Yac Orekma In Luti Lom Uh Oacna Aunfong?
OREKMA in luti lasr uh arlacna yohk srihpac ac sacohk. Tuhsruhktuh, tiac mwet nuhkewa kuht fahkwack nuh se uh ahksacohkye ma inge. Finne mwet suc ahkkahlwemye luhngse laltahl ke pweng in Bible uh, tiac pacl nuhkewa eltahl akihlen yohk srihpaciyac in lutlutkihn Kahs luhn God yohrohsr.
Ke sie mwe puhpuhlyuck, srihke nuhnkuh kacl Gavin. El fahsr wi miting ke Lohm in Toeni uh, tuhsruhktuh el sruhnga lutlut ke Bible. Gavin el ahkuhtweyac lah arlacna srihk etwacack lal ke Bible uh ac el sruhnga mwet sahyac in etuh ma inge. El sensen muh ac siyuckyuck sel elan welah sie alu, el sruhnga pac in kiacpweyucklac el. Meac kom nuhnkuh? Yac oasr kahsruh ma kuh in oruh nuh sel Gavin? Srihke nuhnkuh ke ma wowo ma mwe luti in Bible uh ac kuh in oraclah nuh sin sie mwet. Jeova el tuh fahk nuh sin mwet Israel: “Mwe luti luhk fah puhtat oacna tul in af, ac sikyak fin facluh oacna aunfong . . . oacna af loang nuh fin mah srihsrihk uh.” (Deuteronomy 31:19, 30; 32:2) Lwelah kuht in lotwelah kuhtuh ma ke aunfong ac tuni nuh ke orekma in luti lasr uh tuh kuht in kuh in kahsruh “mwet e nuhkewa” ke inkacnek ma wo emeet uh.—Sie Timothy 2:3, 4.
OREKMA IN LUTI LASR UH AC OACNA AUNFONG KE INKACNEK FUHKAH?
Aunfong uh kais kuhtuh na sikyak. Aunfong uh kais kuhtuh na sikyak ke ohu yen engyeng uh ac eklac nuh ke tul in kof. Kahs luhn Jeova inge “sikyak fin facluh oacna aunfong” fuhkah? El sramsram nuh sin mwet lal uh ke inkacnek kuhlwacng ac fihsracsr ma ahkkahlwemye luhngse. Kuht etahel ke pacl se kuht ahkkahlwemye suhnak nuh ke ma mwet sahyac uh luhlahlfongi kac uh. Kuht ahkkweyacltahl in sifacna orekmakihn nuhnak laltahl uh ac in sifacna oruh sulaclah laltahl. Ke pacl se kuht ahkkahlwemye nuh sin mwet uh lah kuht nuhnkuh kacltahl, mwet uh ac luhngse in lohng ma kuht fahk uh ac orekma in luti lasr uh ac fahlac wo.
Aunfong uh mwe ahkkweye. Orekma in luti lasr uh ac ahkkweye mwet sahyac ke kuht nuhnkuh ke inkacnek pucspucs ma kuht kuh in kahsreltahl in ahkyohkye etwacack laltahl ke ma pwacye uh. Chris, sie mukul lili suc siyuck sel Gavin in lutlut ke Bible, el tiacna pahtkol elan oruh. Tuhsruhktuh, el srihke in konwacack kain in inkacnek ma ac oruh Gavin elan engan in sramsram ke Bible uh. Chris el fahk nuh sel Gavin muh oasr pweng na yohk srihpac se ma sramsramkihnyuck in Bible ac el fin lutlutkihn pweng se inge, ma inge ac kahsrel in kahlwem ke ma sramsramkihnyuck ke miting uh yohk liki na meet ah. Chris el ahkuhtweyac lah, kahs pahluh in Bible uh pa ahkpwacyeye nuh sel in luhlahlfongi lah Bible uh pwacye. Ke srihpac se inge, yohk sramsram laltahl ke ahkpwacyeyacn kahs pahluh inge. Sramsram laltahl inge ahkkweyacl Gavin ac ke srihpac se inge el luhngse in lutlut Bible.
Aunfong uh yohk srihpac nuh ke moul. Ke puhlan pacl ma fol ac paho fin acn Israel, sahp ke lusen mahlwem ekahsr ac wacngihn af. Fin wacngihn ohu se ma oraclah aunfong uh, fukun sahk pucspucs ac kuh in uli ac maslah. Jeova el palye lah ke lwen lasr uh, ac fah oacna ke wacngihn af uh, kalmac pa mwet uh ac maluh “nuh ke kahs in luti sin LEUM GOD.” (Amos 8:11) El wuhlelah lah mwet akmuhsralah uh “fah oacna aunfong suc tuhkuh sin LEUM GOD me,” ke eltahl som fahkwack pweng wo ke Tohkohsrahi uh wi “kuhtuh pac sheep.” (Micah 5:7; John 10:16) Pweng se ma kuht fahkwack inge sie ip ke mwe kahsruh luhn Jeova in sang moul nuh sin mwet suc maluh ke ma pwacye. Yac kuht ahksacohkye pweng se inge?
Aunfong uh mwe insewowo sin Jeova me. (Deuteronomy 33:13) Orekma in luti lasr uh kuh in mwe insewowo se, kuh sie mwe sang nuh sin mwet suc lohng. Sie mwe insewowo nuh sel Gavin pa, lutlut Bible lal uh ke srihpen ma inge kahsrel in konwacack top nuh ke kihsen siyuck nuhkewa lal uh. El sa na kapkapwack, el bacptaislac ac ingena el engan in som fahkwack pweng wo ke Tohkohsrahi uh wi muhtwacn kiyacl uh, Joyce.
Mwet Loh luhn Jeova uh fahkwack pweng wo ke Tohkohsrahi fin facluh nohfohn
AHKSACOHKYE OREKMA IN LUTI LOM UH
In nuhnkuh ke orekma in luti lasr uh oacna aunfong ac kuh in kahsre kuht in kahlwem kac lah kwacfeacng luhn kais sie sesr ke orekma in luti uh arlacna sacohk. Fuhkah? Kais sie tul in kof sang kahsruh na srihsrihk, tuhsruhktuh ke pacl ma tul in kof inge sun million, infohk uh ac sroksroki ke ohu. In oacpacna, ma kais sie sesr oruh ke orekma in luti uh sahp luhman srihklac nuh sesr. Tuhsruhktuh, ke sahflahiyac uh kuht fin oracni orekma ac kwacfeacng luhn million sin mwet kuhlwacnsap luhn Jeova uh, ma loh uh ituckyang nuh sin “mwet nuhkewa” fin facluh nohfohn. (Matthew 24:14) Yac orekma in luti lasr uh sie mwe insewowo sin Jeova nuh sin mwet nuhkewa? Ahok, pweng lasr uh oacna aunfong ma kais kuhtuh na sikyak, mwe ahkkweye ac yohk srihpac nuh ke moul!