Oakwuck Sasuc Luo Nuhke Orekma in Fahkwack Pweng Wo nuh sin Mwet Nuhkewa
1. Mwe srihkasrak fuhkah Kihristin in pacl meet ah oruh?
1 Kihristin in pacl meet ah elos oruh yohk liki na in forfor ke sie lohm nuhke sie lohm. Elos forfor pac, ke acn ma mwet uh oasr we. (Orekma 20:20) Ke sie mwe puhpuhlyuhk, elos som nuhke tempuhl, acn ma elos etuh lah mwet pucspucs ac oasr we. (Orekma 5:42) Ke pacl se el oasr Athens, mwet sap Paul el forfor lwen nuhkewa nuh sin mwet ke acn in tuhkweni ke siti uh. (Orekma 17:17) In pacl inge, inkacnek se emeet kuht fahkwelik ke pweng wo pa in som nuhke sie lohm nuhke sie lohm. Tuhsruhktuh, kuht som pac nuhke acn ma stosah oasr we, acn in pisnis, acn ma mwet uh muhtwacta we, inkacnek luhlahp ma mwet uh kwacna fahsr we, ac kuhtuh pac acn sahyac in konacack mwet kuht in forfor nuh se. Fwinne kacfweyuck mwet forfor nuhkewa in wi orekma in fahkwack pweng wo nuh sin mwet nuhkewa, mwet pucspucs ac wi is pacl wowo in wi oruh orekma se inge ke oakwuck sasuc luo.
2. Orekma sasuc fuhkah se muhtwacwacack ke Nohfuhmpuh 2011?
2 Fahkwack Pweng Wo In Siti Luhlahp: Oacna ma fwackyuck ke puk luhn Yearbook yac 2013 in sra 16 ac 17, sie oakwuck sasuc nuhke fahkwack pweng wo nuh sin mwet nuhkewa muhtwacwacack ke siti luhn New York ke Nohfuhmpuh 2011. Elos orekmakihn tepuh kuh nien puk in ahkkahlwemye wo mwe rit ke kain in kahs. Ma inge fihliyucki ke acn wo ke siti uh ke acn ma mwet pucspucs elos fahsr we. Ke kais sie lwen, mwet tausin elos fahsr ke acn inge, wekuhnacng elos suc muhta in lohm ma moliyuck ac mwet suc tiac kwacna muhta in lohm selos. Sahflahiyen ma inge, mwet puhkantwen elos luhngse in riti mwe rit inge. Ke mahlwem se ma tuhfahna tari ah, mackuhsin 3,797 ac puk 7,986 kihtakatlah. Mwet pucspucs suc ahluhkelah acn sac, elos siyuck in lutlut Bible. Ke srihpen orekma se inge orek in muh muhtwacwacack lutlut Bible yurin mwet uh, kuhtwena address ma mwet uh use ac sa na suhpweyucklac nuhke congregation ma fal in som nuh yurin mwet sac.
3. Orekma sasuc se inge ahkyohkyeyuck fuhkah?
3 Ke srihpen orekma se inge kapwack wo, ingena orekma se inge ahkyohkyeyuck fin facluh nohfohn nuhke siti luhlahp suc puhs mwet muhta kac. Ohfuhs luhn Mwet Loh luhn Jeova ke acn sac, fah fwahk ma yac siti ac wo in is kahsruh. Inkaiyen siti inge puhs mwet fahsr we ke srihpen oasr acn in wiwac mwet kuh ohfuhs pucspucs kuh lohm ma mwet uh moli pwacnacng puhkantwen mwet fahsr ke acn inge. Tokin ma inge, ohfuhs fah suhmuhslah lwacta nuh sin congregation suc ac wi orekma se inge ac sang pac oakwuck sahyac. Regular ac special pioneer pa kwacna orekmakihnyuck, tuhsruhktuh ke kuhtuh acn uh, auxiliary pioneer kuh pac in wi oruh orekma se inge.
4. Orekma in fahkwack pweng wo in siti luhlahp uh orek fuhkah?
4 Orekma Se Inge Orek Fuhkah: Elos suc ac wi orekma in fahkwack pweng wo in siti luhlahp ac soano mwet uh in tuhkuh nuhke tepuh kuh acn in ahkkahlwemye mwe rit ah. Ke pacl se mwet se ac tuhkuh nuhke tepuh, ac suliyuck el in is kuhtwena mwe rit suc el luhngse in riti. Pioneer uh ac engan in orekmakihn Bible in topuk kuhtwena kihsen siyuck luhn mwet sac. El fwin is mwe rit, pioneer ah ac tiac fwahk lah oasr oakwuck in sang mwe kahsruh. Tuhsruhktuh, el fwin siyuck lah orekma se inge is kahsruh fuhkah ke mani, elos kuh in ahkuhtweyac lah kahsruh ke mani lal kuh in suhpweyucklac nuh sie sin address ma sihmlac ke mwe rit sac. Fwin kuh, elos ac siyuck: “Kom luhngse sie mwet in muhtwacta nuhke lohm sum?” kuh “Kom etuh lah wekuhnacng mwe rit se ingacn, oasr lutlut ke Bible suc muhta orek ke wacngihn molo?”
5. In oruh orekma se inge sang fuhkah mwe insewowo nuh sin sie siyacnyacn?
5 In wi oruh orekma se inge use mwe insewowo na pwacye. Siyacnyacn se suhmuhslah ma inge: “In tu ke tepuh sac ac liye mwet tausin pucspucs fahsr ke kais sie lwen mokle insiacsr ke orekma yohk se inge ma orek in sun mwet nuhkewa fwin facluh. In liye pisen mwet inge ac nuhnkuh ke ohiyen Jeova el nuhnkuh na pwacye ke kais sie mwet inge, ahkkweye kuht in sulaclah in tahfwelah na fihliyac orekma in forfor pa in yohk srihpac emeet in moul lasr. Kuht petsacelah ma Jeova el tuni insien mwet nuhkewa suc ahluhkelah tepuh sac, ac suk elos suc fal in etacl. Pa inge kais kuhtuh pacl ma kuht puhla lah kuht fototo nuh sin lipufacn suc wi kuht oruh orekma se inge.”
6. (a) Piyac pac sie oakwuck sasuc in fahkwack pweng wo suc oakiyucki sin congregation pucspucs? Ac ma inge siena fuhkah liki oakwuck in fahkwack pweng wo in siti luhlahp? (b) Congregation uh kuh in ahkacsruheni fuhkah ke pacl se elos wi oruh orekma in fahkwack pweng wo nuh sin mwet nuhkewa?
6 Fahkwack Pweng Wo Ke Acn Lowos: Wekuhnacng fahkwack pweng wo in siti luhlahp, oasr pac sie oakwuck sasuc sahyac ma oreklac sin u luhn mwet elder pucspucs ke acn in forfor lalos. Ke inkacnek sasuc se inge, mwet forfor uh ac orekmakihn tepuh se kuh mwe ahkkahlwemye mwe rit ke sie acn ma puhkantwen mwet we ke acn in forfor lalos. Ma inge siena liki orekma in fahkwack ke siti luhlahp, ke srihpen orekmakihnyuck mwet kahsruh ke congregation pucspucs in forfor ke acn se na suc oasr mwet pucspucs ke siti ma suleyucklac sin ohfuhs lasr.—Liyac pohk se inge, “Akacsruhi Wo Eneneyuck.”
7. Ke acn ma fal, elder uh ac oakiyac fuhkah orekma in fahkwack pweng wo ke acn lalos?
7 Elder uh pa ac liye fwin oasr acn in forfor luhn congregation suc mwet pucspucs kwacna fahsr we ac sulaclah fwin ac fal in oakiyac orekma in fahkwack pweng wo nuh sin mwet nuhkewa. Kuhtuh acn ma wo in fihliyac sie tepuh kuh mwe ahkkahlwemye mwe rit uh pa acn inge: Acn in wiwac mwet, acn ma puhkantwen mwet kwacna muhta we, acn in muhtwacta, inkacnek ma mwet kwacna fahsr we, stoh, acn in lutlut luhn college, acn in oaksohk ac acn ma mwet uh kwacna oruh mwe ahkfuhlwact ke kais sie yac. Oasr ma wo tuhkuh ke sie tepuh ma oakiyucki ke acn sefanna, ke kain in lwen sefanna, ac ke kain in ao sefanna. Konweyuckyak lah in fihliyac sie tepuh ke lohm se suc puhs stoh lac wo liki na in fihliyac ke sie stoh luhlahp. Mweyen mwet uh ac nuhnkuh na ke meac elos ac oruh ke elos som nuhke stoh sac. Kuhtuh acn suc oacna acn in fahsr ma puhs mwet fahsr kac, ac sahp wo in orekmakihn sie mwe ahkkahlwemye mwe rit ma srihk. Elder uh kuh in download kuhfwen orekma ke Web site lasr in oruh mwe ahkkahlwemye mackuhsin luhn Watchtower ac Awake! ac puk in Baibel El Luti. Ma inge, orekmakihnyuck ke oakwuck se inge in fahkwack pweng wo nuh sin mwet nuhkewa. Elos suc ac wi orekma se inge ac oruh oacna elos suc wi fahkwack pweng wo in siti luhlahp ac elos enenuh in orekmakihn oakwuck nuhkewa sin mwet liyacng orekma luhn luti. Elos fwin is address sin sie mwet suc luhngse lohng suc tiac muhta ke acn in forfor lalos, elos enenuh in sa nwacklah pwepuh in Please Follow Up (S-43) ac sang nuh sin sackractacri.
8. Fwin wacngihn oakwuck luhn congregation in oruh orekma in fahkwack pweng wo nuh sin mwet nuhkewa, pacl wo fuhkah srackna oasr in oruh ma inge?
8 Orekma in Fahkwack Pweng Wo Ke Pacl In Forfor Lom Sifacna: Kuhtuh sin congregation uh sahp wacngihn acn ma puhkantwen mwet kwacna fahsr we ke acn in forfor lalos elos in kuh in fihliyac sie tepuh kuh mwe ahkkahlwemye mwe rit. Tuhsruhktuh, kacfweyuck mwet forfor in congregation inge, elos in wi oruh orekma in fahkwack pweng wo nuh sin mwet nuhkewa ke pacl in forfor lalos sifacna. Yac oasr acn in moul, kuh stoh ma kahfofo ke acn in forfor lom? Oasr acn in muhtwacta kuh acn ma mwet uh kwacna toeni we? Oasr kain in acn ma mwet uh kwacna oruh mwe ahkfuhlwact lalos we ke acn in forfor lom? Fwin ouinge, kom srackna kuh in wi oruh orekma in fahkwack pweng wo nuh sin mwet nuhkewa.
9. Efuh kuht enenuh in kacfweacng nuhnkuh in forfor ke acn ma kuht kuh in konacack mwet uh we?
9 Luhngse luhn Jeova pa, “mwet e nukewa in moliyukla ac in ku in etu ke ma pwaye.” (1 Timothy 2:4) Pwacnacng, kuht kacfweacng in sun mwet nuhkewa ke pweng wo luhn Tohkohsrahi meet liki sahflah tuhkuh. (Matthew 24:14) Ke acn pucspucs, upac in konacack mwet in lohm selos. Tuhsruhktuh, kuht kuh in sahp sramsram nuh selos ke pacl se elos wacngihn in lohm selos ac elos oasr ke acn ma mwet pucspucs oasr we. Sahp orekma in fahkwack pweng wo nuh sin mwet nuhkewa pa inkacnek sefanna ma kuhtuh mwet uh ac kuh in is pacl wo in lohng pweng wo. Pwacnacng, kuht in ahkpwacyeye na pwacye orekma in forfor lasr ke kuht kacfweacng in forfor ke acn ma mwet uh oasr we.—2 Timothy 4:5.
[Petsac ke sra 5]
Akacsruhi Wo Eneneyuck
Oasr ripohrt ma ahkkahlwemye lah oasr mwet forfor ke congregation suc apkuhran nuh sin sie sin sie, elos oruh orekma in fahkwack pweng wo nuh sin mwet nuhkewa ke elos kalweni in som nuhke inkacnek sena, acn in stosah sena, ac ke acn in pisnis sena kuh acn in wiwac mwet sena. Mwet forfor ke kais sie congregation inge, elos tuhkweni na fihliyac mackuhsin ke acn in soano mwet, acn in owo ac elos tuhkweni na forfor nuh sin pisnis ke acn sefanna. Ma inge oruh mwet in pisnis uh ac mwet ke acn sac in foloyak kuhtuh pacl uh, fwinne mwet forfor ah tiac forfor ke pacl sefanna. Ke srihpac se inge, ac wo in orekma na ke acn in forfor luhn congregation lowos ke pacl se kom oruh orekma in fahkwack pweng wo nuh sin mwet nuhkewa.
Fwin mwet forfor uh ke orekma ke acn in forfor ma puhkantwen mwet we tuhsruhktuh ma luhn congregation sahyac, elos enenuh in sramsram nuh sin mwet liyacng orekma luhn luti. Mwet liyacng sac kuh in sramsram nuh sin mwet liyacng ke congregation se sahyac ah in is sukohsohk meet liki congregation lal som nuhke acn sac. Ke acn in forfor ma oasr congregation suc orekmakihn kain in kahs, mwet liyacng ke congregation inge enenuh in sramsram nuh sin sie sin sie mweyen mwet ke acn sac in tiac foloyak. Fwin oasr akacsruhi wo, ma nuhkewa kuh in orek ke ohiyac fal ac takla wo.—1 Corinth 14:40.