Fahkack Pweng Wo nuh sin “Mwet Nuhkwewa”
1. Ke ohiyac fuhkah mwet fahkack pweng wo elos oacna mwet orekma suc usrnguk ac utuftuf?
1 Sie mwet orekma usrnguhk ac utuftuf oasr kain in orekma puhspuhs lal, ac el etuh ngea ac fuhkah in orekmakihn kuhfwen orekma inge nuhkwewa. Ke ohiyac sepacna inge, oasr pac kuhfwen orekma puhspuhs lasr su kuh in kasre kuht in ahkpwacyeye orekma lasr oacna mwet fahkack pweng wo. Ke sie mwe puhpuhlyuhk, oasr kain in brochure suc ahkkahlwemye ke kain mwe lutlut wowo puhspuhs kuh in kahsre kuht in fahkack pweng wo nu sin “mwet nukwewa.”—1 Corinth 9:22.
2. Ngea kuht kuh in orekmakihn brochure ke orekma in luti lasr?
2 Ngea Pacl Wo in Orekmakihn Brochure: Sie mwet orekma suc utuftuf el fah orekmakihn sie kuhfwen orekma pacl nuhkwewa el enenuh ma inge. Ke ohiyac oacpacna inge, kuht kuh in orekmakihn sie brochure pacl nuhkwewa kuht nuhnkuh muh oasr sie mwet su fah eis kahsruh kac, ac tiyac ke mahlwem na ma kuht ahkolah in kihtelah ma inge. Ke mwe puhpuhlyuhk, fin buk in kihtelah pa Mea Baibel el Luti ac kuht fahkack pweng wo nuh sin metsac su tiyac mwet Kristian suc tiyac arlac luhngse in lohng ke ma pwacye lun Bible, sahp wo in orekmakihn sie brochure suc fal in ahkkahlwemye nuh sel, ac tukun kuhtuh pacl kuht kuh in orekmakihn buk se inge Mea Baibel el Luti tukun kuht oruh mwet se inge in insewowo in lutlut.
3. Efuh kuh kuht enenuh in pahlah in orekmakihn kuhfwen orekma lasr in sang ma loh?
3 Bible el ahkkahlwemye kahs in kaksyak nuh selos suc alken ac utuftuf ke orekma lalos. (Soakas 22:29) Pwacye lah, wacngihn orekma sahyac suc yohk srihpac liki orekma in “luti ke Pweng Wo sin God me.” (Rome 15:16) Tuh kuht in “mwet orekma su tia enenu in mwekin,” suc orekmakihn suwohs na kas lun God.—2 Timote 2:15.