Kuht Kuloh Na Pwacye In Eis Luhngkuhlwacng luhn God

1, 2. (a) Ahkuhtweyac mwe puhpuhlyuck lal Jesus ke mwet se ma la imac in grape sac. (b) Mwe puhpuhlyuck se inge luhmahlah fuhkah ohiyac wo ac luhngkuhlwacng?

TOANG ke sie lututacng ah, sie mwet suc la imac in grape se el som nuh ke acn in kuhka uh in sukok mwet in orekma lal. El ahkkahlwemye nuh sin mukul inge luhpah se ma el ac moli nuh seltahl uh ac eltahl nuhkewa inseselac kac. Tuhsruhktuh, ke srihpen mukul se ma la imac se inge el enenuh kuhtuh pac mwet orekma ah, el sifwil fohlohk pacl ekahsr nuh ke acn in kuhka se inge in suk kuhtuh pac mwet orekma sahyac ah. Luhpan mani ma el fahk muh el ac moli nuh sin mukul nuhkewa inge arlacna fal. Ke sahflahiyen sie lwen in orekma laltahl uh, mwet se ma eltahl orekma la inge el oracltahlweni tuh elan sang molin orekma laltahl uh. Finne eltahl orekma lwen fohn kuh ke lusen ao sefanna, mwet se ma eltahl orekma la inge sang luhpah sefanna nuh seltahl nohfohn. Tuhsruhktuh, mukul ma orekma lwen fohn inge muhtwacwacack in tohrkahskahs, ac mwet se ma eltahl orekma la inge el fahk: ‘Yac komtacl tiac inseselac nuh ke luhpah se nga fahk nuh sumtacl ah? Yac tiac oasr suwohs luhk in sang nuh sin mwet orekma nuhkewa luhk inge kuhtwena ma nga luhngse in sang? Yac komtacl sok ke srihpen nga wo?’​—Matthew 20:1-15.

² Mwe puhpuhlyuck se lal Jesus inge ahkacsmakihnye kuht ke sie sin ohiyac wo luhn Jeova uh, pa “luhngkuhlwacng” kuh kahs Greek se ma kuhtuh pacl uh luhngasyucklac ke Bible Kosrae uh oacna “kuhlwacng”.^[1] (Liye endnote.) (Riti Luo Corinth 6:1.) Fuhkah? Kuhtuh mwet uh ac kuh in nuhnkuh muh mwet ma orekma lwen fohn inge enenuh yohk mololtahl liki mwet orekma sahyac ah. Tuhsruhktuh, mwet se ma eltahl orekma la inge ahkkahlwemye luhngkuhlwacng nuh sin mwet orekma lal ma orekma tahfuhn lwen na. Sie mwet suc yohk etwacack la ke kahs se inge “luhngkuhlwacng” ma orekmakihnyuck ke Bible uh, el fahk lah: “Kalmen kahs se inge pa sie mwe sang ma wacngihn molo ac ituckyang nuh sin sie mwet tiac ke srihpen orekma lal kuh ke ma el oruh, a ke srihpen kuhlwacng luhn mwet se ma sang an.”

MWE SANG LUHN JEOVA MA AHKKAHLWEMYE LUHNGKUHLWACNG

3, 4. Efuh ac ke inkacnek fuhkah Jeova el ahkkahlwemye luhngkuhlwacng lal nuh sin mwet nuhkewa?

³ Bible uh fahk lah luhngkuhlwacng luhn God uh “sie mwe sang ma wacngihn molo.” (Ephesus 3:7, NW) Ke srihpen kuht tiac kuh in ahkos Jeova ke inkacnek suwohs, kuht tiac fal in eis kuhtwena mwe kuhlwacng luhn God uh. Fal nuh sesr in misac. Tohkohsrah Solomon el fahk: “Wacngihn sie mwet fin facluh oruh ma suwohs pacl nuhkewa ac tiacna oraclah sie tahfonglac.” (Ecclesiastes 7:20) Tok, mwet sap Paul el fahk: “Mwet nuhkewa orekma kuluk, ac elos nuhkewa tiac sun luhpan wolacna se ma God el ahkoo nuh selos” ac “molin ma kuluk pa misac.”​—Rome 3:23; 6:23a.

⁴ Ke srihpen luhngse yohk luhn Jeova nuh sin mwet uh, el suhpwacma “wen sefanna nahtuhl” tuh elan misac kacsr. Pa inge orekma se ma yohk emeet ma ahkkahlwemye luhngkuhlwacng. (John 3:16) Paul el fahk lah, “ke luhngkuhlwacng luhn God, [Jesus] elan misac ke mwet nuhkewa. Inge kuht liye lah ahkfuhlwactyeyuck el ke sie tefuroh luhn wolacna ac suhnak ke srihpen misac suc el kweok kac.” (Hebrew 2:9) Ahok, “mwe kihte luhn God pa moul ma pahtpaht yurin Christ Jesus Leum lasr.”​—Rome 6:23b.

5, 6. Meac tuhkuh ke kuht kolyuck (a) ke ma kuluk? (b) ke luhngkuhlwacng?

⁵ Efuh kuh kuht oruh ma kuluk ac misac? Bible uh fahk lah “ke srihpen ma kuluk luhn sie mwet, misac leum fin mwet uh.” Pwacnacng, ke srihpen kuht ma nahtuhl Adam, kuht sesuwohs ac misac. (Rome 5:12, 14, 17) Tuhsruhktuh, kuht srackna kuh in sulaclah in tiac kolyuck kuh kihfucsyucklac ke ma kuluk. Kuht ac oruh fuhkah ma inge? Ke pacl ma kuht ahkkahlwemye luhlahlfongi lasr nuh ke mwe kihsac luhn Christ, kuht puhla ma wo ma tuhkuh ke luhngkuhlwacng luhn Jeova uh. Bible uh fahk: “Yen ma kuluk uh yohkwelihk we, luhngkuhlwacng luhn God yohkwelihk liki. Ohinge, in oacna ke ma kuluk uh leumi mwet uh ke misac, in ohiyac sac pacna, luhngkuhlwacng luhn God leumi kuht ke El ahksuwohsye kuht ye muhtahl, ac pwen kuht nuh ke moul ma pahtpaht ke srihpen Jesus Christ.”​—Rome 5:20, 21.

⁶ Finne kuht srackna mwet kuluk, kuht tiac enenuh in lwelah ma kuluk uh in leumi kuht kuh kuhtangkuhtlac. Ke ma inge, ke pacl ma kuht oruh ma kuluk uh, kuht siyuck nuhnak muhnahs sin Jeova. Paul el sensenkihn kuht: “Ma kuluk in tiac leumi kowos; tuh kowos tiac moul ye masap a ye luhngkuhlwacng luhn God.” (Rome 6:14) Pwacnacng, kuht ac engankihn fuhkah ma wo ma tuhkuh ke luhngkuhlwacng luhn God uh? Paul el fahk: “God el ahkkahlwemye tari luhngkuhlwacng lal. . . . Luhngkuhlwacng lal luti kuht in fahsr liki ma luhngse luhn facluh ac ohiyen moul ma pihlesruh God; ac tuh kuht in karihngihn kuht sifacna, ac moulkihn moul suwohs ac muhtahl fin facl se inge.”​—Titus 2:11, 12.

LUHNGKUHLWACNG AHKKAHLWEMYEYUCK KE “OHIYAC PUCSPUCS”

7, 8. Meac kalmac ke fwack muh luhngkuhlwacng luhn Jeova uh ahkkahlwemyeyuck ke “ohiyac pucspucs”? (Liye petsac se meet ke mwe lutlut se inge.)

⁷ Mwet sap Peter el suhmuhslah: “Oacna kais sie eis mwe sang ac orekmakihn inmahsrlowos oacna mwet tuhtahfpo wo in luhngse luhn God in ohiyac pucspucs.” (Sie Peter 4:10, BMK) Meac kalmac ke fwack muh luhngkuhlwacng luhn Jeova uh ahkkahlwemyeyuck ke “ohiyac pucspucs”? Kalmen ma inge pa, ke kuhtwena ma upac ma kuht sun ke moul lasr uh, Jeova el ac fah use nuh sesr ma kuht enenuh tuh kuht in muhtwacnglah. (Sie Peter 1:6) Pacl nuhkewa, el fah use ma kuht enenuh na pwacye uh, tuh kuht in kuhtanglah kais sie ma upac lasr uh.

⁸ Mwet sap John el suhmuhslah: “Liki luhngkuhlwacng yohklac na lal el kalweni na in acse mwe insewowo nuh sesr nuhkewa.” (John 1:16) Ke srihpen Jeova el ahkkahlwemye luhngkuhlwacng lal uh ke inkacnek pucspucs, kuht eis mwe insewowo pucspucs kac. Meac kuhtuh sin mwe insewowo inge?

9. Ma wo fuhkah kuht kuh in engankihn ke srihpen luhngkuhlwacng luhn Jeova? Kuht ac ahkkahlwemye fuhkah srui lasr nuh kac?

⁹ Jeova el nuhnak muhnahs ke ma kuluk lasr uh. Ke srihpen luhngkuhlwacng luhn Jeova nuh sesr, el nuhnak muhnahs ke ma kuluk lasr uh. Tuhsruhktuh, el oruh ma inge muhkwena fin, kuht auliyak ac kwacfeacng in lain kena kuluk lasr inge. (Riti Sie John 1:8, 9.) Paul el ahkuhtweyac nuh sin mwet Christian akmuhsralah ke lwen lal ah lah Jeova el nuhnak muhnahs fuhkah ke ma kuluk uh. El fahk: “[Jeova] El molikuhtlac liki kuh luhn lohsr uh, ac us kuht me nuh in tohkohsrahi luhn Wen kuloh nahtuhl. Ke srihpacl, kuht ahksukohsohkyeyucklac, suc kalmeyac pa God El nuhnak muhnahs nuh sesr ke ma kuluk lasr.” (Colossae 1:13, 14) Kuht arlacna srui ke pahkotwen luhn God ac kuht luhngse in kaksakuhnuhl kac. Ac ke srihpen Jeova el nuhnak muhnahs ke ma kuluk lasr uh, kuht kuh pac in eis mwe insewowo pucspucs sahyac kac.

10. Meac kuht kuh in engankihn ke srihpen luhngkuhlwacng luhn God uh?

¹⁰ Kuht kuh in fototo nuh sin God ac mislac inmahsrlosr. Kuht mwet sesuwohs, pwacnacng ke pacl se ma kuht isuslac ah kuht mwet lokoalok luhn God. Ke ma inge, Paul el fahk: “Meet kuht mwet lokoalok luhn God, tuhsruhktuh El oraclah kuht in mwet kawuck lal ke misac luhn Wen nahtuhl.” (Rome 5:10) Ke srihpen mwe molwelah uh, kuht kuh in fototoyang nuh sin God, kalmac pa kuh in oasr mislac inmahsrlosr ac kuht eklac mwet kawuck lal. Paul el ahkuhtweyac ma inge ac lah ma inge kuhpahsr fuhkah nuh ke luhngkuhlwacng luhn Jeova ke el tuh fahk nuh sin mwet lili akmuhsralah wiyacl uh: “Ke srihpen luhlahlfongi lasr in Christ, el pwen kuht me in puhlakihn luhngkuhlwacng luhn God, suc kuht moul kac in pacl inge. Ohinge kuht arulacna engan mweyen oasr finsrak lasr lah kuht ac fah ipeis ke wolacna luhn God!” (Rome 5:1, 2) Kuht arlacna kuloh nuh sin Jeova ke srihpen kuht kuh in engankihn mislac ac fototo lasr nuh sin Jeova!

11. Mwet akmuhsralah uh pwacnma fuhkah “kuhtuh sheep” sahyac uh nuh ke suwohswohs?

¹¹ Kuht kuh in eklac suwohswohs ye muhtuhn God. Mwet pahluh Daniel el suhmuhslah lah ke lusen lwen sahflah uh, “elos suc lahlmwetmwet” kuh mwet akmuhsralah, fah pwacnma “mwet pucspucs nuh ke suwohswohs.” (Riti Daniel 12:3, BMK.) Mwet akmuhsralah uh oruh fuhkah ma inge? Eltahl som fahkwack ke pweng wo ac luti million sin “kuhtuh sheep” sahyac ke masap luhn Jeova uh. (John 10:16) Eltahl kahsreltahl in eklac mwet suwohswohs ye muhtuhn God, ac ma inge kuh in orek ke na srihpen luhngkuhlwacng luhn Jeova. Paul el ahkuhtweyac: “A ke luhngkuhlwacng luhn God suc El acse ke wacngihn molo, mwet nuhkewa ahksuwohsyeyuck ye muhtahl ke Christ Jesus, suc ahksukohsohkyeloslac.”​—Rome 3:23, 24.

12. Puhruhe lasr uh kuhpahsr fuhkah nuh ke luhngkuhlwacng luhn God?

¹² Kuht kuh in fototoyang nuh sin God ke inkacnek luhn puhruhe. Ke srihpen luhngkuhlwacng luhn Jeova uh, kuht kuh in puhruhe nuh sel. Paul el pahngon tron luhn Jeova uh “yen luhngkuhlwacng oasr we” ac el suli kuht in “puhlaik in utyak” nuh we. (Hebrew 4:16a) Ke kuhtwena pacl, kuht kuh in puhruhe nuh sin Jeova ke inkacnek luhn Jesus. Ma inge arlacna sacohk nuh sesr! Paul el fahk: “Ke kuht kuhpahsryang nuh sin Christ ac luhlahlfongi in el, kuht puhlaik in utyak nuh ye muhtuhn God ac arulacna etuh lah El ac lohme nuh sesr.”​—Ephesus 3:12.

13. Ke inkacnek fuhkah luhngkuhlwacng lal ac fah “kahsre kuht ke pacl kuht enenuh”?

¹³ Kuht kuh in konwacack kahsruh ke pacl fal. Paul el ahkkweye kuht in puhruhe nuh sin Jeova ke pacl nuhkewa ma oasr enenuh lasr, “ac kuht ac fah eis pahkotwen ac konwacack luhngkuhlwacng in kahsre kuht ke pacl kuht enenuh.” (Hebrew 4:16b) Ke pacl nuhkewa ma oasr mwe sruhf kuh ma upac ke moul lasr uh, kuht kuh in siyuck ke kahsruh luhn Jeova. Ac el topuk puhruhe lasr uh, finne el tiac enenuh in oruh. El kwacna orekmakihn mwet lili wiyacsr uh in kahsre kuht. Jeova el topuk puhruhe lasr uh tuh “kuht kuh in puhlaik in fahk, ‘Leum el kahsreyuc, Nga fah tiacna sahngweng. Meac mwet ac kuh in oruh nuh sihk?’”​—Hebrew 13:6.

14. Ma wo fuhkah luhngkuhlwacng luhn Jeova uh oruh nuh ke insiacsr?

¹⁴ Kuht kuh in eis mwe ahkkweye nuh ke insiacsr. Mwe insewowo na yohk se lah Jeova el ahkkweye kuht ke pacl nuhkewa ma kuht puhla ahsor yohk. (Psalm 51:17) Ke pacl ma mwet Christian fin acn Thessalonica eltahl sun mwe kalyei, Paul el suhmuhslah: “Leum lasr Jesus Christ sifacna, ac God Pahpah tuhmwacsr, suc ke luhngkuhlwacng lal El luhngse kuht ac acse nuh sesr puhlaik ac finsrak kuh, suc ac tiacna wacngihnlac. Elan ahkpuhlaikye kowos ac ahkkweye kowos.” (Luo Thessalonica 2:16, 17.) Fuhkah woiyac in etuh lah ke srihpen luhngkuhlwacng luhn Jeova el luhngse kuht ac nuhnkuh kacsr!

15. Ke srihpen luhngkuhlwacng luhn God nuh sesr, finsrak fuhkah oasr yohrohsr uh?

¹⁵ Oasr finsrak lasr in moul ma pahtpaht. Ke srihpen kuht oruh ma kuluk, wacngihn finsrak lasr fin tiac ke kahsruh luhn Jeova. (Riti Psalm 49:7, 8.) Tuhsruhktuh, Jeova el acse sie finsrak na wo. Meac se inge? Jesus el fahk: “Pa inge ma Pahpah tuhmuhk el luhngse: elos nuhkewa suc liye Wen ac luhlahlfongel in eis ma pahtpaht.” (John 6:40) Ke ma inge, oasr finsrak lasr in moul ma pahtpaht ke srihpen luhngkuhlwacng luhn Jeova. Paul el fahk: “God el ahkkahlwemye tari luhngkuhlwacng lal ke El acse molwelah nuh sin mwet e nuhkewa.”​—Titus 2:11.

TIAC LWELAH LUHNGKUHLWACNG LUHN GOD IN PA SRIHPAC LOM IN ORUH MA KULUK

16. Ke inkacnek fuhkah kuhtuh mwet Christian in pacl meet ah orekmakihn luhngkuhlwacng luhn God in pa srihpac laltahl in oruh ma kuluk?

¹⁶ Yohk mwe insewowo ma kuht eis ke srihpen luhngkuhlwacng luhn Jeova uh. Tuhsruhktuh, kuht enenuh in taran kuht in tiac lwelah kuhlwacng lal uh in pa srihpac lasr in oruh ma kuluk. Inmahsrlon mwet Christian in pacl meet ah, oasr kuhtuh seltahl ma srihke in “ekuhllah . . . luhngkuhlwacng luhn God lasr tuh elos in oruh na luhmah fohkfohk lalos.” (Jude 4) Mwet lili soaru inge nuhnkuh na muh eltahl kuh in oruh na ma kuluk ac Jeova el ac fah nuhnak muhnahs nuh seltahl pacl nuhkewa. Eltahl tuh srihke in oruh pac mwet lili wiyacltahl uh in oruh ma kuluk. Ke pacl inge pac, kuhtwena mwet suc oruh ma inge pihlesruh kuh “lain nguhn in kuhlwacng.”​—Hebrew 10:29.

17. Kahs in kahsruh na kuh fuhkah ma Peter el ahkkahlwemye?

¹⁷ Satan el kiacpwelah kuhtuh mwet Christian ke pacl inge uh in nuhnkuh na muh eltahl kuh in oruh kuhtwena ma kuluk ac Jeova el fah sa na in nuhnak muhnahs nuh seltahl. Pwacye lah Jeova el luhngse in nuhnak muhnahs nuh sin mwet orekma kuluk suc auliyak uh, tuhsruhktuh el siyuck kuht in kwacfeacng in lain kena kuluk luhn ikoacsr. Jeova el moklel Peter elan suhmuhslah: “Ac kowos mwet kawuck luhk, kowos etuh ma inge tari. Kowos in sifacna liyekowosyang tuh kowos fah tiac ahktahfongyeyucklac ke ma suhtuhuh luhn mwet pihlesruh ma sap, pwacnacng kowos puhtatlac liki acn kowos muhta okak we. A kowos in kapkapwack ke luhngkuhlwacng ac etwacack lowos ke Leum ac Mwet lahngo lasr Jesus Christ.”​—Luo Peter 3:17, 18.

LUHNGKUHLWACNG LAL UH ACSE KUNOHKOHN YOHK

18. Ke srihpen luhngkuhlwacng luhn Jeova uh, kunohkohn fuhkah oasr yohrohsr uh?

¹⁸ Kuht arlacna srui ke luhngkuhlwacng luhn Jeova uh. Ke ma inge, kuht enenuh in orekmakihn mwe sang se lasr inge in sang wolacna nuh sin Jeova ac in kahsruh mwet sahyac. Arlacna fal nuh sesr in oruh ma inge. Tuhsruhktuh, ke inkacnek fuhkah kuht kuh in orekmakihn mwe sang inge uh? Paul el fahk: “God el acse kais sie mwe kihte nuh sesr suc tiac oacna sie, na kuht in orekmakihn mwe kihte inge fal nuh ke kuhlwacng ma God El acse nuh sesr . . . Kuht fin kuh in kuhlwacnsuhpuh mwet, kuht enenuh in kuhlwacnsap; kuht fin kuh in luti, kuht enenuh in luti; kuht fin kuh in ahkkweye insiacn mwet, kuht enenuh in ahkkweyaclos. . . . Kuhtwena mwet suc oruh mwe kuhlwacng lal, lwelah elan oruh ke inse engan.” (Rome 12:6-8) Pwacnacng, ke srihpen luhngkuhlwacng luhn Jeova uh, oasr kunohkohn lasr in sang kuhiyacsr ke orekma in luti uh, in luti Bible uh nuh sin mwet sahyac, in ahkkweye mwet lili wiyacsr uh ac in nuhnak muhnahs nuh sin kuhtwena mwet suc ahktoasrye kuht.

19. Kunohkohn fuhkah se lasr ma kuht ac fah tuni ke mwe lutlut se tok uh?

¹⁹ Ke srihpen kuht eis ma wo pucspucs ke luhngkuhlwacng luhn Jeova uh, ma inge enenuh in mokle kuht in sang kuhiyacsr “in fahkwelihk pweng wo ke kuhlwacng luhn God.” (Orekma 20:24) Kunohkohn se inge pa kuht ac fah tuni ahkwoyac ke mwe lutlut se tok uh.