Yac Siofok Ye Kolyuck ke Tohkohsrahi!

“God luhn mislac in sot ma wo nuhkewa ma kowos enenuh in oruh ma luhngse lal.”​—HEBREW 13:20, 21.

ON: 136, 14

KE LUSEN YAC SIOFOK SOMLAH AH . . .

Kuhfwen orekma fuhkah orekmakihnyuck in fahkwelihk pweng wo ke Tohkohsrahi uh?

Meac kuhtuh inkacnek sasuc ma orekmakihnyuck uh?

Mwe ahkpah fuhkah ituckyang nuh sin mwet ma fahkwack ke Tohkohsrahi uh?

1. Kuht etuh fuhkah lah yohk srihpen orekma in luti uh nuh sel Jesus? Ahkuhtweyac.

JESUS el luhngse sramsram nuh sin mwet ke Tohkohsrahi luhn God. Ke pacl se el muhta fin facluh ah, el sruhmuhn ke Tohkohsrahi uh yohk liki kuhtwena sifac sahyac, ac el oruh ma inge puhs liki pacl 100. Tohkohsrahi uh yohk srihpac na pwacye nuh sel Jesus.​—Riti Matthew 12:34.

2. Mwet ekahsr wi lohng ma sap ma sihmlac ke Matthew 28:19, 20 inge, ac efuh kuh kuht fahk ohinge?

² Kihtin pacl tukun Jesus el sifwil moulyak, el ohsun nuh sin un mwet se suc puhs liki mwet 500. (Sie Corinth 15:6) Sahp pa inge pacl se ma Jesus el sapkihn eltahl in luti nuh sin “mwet in muhtuhnfacl nuhkewa.” Orekma se inge tiac na ma fihsracsr se.a (Liye footnote.) El fahk nuh seltahl lah orekma in luti uh ac fah tuhtahflah ke lusen pacl loeloes se, “nwe ke sahflah” oakwuck kuluk se inge. Ke pacl se kom luti pweng wo uh ke pacl inge, kom kahsruh in ahkpwacyeye kahs pahluh se inge.​—Matthew 28:19, 20.

3. Meac ma tolu ma kahsre kuht in som fahkwack ke pweng wo?

³ Tukun Jesus el sang masap inge nuh seltahl in som luti, el fahk: “Nga ac fah wi kowos.” (Matthew 28:20) Pwacnacng Jesus el wuhlelah nuh sin mwet tuhma lutlut lal ah lah el ac fah kol orekma in luti uh ac lah el fah kahsreltahl in luti fin facluh nohfohn. Jeova el oacyacpac wi kuht. El use “ma wo nuhkewa” in kahsre kuht fahkwack. (Hebrew 13:20, 21) Ke mwe lutlut se inge, kuht ac fah sramsramkihn tolu sin ma wo inge: (1) kuhfwen orekma ma ituckuh nuh sesr uh, (2) inkacnek in luti ma kuht orekmakihn uh, ac (3) mwe ahkpah ma ituckuh nuh sesr uh. Ma se meet lwelah kuht in tuni kuhtuh sin kuhfwen orekma ma kuht orekmakihn ke lusen yac 100 somlah inge.

MA PUCSPUCS MA KAHSRUH MWET KUHLWACNSAP LUHN GOD UH IN LUTI

4. Kain in kuhfa pucspucs ma orekmakihnyuck ke orekma in luti lasr uh kahsre kuht fuhkah?

⁴ Jesus el luhmahlah pweng ke Tohkohsrahi uh nuh ke fihtac ma yukwiyucki ke kain in fohk. (Matthew 13:18, 19) In ahkoelah fohk uh, mwet imac se ac enenuh in orekmakihn kain in kuhfa. Ke inkacnek se pacna inge, Tohkohsrah lasr uh use kuhfwen orekma ma kuht ac kuh in orekmakihn in kahsruh mwet sahyac in lohng pweng ma kuht us inge. Kuhtuh sin kuhfa inge orekmakihnyuck ke kihtin pacl na, a kuhtuh srackna orekmakihnyuck nwe ke pacl inge. Tuhsruhktuh kuhfwen orekma inge nuhkewa kahsre kuht in kapkapack ke inkacnek in luti lasr uh.

5. Meac se inge testimony card, ac orekmakihnyuck fuhkah?

⁵ Ke yac 1933, mwet lili uh muhtwacwack in orekmakihn testimony card, sie kuhfa ma kahsruh mwet pucspucs in muhtwacwacack luti. Ma inge kihtin pwepuh se ma sihmlac sie pweng wo in Bible uh ke kahs na fototo ac fihsracsr in ritiyuck. Kuhtuh pacl ah oreklac card sasuc wi pweng sasuc se kac. Brother Erlenmeyer el yac 10 ke pacl se el orekmakihn testimony card inge ke pacl se meet. El ahkuhtweyac: “Kahs in muhtwacwack se kac ah pa, ‘Kom kuh in nuhnak muhnahs riti card se inge?’ Tukun mwet in lohm sacn riti, kuht ac ahkkahlwemye mwe rit se nuh sel na kuht som.”

6. Testimony card inge mwe kahsruh se fuhkah?

⁶ Testimony card inge kahsruh mwet lili ah ke inkacnek pucspucs. Ke sie mwe puhpuhlyuck, kuhtuh sin mwet lili ah mwekihn. Ac eltahl finne luhngse na pwacye in wi fahkwack, eltahl nihkihn ma eltahl in fahk. Kuhtuh sin mwet lili inge arlacna puhlaik. Eltahl fahk nuh sin mwet in lohm inge ma nuhkewa ma eltahl etuh uh ke minit na ekahsr, tuhsruhktuh inkacnek ma eltahl oruh ma inge uh tiac wo pacl nuhkewa. Testimony card inge kahsruh mwet lili uh in ahkkahlwemye pweng ma fihsracsr ac kahlwem nuh sin mwet.

7. Meac kuhtuh ma upac ke orekmakihnyen card se inge?

⁷ Oasr pac ma upac. Sister Grace Estep el fahk: “Kuhtuh pacl uh ac siyuckyuck sesr, ‘Efuh, meac sihmlac kac an? Kom tiac kuh in fahkma na nuh sihk?’” Oacyacpac, kuhtuh sin mwet in lohm inge tiac kuh in riti ma sihmlac ke card inge. Kuhtuh sruokyac na card inge ac kaliyac sruhnguhl laltahl uh. Kuhtuh pac sruhnga lohng pweng kuht us ah, pwacnacng eltahl lihseyac card inge. Tuhsruhktuh, finne ke ma upac inge, testimony card uh kahsruh mwet lili ah in som luti mwet tuhlan laltahl uh ac in akihlenyuck oacna mwet luti ke Tohkohsrahi uh.

8. Orekmakihnyuck fuhkah portable phonograph inge? (Liye petsac se meet ke mwe lutlut inge.)

⁸ Sie pac kuhfwen orekma ma orekmakihnyuck ke yac 1930 kuhtuh pa portable phonograph. Kuhtuh sin mwet lili inge pahngon ma inge Aaron ke srihpen mwe sritacl disc luhlahp inge pa oruh inkaiyen sramsram uh. (Riti Exodus 4:14-16.) Mwet in lohm se fin insese in lohng, mwet lili inge ac sritaclkihn mwe sramsram na fototo ma tuhkuh ke Bible ac sang kuhtuh mwe rit uh nahtuhltahl. Oasr pacl ma sucu na fohn se ac tuhkweni muhta lohng mwe sramsram se! Ke yac 1934, Watch Tower Society muhtwacwacack in oruh portable phonograph ma oreklac na nuh ke orekma in luti uh. Tok kuhtuh, mukul lili ah recordiyac mwe sramsram 92.

9. Meac kuhtuh ma wo ke portable phonograph inge?

⁹ Ke Brother Hillary Goslin el lohng sie mwe sramsram inge, el ngihsraclah sie phonograph inge ke wik se ac som sang mwet tuhlan lal ah in lohng pweng ke Bible uh. Ke srihpen ma inge, mwet ekahsr ahkkahlwemye luhngse laltahl nuh ke ma pwacye uh ac bacptaislac. Tok kuhtuh, tuhlihk muhtwacn luo nahtuhl Brother Goslin wi lutlut se inge pahngpahng Gilead School ac eklac missionary. In oacna testimony card sac, portable phonograph se inge kahsruh mwet lili pucspucs in muhtwacwacack wi oruh orekma in luti uh. Ac ke srihpen Lutlut in Oruh Ma Luhngse luhn Jeova, Tohkohsrah el ac fah ahkpahye mwet lal uh in eklac mwet luti na wowo.

OREKMAKIHN KAIN IN INKACNEK NUHKEWA IN SUN MWET UH

10, 11. Newspaper ac retio uh orekmakihnyuck fuhkah in luti ke pweng uh, ac efuh kuh arlacna wo inkacnek inge?

¹⁰ Ye kolyuck luhn Tohkohsrah lasr uh, mwet luhn God uh orekmakihn kain in inkacnek in ohsun nuh sin mwet pucspucs ke orekma in luti uh. Inkacnek in luti inge nuhkewa arlacna yohk srihpac nuh ke pacl ma suhpuhs mwet in oruh orekma inge. (Riti Matthew 9:37.) Ke sie mwe puhpuhlyuck, ke yac pucspucs somlah, orekmakihnyuck newspaper uh in fahkwack pweng wo. Ke kais sie wik, Brother Russell el suhpwaclah mwe sramsram se nuh ke sie company ma orek news. Na eltahl ac suhpwaclah mwe sramsram lal inge nuh ke acn in orek newspaper fin acn Canada, Europe ac United States. Ke yac 1913, mwe sramsram lal Brother Russell inge ituckyang nuh ke newspaper 2,000 ac apkuhran nuh ke mwet 15 million ma riti!

¹¹ Orekmakihnyuck pac retio uh nuh ke orekma in luti pweng wo uh. Ke April 16, 1922, Brother Rutherford el oruh sie sin mwe sramsram lal ke retio ac apkuhran nuh ke mwet 50,000 wi lohng kac. Ke kihtin pacl na, kuht muhtwacwacack orekmakihn retio station se lasr sifacna pahngpahng WBBR ac program se emeet ma lohngyuck kac inge orek ke February 24, 1924. Watch Tower ke December 1, 1924 uh fahk muh: “Kuht luhlahlfongi lah retio uh pa fihsracsr molo ac wo emeet in fahkwelihk pweng ke ma pwacye liki kuhtwena ma orekmakihnyuck emeet me.”Retio uh kahsre kuht in sun mwet pucspucs ke acn ma suhpuhs mwet lili we, in oacna newspaper uh.

12. (a) Piyac kain in inkacnek in sang ma loh ke acn ma puhs mwet we kom engankihn emeet uh? (b) Meac ac kuh in kahsre kuht in kuhtanglah sahngweng lasr nuh ke orekma in luti ke acn ma puhs mwet we?

¹² Orekma in sang ma loh ke acn ma puhs mwet we pa sie inkacnek wo ma orekmakihnyuck in sun mwet pucspucs ke pacl inge. Arlacna yohk kwacfeacng luhn mwet lili uh nuh ke orekma in luti nuh sin mwet ke acn in park stosah, ohfuhs, nien kuhka ac ke kuhtuh pac acn sahyac. Yac kom tuhfal in wi ke orekma in sang ma loh ke acn ma puhs mwet we uh? Fin ahok, puhruhe siyuck ke kahsruh ac nuhnkuh ke ma Brother Manera, suc sie mwet fuhfahsryacsr el fahk inge: “Kuht liye kais sie ip ke orekma in luti uh oacna sie pac inkacnek in kuhlwacnsuhpuh Jeova, sie pac inkacnek in ahkpwacyeye oaru lasr nuh sel, ac in ahkpwacyeye lah kuht arlacna engan in kuhlwacnsuhpwacl ke inkacnek nuhkewa el siyuck sesr in oruh.” Ke pacl se kuht kuhtanglah sahngweng lasr uh ac kuht orekmakihn inkacnek sasuc in luti, kuht ahkkweye luhlahlfongi lasr nuh sin Jeova ac kuht eklac mwet luti na wowo.​—Riti Luo Corinth 12:9, 10.

13. Efuh kuh inkacnek na wowo se pa in orekmakihn website lasr uh ke orekma in luti uh, ac meac kuhtuh ma wo ma sikyak nuh sum ke kom orekmakihn an?

¹³ Mwet lili pucspucs engan in sruhmuhn ke website se lasr inge, jw.org, tuh eltahl in riti ac downloadiyac mwe rit ma tuhkuh in Bible ke kahs puhs liki 700. Ke kais sie lwen, puhs liki mwet 1.6 million som nuh kac ac liye website se lasr inge. In pacl meet ah, retio uh us pweng wo uh ac sun mwet ke acn ma oan srenglah. Ke pacl inge, website lasr uh oruh oacpacna.

AHKPAHYE MWET LUTI KE PWENG WO UH

14. Mwe ahkpah fuhkah mwet lili uh enenuh, ac lutlut fuhkah se kahsreltahl in eklac mwet luti na wowo?

¹⁴ Kuhfwen orekma ac inkacnek pucspucs ma kuht sramsramkihn ne ingena inge nohfohn arlacna wo. Tuhsruhktuh, enenuh in ahkpahyeyuck mwet lili in pacl meet ah in eklac mwet luti. Ke sie mwe puhpuhlyuck, kuhtuh pacl uh mwet in lohm uh tiac insese ke ma eltahl lohng ke phonograph inge. Kuhtuh pacl uh mwet in lohm inge arlacna luhngse ma eltahl lohng uh ac eltahl ke ahkyohkye etwacack laltahl uh. Mwet lili uh enenuh in etuh lah eltahl ac kuhtanglah fuhkah kuhtwena kahs in lain ke inkacnek wo ac in kapkapack oacna sie mwet luti wowo. Wacngihn ahlohloh kac lah ke mwe kahsruh ke nguhn luhn God uh, Brother Knorr el liyacack lah arlacna yohk srihpac mwet lili uh in etwaclah sramsram. Pwacnacng muhtwacwacack ke yac 1943, congregation pucspucs oakiyac lutlut se inge pahngpahng Lutlut in Oruh Ma Luhngse luhn Jeova (Theocratic Ministry School). Lutlut se inge kahsruh mwet nuhkewa in eklac mwet luti wowo.

15. (a) Meac sikyak nuh sin kuhtuh mwet lili uh ke eltahl wi ke Lutlut in Oruh Ma Luhngse luhn Jeova? (b) Wuhlelah luhn Jeova in Psalm 32:8 ahkpwacyeyuck fuhkah nuh sum?

¹⁵ Puhs mukul lili suc suhpah in tuyak sramsram ye muhtuhn mwet. Brother Ramu el esam sramsram se meet lal ke yac 1944. Mwe sramsram se inge ma ke mwet se in Bible inge Doeg. El fahk: “Niyuck, pouk ac wihsihk kewa na rarrar.” El oacyacpac fahk: “Pa inge pacl se emeet nga tuyak nuh meet in sramsram, tuhsruhktuh nga tiac na fuhleack.” Finne tiac fihsracsr, oasr pac tuhlihk suc oruh mwe sramsram ke lutlut se inge. Brother Manera el esam ma sikyak nuh sin sie tuhlihk mukul ke el tuyak in oruh sramsram se emeet lal: “El arlacna tuhfal oruh ke el muhtwacwacack ke sramsram se lal ah, el tuhng. Tuhsruhktuh, el kwacfeacng in ahksahfyelah, el finne tuhng na sramsram ke lusen pacl nohfohn sac.” Sahp kom tiac wi top ke pacl in toeni uh mweyen kom mwekihn kuh kom puhla muh kom tiac kuh in top. Fin pa inge ma kom puhla uh, siyuck sin Jeova elan kahsre kom kuhtanglah sahngweng se lom inge. El ac kahsre kom oacna ke el kahsruh mwet lutlut meet ke Lutlut in Oruh Ma Luhngse luhn Jeova.​—Riti Psalm 32:8.

16. Meac finsrak luhn Gilead School (a) in pacl meet ah (b) muhtwacwacack ke yac 2011?

¹⁶ U luhn God uh use pac mwe ahkpah ke inkacnek luhn lutlut se inge Gilead School. Sie finsrak ke lutlut se inge pa in kahsruh mwet lili suc wi kac inge in ahkkweye kena laltahl nuh ke orekma in luti uh. Gilead School muhtwacwacack ke yac 1943 ac ke pacl sac fahfahsruh, mwet lili 8,500 ahkpahyeyuck kac ac suhpweyucklac nuh ke muhtuhnfacl 170. Ke yac 2011, mwet suc suliyuck in wi lutlut se inge uh pa special pioneer, mwet liyacacng suc fuhfahsryacsr nuh ke congregation pucspucs, mwet suc orekma ke Bethel kuh missionary suc soenna wi lutlut ke Gilead.

17. Fuhkah woiyen mwe ahkpah ke Gilead uh?

¹⁷ Yac Gilead School sang na pwacye kahsruh uh? Ahok. Nuhnkuh ke ma sikyak fin acn Japan inge. Ke August 1949, suhpuhs liki mwet lili singucul ke muhtuhnfacl se inge. Tuhsruhktuh, ke sahflahiyen yac sac, missionary 13 som oruh orekma in luti uh wi mwet lili fin acn we. Ke pacl inge, apkuhran nuh ke mwet lili 216,000 fin acn Japan ac tahfuh seltahl wi ke orekma in pioneer uh.

18. Lutlut fuhkah pac sahyac uh?

¹⁸ Puhs pac kain in lutlut sahyac, oacna Kingdom Ministry School, Pioneer Service School, School for Kingdom Evangelizers, School for Circuit Overseers and Their Wives, ac School for Branch Committee Members and Their Wives. Lutlut inge nuhkewa ahkpahye ac ahkkweye luhlahlfongi luhn mukul ac muhtwacn lili pucspucs. Arlacna kahlwem lah Jesus el srackna ahkpahye mwet pucspucs.

19. Meac Brother Russell el fahk ke orekma in luti uh, ac ma inge ahkpwacyeyuck fuhkah?

¹⁹ Ahluhkwelah tari yac 100 ma Tohkohsrahi luhn God uh kol. Ke lusen pacl se inge, Jesus Christ, suc Tohkohsrah lasr pa kol orekma in luti uh. Ke yac 1916, Brother Russell el luhlahlfongi lah orekma in luti ke pweng wo uh ac fah fahsrelihk nuh fin facluh nohfohn. El fahk: “Orekma uh sa in fahsrelihk ac ma inge ac fah tahfwelah na in fahsrelihk, mweyen oasr orekma se suc enenuh in lutiyuck fin facluh nohfohn ke ‘gospel ke tohkohsrahi uh.’” (Faith on the March, by A. H. Macmillan, sra 69) Orekma se inge orek mihsenge! Kuht kuloh nuh sin Jeova, God luhn mislac ke el use ma nuhkewa ma kuht enenuh in oruh ma luhngse lal uh!

[Sihm srihsrihk e ten]