Kain in Lutlut Fuhkah Orek nuh sin Pioneer Nuhkewa?

Mwet Loh luhn Jeova uh etweyuck ke orekma in luti laltahl ke Bible. Oasr lutlut ma oreklac nuh sin mwet suc sang pacl ac kuh laltahl kewa nuh ke orekma in luti pweng ke Tohkohsrahi tuh eltahl in ‘ahkfalye ma kunacltahl.’​—Luo Timothy 4:5.

Pioneer Service School. Ke pacl se regular pioneer se sun yac se ke orekma in kuhlwacnsap lal uh, el kuh in wi ke lutlut se ma orek ke lusen lwen ohnkohsr ke sie Lohm in Toeni ma fototo nuh yohrohl uh. Srihpen lutlut se inge pa in kahsruh pioneer sacn in fototoyang nuh sin Jeova liki na meet ah, elan kuh in etwaclah na pwacye ip pucspucs ke inkacnek in luti lal uh, ac elan tahfwelah in oaru ke orekma in kuhlwacnsap lal uh.

School for Kingdom Evangelizers. Lutlut se inge orek ke lusen mahlwem luo in ahkpahye pioneer ma yohk experience la ac kuh in som liki acn seltahl in kuhlwacnsap ke sie acn ma yohk enenuh we uh. Ke ma inge eltahl fahk: “Nga inge! Suhpweyuclac” in oacna Jesus Christ, mwet luti se suc wo emeet fin facluh. (Isaiah 6:8; John 7:29) Sahp oasr ma sie mwet suc som liki acn sel uh enenuh in ekuhllah. Kuhtuh sin ma ma el ac enenuh in ekuhllah an pa nuhnak ac puhlakihn lal, ac in moulkihn sie moul fihsracsr. Sahp facsin, puhlan pacl, ac mongo ke acn inge arlacna siena liki ma el pahlah kac uh. Sahp el ac enenuh in lotwelah kahs sasuc ke acn inge. Lutlut se inge kahsruh mwet lili lolacp ac mwet lili pahyuck, suc oasr ke yac 23 nuh ke 65 eltahl in ahkkahlwemye ohiyen mwet Christian ma eltahl ac enenuh in oruh ma kunacltahl ac ma wowo pucspucs ma ac kahsreltahl tuh Jeova ac u lal uh kuh in orekmakuhnuhltahl nuh kac uh.

Watchtower Bible School of Gilead. Muhtwacwacack ke yac 1943, puhs liki 8,000 sin missionary ma ahkpahyeyuck ke Gilead suhpweyuckwelihk eltahl in sang ma loh ke lusen acn na loes ac ke acn lofoko kuhtuh fin “facluh nohfohn.” (Orekma 13:47) Ke kuhtuh sin mwet lili suc wi ke lutlut inge in pacl meet ah tuhfahna sun acn Peru ah, tuh wacngihn congregation ke muhtuhnfacl se inge. Ke pacl inge, puhs liki 1,000 congregation fin acn we. Ke missionary lasr inge muhtwacwacack in oruh kuhlwacnsap laltahl fin acn Japan, suhpuhs liki mwet singucul ke Mwet Loh fin acn we. Ke pacl inge puhs liki mwet 200,000. Ke lutlut se inge, arlacna yohk ac loal ma lutlutkihnyuck ke Bible uh ke lusen mahlwem lihmekohsr inge. Suliyuck mwet ma kuhlwacnsap oacna special pioneer kuh missionary, mwet suc orekma ke ohfuhs luhn Mwet Loh luhn Jeova, kuh mwet fuhfahsryucsr nuh ke congregation pucspucs eltahl in wi ke lutlut se inge, ma yohk ahkpah kac in sang kahsruh ac ahkkweye orekma in luti ma orek fin facluh nohfohn.

• Meac srihpen Pioneer Service School?

• Suc lutlut se inge School for Kingdom Evangelizers oreklac nuh se uh?