Fahkwelihk Pweng Wo ke Luhngkuhlwacng luhn God

1, 2. Mwet sap Paul el ahkkahlwemye fuhkah lah el srui ke luhngkuhlwacng luhn God uh?

MWET sap Paul el kuh in fahk na pwacye: “Kuhlwacng lal [luhn God] nuh sihk tiac wacngihn srihpac.” (Riti Sie Corinth 15:9, 10.) Paul el etuh na pwacye lah el suhfal in eis pahkotwen luhn God, ke srihpen mwe kalyei ma el oruh nuh sin mwet Christian in pacl meet ah.

² Ke apkuhranyang nuh ke sahflahiyen moul lal Paul uh, el suhmuhslah kahs inge nuh sel Timothy: “Nga sang kuloh nuh sin Christ Jesus Leum lasr, suc ahkkweyeyuc ke orekma luhk. Nga sang kuloh nuh sel tuh el oekyuc muh nga fal ac el srihsrngiyucwi in kuhlwacnsap nuh sel.” (Sie Timothy 1:12-14) Orekma fuhkah se el sramsramkihn inge? Paul el fahk nuh sin mwet elder ke congregation fin acn Ephesus: “Nga tiac seko moul luhk sifacna, a nga kena ahksahfyelah kunohkohn se ma Leum Jesus el acse nga in oruh, pa in fahkwelihk Pweng Wo ke kuhlwacng luhn God.”​—Orekma 20:24.

3. Orekma in luti fuhkah se ma ituckyang nuh sel Paul elan oruh? (Liye petsac se meet ke mwe lutlut se inge.)

³ Meac “pweng wo” se ma Paul el som fahkwelihk inge? Ac ma inge ahkkahlwemye fuhkah luhngkuhlwacng luhn Jeova uh? Paul el fahk nuh sin mwet Christian fin acn Ephesus: “Nga luhlahlfongi muh kowos lohng tari lah ke srihpen luhngkuhlwacng luhn God, El acse orekma se inge kunuck in ahkwoye kowos.” (Ephesus 3:1, 2) Jesus el sap nuh sel Paul elan som fahkwack ke pweng wo uh nuh sin mwet suc tiac mwet Jew. Muhtwacwacack ke pacl se inge, mwet ke muhtuhnfacl sahyac uh kuh in wi ke Tohkohsrahi luhn God ye kolyuck lal Jesus. (Riti Ephesus 3:5-8.) Paul el moniyuck in som fahkwack ac el oakiyac mwe srihkasrak wo se nuh sin mwet Christian ke pacl inge uh. El ahkkahlwemye lah luhngkuhlwacng luhn God uh tiac “wacngihn srihpac” kuh suhfal nuh sel.

YAC LUHNGKUHLWACNG LUHN GOD UH MOKLE KOM?

4, 5. Efuh kuht kuh in fahk muh “pweng wo inge ke Tohkohsrahi uh” pa “pweng wo ke kuhlwacng luhn God”?

⁴ Ke lusen lwen sahflah inge, ituckyang kunohkohn se nuh sin mwet luhn Jeova uh in som fahkwack “pweng wo inge ke Tohkohsrahi uh . . . fin facluh nohfohn in mwe loh nuh sin mwet nuhkewa.” (Matthew 24:14) Pweng wo ke Tohkohsrahi uh pa “pweng wo ke kuhlwacng luhn God.” Fuhkah tuh in ohinge? Mwe insewowo nuhkewa ma kuht ac eis ke Tohkohsrahi luhn God uh ma ke srihpen luhngkuhlwacng luhn Jeova. (Ephesus 1:3) Paul el ahkkahlwemye srui yohk nuh ke luhngkuhlwacng luhn Jeova uh ke el moniyuck in som fahkwack. Yac kuht etahi mwe srihkasrak lal Paul inge?​—Riti Rome 1:14-16.

⁵ Ke mwe lutlut se tari ac, kuht lotwelah lah finne kuht mwet orekma kuluk oasr ma wo pucspucs ma kuht kuh in eis ke luhngkuhlwacng luhn Jeova uh. Ke srihpen puhs ma wo ma kuht eis kac, oasr kunohkohn lasr in luti nuh sin mwet sahyac lah Jeova el ahkkahlwemye fuhkah luhngse lal uh ac lah eltahl ac eis fuhkah ma wo kac. Ke inkacnek fuhkah kuht kuh in kahsruh mwet sahyac uh in ahksacohkye luhngkuhlwacng luhn God uh?

FAHKWELIHK PWENG WO KE MWE MOLWELAH UH

6, 7. Ke pacl ma kuht ahkuhtweyac mwe molwelah uh nuh sin mwet sahyac, ke inkacnek fuhkah kuht fahkwelihk pweng wo ke luhngkuhlwacng luhn God uh?

⁶ Ke pacl inge, mwet pucspucs eltahl tiac ahsor kuh inse toasr in oruh ma kuluk, pwacnacng eltahl tiac kahlwem kac lah efuh kuht enenuh mwe molwelah uh. Oacyacpac, puhseni na mwet suc akihlen lah eltahl tiac insewowo ke ohiyen moul laltahl uh. Meet liki mwet pucspucs inge muhtwacwacack in sramsram nuh sin Mwet Loh luhn Jeova uh, eltahl tiac etuh lah meac ma kuluk uh, ma kuluk uh ahkkulukye kuht fuhkah, ac efuh kuht enenuh in sukohsohklah liki mwe kohs luhn ma kuluk. Ke pacl se ma eltahl kahlwemack kac lah meac ma kuluk uh, mwet inse pwacye uh srui ke eltahl etwacack lah Jeova el suhpwacma wen nahtuhl nuh facluh in ahksukohsohkyekuhtlac liki ma kuluk ac misac. Jeova el oruh ma inge ke srihpen luhngse ac luhngkuhlwacng yohk lal.​—Sie John 4:9, 10.

⁷ Lohacng nuh ke ma Paul el fahk ke wen kuloh nuhtin Jeova: “Tuh ke srihpen Christ el sifacna kihsackuhnlah moul lal ac srahl sohrohrlah, kuht sukohsohklah, ahok, ma kuluk lasr nuhnak muhnahs nuh sesr. Yohklac na luhngkuhlwacng luhn [Jeova] God.” (Ephesus 1:7) Mwe kihsac luhn Christ ke moul lal uh pa mwe ahkpwacyeye se ma yohk emeet ke luhngse luhn God nuh sesr ac ma inge ahkkahlwemye luhpan luhngkuhlwacng lal uh. Sie mwe ahkkweye pa inge in etuh lah kuht fin ahkkahlwemye luhlahlfongi lasr nuh ke mwe kihsac lal Jesus, ma kuluk lasr uh fah iyucklac ac kuht fah engankihn sie nuhnak ac puhlakihn wo! (Hebrew 9:14) Pweng wo na pwacye pa inge kuht in sruhmuhn pac nuh sin mwet sahyac!

KAHSRUH MWET SAHYAC IN EKLAC KAWUCK LUHN GOD

8. Efuh kuh mwet kuluk uh enenuh in fototo nuh sin God?

⁸ Mwet uh fin tiac ahkkahlwemye luhlahlfongi laltahl nuh ke mwe kihsac lal Jesus uh, God el liyacltahl oacna mwet lokoalok lal. Pwacnacng, oasr kunohkohn se lasr in fahk nuh seltahl lah eltahl kuh in eklac kawuck luhn God. Mwet sap John el suhmuhslah: “Kuhtwena mwet suc luhlahlfongi ke wen oasr moul ma pahtpaht lal. Kuhtwena mwet suc seahkos wen fah wacngihn moul lal, a el ac fah muhtana ye kaiyuck luhn God.” (John 3:36) Kuht kuh in engan lah ke srihpen mwe kihsac luhn Christ, kuht kuh in fototo nuh sin God. Paul el ahkuhtweyac ohinge: “Meet kowos muhta loeslac liki God, ac kowos mwet lokoalok lal ke srihpen orekma kuluk ac nuhnak kuluk lowos. A inge, ke srihpen misac in mahno luhn wen nahtuhl, God el oraclah kowos mwet kawuck lac lal.”​—Colossae 1:21, 22.

9, 10. (a) Kunohkohn fuhkah se Jesus el sang nuh sin mwet lili akmuhsralah wiyacl uh? (b) “Kuhtuh sheep” sahyac uh kahsruh fuhkah mwet akmuhsralah uh?

⁹ Christ el sang nuh sin mwet lili akmuhsralah wiyacl fin facluh uh “kunohkohn se inge, in oruh tuh mwet ngiac in mwet kawuck pac lal.” Paul el fahk nuh seltahl: “Ma inge nuhkewa oakwuck sin God, suc, ke Christ, ikihlkuhtlac liki mwet lokoalok nuh ke mwet kawuck lal, ac El acse nuh sesr kunohkohn se inge, in oruh tuh mwet ngiac in mwet kawuck pac lal. Pweng ma kuht sulkackihn uh pa inge. God el oruh tuh mwet nuhkewa in mwet kawuck lal ke Christ. God el tiac oacklah ma kuluk lalos ac el ahkkahlwemye nuh sesr ohiyac se ma el oruh tuh elos in mwet kawuck lal. Ke ma inge, kuht mwet in tahfwema kahs luhn Christ, oacna in God pa sifacna sensenkackihn kowos ke mwe luti lasr. Kuht kwacfe kowos ke inen Christ: ‘Lwelah God elan ikihlkowoslac liki mwet lokoalok nuh ke mwet kawuck lal.’”​—Luo Corinth 5:18-20.

¹⁰ Nuh sin “kuhtuh sheep” sahyac uh, sie kunohkohn na sacohk pa in kahsruh mwet akmuhsralah ke orekma in luti se inge. (John 10:16) In oacna mwet in utuck kahs luhn Christ, “kuhtuh sheep” sahyac uh wi oruh ip se ma yohk emeet ke orekma in luti uh, pa in luti mwet ke ma pwacye ac kahsreltahl in fototo nuh sin Jeova. Ip na yohk srihpac se pa inge ke orekma in luti ke pweng wo ke luhngkuhlwacng luhn God.

LUTI NUH SIN MWET LAH GOD EL LOHNG PUHRUHE UH

11, 12. Efuh kuh pweng wo se nuh sin mwet sahyac uh in lotwelah lah eltahl kuh in puhruhe nuh sin Jeova?

¹¹ Mwet pucspucs eltahl puhruhe ke srihpen ma inge ahkwoye puhlakihn laltahl uh. Tuhsruhktuh, eltahl tiac luhlahlfongi na pwacye lah God el lohng puhruhe laltahl uh. Eltahl enenuh in etuh lah Jeova el lohng ac “topuk puhruhe” uh. David el suhmuhslah: “Mweyen kom topuk puhruhe, mwet in acn nuhkewa ac fah tuhkuh nuh yurum. Ke srihpen ma kuluk lalos, ma suhtuhuh lasr uh kuhtangkuhtlac. Tuhsruhktuh, kom nuhnak muhnahs nuh sesr kac.”​—Psalm 65:2, 3.

¹² Jesus el fahk nuh sin mwet tuhma lutlut lal ah: “Pahpah El ac fah sot nuh suwos kuhtwena ma kowos siyuck sel kac inek.” (John 16:23) Kalmen ma inge pa kuht kuh in puhruhe ke “kuhtwena ma” ma fal nuh ke luhngse luhn Jeova uh. John el suhmuhslah: “Oasr puhlaik lasr ye muhtuhn God, mweyen kuht etuh na lah El lohng kuht ke kuht siyuck sel ke kuhtwena ma suc fal nuh ke ma luhngse lal.” (Sie John 5:14) Fuhkah woiyac in kahsruh mwet sahyac uh in kahlwem kac lah puhruhe uh tiac sie ma in ahkwoyelah puhlakihn laltahl uh, a pa inge sie inkacnek ma kuht kuh in fototoyang nuh ke tron luhn Jeova “yen luhngkuhlwacng oasr we”! (Hebrew 4:16) Ke kuht luti nuh sin mwet sahyac uh in puhruhe ke inkacnek suwohs, nuh sin mwet se ma fal eltahl in puhruhe nuh se, ac srihpac wo in puhruhe siyuck ke sie ma, kuht kahsreltahl in eklac kawuck luhn Jeova ac in kuh in konwacack mwe ahkkweye ke pacl ma eltahl sun ma upac.​—Psalm 4:1; 145:18.

LUHNGKUHLWACNG LUHN JEOVA KE OAKWUCK SASUC UH

13, 14. (a) Kunohkohn sacohk fuhkah se ac fah oasr yurin mwet akmuhsralah uh ke pacl fahsruh uh? (b) Orekma wo fuhkah se mwet akmuhsralah uh ac fah oruh nuh sin mwet uh?

¹³ Jeova el ac ahkkahlwemye luhngkuhlwacng lal uh yohk liki na inge ke oakwuck sasuc se ma fahsruh uh. Ke inkacnek fuhkah? God el ac sang sie kunohkohn na yohk ac sacohk nuh sin 144,000 in weluhl Christ inkuhsrao ac kol. Paul el ahkuhtweyac lah meac kunohkohn se inge ke el suhmuhslah: “Yohklac na pahkotwen luhn God, ac luhngse lal nuh sesr arlacna yohk, pwacnacng ke kuht misac in nguhn ke seahkos lasr, El ahkmoulyekuhtyak oacna ke El ahkmoulyelack Christ. Kowos moliyucklac ke luhngkuhlwacng luhn God. Ke kuht kuhpahsryang nuh sin Christ Jesus, God El ahkmoulyekuhtyak yurin Christ liki nguhn in misac, tuh kuht fah weluhl leumi acn inkuhsrao. El oruh ma inge in ahkkahlwemye nuh ke fihl nuhkewa fahsruh, kasrpen luhngkuhlwacng luhlahp lal, ke luhngse lal suc El ahkkahlwemye in Christ Jesus.”​—Ephesus 2:4-7.

¹⁴ Upac nuh sesr in petsacelah ma wo pucspucs ma Jeova el ahkolah nuh sin mwet Christian akmuhsralah suc fah weluhl Christ inkuhsrao ac kol. (Luke 22:28-30; Philippi 3:20, 21; Sie John 3:2) Jeova el ac fah ahkkahlwemye “kasrpen luhngkuhlwacng luhlahp lal” nuh seltahl ke inkacnek yohk. Eltahl ac eklac “Jerusalem sasuc” ac fah muhtwacn kiyacn Christ. (Fwackyuk 3:12; 17:14; 21:2, 9, 10) Eltahl ac fah weluhl Jesus orekma in “mwe ahkkweyaclah mas luhn muhtuhnfacl uh.” Eltahl ac fah kahsruh mwet pucspucs in sukohsohklah liki ma kuluk ac misac ac kahsreltahl in eklac suwohswohs.​—Riti Fwackyuk 22:1, 2, 17.

15, 16. Ke pacl fahsruh uh, Jeova el ac ahkkahlwemye fuhkah luhngkuhlwacng lal nuh sin “kuhtuh sheep” sahyac uh?

¹⁵ Ephesus 2:7 fahk lah God el ac fah ahkkahlwemye luhngkuhlwacng lal “nuh ke fihl nuhkewa fahsruh uh.” Ke pacl fahsruh uh, mwet nuhkewa fin facluh ac fah puhla “kasrpen luhngkuhlwacng lal” uh. (Luke 18:29, 30) Sie sin inkacnek yohk emeet ma Jeova el ahkkahlwemye luhngkuhlwacng lal nuh sin mwet uh pa ke el ahkmoulyeack mwet pucspucs ke “facl sin mwet misac” kuh inkuclyuck uh. (Job 14:13-15; John 5:28, 29) Suc ac fah sifwil moulyak uh? Mwet oaru suc misac meet liki Christ el kihsackihn moul lal, wekuhnacng “kuhtuh sheep” sahyac ma oaru nuh sin Jeova ac misac ke lwen sahflah inge. Mwet oaru inge nuhkewa ac fah sifwil moulyak ac sifwil tahfwelah in kuhlwacnsuhpuh Jeova.

¹⁶ Million sin mwet pucspucs suc misac ac tiac etuh God ac fah oacyacpac ahkmoulyeyuckyak. John el suhmuhslah: “Nga liye mwet misac uh, mwet fuhlwact ac mwet puhsisacl, elos tu ye muhtuhn tron. Puk nuhkewa ma fahkwack ohiyen orekma luhn mwet uh ikacklah. Ac sie pac puk ikacklah, suc sihmlac inen mwet nuhkewa suc ac fah moul ma pahtpaht yurin God, pa inge puk in moul. Ac mwet misac elos nuhnuhnkweyuck fal nuh ke ma sihmlac in puk inge.” (Fwackyuk 20:12, 13) Ac fah oasr pacl wo luhn mwet suc sifwil moulyak inge in lutlut kacl Jeova ac ahkos kolyuck lal uh. Eltahl ac enenuh in lutlut ac orekmakihn kahs in kahsruh ke Bible wi masap sasuc ma ac fah sihmlac ke “sie pac puk.” Masap sasuc inge pa sie pac inkacnek ma Jeova el ac ahkkahlwemye luhngkuhlwacng lal uh.

TAHFWELAH NA IN FAHKWACK KE PWENG WO

17. Meac kuht enenuh in esam ke pacl ma kuht wi ke orekma in luti uh?

¹⁷ Ke pacl inge, yohk srihpac liki na meet ah kuht in som fahkwack pweng wo ke Tohkohsrahi uh mweyen sahflah uh apkuhran me! (Mark 13:10) Kuht enenuh in esam lah finsrak lasr ke kuht som fahkwack uh pa in sang wolacna nuh sin Jeova. Kuht ac oruh fuhkah ma inge? Kuht enenuh in fahk nuh sin mwet uh lah ke srihpen kuhlwacng yohk luhn Jeova, kuht ac kuh in engankihn mwe insewowo pucspucs ke facl sasuc uh.

18, 19. Kuht sang wolacna nuh ke luhngkuhlwacng luhn Jeova uh ke inkacnek fuhkah?

¹⁸ Ke pacl ma kuht fahkwack nuh sin mwet uh, kuht kuh in ahkuhtweyac nuh seltahl lah ke pacl se ma Christ el muhtwacwacack in kol ke Tohkohsrahi luhn God, mwet uh fah eis ma wo nuhkewa ma tuhkuh ke mwe molwelah ac kuht fah kais kuhtuh na eklac suwohswohs. Bible uh fahk: “Ma oreklac nuhkewa ac fah ahksukohsohkyeyucklac liki ma suc ac kuhlawi, ac ipeis ke sukohsohk wolacna luhn tuhlihk nuhtin God.” (Rome 8:21) Ma inge ac kuh in sikyak ke srihpen luhngkuhlwacng luhn Jeova.

¹⁹ Oasr kunohkohn se yohrohsr in sruhmuhn nuh sin mwet sahyac ke wuhlelah na wo se ma konweyuckyak ke Fwackyuk 21:4, 5: “[God] El ac fah elah sronin muhtahlos nuhkewa. Ac fah wacngihn misac, wacngihn ahsor kuh tuhng kuh kweok, mweyen ma nuhkewa meet ah wacngihnlac.” Ac Jeova, suc muhta fin tron, el fahk: “Inge nga oruh ma nuhkewa sasuc!” El oacyacpac fahk: “Suhmuhslah ma inge, mweyen kahs inge kahs pwacye ac fal in luhlahlfongiyuck.” Ke kuht moniyuck in som fahkwack ke pweng wo nuh sin mwet sahyac uh, kuht sang na pwacye wolacna nuh ke luhngkuhlwacng luhn Jeova!