Mwet Elder, Meac Puhla Lom in Ahkpahye Mukul Lili uh?

1, 2. Meac mwet suc liyacacng congregation eltahl akihlen ke congregation pucspucs?

SIE mwet suc liyacacng congregation pucspucs el apkuhran in sahflah ke miting se lal yurin un mwet elder. El liyacltahl ac puhla luhngse yohk lal nuh sin mukul alken inge nuhkewa suc kuhtuh seltahl mahtuhoh tari ac kuh in pahpah se tuhmwacl. Tuhsruhktuh, oasr pac ma yohk srihpac se suc ahkkulukye nuhnak lal ah. El siyuck seltahl: “Mukul lili, meac komtacl oruh in ahkpahye mwet sahyac uh in ahkyohkye orekma in kuhlwacnsap laltahl ke congregation uh?” Mukul lili inge kewa etuh lah ke muhtwacta sahflah se luhn mwet liyacacng se inge, el ahkkweyacltahl in orekmakihn pacl yohk laltahl in ahkpahye mukul lili uh. Ke sahflahiyac ah, sie mwet elder el fahkwack lah: “In fahk na pwacye, arlac srihklac ma kuht oraclah.” Mwet elder nuhkewa sahyac ah insese.

² Kom fin sie mwet elder, sahp top lom an ac oacpacna. Mwet suc liyacacng congregation pucspucs uh eltahl akihlen lah elder pucspucs eltahl enenuh in sang pacl laltahl uh nuh sin mukul lili fuhsr ac mahtuh in sang ahkpah tuh eltahl in kahsruh ac karihngihn congregation uh. Tuhsruhktuh, arlacna upac ma inge in orek. Efuh?

3. (a) Bible uh ahkkahlwemye fuhkah lah yohk srihpac in ahkpahye mwet sahyac uh, ac efuh kuht nuhkewa enenuh in etuh ke mwe ahkpah se inge? (Liye footnote.) (b) Efuh upac nuh sin kuhtuh mwet elder uh in ahkpahye mwet sahyac?

³ Oacna sie mwet elder, kom etuh lah yohk srihpac in sang pacl nuh sin mukul lili suc eis mwe ahkpah.a (Liye footnote.) Kom etuh lah enenuh nuh ke mukul lili uh yohkwelihk, in kahsruh mwet ke congregation pucspucs in tu na kuh ke pacl inge ac in kahsruh congregation sasuc ke pacl fahsruh uh.(Riti Isaiah 60:22.) Bible uh fahk muh kom enenuh in “luti pac nuh sin mwet ngiac.” (Riti Luo Timothy 2:2.) Tuhsruhktuh, sahp upac in oraclah pacl nuh ke ma inge. Kom enenuh in lohacng nuh ke mwe enenuh luhn sucu lom ac orekma lom an. Kom oacyacpac enenuh in karihngihn mwe enenuh luhn congregation ac kuhtuh pac mwe elyah sahyac. Ke srihpen arlac puhs ac yohk orekma kuht enenuh in oruh, pwacnacng lwelah kuht in sruhmuhn lah efuh arlacna yohk srihpac nuh sum in sang pacl lom in ahkpahye mwet sahyac.

YOHK SRIHPAC IN AHKPAH

4. Meac sie srihpac ma kuh in oruh mwet elder in tiac sa oraclah mwe ahkpah?

⁴ Meac srihpac pwacnacng upac kuhtuh in oraclah pacl in ahkpahye mukul lili ke congregation uh? Sahp kuhtuh seltahl ac nuhnkuh muh: ‘Oasr ma yohk srihpac sahyac luhn congregation suc enenuh in karihngihnyuck meet. Nga fin tiac ahkpahye mwet sahyac ingena, congregation uh ac tiac ahkkulukyeyucklac.’ Yac kahs inge pwacye? Sahp pwacye oasr ma sahyac kom enenuh in lohacng nuh kac meet. Tuhsruhktuh, kom fin tiac suhlahklahk in sang mwe ahkpah nuh sin mukul lili, kom ac kuh in ahkngalye congregation uh.

5, 6. (a) Meac kuht kuh in lotwelah ke mwe puhpuhlyuck se ke mwet se ma oasr stosah soko okoacl ac el ac karihngihn fuhkah? (b) Kuht ac luhmahlah fuhkah ma inge nuh ke mwe ahkpah luhn congregation uh?

⁵ Nuhnkuh ke mwe puhpuhlyuck se inge. Sie mwet suc oasr stosah soko okoacl ac el enenuh in ahol oil kac ke kais kuhtuh pacl. Sahp oasr pacl el puhla muh yohk srihpac el in nwacna gas liki na in ayaol oil mweyen fin wacngihn koano, na stosah okoacl an ac tilac kuh in kahsruhsr. Sahp el nuhnkuh pac muh el finne kahfofolac in oruh ingena, el kuh in fah oruh tok. Sahyac pacna, stosah soko inge ac srackna orekma kuhtuh. Tuhsruhktuh ma inge mwe sensen. Mwet se inge fin tiac ahollah oil kac ke pacl el enenuh in oruh, stosah soko inge ac kuh in muhsahllah, finne tiac ke pacl na sa. Ke sahflahiyac uh, el ac enenuh in sislah pacl lal ac mani na yohk in ahkwoye stosah soko inge. Meac kuht lotwelah?

⁶ Mwet elder uh enenuh in suhlahklahk karihngihn mwe enenuh uh ac elyah uh ke pacl na sa. Eltahl fin tiac, congregation uh ac sun ma upac. Oacna ke mwet suc oasr stosah soko okoacl el enenuh in sang gas nuh kac ke kais kuhtuh pacl, mwet elder uh enenuh in “akihlen ma suc arlacna wo” ac yohk srihpac uh. (Philippi 1:10) Tuhsruhktuh, kuhtuh elder uh ac kahfofolac ke ma yohk srihpac sahyac nwe wacngihnlac pacl laltahl in ahkpahye mwet uh. Ma inge ac oacna elan pihlesruh in sang oil nuh ke stosah okoacl uh. Mwet elder uh fin tiac suhlahklahk in ahkpahye mukul lili se, sie pacl ac wacngihn mukul lili ke congregation suc pah in karihngihn mwe enenuh nuhkewa.

7. Meac nuhnak lasr ke mwet elder suc oraclah pacl in sang mwe ahkpah?

⁷ Pwacnacng nimet nuhnkuh muh tiac yohk srihpen ahkpah uh. Mwet elder ma suk ma wo nuh sin congregation ke pacl fahsruh uh pa orekmakihn pacl laltahl in ahkpahye mwet sahyac uh. Eltahl inge pa mwet kuhlwacnsap lahlmwetmwet ac arlacna sacohk sin mwet lili wiyacltahl uh. (Riti Sie Peter 4:10.) Ma wo fuhkah congregation uh kuh in eis kac?

OREKMAKIHN PACL KE INKACNEK WO

8. (a) Srihpac fuhkah pwacnacng mwet elder uh enenuh in ahkpahye mwet sahyac uh? (b) Kunohkohn yohk srihpac fuhkah ituckyang nuh sin mwet elder suc oruh orekma in kuhlwacnsap laltahl ke acn ma enenuh uh yohk we? (Liye pohk se inge “Sie Kunohkohn Na Yohk Enenweyac.”)

⁸ Mwet elder ma arlac pah tari, eltahl enenuh pac in puhsisacl ac kahlwem kac ke eltahl mahtuhoh, eltahl ac tiac kuh in oruh oacna ma eltahl kuh in oruh ingena. (Micah 6:8) Oacyacpac, mwet elder uh enenuh in etuh lah “pacl ac ma sikyak” uh kuh in oruh upac nuh seltahl in ahkpwacyeye ma kunacltahl ke congregation uh. (Ecclesiastes 9:11, 12, BMK; James 4:13, 14) Pwacnacng, ke srihpen eltahl luhngse ac nuhnkuh ke mwet luhn Jeova uh, mwet elder uh kwacfeacng na in luti mukul lili fuhsr ke ma eltahl lotwelah ke lusen yac pucspucs.​—Riti Psalm 71:17, 18.

9. Ma fuhkah nuh ke pacl fahsruh uh oruh yohk srihpac in sang ahkpah?

⁹ Mwet elder ma ahkpahye mwet sahyac uh eltahl sacohk, mweyen kwacfeacng laltahl uh ac ahkkweye congregation uh. Ahkpah inge kahsruh mukul lili pucspucs eltahl in ahkolah kahsruh congregation uh in inse sefanna ac oaru nuh sin God. Ma inge arlac yohk srihpac ke lwen sahflah inge, ac fah oacyacpac yohk srihpac nuh ke lwen in ongaiyac luhlahp uh. (Ezekiel 38:10-12; Micah 5:5, 6) Pwacnacng, mwet elder, nuhnak muhnahs oraclah pacl in ahkpahye mwet sahyac, muhtwacwack mihsengelac.

10. Meac sie mwet elder el ac enenuh in oruh tuh in oasr pacl lal in sang mwe ahkpah nuh sin mwet sahyac?

¹⁰ Kuht kahlwem kac tari lah puhkantwen orekma lom ke srihpen kom karihngihn kunohkohn na yohk srihpac pucspucs luhn congregation. Pwacnacng, sahp kom enenuh in orekmakihn kuhtuh pacl in oruh kunohkohn lom ingacn in sang mwe ahkpah. (Ecclesiastes 3:1) In oruh ouinge, kom orekmakihn pacl lom ke inkacnek wo, ac ma inge ac wo nuh sin congregation ke pacl fahsruh uh.

AHKOLAH INKACNEK WO AC FAL

11. (a) Ke kain in acn pucspucs, ma wo fuhkah kuht kuh in konwacack ke kahs in kahsruh ma oreklac ke mwe ahkpah sin mwet elder inge? (b) Fal nuh ke Soakas 15:22, efuh kuh yohk srihpac in sramsramkihnyuck kahs in kahsruh inge sin mwet elder sahyac?

¹¹ Ke kuhtuh pacl somlah ah, siyuckyuck sin mwet elder ekahsr suc pah in sang ahkpah nuh sin mukul lili in ahkyohkye orekma laltahl ke congregation, lah eltahl oruh ma inge fuhkah. b (Liye footnote.) Mwet elder nuhkewa eltahl fahk kahs in kahsruh sefanna finne ohiyacn moul luhn kais sie seltahl tiac oacna sie. Meac ma inge ahkpwacyeye? Lah mwe ahkpah suc fal nuh ke Bible uh yohk srihpac nuh sin mukul lili ke “church [“congregation,” NW] nuhkewa yen nuhkewa.” (Sie Corinth 4:17) Pwacnacng ke mwe lutlut se inge ac mwe lutlut tok uh, kuht ac fah sruhmuhn ke kuhtuh kahs in kahsruh ma mwet elder inge eltahl fahk uh. (Soakas 15:22) Mwet elder ma sang ahkpah inge ac fah pahngpahng mwet luti ac mukul lili ma eis ahkpah inge ac fah pahngpahng mwet lutlut.

12. Meac sie mwet luti el enenuh in oraclah, ac efuh?

¹² Ma se meet, sie mwet luti el enenuh in ahkolah inkacnek wo ac fal. Efuh kuh ma inge yohk srihpac? Oacna ke sie mwet imac el enenuh in ahkolah fohk uh meet liki el yukwiyac fihtac uh, sie mwet luti el enenuh in ahkolah insiacn mwet lutlut meet liki el kuh in lotel ke kuhtuh ma sasuc ah. Pwacnacng, ac fuhkah mwet luti se el in ahkolah inkacnek wo ac fal nuh ke mwe ahkpah? El kuh in etahi mwe srihkasrak luhn sie mwet pah in luti ke pacl meet ah, mwet pahluh Samuel.

13-15. (a) Meac Jeova el fahk nuh sel Samuel elan oruh? (b) Samuel el ahkoellah Saul fuhkah nuh ke kunohkohn sasuc se inge? (Liye petsac se meet ke mwe lutlut inge) (c) Efuh kuh ma suhmuhslah in Bible kacl Samuel inge sacohk nuh sin mwet elder uh?

¹³ Ke yac 3,000 kuhtuh somlah ah, Jeova el fahk nuh sel mwet pahluh Samuel, suc mahtuhoh tari: “Ke ao se inge lutu, nga ac fah suhpwacoht sie mukul suc ma in sruf lal Benjamin. Kom fah mosrwellah tuh elan mwet kol luhn mwet Israel, mwet luhk.” (Sie Samuel 9:15, 16) Samuel el etuh tari lah el ac tilac kol muhtuhnfacl Israel, ac lah Jeova el ke elan mosrwelah sie mwet kol sasuc. Pwacnacng in ahkolah mukul se inge nuh ke kunohkohn sasuc lal, Samuel el nuhnkeack ma se ac oraclah oakwuck nuh kac.

¹⁴ Ke lwen tohkoh ah, Samuel el ohsun nuh sel Saul, ac Jeova el fahk nuh sin mwet pahluh sac: “El inge!” Ke pacl sac na, Samuel el ahkfahsrye oakwuck lal ah. El oraclah sie pacl na wo tuh elan sramsram nuh sel Saul. Samuel el solwacl Saul ac mwet kuhlwacnsap lal in weluhl mongo ac el sang acn in muhta ma wo emeet ac ikoac ma yuc emeet. Samuel el fahk: “Mongo, tuh nuh ke pacl se pakiyucki ma inge sruokyucki nuh sum.” Tukun tari mongo laltahl ah, Samuel el solwacl Saul nuh in lohm sel ah. Ke eltahl fahsr som nuh we, eltahl engankihn sramsram laltahl ah. Ke eltahl sun lohm sel Samuel ah, eltahl fanyak nwe fin lohm sac, ac Samuel el “kahskahs nuh sel Saul fin mahngon lohm se” nwe ke pacl in mutul laltahl. Ke lwen tok ah, Samuel el mosrwellah Saul, ngokyac muhtahl, ac sang kahs in luti nuh sel. Na, Saul el som ac ahkolah nuh ke ma ac fah sikyak tohkoh an.​—Sie Samuel 9:17-27, BMK; 10:1.

¹⁵ Samuel el mosrwellah Saul tuh el in mwet kol ke sie muhtuhnfacl. Pwacye lah ma inge arlacna siena liki mwe ahkpah nuh sin sie mukul lili in eklac mwet elder kuh mwet kahsruh mwet elder ke congregation uh. Tuhsruhktuh, mwet elder uh kuh in lotwelah ma yohk srihpac pucspucs ke inkacnek ma Samuel el ahkoellah Saul nuh kac. Kuht kuh in sruhmuhn luo sin ma inge.

MWET LUTI ENGAN AC KAWUCK WO

16. (a) Meac Samuel el puhla ke mwet Israel ah siyuck ke sie tohkohsrah ah? (b) Meac Samuel el puhla ke Jeova el fahk nuh sel elan mosrwellah Saul ah?

¹⁶ Engan in oruh ac tiac tahfuh luo. Ke Samuel el tuhfahna lohngack lah mwet Israel eltahl ke sie mwet ah in tohkohsrah laltahl, el puhlakihn ahsor ac pihlesreyuck el. (Sie Samuel 8:4-8) Pacl tolu Jeova el fahk nuh sel el in lohng mwet uh, mweyen Samuel el sruhnga sang sie tohkohsrah ah laltahl. (Sie Samuel 8:7, 9, 22) Samuel el finne puhla ma inge, el tiac sok kuh kasrkuhsrak sin mukul se suc ac fah muh aholuhl oacna sie mwet kol. Ke Jeova el fahk nuh sel elan mosrwellah Saul, Samuel el tiac na tahfuh luo. El engan in ahkos ac tiac ke na srihpen el enenuh in oruh, tuhsruhktuh ke srihpen el luhngse Jeova.

17. Mwet elder ke pacl inge uh etahel Samuel fuhkah, ac mwe insewowo fuhkah ma inge sang nuh seltahl?

¹⁷ Ke pacl lasr inge uh, puhs mwet elder ma pah tari suc etahi inkacnek kuhlwacng lal Samuel in ahkpahye kuhtuh pac mwet sahyac. (Sie Peter 5:2) Mwet elder na kuhlwacng inge engan in luti mwet sahyac ac tiac sahngweng in sang kuhtuh kunohkohn wo laltahl ke congregation uh nuh sin mwet lutlut. Tuhsruhktuh, eltahl puhla muh mukul lili suc ‘weluhltahl orekma’ inge arlacna sacohk ac kuh in kahsreltahl karihngihn mwe enenuh luhn congregation uh. (Luo Corinth 1:24; Hebrew 13:16) Mwet elder inge tiac nuhnkuh kacltahl sifacna, a eltahl engan in liye ke mwet lutlut inge orekmakihn kuh laltahl in kahsruh mwet luhn Jeova uh.—Orekma 20:35.

18, 19. Mwet elder se ac ahkolah fuhkah insiacn sie mwet lutlut nuh ke mwe ahkpah, ac efuh yohk srihpen ma inge?

¹⁸ Oacna sie mwet kawuck, ac tiac mwet luti se na. Ke pacl se Samuel el ohsun nuh sel Saul, el kuh in mosrwellah oacna sie tohkohsrah ac okwacacng oil nuh fin sifacl ke pacl sac na. In muh tohkohsrah sasuc se inge akmuhsralah, tuhsruhktuh el ac tiac ahkolah wo in kol mwet luhn God. Pwacnacng, Samuel el sang pacl yohk in ahkoelah Saul nuh ke kunohkohn sasuc se lal ingacn. Meet liki el mosrwellah Saul ah, eltahl tuhkweni mongo, fahsr, sramsram ke lusen pacl na loes, ac oacyacpac tuhkweni monglac. Samuel el sano pacl fal elan ahkmuhsraelah tohkohsrah sasuc se inge.

¹⁹ Pwacye pac ma inge nuh ke pacl lasr uh. Sie mwet elder el enenuh in kwacfeacng in kawuck nuh sin mwet lutlut se meet liki el muhtwacwack in ahkpahye mwet sahyac. Ma sie mwet elder el oruh tuh mwet lutlut se in pah ac fototo nuh sel fah tiac oacna sie pacl nuhkewa, a ac fal nuh ke ohiyac ac facsin laltahl. Tuhsruhktuh, yen nuhkewa kom muhta we, kom fin orekmakihn pacl lom in wi mwet lutlut se, kom finne kahfofo, el ac etuh lah el yohk srihpac nuh sum. (Riti Rome 12:10.) Pwacye lah mwet lutlut uh ac srui na pwacye ke luhngse ac pacl ma kom sang nuh seltahl uh.

20, 21. (a) Kom ac ahkuhtweyac fuhkah sie mwet luti wo? (b) Meac kuht ac fah sramsramkihn ke mwe lutlut se tok uh?

²⁰ Ma na pwacye se lah sie mwet luti wo el luhngse in ahkpahye mwet sahyac. Oacyacpac el enenuh pac in luhngse mwet ma el ahkpahye uh. (Liye pac John 5:20.) Efuh ma inge yohk srihpac? Mweyen, fin sie mwet lutlut el puhla lah kom arlacna nuhnkacl, el ac engan in lutlut sum. Pwacnacng mwet elder, komtacl kwacfeacng in luti ac oacyacpac in sie mwet kawuck wo.—Soakas 17:17; John 15:15.

²¹ Tukun sie mwet elder el ahkoelah insiacn sie mwet lutlut, na el tuhfah kuh in muhtwacwack ahkpahyacl. Meac kuhtuh inkacnek suc mwet elder uh kuh in orekmakihn? Ma inge ac fah sramsramkihnyuck ke mwe lutlut se tok uh.