemye kasru lalos na paye ke alu paye. Elos enenu in oanu Jehonadab, ku Jonadab, sie met su tia met Israel su alu nu sin Jeova. Ke pal se ma Jehu el tafwela in akpayeye kunokon lal ke moniyuk, na Jehonadab el lungse in akkalemye insese a kasru lal. Ke ma inge el illa in osun nu sin togusra sasu lun Israel, su kasrusr ke sariot som nu an Samaria in uniye ma lula ke sou lal Ehab. Ke pal se ma el liyel Jehonadab, Jehu el siyuk: “Ya insiom sumwos, oanu insiuk yurin insium?” Topuk sumwos lal Jehonadab moklel Jehu in sang paul nu sel a sulel Jehonadab in sroang nu ke sariot lal, a fwak: “Fwasru wi yu a liye moniyuk luk ke Jeova.” Wangin alollo lal, Jehonadab el eis me solsol in akkalemye insese a kasru lal nu sin met akmusrala su Jeova el pakiye oanu met suk foloksak.—2 Togusra 10:15-17.
12 Orekma in akkiye alu paye su tuku ke inse arulanu sumwos na paye, meyen Jeova el Met Orekutla a Ku Liki Ku, su oasr sumwos in eis alu nu sel mukena. El sapkin nu sin met Israel: “Nik kom oru nu sum kutena me srulela, ku kutena luman ma on in kosrao lung, ku ma on in fwalu ten, ku ma on in kof ye fwalu. Nik kom sifwanu epasr nu selos, ku orekma nu selos; tu Nga Jeova God lom sie God lemta.” (Exodus 20:4, 5) Elos nu kemwa su fwinsrak in moul ke “len lun Jeova” elos enenu in alu nu sel mukefwunnu, in oru ou inge in ngun a paye.” (Jon 4:23, 24) Elos enenu in tu ku ke alu paye, oanu Elaija, Elaisa, a Jehonadab.
13 Tukun kunanela lun sou lal Ehab nu fon, Togusra Jehu el oru kutu inkanek tu lan etu elos nu kemwa su alu nu sel Beal a tu lan ku in aksafyela alu kikiap inge fwin an Israel. (2 Togusra 10:18-28) Ke len inge, Togusra in kosrao, Jisus Kraist, pakiyuki tari in kunausla met lokwalok nu kemwa lun Jeova a in akfulatye sumwos lun God in kol. Oanu insiel Jehonadab su sumwos nu sel Jehu, “u lulap” ke “sip ngie” lal Jisus ke len inge elos enenu in akilen Kraist oanu Togusra Messaia ke insielos kemwa a elos enenu in akesrui nu sin ma wiel Kraist in ngun su srakna oasr fwin fwalu. (Fwakyuk 7:9, 10; Jon 10:16) Elos sang me akpayeye nu ke ma inge elos fwin orekmakin alu paye a wi epeis ke moniyuk ke orekma lun met Kristian, sang kas in sensen nu sin met lokwalok lun God ke “len lun Jeova” su futotoeni.”—Mattu 10:32, 33; Rom 10:9, 10.
Ma Sikyuk Yok Apkurun!
14 Jehu el orekma yok in aksafyela alu lal Beal fwin an Israel. Ke len lasr misinge, ke inkanek lun Jehu Lulap, Jisus Kraist, God el kunausla Babulon Lulap, alu kikiap nu kemwa. Kitin pal lula kut ku in liye akpayeye lun kas lun lipufon nu sel met sap Jon: “A ko siengoul kom liye, a kosro soko ingo, elos fwa srunga mutan kosro sa [Babulon Lulap] a elos fwa oru tu lan mukena muta, kuflofol, a elos fwa kangla ikwel, a fwa arulanu eskulak in e. Tu God el filiye insielos in oru lungse lal, a tu elos in nunuk siefwunnu, a in sang togusrai lalos nu sin kosro soko ingo, nu ke pal se e fwa akpayeyuk kas lun God.” (Fwakyuk 17:16, 17; 18:2-5) “Ko siengoul” el aoliyen met solse a kofwen me meun ye koko lun met kol lun politic su kol fwalu. Fwinne elos orek kosro in ngun nu ke Babulon Lulap, tusruktu pal lal futoto. U se inge lun politic fwin fwalu el e fwa kunausla alu kikiap nu kemwa, a “kosro soko”—United Nations—oasr ip yok lal ke “ko siengoul” fwin ke orekma in kunausella.b Fuka sie pal yok pa inge in sang kaksak nu sin Jeova!—Fwakyuk 19:1-6.
15 Tukun Togusra Jehu el oru orekma lal in kunausla alu lal Beal, sou nu kemwa in lom sel elos loang nu ke met lokwalok lun Israel ke politic. Togusra Jisus el oru pa ou inge. Ku lun politic el on na tukun kunanela lun alu kikiap su oanu alu lal Beal. Ye me purakak lal Setan su Devil, met lokwalok inge ke sumwos lun God in kol elos fwa tuyuk in orek meun a srike in kunausla u lun God fwin fwalu. (Ezekiel 38:14-16) Tusruktu Jeova el orekmakin Togusra Jisus Kraist in kunauselosla ke Armagedun, “meun lun len lulap lun God Ku Liki Ku,” in aksafyela orekma in akfulatye sumwos lun God in kol ke ma nu kemwa.—Fwakyuk 16:14, 16; 19:11-21; Ezekiel 38:18-23.
Kulansapu Wikin Moniyuk Su Oanu Moniyuk lal Elaisa
16 Nu ke na “len lun Jeova” el aksafyela akmwuk koluk nu kemwa lal Setan, met kulansap lun God elos enenu in akkalemye pulaik a moniyuk oanu Elaisa. Sayen orekma lal oanu met akluo lal Elaija, Elaisa el mukena oru orekma oanu met palu lun Jeova ke lusen yiu 50 kutu! A Elaisa el akkalemye moniyuk nu ke na saflaiyen moul loeloes lal. Meet liki el mise, tulik lun tulik nutul Jehu el muteta nu sel, enel pa Togusra Jehoash. Elaisa el sapkin nu sel in pusrik me pus lal ke windo. Pus el pusrukla, a Elaisa el fwak: “Pus in kutangla lun Jeova, aok pus in kutangla fwin Syria! Tu kom fwa uniye met Syria in Efek, nu ke pal kom kunauselosla.” Ke me siyuk lal Elaisa, Jehoash el fwakisye foko ke pus lal. Tusruktu el oru ou inge tia ke moniyuk, paenang pal tulo na. Ke ma inge Elaisa el fwak la, fwokin ma inge pa, kutangla tulo mukena pa etukyung nu sel Jehoash, a pa inge ma sikyuk na paye. (2 Togusra 13:14-19, 25) Togusra Jehoash el tia kunausla mutanfwal Syria nu ke “pal elos wanginla.”
17 Ke ma inge, ke sripen moniyuk lalos oanu moniyuk lal Elaisa, paenang met lula akmusrala elos kaifweung na ke meun lalos lain alu kikiap. Met su welultal su oasr fwinsrak in moul fwin fwalu elos oru pa ou inge. Sayen ma inge, met nu kemwa su fwinsrak in moula liki “len lun Jeova” elos kafweung na in srukye ke nunuk lalos kas moniyuk lal Elaisa su sapkinyuk in pakisye fwalu. Lela kut nu kemwa in wis pus lun ma paye a wilulos ke orekma in pakis—pal nu kemwa—aok, nu ke pal Jeova el fwak la orekma lasr welultal tari.
18 “Len lun Jeova” el aksafyela akmwuk koluk ke len lasr ke pal na futoto. Ke ma inge lela kut nu kemwa in mokleyuk ke kas in akkeye lal met sap Piter. “Ke ma inge, meyen ma inge nu kemwa fwa kunausyukla on inge,” Piter el fwak, “ yen met su fwa fwal nu sumwos in muta in moul mutal a sumwosmwos, in sano a tawi ke tuku lun len lun Jeova!” (2 Piter 3:11, 12) Fwin ip nu kemwa lun amwuk se inge kofwelik ke e lun mulat lun God su el akkalemye ke inkanek lal Jisus Kraist, elos mukena su oasr record mwo ke oiye a oru orekma mutal pa ku in kaengla liki. Nasnas ke mano a ikwe arulanu yok sripe. Wekunang lungse nu sin met tulan, su akkalemyeyuk ke pal se ma kut loang nu ke ma enenu lalos, yokna ke ma lun ngun ke inkanek lun orekma lun forfor lasr oanu met Kristian.
19 Ya kas a orekma lom oanu sie me akul tu elos in akilen kom oanu sie met kulansap moniyuk a oaru lun God? Fwin aok, kom ku in srukye fwinsrak lom in moula liki “len lun Jeova” a in moul ke sie fwalu sasu su God el mwolela. Aok, in moula liki saap pa inge experience lom kom fwin oru mwo nu sin ma wiel Kraist in ngun meyen elos met tumal lutlut lal, oanu seanyen se fwin an Shunem su akkalemye kulang nu sel Elaisa. Tu in moul, kom enenu in ouyepa oanu Naaman, su inse pusisel in akos kolyuk mutal a ekla met kulansap lun Jeova. Fwin oasr kena lom in moul ma patpat ke sie paredais fwin fwalu, na kom enenu in akkalemye kasru ke insiom kemwa ke alu paye, oanu Jehonadab el oru. Saap kom sie sin met kulansap oaru lun Jeova, su e fwa experience tok akpayeyen kas lal Jisus: “Fwasru, komwos met insemwomwo lun Papa tumuk, usrui togusrai su akola nu sumwos ke mutamweyen fwalu me.”—Mattu 25:34.
[Footnotes]
a Srike liye sapter 18 a 19 ke buk inge “Let Your Name Be Sanctified,” orekla sin Watchtower Bible and Tract Society of New York, Inc.
b Srike liye sra 254-6 lun Revelation—Its Grand Climax At Hand!, orekla sin Watchtower Bible and Tract Society of New York, Inc.
Fuka Kom Topuk?
◻ Mea kutu nu ke oiye puspis su eneneyuk tu in moula liki “len lun Jeova”?
◻ Kain in me srikasrak fuka akkalemyeyuk sin seanyen se fwin an Shunem in len lal Elaisa?
◻ Mea kut ku in lotela kel Naaman?
◻ Fuka kut ku in etawi me srikasrak lal Jehonadab?
◻ Fuka 2 Piter 3:11, 12 el orekma nu sesr?
[Study Questions]
1. Su oru orekma wikin ngun a ku lal Elaija?
2. (a) Mea menmen safla lal Elaija, a menmen se meet lal Elaisa? (b) Mea me akpayeye su akkalemye la Elaija el tia som nu in kosrao?
3. Mea Poul el Piter el fwak ke oasr tari lal Jisus a “len lun Jeova”?
4. Mea moniyuk el oru ke kulansap nu sin Jeova?
5. Efu arulanu yok sripe in oru orekma mwo nu sin “ma wiel” Jisus, a kain in me pupulyuk fuka oasr yurosr su tuku ke len lal Elaisa?
6, 7. Kain in me srikasrak fuka Naaman el orala, a mea ma inge el lungse in akkalemye fwin sie met el lungse in moula liki “len lun Jeova”?
8. (a) Elos nu kemwa su e fwa moula liki “len lun Jeova” elos enenu in akkalemye oiye fuka ke orekma in oru lungse lun God? (b) Kain in kunokon fuka etukyung nu sel Jehu? (c) Mea sikyuk nu sel Jesebel?
9, 10. Fuka kas lal Elaija akpayeye na paye ke ma sikyuk nu sel Jesebel?
11. Su Jehonadab, a fuka el akkalemye kasru ke alu paye?
12. Efu oasr sumwos lun Jeova in siyuk nu sin met in alu nu sel mukena?
13. Oanu inse sumwos lal Jehonadab’s nu sel Jehu, su met inge su akilen Togusra Messaia, a fuka elos akkalemye ou inge?
14. Mea pal fwasru lun alu kikiap?
15. Mea sikyuk ke pal se ma kaifweung in srike in kunausla u lun God fwin fwalu orekla?
16, 17. (a) Efu kut etu la Elaisa el moniyuk nu ke saflaiyen moul lal? (b) Mea kut enenu in oru ke pus lun ma paye?
18. Fuka kut topuk ke ma simusla in 2 Piter 3:11, 12?
19. Mea kut enenu in oru tu kut in moula liki “len lun Jeova”?