Orekmakihn Pacl Lom ke Orekma in Luti ke Inkacnek Wo Emeet
Mwet Loh luhn Jeova eltahl orekmakihn ao 1,945,487,604 ke orekma laltahl in luti pweng wo ke yac 2014. Ma inge mwe ahkpwacyeye lah kuht ke kahfofo ke orekma in kuhlwacnsap lasr nuh sin Jeova uh. (Psalm 110:3; Sie Corinth 15:58) Ke srihpen “tiac yohk pacl luhlah,” yac kuht kuh in orekmakihn pacl sacohk lasr uh nuh ke orekma in luti uh tuh in sun mwet pucspucs?—Sie Corinth 7:29.
Kuht enenuh in fihsracsr in ikihl kuh ahkfalye oakwuck lasr uh tuh kuht in orekmakihn wo pacl lasr uh nuh ke orekma in luti uh. Ke sie mwe puhpuhlyuck, kom fin orekmakihn ao se kuh puhs liki nuh ke sie oakwuck ke orekma in luti tuhsruhktuh wacngihn mwet kom sramsram nuh se, yac kom kuh in ekuhllah oakwuck lom tuh kom in konwacack mwet pucspucs ac sramsram nuh seltahl? Ohiyac ma sikyak uh tiac oacna sie ke acn nuhkewa. Tuhsruhktuh kahs in kahsruh ke paragraph tohkoh uh kuh in kahsre kom in orekmakihn wo pacl lom tuh kom in tiacna fihsihk ke wacngihn srihpac kuh “puok engyeng uh.”—Sie Corinth. 9:26, BMK.
Orekma in Sang Ma Loh ke Lohm nuh ke Lohm: Ke lusen yac pucspucs, mwet lili uh kwacna muhtwacwacack ke orekma in luti lalos, kais sie lwen, ke eltahl sulkackihn pweng wo lohm nuh ke lohm. Tuhsruhktuh, ke srihpen mwet pucspucs eltahl orekma ke lwen, sahp wo in orek orekma in luti sie lohm nuh ke sie lohm ke tahfuhn lwen tok kuh ke ekuh, ke pacl se mwet pucspucs muhta in lohm seltahl uh ac tiac kahfofo. Ke lwen, sahp orekma in sang ma loh nuh sin mwet ma fahsr ke inkacnek uh kuh ke acn in business pa wo in orek ac puhs mwet kuht kuh in sun.
Orekma in Sang Ma Loh ke Acn ma Mwet Pucspucs Oasr We: Tepuh ac mobile display uh enenuh in tahklac wo ke acn ma mwet pucspucs fahsr we ke territory luhn congregation uh. (Liye July 2013 Orekma Luhn Tohkohsrahi Lasr, sra 5.) Fin suhpuhseni mwet ke sie acn ma orekma in luti uh orek kac, Congregation Service Committee ac fah sulaclah lah piyac acn ma puhkantwen mwet fahsr kac tuh mobile display kuh tepuh uh in orekmakihnyuck we.
Orekma in Sifwil Fohlohk ac Lutlut Bible nuh sin Mwet uh: Yac kom kuh in orek oakwuck in sifwil fohlohk nuh yurin mwet kuh yurin mwet lutlut Bible lom uh ke sie pacl sahyac fin sie pac inkacnek in sang ma loh uh tiac fahlac wo? Ke sie mwe puhpuhlyuck, orekma in luti sie lohm nuh ke sie lohm fin fahlac wo ke lututacng in Saturday, yac kom kuh in oruh lutlut ke Bible ke tahfuhn lwen tok kuh ke ekuh? Ke pacl se orekma in sifwil fohlohk nuh yurin mwet uh orek, yac mwet lili uh kuh in fahsrelihk nuh ke u srihsrihk tuh in puhs mwet ma eltahl sun ke orekma in luti uh?
Pwacye lah kuht kuh in oek pacl ma kuht orekmakihn ke orekma in luti uh pacl nuhkewa kuht wi kac uh, tuhsruhktuh insewowo lasr ac fah yohkwelihk na fin oasr fahko wo ke orekma in luti lasr uh. Kom fin konwacack tuh sie inkacnek in sang ma loh tiac fahlac wo ke sie pacl uh, srihke oruh sie pac inkacnek sahyac ke orekma in luti uh. Puhruhe nuh sin Jeova, “Leum luhn kosrwacni,” siyuck ke kahsruh lal tuh kom kuh in orekmakihn pacl lom uh ke orekma in luti ke inkacnek wo emeet!—Matthew 9:38.