Efuh Kuht Enenuh In “Taran ac Sano”?

1. Luhmahlah lah efuh kuh yohk srihpac nuh sesr in lohacng nuh ke puhlan pacl ma kuht oasr kac ac ke ma sikyak kuh orek siskacsr uh. (Liye petsac se meet ke mwe lutlut se inge.)

TOENI luhlahp se apkuhran in muhtwacwacack. Chairman kac uh tulac ke platform ac paing mwet nuhkewa. Puhsren on uh ac muhtwacwacack in sritaclkihnyuck. Mwet nuhkewa suc wi kac uh etuh lah pa inge pacl in muhta laltahl uh. Eltahl ke tari lohng on kahto inge ac mwe sramsram nuhkewa ma ac fah sruhmuhnyuck uh. Tuhsruhktuh, sahp oasr kuhtuh seltahl suc tiac lohacng nuh ke ma chairman sac fahk uh ac tiac pacna akihlen lah pusren on uh muhtwacwacack tari. Pwacnacng, kuhtuh seltahl srackna forfor kuh sramsram nuh sin kawuck laltahl uh. Ma sikyak inge ahkkahlwemye nuh sesr ke ma ac kuh in sikyak kuht fin tiac lohacng nuh ke puhlan pacl ma kuht oasr kac uh kuh nuh ke ma sikyak siskacsr uh. Mwe lutlut na yohk srihpac se nuh sesr pa inge ke srihpen ac oasr ma na yohk ma ac fah sikyak ke pacl na sa ac kuht enenuh in ahkolah nuh kac. Meac se ac fah sikyak inge?

2. Efuh kuh Jesus el fahk nuh sin mwet tuhma lutlut lal ah in “taran ac sano”?

² Jesus Christ el sensenkihn mwet tuhma lutlut lal ah ke enenuh laltahl in taran ac ahkolah nuh ke “sahflahiyen facluh” kuh oakwuck kuluk se inge. El fahk nuh seltahl: “Kowos liyekowosyang ac tuhpan, tuh kowos tiac etuh ke pacl se ac sikyak.” Tukun ma inge, el sifwil kalweni pacl puhs: “Kowos in arulacna taran.” (Matthew 24:3; riti Mark 13:32-37) Puk luhn Matthew oacyacpac ahkkahlwemye lah Jesus el sensenkihn mwet tuhma lutlut lal uh ke ma inge. El fahk nuh seltahl: “Ke ma inge kowos tawi ac karuhnguhnwacng, mweyen kowos tiac etuh lwen se Leum lowos el ac tuhkuh.” Ac el sifwil pacna sensenkuhnuhltahl ac fahk: “Kowos enenuh in ahkolah pacl nuhkewa, mweyen Wen nuhtin Mwet el ac tuhkuh ke sie ao ma kowos tiac etuh kac.”​—Matthew 24:42-44; 25:13.

3. Efuh kuh kuht lohacng ahkwoyac nuh ke kahs in sensen lal Jesus inge?

³ Mwet Loh luhn Jeova uh lohacng ahkwoyac nuh ke kahs in sensen ma Jesus el ahkkahlwemye inge. Kuht etuh lah kuht muhta ke lwen “sahflah” ac lwen in “ongaiyac luhlahp” uh ac muhtwacwacack ke pacl na sa! (Daniel 12:4; Matthew 24:21) In oacna ke Jesus el palye, mwet luhn Jeova uh som fahkwack pweng wo ke Tohkohsrahi uh ke yen nuhkewa fin facluh. Ke pacl sacn pacna, kuht liye lah oasr mweun, mas upac, kusrusr ac masrinsracl ke acn pucspucs. Mwet ke alu pucspucs eltahl fohsack ac yohkwelihk ahkmas ac orekma suhlallacl uh liki na meet ah. (Matthew 24:7, 11, 12, 14; Luke 21:11) Ke pacl inge, kuht rahrahlac in sano ke pacl se ma Jesus el ac fah tuhkuh ac ahkpwacyeye oakwuck luhn Pahpah tuhmwacl uh.​—Mark 13:26, 27.

LWEN IN ONGAIYAC LUHLAHP UH APKUHRAN ME!

4. (a) Efuh kuht kuh in luhlahlfongi lah Jesus el etuh tari lah ngac Armageddon ac fah muhtwacwacack uh? (b) Finne kuht tiac etuh lah ngac lwen in ongaiyac luhlahp uh ac fah muhtwacwacack uh, meac kuht kuh in luhlahlfongi na pwacye kac?

⁴ Ke pacl ma kuht som nuh ke sie toeni luhlahp, kuht etuh pacl in muhtwacwacack la uh. Tuhsruhktuh, kuht tiac kuh in etuh lah ngac lwen in ongaiyac luhlahp uh ac fah muhtwacwacack. Ke pacl se Jesus el muhta facluh ah, el fahk: “Wacngihn mwet etuh lah lwen sac kuh ao sac ac tuhkuh ngac, tiac pac lipufacn inkuhsrao kuh Wen. Pahpah muhkefanna pa etuh.” (Matthew 24:36) Ahok, ke srihpen Jesus pa ac kol mweun ke Armageddon uh, sahp el etuh tari lah mweun se inge ac orek ngac. (Fwackyuk 19:11-16) Tuhsruhktuh, kuht srackna nihkihn lwen kuh ao ma lwen in ongaiyac luhlahp uh ac muhtwacwacack. Pa inge srihpac se pwacnacng arlacna yohk srihpac nuh sesr in taran ac sano na. Jeova el sulaclah tari lah ngac lwen in ongaiyac luhlahp uh ac fah muhtwacwacack ac kais sie lwen inge fototo me liki na meet ah. “Pwacye na lah ac sikyak ac tiac kohtlah nwe tok.” (Riti Habakkuk 2:1-3.) Efuh kuht kuh in luhlahlfongi ma inge?

5. Sang sie mwe puhpuhlyuck an in ahkkahlwemye lah fuhkah kahs pahluh luhn Jeova uh pacl nuhkewa ahkpwacyeyuck ke pacl fal.

⁵ Kahs pahluh luhn Jeova uh ahkpwacyeyuck ke pacl fal pacl nuhkewa! Ke sie mwe puhpuhlyuck, nuhnkuh ke lwen se ma el ahksukohsohkyelah mwet lal liki acn Egypt. Ma inge sikyak ke Nisan 14 in yac 1513. Tok, Moses el suhmuhslah ac sruhmuhn ke lwen se inge: “Ke na lwen sahflah ke yac ahngfoko tolngoul, sruf nuhkewa ke mwet luhn LEUM GOD illac liki facl Egypt.” (Exodus 12:40-42) Ke Nisan 14 in yac 1943, yac 430 na fal meet liki mwet Israel inge ahksukohsohkyeyucklac, ahkpwacyeyuck wuhlelah luhn Jeova in ahkinsewowoye fihl in tuhlihk nahtuhl Abraham uh. (Galatia 3:17, 18) Ke kuhtuh pacl tok, Jeova el fahk nuh sel Abraham: “Fihl in tuhlihk nuhtum ac fah mwet sac in sie facl suc tiac facl selos. Elos ac fah mwet kohs we, na ac fah arulacna orek elos kuluk ke lusen yac ahngfoko.” (Genesis 15:13; Acts 7:6) Yac ahngfoko inge muhtwacwacack acwac ke yac 1913 ke pacl se ma Ishmael el muhtwacwacack in oruh kuluk nuh sel Isaac. Ma inge sahflah ke lwen se ma Jeova el ahksukohsohkyelah mwet Israel liki acn Egypt. (Genesis 21:8-10; Galatia 4:22-29) Ahok, yac pucspucs meet liki ma inge, Jeova el oakiyac lwen se ma el fah ahksukohsohkyelah mwet lal uh!

6. Efuh kuht kuh in luhlahlfongi lah Jeova el ac fah molwelah mwet lal uh?

⁶ Joshua pa sie sin mwet Israel ma sukohsohklah liki acn Egypt. Yac pucspucs tohkoh, el ahkacsmakihnye mwet Israel: “Kais sie suwos sifacna etuh insiowos ac in nguhnuwos lah LEUM GOD lowos El sot ma wolacna nuhkewa El tuh wuhlelah kac. Wuhlelah lal nuhkewa ahkpwacyeyuck, wacngihn sie tahfonglac.” (Joshua 23:2, 14) Jeova el wuhlelah in molwelah mwet lal uh liki lwen in ongaiyac luhlahp uh ac in sang nuh seltahl moul ma pahtpaht ke facl sasuc uh. Ac kuht kuh in luhlahlfongi lah wuhlelah lal uh fah ahkpwacyeyuck. Pwacnacng, kuht fin luhngse in wi muhta ke facl sasuc se inge, kuht enenuh in taran ac sano.

TARAN AC SANO TUH KOM IN WI MOULLAC

7, 8. (a) Meac orekma luhn mwet topang uh in pacl meet ah, ac meac mwe lutlut se inge luti nuh sesr? (b) Sang sie mwe puhpuhlyuck an nuh ke ma ac fah sikyak fin mwet topang uh mutullac ke orekma laltahl.

⁷ Oasr mwe lutlut yohk se ma kuht lotwelah sin mwet topang ma liyacacng city in pacl meet ah. City pucspucs inge, wekuhnacng acn Jerusalem ac rauniyucklac ke pot fuhlwact tuh mwet lokoalok laltahl uh in koflah utyak nuh loac. Mukul inge tu fin pot inge ac eltahl kuh in liye acn nuhkewa ma rauneack city laltahl uh. Kuhtuh pac mwet topang uh tu ke mutunpot ke city uh. Mwet topang inge enenuh in taran ac sano ke lwen ac fong, in liye fin oasr mwet lokoalok laltahl ma srihke in utyak nuh we. Fin oasr, na eltahl ac enenuh in sensenkihn mwet ke city uh. (Isaiah 62:6) Eltahl etuh lah yohk srihpac eltahl in ngwetngwet na ac taran ke ma ac sikyak uh. Eltahl fin tiac, mwet pucspucs ac kuh na in misac.​—Ezekiel 33:6.

⁸ Josephus, suc suhmuhslah ke mwe sramsram luhn mwet Jew in pacl meet ah, el ahkuhtweyac lah fuhkah mwet Rome uh utyak nuh in acn Jerusalem ke yac 70 tukun pacl luhn Christ. Mwet suc topangi kuhtuh ipin acn ke city uh mutullac. Pwacnacng, mwet solse luhn acn Rome ah kuh in utyak nuh ke city uh. Eltahl som nuh ke tempuhl, esuhkack ac kuhnahoslah inkaiyen acn Jerusalem. Pa ingacn ip sahflah se ke ongaiyac luhlahp ma mwet Jew ac puhla.

9. Meac inkaiyen mwet ke pacl inge uh tiac akihlen?

⁹ Inkaiyen government ke pacl inge uh orekmakihn solse laltahl in topangi mahsrol ac technology sasuc nuh ke security system laltahl uh. Mwet ke government inge arlacna taran ke kuhtwena mwet kuh ma suc kuh in ahksensenye mislac luhn muhtuhnfacl laltahl uh. Tuhsruhktuh, eltahl tiac akihlen lah oasr sie government ma arlacna kuh inkuhsrao ma oan ye kolyuck lun Christ Jesus. Ac fah tiac paht, government se inge ac fah mweuni government nuhkewa fin facluh. (Isaiah 9:6, 7, footnote; 56:10; Daniel 2:44) Kuht sano lwen se inge in tuhkuh ac kuht luhngse in ahkolah nuh kac. Ke ma inge, kuht lohacng ahkwoyac nuh ke kahs pahluh in Bible ac tafwela na in oaru in kuhlwacnsuhpuh Jeova.—Psalm 130:6.

TARAN IN TIAC LOHACNG NUH KE MA SAHYAC

10, 11. (a) Meac kuht enenuh in arlac taran, ac efuh? (b) Meac oruh kom in luhlahlfongi lah Devil pa kiacpwelah mwet uh in tiac lohacng nuh ke kahs pahluh in Bible?

¹⁰ Srihke petsacelah ke nuhnak lom an ke sie mwet topang suc ngwetngwet ke fong fohn se. Ke ao ekahsr luhlah ke pacl in topang lal uh, upac nuh sel in ngwetngwet na mweyen el arlacna tohtohlah. Ke inkacnek oacpacna inge, kuht moul ke lwen sahflah luhn facl se inge. Ac ke kuht fototoeni nuh ke sahflah uh, ac upaclah nuh sesr in tiac mutul. Sie mwe ahsor yohk kuht fin tiac kwacfeacng in taran ac sano! Lwelah kuht in sramsramkihn ma tolu ma kuh in tulokihnkuhti in tiac mutul.

¹¹ Devil el kiacpwelah mwet uh. El pa “leum luhn facluh”. Tiac paht meet liki Jesus el misac, el ahkacsmakihnye mwet tuhma lutlut lal ke ma se inge pacl tolu. (John 12:31; 14:30; 16:11) Satan el orekmakihn alu kikiacp in sang kiacpwelah mwet uh. Pa ingacn srihpac se pwacnacng puhs mwet ke pacl inge suc tiac lohacng nuh ke kahs pahluh in Bible ma ahkkahlwemye kahlwem lah sahflah luhn facl kuluk se inge arlacna apkuhran. (Zephaniah 1:14) Arlac kahlwem lah Satan el “ahklohsrye nuhnak” luhn mwet suhlahlahlfongi. (Luo Corinth 4:3-6) Ke srihpac se inge, ke kuht srihke in fahkwack nuh sin mwet lah sahflahiyen facl kuluk se inge apkuhran me ac Christ el ingena kol, puhs selos tiac luhngse in lohng. Eltahl kwacna fahk, “Nga tiac insewowo in lohng.”

12. Efuh kuht enenuh in tiac lwelah Devil elan kiacpwekuhtlac?

¹² Finne puhs mwet suc tiac luhngse in etuh ke kahs pahluh in Bible, kuht tiac enenuh in lwelah kain in ohiyac inge in ahkmuhnahsye kuht. Kuht etuh lah efuh yohk srihpac in taran na. Paul el fahk nuh sin mwet lili wiyacl: “Tuh kowos sifacna arulacna etuh lah Lwen luhn Leum ac tuhkuh oacna sie mwet pihsrapasr ke fong.” (Riti Sie Thessalonica 5:1-6.) Jesus el sensenkihn kuht: “Kowos in ahkolah, tuh Wen nuhtin Mwet el ac fah sikme ke ao se suc kowos tiac etuh kac.” (Luke 12:39, 40) Tiac paht, Satan el ac kiacpwelah mwet uh ke el oruh eltahl in nuhnkuh muh oasr “mislac ac wona” ma nuhkewa fin facluh. Tukun ma inge, lwen luhn Jeova ac fah sa na in tuhkuh ac eltahl ac fah arlacna lut. Ac fuhkah nuh sesr? Kuht fin luhngse in ahkolah ke lwen sacn ac tiac kiacpweyucklac oacna mwet pucspucs uh, kuht enenuh in “ngwetngwet ac ngucsrihk na.” Pa sis, kuht enenuh in riti Kahs luhn God lwen nuhkewa ac nuhnkuh yohk ke ma Jeova el fahk nuh sesr kac uh.

13. Nguhn luhn facluh ahkkulukye mwet uh fuhkah, ac kuht kuh in lain fuhkah mwe ahkkuluk ma tuhkuh kac uh?

¹³ Nguhn luhn facluh kihfaslah inkacnek in nuhnak luhn mwet uh. Puhs mwet ke pacl inge puhla muh eltahl tiac enenuh in etuh ke God. (Matthew 5:3) Pwacnacng, eltahl orekmakihn inkaiyen pacl ac kuh laltahl uh in eis ma pucspucs ke facluh. (Sie John 2:16) Oacyacpac, oasr kain in mwe ahkengan ma mwet uh pwacr kac ac ma inge ahkkweyacltahl in luhngse mwe pwacr ac ahkyohkye kena laltahl inge yohk liki na meet ah. (Luo Timothy 3:4) Ma inge kihfaslah mwet uh liki ma yohk srihpac emeet, ac eltahl tiac nuhnkuh ke fototo laltahl nuh sin God. Pwacnacng, Paul el ahkacsmakihnye mwet Christian uh lah “pacl in nguhtwaclihk liki mutul” ke eltahl tiac orekmakihn moul laltahl in ahkfalye kena laltahl uh.​—Rome 13:11-14.

14. Kahs in sensen fuhkah kuht kuh in konwacack in Luke 21:34, 35?

¹⁴ Kuht luhngse in nguhn luhn God a tiac nguhn luhn facluh pa kahsre kuht ke nuhnak lasr uh. Ke inkacnek luhn nguhn lal, Jeova el kahsre kuht in kahlwem na pwacye ke ma ac fah sikyak. (Sie Corinth 2:12)^[1] (Liye endnote.) Tuhsruhktuh, kuht enenuh in taran. Finne ma suc tiac arlacna yohk srihpac ke moul ac kuh in kihfuhskuhtlac ke kuhlwacnsap lasr nuh sin Jeova. (Riti Luke 21:34, 35.) Sahp, mwet sahyac uh ac fahk nuh sesr muh kuht lahlfon in luhlahlfongi muh kuht muhta ke lwen sahflah ke facluh kuluk se inge. (Luo Peter 3:3-7) Tuhsruhktuh, kuht tiac enenuh in lwelah eltahl in ahkmuhnahsye kuht. Oasr mwe ahkpwacyeye lasr lah ke pacl na sa sahflah uh ac fah tuhkuh. Kuht fin luhngse nguhn luhn God in kihfuhskuhtlac, kuht enenuh in wi mwet lili wiyacsr uh in wi ke miting pacl nuhkewa.

15. Meac sikyak nuh sel Peter, James, ac John, ac ma inge ac kuh pac in sikyak nuh sesr fuhkah?

¹⁵ Ohiyac sesuwohs lasr uh ac oruh in upac nuh sesr in taran pacl nuhkewa. Jesus el kahlwem kac lah mwet uh sesuwohs ac oasr mwe muhnahs laltahl. Nuhnkuh ke ma sikyak ke fong se meet liki Jesus el misac. Jesus el finne suwohswohs, el etuh lah in sruokyacna oaru lal uh el enenuh in puhruhe nuh sin Pahpah tuhmwacl in siyuck ke kahsruh. Jesus el siyuck mwet sap Peter, James, ac John in tiac mutul ke pacl se ma el puhruhe. Tuhsruhktuh, mwet sap uh tiac akihlen lah fuhkah yohk srihpaciyac nuh seltahl in tiac mutul. Eltahl tohtohlah, ac mutullac. Jesus el tohtohlah pac, tuhsruhktuh el tiac mutul ac puhruhe nuh sin Pahpah tuhmwacl. Ac pa ingacn ma mwet sap lal ah enenuh in oruh ke pacl sac.​—Mark 14:32-41.

16. In fal nuh ke Luke 21:36, Jesus el luti kuht fuhkah in “sano”?

¹⁶ Meac kuh in kahsre kuht in “sano” ac ahkolah ke lwen luhn Jeova? Enenuh in oasr kena lasr in oruh ma suwohs pacl nuhkewa. Tuhsruhktuh, oasr pac ma sahyac ma enenweyuck. Lwen ekahsr meet liki Jesus el misac, el fahk nuh sin mwet tuhma lutlut lal lah eltahl enenuh in puhruhe pacl nuhkewa nuh sin Jeova in siyuck ke kahsruh. (Riti Luke 21:36.) In ngwetngwet ac sano ke lwen sahflah uh, kuht oacyacpac enenuh in puhruhe nuh sin Jeova pacl nuhkewa.​—Sie Peter 4:7.

TARAN AC SANO

17. Kuht ac etuh fuhkah lah kuht ahkoekuhtlac nuh ke ma ac fah tuhkuh ke pacl na fototo fahsruh uh?

¹⁷ Jesus el fahk lah sahflah ac fah tuhkuh “ke sie ao ma kowos tiac etuh kac.” (Matthew 24:44) Ke ma inge, kuht enenuh in ahkolah pacl nuhkewa. Tiac pa inge pacl in srihke oruh kain in moul ma facl lal Satan uh fahk muh ac use mwe insewowo. Mwemwe se na pa inge. A, ke inkacnek luhn Bible, Jeova ac Jesus eltahl fahk nuh sesr lah kuht ac kuh in taran ac sano fuhkah. Pwacnacng, lwelah kuht in lohacng nuh ke kahs pahluh in Bible ac ma inge ahkpwacyeyuck fuhkah ke pacl inge. Ac kuht in kwacfeacng in fototoyang nuh sin Jeova ac fihliyac Tohkohsrahi lal uh meet ke moul lasr uh. Na, kuht ac fah ahkolah ke pacl se ma sahflah ac tuhkuh. (Fwackyuk 22:20) Kuht fin ke moullac kuht enenuh in orekmakihn kahs in kahsruh inge!