Kahsruh Mwet Uh in Porongo God

1. Mwe rit fuhkah utuckuh nuh sesr ke Toeni luhlahp luhn District suc sifac pa “Togusrai Luhn God in tuku!”? Efuh kuh ma inge kuhfwen orekma suc wo na pwacye?

¹ Ke toeni luhlahp luhn District suc sifac pa “Togusrai Luhn God in Tuku!”, mwe rit luo suc oasr ke sra 32 utuckuh nuh sesr, Porongo God in Moul Ma Patpat ac ma wiyacn mwe rit se inge suc ahkfusracsryeyuhklac, Porongo God.a Ke srihpacn sihm kac uh fototo, arlacna fihsracsr ac sa in luhngaslah ma inge. Mwe rit se inge Porongo God in Moul Ma Patpat leyucklah in langasyuclah ke kahs 431 ke pacl se utuckuh nuh sesr mwe rit inge.

2. Suc ac fah insewowo ke mwe rit inge?

² Suc ac fah insewowo ke mwe rit inge? Srihke nuhnkuh ke kais sie ohiyac suc sikyak fin facluh nohfohn suc sihmlac ten inge:

• Sie mwet forfor el sramsram nuh sin mwet in lohm uh, sahp pa inge pacl se emeet el osun nuh sel kuh el sifwil muhtwacta nuh yurin mwet sac. El liye lah mwet sac tiac kuh in rit wo.

• Sie mwet forfor el sramsram nuh sin mwet se suc kahskahskihn sie kahs suc suhpuhs puk kuht luhngaslah nuh ke kahs sac kuh wacngihn na pwacye puk kuht luhngaslah nuhke kahs lalos. Kuh sahp inkaiyen mwet ke acn sac tiac kuh in riti kahs suc elos puhla muh wo nuh selos.

• Sie mwet forfor el sramsramkihn pahol kuh manol (sign-language) nuh sin mwet suhlohng kahs ke acn in forfor lal.

• Sie pahpah kuh ninac suc luhngse in luti tuhlihk srihsrihk nahtuhlos suc soena etuh rit.

3. Mwe rit se inge Porongo God, oreklac fuhkah?

³ Ma Inge Oreklac Fuhkah: Sihm na fototo pa oasr ke Porongo God. Sentence soko na ac sie koanon fuhs pa sihmlac acn ten ke kais sie sra in ahkkahlwemye mwe lutlut ma yohk srihpac. Efuh ouinge? Srihke nuhnkuh fin sie mwet el usot nuh sum sie mwe rit suc oasr ke sie kahs suc kom tiac etuh riti, ac sahp kom tuhfahna liye sihm kac ah. Yac kom ac ke riti ma inge finne oasr petsac kahto kac? Kahlwem lah kom ac tiac. Ke ouinge, mwet suc tiac kuh in rit, elos fihsracsr in tuhfal kuh sruhnga rit ke elos liye puk se suc oasr sihm kac. Ke srihpac yohk se inge, kais sie sra oreklac wo in oasr petsac kac ac oasr pac ma se suc oacna mwe pihsr soko in kol sramsram lowos ke kais sie petsac.

4. Mwe rit se inge Porongo God in Moul Ma Patpat oreklac fuhkah?

⁴ Petsac ke Porongo God in Moul Ma Patpat, oacna petsac ke Porongo God. Mwe rit se inge oreklac nuh selos suc kuh in rit kuhtuhsrihk kuh elos suc srackna lutlut in rit. Mwe rit se inge kuh in orekmakihnyuck oacna mwe kahsruh luhn sie mwet luti ke pacl se kom luti mwet se ke Porongo God. Ke acn lucng ke lacsac ke mwe lutlut sra luo nuhkwewa, oasr kihsen siyuck se suc top nuh kac ac topukyuhklac ke sra ah. Oasr mwe ahkuhtweyac ac fuhs sihmlac in kuhpahsr nuhke petsac ah. Ke acn ten ke sra luhn mwe lutlut se inge, oasr pohk se ma ahkkahlwemye kuhtuh pac mwe lutlut ac fuhs suc kuh pac in sramsramkihnyuhk fal nuhke enenuh luhn mwet lutlut sac.

5. Ngac kom kuh in kihtelah mwe rit inge ac kom ac oruh fuhkah?

⁵ Kom ac Orekmakihn Ma Inge Fuhkah: Kom kuh in kihtelah mwe rit inge pacl nuhkwewa kom puhla tuh enenweyuck ke kom oruh orekma in forfor ke sie lohm nuh ke sie lohm finne tiac pa inge mwe kihtelah ke mahlwem sac. (Liye pohk se inge “Ma Inge Ac Kihtakatlah Fuhkah.”) Kom kuh in sang nuh sin mwet ke kom sifwil muhtwacta nuh yurolos ac kom fahk lah oasr ma se kom luhngse in ahkkahlwemye nuh selos. Tokin ma inge kom sang nuh sel mwe rit sac.

6. Kuht ac lutlut Bible yurin mwet uh fuhkah ke kuht orekmakihn mwe rit luo inge?

⁶ Ke srihpaen wacngihn kihsen siyuck ke Porongo God, sramsram lowos ac tiac oacna ke kowos orekmakihn kihsen siyuck ac top ke puk in Baibel El Luti. Ke facsin nuhkwewa, mwet uh elos luhngse lohng pihlenfong kuh mwe sramsram uh. Kacfweacng in orekmakihn petsac ah in fahkwack mwe sramsram kuh ma orek lun Bible. Ahkuhtweyac meac orek ke petsac ah. Ahkkahlwemye lah kom moniyuck ac engan ke ma kom sruhmuhn. Siyuck sin mwet lutlut sac lah meac el liye. Riti fuhs ke acn ten ke kais sie sra ac fal nuhke top lal kom ahkyohkye ahkuhtweyac ke mwe lutlut. Siyuck sel kihsen siyuck elan kuh in wi sramsram ac kom in kuh pac in etuh lah pwacye el sruokyac mwe lutlut ah. Fin mwet sac lutlutkihn Porongo God in Moul Ma Patpat, kowos tuhkweni riti mwe ahkuhtweyac wekuhnacng fuhs ma sihmlac ke pacl se kowos sramsramkihn kais sie petsac.

7. Kuht kuh in kahsruh fuhkah mwet lutlut ke Bible in kapkapack?

⁷ Kahsruh Mwet Lutlut in Kapkapack: Finsrak, lutlut lom nuh sin mwet lutlut sac ac ahkyohkye ke lal in eis etwacack in rit elan kuh in sifacna eis mwe etwacack kel Jeova. (John 17:3) Fin lutlut lowos orek ke Porongo God, sahp ke pacl ma fal, kom kuh in siyuck sin mwet sac fin el luhngse kom in lotel rit, na kom kuh in srolah nuhke Porongo God in Moul Ma Patpat. Finne kom tari liki sie sin mwe rit luo inge, mwet lutlut sac soena fal in pacptaislac. Kom enenuh in tahfwelah lutlut ke puk in Baibel el Luti kuh sie mwe rit suc ac kahsrel in ahkyohkye etwacack lal ke Bible.

8. Efuh kuh kom sang kuloh nuhke kuhfwen mwe lutlut inge nuhke orekma in luti lasr?

⁸ Mwet uh enenuh in porongo Luem suc Fuhlwactlacna fin facluh ac in kuhsrao fin elos luhngse in moul ma pahtpaht. (Isaiah 55:3) Ac luhngse luhn Jeova pa “mwet e nukewa in moliyukla,” wekuhnacng pac elos suc tiac kuh in rit in etuh pac porongo el. (1 Timothy 2:3, 4) Kuht arlacna sang kuloh nuhke kuhfwen orekma inge suc kuht kuh in orekmakihn in luti mwet uh in etuh lah elos ac porongo fuhkah God!

[Footnote]

[Pohk ke sra 3]

Ma Inge Ac Kihtakatlah Fuhkah

Ahkkahlwemye nuh sin mwet in lohm ah sra 2-3, ac fahk ouinge: “Kom ke moul ke facl se oacna ouinge? [Soano ke mwe top.] Fuhs in Bible olelah [kuh, puk muhtahl se inge olelah] lah pacl apkuhran God elac oraclah facluh se inge nuhke acn kahto, mihslac,ac wacngihn mwet suhkahsruhp kuh mas. Lohacng wo nuhke meac kuht enenuh in oruh in wi moul ke acn se inge. [Riti Isaiah 55:3, suc sihmlac e lucng ke sra 3.] Fuhs se inge fahk nuh sesr in “fahsru” nuh yurin God ac ‘porongo’ el. Tuhsruhktuh kuht ac porongo fuhkah God? Olanglah nuh ke sra 4-5, ac ahkuhtweyac top nuh sel. Fin wacngihn pacl lal, likiyac mwe rit sac yurol ac oakiyac kom in sifwil fohlohk ac sramsram ke top nuh kac uh.