God El Insewowo ke Ohiyen Oaru Lasr

1, 2. Ma upac fuhkah Jephthah ac tuhlihk muhtwacn se nahtuhl inge sun?

MUHTWACN fuhsr se inge kahsruhsr nuh yurin pahpah tuhmwacl uh in ohsun nuh sel. El arlacna engan in liye lah el moullac fohlohk ke mweun ac. Kuhtanglah luhlahp se luhn pahpah tuhmwacl uh oruh el on ac tacn ke engan. Tuhsruhktuh, el lut ke ma pahpah tuhmwacl uh oruh ac fahk tok inge. El seyac nuknuk lal uh ac wowoyak: “We, acn nuhtihk! Srihpom pa oruh ngan puhla kweok upac nuh in nguhnik inge!” Pahpah se inge fahk nuh sel lah el oraclah wuhlelah se nuh sin Jeova ma ac ekuhllah moul lal uh nwe tok. Kalmen wuhlelah se el oraclah inge pa tuhlihk muhtwacn se nahtuhl uh ac tiac kuh in pahyuck kuh orek tuhlihk. Tuhsruhktuh, tuhlihk muhtwacn se nahtuhl inge sa na tohpohkuhllah ac ahkkweyacl elan sruokyacna wuhlelah lal nuh sin Jeova uh. Kahs lal inge ahkkahlwemye lah el luhlahlfongi na pwacye lah kuhtwena ma Jeova el siyuck sel uh ma ac wo nuh sel. (Mwet Nununku 11:34-37) Ke pahpah tuhmwacl uh liye luhpan luhlahlfongi lal uh, el arlacna kaksakuhnuhl mweyen el etuh lah engan lal in oruh ma inge ac ahkinsewowoye Jeova.

² Jephthah ac tuhlihk muhtwacn se nahtuhl inge luhlahlfongi kacl Jeova ac ke inkacnek lal uh. Eltahl oaru na finne ke pacl ma tiac fihsracsr nuh seltahl. Eltahl luhngse in eis mwe ahkinsewowo sin Jeova ac ma inge pa yohk srihpac emeet nuh seltahl uh.

3. Efuh kuh mwe srihkasrak lal Jephthah ac tuhlihk muhtwacn se nahtuhl inge mwe kahsruh se nuh sesr ke pacl inge?

³ Tiac fihsracsr in oaru nuh sin Jeova pacl nuhkewa. Kuht enenuh in sifacna ahkkweye kuht ac “sruokyac kuh luhlahlfongi” lasr uh. (Jude 3) In kahsre kuht in oruh ma inge, lwelah kuht in lutlut kac lah Jephthah ac tuhlihk muhtwacn se nahtuhl inge muhtwacnglah fuhkah ke ma upac ma sikyak ke moul laltahl uh. Eltahl sruokyac fuhkah oaru laltahl nuh sin Jeova uh?

SRUOKYACNA OARU LOM FINNE KE MWE AHKKULUK LUHN FACLUH

4, 5. (a) Masap fuhkah se Jeova el sang nuh sin mwet Israel ah ke pacl se eltahl utyak nuh ke Facl in Wuhlelah uh? (b) In fal nuh ke Psalm 106, ma upac fuhkah mwet Israel inge sun ke srihpen seahkos laltahl?

⁴ Apkuhran in yac 300 meet pacl sac, Jeova el sapkihn mwet Israel in uniyac mwet nuhkewa ma alu nuh sin god kikiacp ke Facl in Wuhlelah uh. Tuhsruhktuh, eltahl tiac ahkos. (Deuteronomy 7:1-4) Ke lwen nuhkewa, Jephthah ac tuhlihk muhtwacn se nahtuh inge liye ma kuluk ma mwet Israel ah sun ke srihpen eltahl seahkos. Puhs mwet Israel ma muhtwacwacack in etahi mwet Canaan, suc alu nuh sin god kikiacp ac moulkihn moul fohkfohk.​—Riti Psalm 106:34-39.

⁵ Ke srihpen seahkos luhn mwet Israel inge, Jeova el tiac karuhnguhnuhltahl liki mwet lokoalok laltahl uh. (Mwet Nununku 2:1-3, 11-15; Psalm 106:40-43) Sahp nuh sin sucu ma luhngse Jeova inge, upac nuh seltahl in sruokyacna oaru laltahl uh ke lusen yac pucspucs ma arlacna upac. Tuhsruhktuh, Bible uh ahkkahlwemye lah oasr mwet oaru, oacna Jephthah ac tuhlihk muhtwacn se nahtuhl uh, weluhlacng Elkanah, Hannah, ac Samuel. Eltahl sulaclah tari muh eltahl ac ahkinsewowoye Jeova.​—Sie Samuel 1:20-28; 2:26.

6. Mwe ahkkuluk fuhkah luhn facluh oasr ke pacl inge, ac meac kuht enenuh kac?

⁶ Ke pacl lasr uh, nuhnak ac orekma luhn mwet pucspucs oacpacna mwet Canaan. Eltahl nuhnkuh na in oan yurin mwet, ke orekma suhlallacl, ac mani. Tuhsruhktuh, Jeova el use kahs in sensen na kahlwem se nuh sesr. El luhngse in karihngihn kuht oacna ke el luhngse in karihngihn mwet Israel liki mwe ahkkuluk. Yac oasr ma kuht kuh in lotwelah ke ma tahfonglac laltahl uh? (Sie Corinth 10:6-11) Kuht enenuh in sang kuhiyacsr kewa in tiac oacna mwet luhn facluh ke nuhnak laltahl uh. (Rome 12:2) Yac kuht ac sang kuhiyacsr kewa in oruh ma inge?

JEPHTHAH EL SRUOKYACNA OARU LAL FINNE AHKTOASRYEYUCK EL

7. (a) Orekma suhfal fuhkah Jephthah el puhla sin mwet lal sifacna? (b) Meac Jephthah el oruh?

⁷ Ke lwen lal Jephthah, mwet Israel inge eklac mwet kohs luhn mwet Philistia ac mwet Ammon ke srihpen eltahl seahkos Jeova. (Mwet Nununku 10:7, 8) Tuhsruhktuh, ma upac ma Jephthah el sun inge tiac ma tuhkuh sin mwet lokoalok ke muhtuhnfacl sahyac uh muhkwena. Tamuhlel wiyacl ac mwet kol luhn acn Israel uh oruh kuluk nuh sel. Ke srihpen tamuhlel wiyacl inge sok sel ac sruhngwacl, eltahl pahtkollah elan som liki acn we, finne ma lal na pwacye. (Mwet Nununku 11:1-3) Jephthah el tiac lwelah ohiyac kuluk laltahl uh in ahkkulukyacllah. Kuht etuh fuhkah ma inge? Mweyen ke pacl se ma mwet mahtuh ke muhtuhnfacl se lal ingacn siyuck elan kahsreltahl, el sa na in oruh. (Mwet Nununku 11:4-11) Oacna meac se moklel Jephthah elan oruh ma inge?

8, 9. (a) Kahs in kahsruh fuhkah ma oasr ke masap ma ituckyang nuh sel Moses ah kahsrel Jephthah? (b) Meac yohk srihpac emeet nuh sel Jephthah?

⁸ Jephthah el sie mwet mweun na kuh ac el etuh sramsram mahtuh ke mwet Israel wekuhnacng masap ma ituckyang nuh sel Moses ac. Inkacnek ma Jeova el ahkkahlwemye nuh sin mwet lal uh lotwel ke oakwuck luhn God ke ma wo ac ma kuluk. (Mwet Nununku 11:12-27) Jephthah el orekmakihn etwacack ke moul lal uh ke pacl ma el oruh sulaclah lal. El etuh puhlakihn luhn Jeova ke kasrkuhsrak ac fohlohksahk uh ac el etuh pac lah God el luhngse mwet nuhkewa in luhngse sie sin sie. In wekuhnacng ma inge, Masap uh oacyacpac lotwel lah ohiyac fuhkah el enenuh in ahkkahlwemye nuh sin mwet sahyac, finne mwet ma sruhngwacl uh.​—Riti Exodus 23:4, 5; Leviticus 19:17, 18.

⁹ Sahp, mwe srihkasrak lal Joseph uh kahsrel Jephthah. Sahp, el etwaclah in ahkkahlwemye pahkotwen oacna ma Joseph el oruh nuh sin tamuhlel wiyacl, eltahl finne sruhngwacl. (Genesis 37:4; 45:4, 5) Jephthah el fin nuhnkuh ke mwe srihkasrak inge, ac kuh in kahsrel elan oruh ma Jeova el ac insewowo kac uh. Ma tamuhlel wiyacl Jephthah inge oruh nuh sel uh ahkngalyacl na pwacye. Tuhsruhktuh, ma yohk srihpac liki na puhlakihn lal Jephthah uh pa in karihngihn inen Jeova ac mwet lal uh. (Mwet Nununku 11:9) El sulaclah muh el ac oaru na nuh sin Jeova. Kain in ohiyac se inge pa use mwe insewowo luhn Jeova, kewana nuh sel ac mwet Israel nuhkewa.​—Hebrew 11:32, 33.

10. Fuhkah kuht kuh in lwelah kahs in kahsruh luhn Bible uh in kahsre kuht in oacna mwet Christian ke pacl inge?

¹⁰ Yac oasr ma kuht lotwelah ke mwe srihkasrak lal Jephthah uh? Meac kuht ac fah oruh fin mwet lili wiyacsr uh ahktoasrye kuht kuh fin kuht puhla muh eltahl tiac wo nuh sesr? Kuht enenuh in tiac lwelah inse toasr lasr uh in oruh kuht in tiac kuhlwacnsuhpuh Jeova. Nikmet tui in wi ke toeni uh kuh in tilac asruoki nuh sin mwet lili ke congregation uh. Lwelah kuht in etahel Jephthah ac ahkos Jeova. Ma inge ac kahsre kuht in kuhtanglah kuhtwena ma upac tuh kuht in oacyacpac mwe srihkasrak na wowo se.​—Rome 12:20, 21; Colossae 3:13.

MWE KIHSAC LASR UH AHKKAHLWEMYE LUHLAHLFONGI LASR

11, 12. Wuhlelah fuhkah se Jephthah el oraclah ah, ac meac kalmen wuhlelah se inge?

¹¹ Jephthah el etuh lah el enenuh kahsruh luhn God tuh elan ahksukohsohkyelah mwet Israel liki mwet Ammon. El wuhlelah nuh sin Jeova lah el fin lwelah elan kuhtanglah, na mwet se emeet ma tufoki liki lohm sel ke pacl se el fohlohk ke mweun uh ac fah kihsackihnyucklac nuh sel oacna sie “mwe kihsac fihrihr.” (Mwet Nununku 11:30, 31) Meac kalmen ma inge?

¹² Jeova el sruhnga in kihsackihnyuck moul luhn mwet ke mwe kihsac, pwacnacng kuht etuh lah tiac pa inge ma Jephthah el oruh uh. (Deuteronomy 18:9, 10) Ye masap ma ituckyang nuh sel Moses ac, sie mwe kihsac fihrihr el mwe sang na sacohk se ma sie mwet el sang nohfohn nuh sin Jeova. Kalmac pa, mwet se ma Jephthah el ac sang nuh sin Jeova inge ac fah kuhlwacnsap ke lohm nuknuk uh ke lusen moul lal nohfohn. Jeova el lohngohl Jephthah ac kahsrel in kuhtanglah ke mweun sac. (Mwet Nununku 11:32, 33) Pwacnacng, suc Jephthah el ac sang nuh sin Jeova uh?

13, 14. Meac kahs lal Jephthah ma sihmlac ke Mwet Nununku 11:35 ahkkahlwemye ke luhlahlfongi lal uh?

¹³ Nuhnkuh ke ma sikyak ke muhtwacwacyen mwe lutlut se inge. Ke pacl se Jephthah el fohlohk ke mweun sac, mwet se emeet ma tufoki in painguhl ah pa tuhlihk muhtwacn kuloh sefanna nahtuhl ah! Yac Jephthah el ac oaru na ac sruokyac wuhlelah lal uh? Yac el ac sang tuhlihk muhtwacn se nahtuhl inge nuh sin Jeova in kuhlwacnsuhpwacl ke lohm nuknuk uh ke lusen moul lal nohfohn?

¹⁴ Kuht kuh in sifwil liye lah kahs in kahsruh ke masap luhn God uh kahsrel Jephthah in oraclah sie sulaclah na wo. Sahp el esam kahs ke Exodus 23:19, ma sapkihnyuck nuh sin mwet luhn God uh in sang insiacltahl kewa nuh sin Jeova. Masap se inge oacyacpac ahkkahlwemye lah ke pacl se sie mwet el oraclah sie wuhlelah nuh sin Jeova, “elan tiac kuhnahoslah wuhlelah lal a elan oruh ma nuhkewa ma el fahk muh el ac oruh.” (Oekyuk 30:2) In oacna Hannah, sie mwet kuhlwacnsap oaru suc sahp moul ke pacl se pacna inge, Jephthah el enenuh in sruokyacna wuhlelah lal uh, el finne etuh lah meac kalmen ma inge nuh sin tuhlihk muhtwacn se nahtuhl uh ac nuh sel sifacna pac. Ke srihpen tuhlihk muhtwacn se nahtuhl inge ac kuhlwacnsap ke lohm nuknuk ac, el ac tiac kuh in orek tuhlihk ke lusen moul lal. Pwacnacng, wacngihn pac mwet ma ac us inel Jephthah kuh usrui acn lal uh. (Mwet Nununku 11:34) Finne ohinge, Jephthah el oaru ac el fahk: “Nga tuh oraclah wuhlelah na kuh se nuh sin LEUM GOD ac nga tiac kuh in kuhnahoslah!” (Mwet Nununku 11:35) Jeova el engankihn mwe kihsac na yohk se lal Jephthah inge ac el ahkinsewowoyacl. Fin pa kom, yac kom ac oacna Jephthah ke ohiyen oaru lal uh?

15. Wuhlelah fuhkah se inkaiyacsr oraclah tari uh, ac kuht ac ahkpwacyeye fuhkah oaru lasr uh?

¹⁵ Ke pacl se kuht wuhlelah moul lasr uh nuh sin Jeova, kuht wuhlelah nuh sel lah kuht ac oruh ma luhngse lal uh ke insiacsr kewa. Kuht etuh lah ac tiac fihsracsr in sruokyacna wuhlelah se inge. Tuhsruhktuh, fuhkah ohiyacsr ke pacl se siyuckyuck sesr in oruh sie ma ma kuht tiac luhngse in oruh? Kuht fin kuhtanglah puhlakihn lasr uh ac kuht luhngse in ahkos God, kuht ahkpwacyeye lah kuht oaru nuh ke wuhlelah lasr uh. Sahp, mwe kihsac lasr uh arlacna upac in oruh, tuhsruhktuh pacl nuhkewa mwe insewowo luhn Jeova uh wo liki. (Malachi 3:10) Pwacnacng, fuhkah nuh sin tuhlihk muhtwacn se nahtuhl Jephthah inge? Fuhkah ohiyacl nuh ke wuhlelah se luhn pahpah tuhmwacl uh?

16. Fuhkah ohiyen tuhlihk muhtwacn se nahtuhl Jephthah inge nuh ke wuhlelah se luhn pahpah tuhmwacl uh? (Liye petsac se meet ke mwe lutlut se inge.)

¹⁶ Wuhlelah lal Jephthah uh siena luhkel Hannah. Hannah el wuhlelah in sang wen nahtuhl in kuhlwacnsap ke lohm nuknuk oacna sie mwet Nazirite. (Sie Samuel 1:11) Mwet Nazirite uh kuh in pahyuck ac orek tuhlihk. Tuhsruhktuh, tuhlihk muhtwacn se nahtuhl Jephthah inge el oacna sie mwe “kihsac fihrihr” ma fohn, pwacnacng el tiac kuh in engankihn sie moul in pahyuck kuh in orek tuhlihk. (Mwet Nununku 11:37-40, BMK) Srihke nuhnkuh! Sahp, el kuh na in pahyuck nuh sin mukul se ma wo emeet fin acn we ke srihpen pahpah tuhmwacl uh sie mwet kol fin acn Israel. Tuhsruhktuh, el ac eklac sie mwet kuhlwacnsap na puhsisacl ke lohm nuknuk uh. Fuhkah ohiyen muhtwacn fuhsr se inge nuh ke ma ac sikyak nuh sel uh? El ahkkahlwemye lah kuhlwacnsap lal nuh sin Jeova uh pa yohk srihpac emeet nuh sel ke el fahk ma inge nuh sin pahpah tuhmwacl ah: “Oruh nuh sihk ma kom wuhlelah kac an.” (Mwet Nununku 11:36) El kihsackuhnlah kena lal in pahyuck ac orek tuhlihk tuh elan kuhlwacnsuhpuh Jeova. Kuht ac etahi fuhkah ohiyac wo lal in sifacna kihsackuhnuhl?

17. (a) Kuht ac etahi fuhkah luhlahlfongi lal Jephthah ac tuhlihk muhtwacn se nahtuhl inge? (b) Kahs ke Hebrew 6:10-12 ahkkweye kom fuhkah in sifacna kihsackihnkomyang nuh sin Jeova?

¹⁷ Tausin sin mwet Christian fuhsr, kewana mukul ac muhtwacn eltahl engan in kihsackuhnuhltahlacng ac tiac pahyuck kuh eltahl sulaclah in tiac orek tuhlihk ke pacl inge. Efuh? Mweyen, eltahl luhngse in lohacng yohk nuh ke kuhlwacnsap laltahl nuh sin Jeova uh. Oacyacpac, puhs sin mwet mahtuh suc kihsackuhnlah pacl laltahl nuh sin Jeova liki na in sislah pacl yohk laltahl yurin tuhlihk nahtuhltahl kuh nuhtin nahtuhltahl. Kuhtuh seltahl wi orekma in muhsah kuh wi ke lutlut se inge pahngpahng School for Kingdom Evangelizers ac som nuh ke sie congregation ma enenweyuck mwet lili we. Kuhtuh pac mwet lili uh oraclah oakwuck in ahkyohkye orekma in kuhlwacnsap laltahl nuh sin Jeova ke puhlan pacl in Mwe Acsmakihn ke misac lal Jesus. Jeova el ac fah tiacna muhlkuhnlah orekma ac luhngse ma eltahl ahkkahlwemye nuh sel uh. (Riti Hebrew 6:10-12.) Ac fuhkah nuh sum? Yac kom kuh in kihsackuhnlah moul lom in kuhlwacnsuhpuh Jeova ke kuhiyom kewa?

MWE LUTLUT MA KUHT KUH IN LOTWELAH KAC UH

18, 19. Meac kuht lotwelah ke ma suhmuhslah in Bible kacl Jephthah ac tuhlihk muhtwacn se nahtuhl inge, ac kuht ac etaheltahl fuhkah?

¹⁸ Meac kahsrel Jephthah in kuhtanglah ma upac pucspucs lal uh? El lwelah Jeova elan kol sulaclah lal ke moul. El sulaclah elan tiac kihfucsyucklac sin mwet ma raunellah uh. Jephthah el sruokyacna oaru lal uh finne ke pacl ma mwet sahyac uh ahktoasryacl. Jeova el ahkinsewowoyacl Jephthah ac tuhlihk muhtwacn se nahtuhl ah ke eltahl engan in kihsackuhnuhltahlacng inge. El orekmakuhnuhltahl kewa in sang kahsruh nuh ke alu pwacye. Finne ke pacl ma mwet sahyac uh tilac oruh ma wo, Jephthah ac tuhlihk muhtwacn se nahtuhl inge sruokyacna oaru laltahl nuh sin Jeova.

¹⁹ Bible uh kwacfe kuht in “oacna elos suc luhlahlfongi ac muhtweng, na kowos fah eis ma God El wuhlelah kac.” (Hebrew 6:12) Lwelah kuht in etahel Jephthah ac tuhlihk muhtwacn se nahtuhl inge, in etuh lah ke pacl ma kuht sruokyacna oaru lasr uh, Jeova el ac ahkinsewowoye kuht.