SIFAC KE KOLO | KOM KUH IN KAHLWEM KE BIBLE
Eis Kahsruh Kom in Kahlwem ke Bible uh
Srihke petsacelah ke pacl se emeet lom in som muhtwacta ke sie acn. Kom sun kain in mwet, facsin, mongo ac mani ma sasuc nuh sum. Kahlwem lah kom ac luhman fohs kuhtuh.
Sahp kom ac puhla oacpacna ke pacl se emeet ma kom riti Bible uh. Ke kom puhla ohingacn, ac oacna in muh kom fohlohk nuh ke sie acn in pacl meet ah ma kom soenna liye. Kom etwaclah mwet inge pahngpahng mwet Philistine, ke kain in facsin luhn mwet ma “saclihk nuknuk” la, kuh ke mongo se ma pahngpahng manna ac ipin mani kuh drachma. (Exodus 16:31; Joshua 13:2; Luo Samuel 3:31; Luke 15:9) Ma inge nohfohn kom ac fohs kac. In oacpacna ke kom som muhtwacta ke sie acn ma sasuc nuh sum, yac kom ac tiac ke in oasr kahsruh ituckot nuh sum sin sie mwet ma ac kuh in ahkuhtweyac ma inge?
MWE KAHSRUH IN PACL MEET AH
Muhtwacwacack ke pacl se emeet ma ma suhmuhslah uh sihmlac ke yac 1,600 meet liki pacl lal Jesus, oasr mwe kahsruh ma ituckyang nuh sin mwet uh tuh in kahlwem kahs kac inge. Ke sie mwe puhpuhlyuck, Moses, suc mwet kol se emeet luhn muhtuhnfacl Israel, el “ahkuhtweyac ac luti” ma suhmuhslah uh.—Deuteronomy 1:5.
Ke yac tausin sie kuhtuh tohkoh, srackna oasr mwet suc fal in luti ma suhmuhslah uh. Ke yac 455 meet liki pacl lal Jesus, oasr sie un mwet Jew, weacng tuhlihk na puhkantwen ma toeni ke sie siti fin acn Jerusalem ma puhs mwet we. Oasr mwet luti ke Bible we ma lihksreni riti ma suhmuhslah uh nuh sin mwet nuhkewa. Ac eltahl oacyacpac “ahkuhtweyac tuh mwet uh in kuh in kahlwem kac.”—Nehemiah 8:1-8.
Ke yac luhmfoko tohkoh, Jesus Christ el wi ke orekma in luti se pacna inge. El arlacna etweyuck inmahsrlon mwet uh oacna sie mwet luti. (John 13:13) El luti nuh sin un mwet pucspucs ac oacyacpac nuh sin kais sie mwet. Ke sie pacl ah, el sramsram nuh sin mwet na puhkantwen ac el ahkkahlwemye mwe luti na etweyuck se ke finohl ah. “Mwet uh arlacna fwefwelac ke luti lal ah.” (Matthew 5:1, 2; 7:28) Ke yac 33, Jesus el sramsram nuh sin mwet tuhma lutlut luo lal ke eltahl fahsr pe innek uh in som nuh ke sie mura ma oan apkuhran nuh Jerusalem. Ac el ‘ahkuhtweyac nuh seltahl ke Ma Suhmuhslah uh’ ke inkacnek arlacna kahlwem.—Luke 24:13-15, 27, 32.
Mwet tuhma lutlut lal Jesus inge eltahl oacyacpac mwet luti ke Kahs luhn God. Ke sie pacl ah, sie mwet yohk wal la fin acn Ethiopia el riti fuhs se in ma suhmuhslah uh. Philip, sie sin mwet tuhma lutlut, el fahsryang nuh yohrohl ac siyuck sel: “Kuh kom kahlwem ke ma kom riti an?” Mwet Ethiopia se inge tohpkuhl ac fahk: “Nga ac kahlwem fuhkah fin wacngihn mwet ahkuhtweyac nuh sihk?” Na, Philip el ahkuhtweyac kalmen ma suhmuhslah inge nuh sel.—Orekma 8:27-35.
MWE KAHSRUH MA OASR KE PACL INGE
In oacna mwet luti ke Bible in pacl meet ah, ke pacl inge Mwet Loh luhn Jeova wi ke sie orekma in luti ke Bible ke acn 239 fin facluh nohfohn. (Matthew 28:19, 20) Ke kais sie wik, puhs liki million yuc sin mwet suc ma eltahl kahsruh in kahlwem ke Bible. Puhs sin mwet lutlut inge tiac mwet Christian meet. Lutlut inge wacngihn molo ac kuh in orek ke lohm sin mwet lutlut se kuh ke kuhtwena acn ma fal. Oasr pac mwet suc engankihn lutlut laltahl uh ke telefon kuh ke video ma ahkfahsryeyuck ke computer kuh ke kuhtuh pac mobile device sahyac.
Nuhnak muhnahs sramsram nuh sin sie Mwet Loh luhn Jeova in eis kuhtuh pac mwe ahkuhtweyac nuh kac lah kom ac eis fuhkah ma wo ke oakwuck se inge. Kom ac kuh in konwacack lah Bible uh tiac sie puk ma kom tiac kuh in kahlwem kac, a “oasr srihpac in luti ma pwacye, in kai, in ahksuwohsye, ac in ahkuhtweyac ohiyen moul suwohs” tuh kom in “suwohsna ac ahkolah fal nu ke orekma wo nuhkewa.”—Luo Timothy 3:16, 17.
[Mwe ahkuhtweyac srihsrihk ke sra 6]
Kom kuh in downloadiyac sie Bible ah nuhtum kuh siyuck ke sie lutlut Bible ah online ke website se lasr inge, www.jw.org
Liye video se inge Efuh Kom in Lutlut ke Bible? ke www.jw.org
Liye video se inge What Happens at a Bible Study? ke www.jw.org
[Pohk ke sra 7]
Mwe Kahsruh ke Internet
Yac kom luhngse in sifacna liye koanon Bible uh? In muhtwacwacack oruh ma inge, som nuh ke website se inge jw.org. Puhs liki kahs 700 ke website se inge ma ahkuhtweyac ke Bible ac ma inge wacngihn molo. Sahp kom ac engan in eis etwacack ke kuhtuh sifac ten inge:
Kihsen siyuck ma mwet uh kwacna siyuck
▪ Meac srihpen moul uh?
▪ Efuh kuh mwet uh misac?
▪ Meac sikyak ke pacl se kom misac?
(Liye ye BIBLE TEACHINGS > BIBLE QUESTIONS ANSWERED)
Ma upac luhn kais sie mwet
▪ Ma kom kuh in oruh ke pacl ma kom puhla ahsor yohk
▪ Ma kom kuh in oruh kom fin wi ke sie mas upac
▪ Mwe elyah ke mani ac misac ke mani
(Liye ye BIBLE TEACHINGS > BIBLE QUESTIONS ANSWERED)
Mwe kahsruh nuh sin sucu
▪ Kom ac tulokihnyac fuhkah akuhkuhin uh
▪ Tuhfahlah tuhlihk nuhtum an in etuh fosrngahkihn ma kunacltahl
▪ Alken in luti ke ohiyen moul nwacsnwacs
(Liye ye BIBLE TEACHINGS > COUPLES & PARENTS)
Kahs in kahsruh nuh sin mwet fuhsr
▪ Ma kom kuh in oruh fin ahkkulukyeyuck monum
▪ Ma kom kuh in oruh fin mwet se fuhnmweti kom
▪ Ma kom kuh in oruh ke pacl kom puhla muh kom suhpwacr ac muhkwena
(Liye ye BIBLE TEACHINGS > TEENAGERS)