SIFAC KE KOLO | MEAC NUHNAK LUHN GOD KE MWEUN UH?

Nuhnak luhn God ke Mweun ke Pacl luhn Mwet Sap ah

Mwet Jew in pacl meet ah ahkkohsyeyuck oacna mwet laltahl meet ah. Wacngihn ahlohloh kac lah pacl pucspucs ma mwet Jew inge puhruhe nuh sin God ke kahsruh ke srihpen ahkkohsyeyuck eltahl ye kolyuck luhn acn Rome. Tohkoh, eltahl lohng kacl Jesus. Yac kuh in ahkpwacyeyuck lah el pa Messiah se ma palyeyuck ah? Tiac mwe lut se lah puhs mwet “finsrak muh el pa ac ahksukohsohkyelah Israel” liki acn Rome. (Luke 24:21) Tuhsruhktuh, wacngihn mwe kahsruh ituckyang nuh seltahl. Ke yac 70 in pacl luhn mwet sap ah, solse luhn acn Rome tuhkuh ac kuhnahoslah acn Jerusalem wi tempuhl fin acn we.

Meac sikyak? Efuh kuh God el tiac kahsruh mwet Jew inge oacna ke el tuh oruh in pacl meet ah? Efuh kuh el tiac pac sang kuh nuh seltahl in som nuh ke mweun se inge ac ahksukohsohkyacltahllah sifacna liki mwe ahkkohs kuh mwe ahkkweok? Yac nuhnak luhn God ke mweun uh eklac? Moh, mweyen mwet Jew inge pa eklac na upac uh. Eltahl pihlesruh Jesus suc Messiah. (Orekma 2:36) Pwacnacng, tuhlac kuh wacngihnlac fototo luhn muhtuhnfacl se inge nuh sin God.​—Matthew 23:37, 38.

Wacngihnlac mwe karihngihn luhn God nuh sin mwet Jew ac nuh ke Facl Wuhlelah. Eltahl tiac pac kuh in sifwil fahk muh oasr kahsruh luhn God nuh ke mweun laltahl inge. Oacna Jesus el tuh palye, mwe insewowo nuhkewa luhn mwet Israel inge som nuh sin un mwet sasuc kuh muhtuhnfacl sasuc se, suc pahngonyuck pac oacna Israel luhn God. (Matthew 21:43) Congregation ke mwet Christian akmuhsralah inge pa kahlwem muh u sasuc se ma etweyuck oacna Israel luhn God. Ac ke pacna pacl luhn mwet sap in pacl meet ah, fwack nuh seltahl: ‘Inge kowos mwet luhn God.’​—Sie Peter 2:9, 10.

Ke srihpen mwet Christian ke pacl luhn mwet sap ah eklac “mwet luhn God,” yac kalmac pa God el mweuni mwet lokoalok laltahl uh tuh eltahl in sukohsohklah liki acn Rome? Kuh yac el sapkihn ac sang kuh nuh seltahl in som mweun lain mwet ma ahkkohsyacltahl inge? Moh, el tiac. Efuh? In oacna mwe lutlut se tari ah ahkkahlwemye, ke mweun nuhkewa ma oakiyucki kuh ahkkweyeyuck, God muhkwena pa sulaclah lah piyac pacl ma mweun inge ac fah orek. God el tiac mweun lain mwet lokoalok luhn mwet Christian in pacl luhn mwet sap ah. Ac el tiac pac sang kuh nuh seltahl in sifacna som mweun. Ma na kahlwem se lah tiac pa inge pacl se ma God el ac ahkwacngihnyelah orekma suhlallacl ac mwe ahkkweok nuhkewa.

Pwacnacng, in oacna mwet kuhlwacnsap luhn God in pacl meet ah, mwet Christian ke pacl luhn mwet sap ah sano na nuh ke pacl se God el ac ahkwacngihnyelah orekma suhlallacl ac mwe ahkkweok. Ac ke lusen pacl se eltahl sano inge, tiac lweyucklac eltahl in sifacna som mweun ac lain mwet lokoalok laltahl uh. Jesus Christ el ahkkahlwemye ma inge in kahlwem ke mwe luti lal uh. Ke sie mwe puhpuhlyuck, el tiac kol mwet tuhma lutlut lal ah in som mweun a el fahk nuh seltahl: “Luhngse mwet lokoalok lowos ac pre kaclos suc kalyei kowos.” (Matthew 5:44) Ke Jesus el palye puhlan pacl se ma solse luhn acn Rome ac fah lain mwet Jew in pacl luhn mwet sap inge, Jesus el sapkihn nuh sin mwet tuhma lutlut lal ah, eltahl in tiac muhta ac wi acnwuck, tuhsruhktuh eltahl in kahing. Ac pa inge ma eltahl oruh ah.​—Luke 21:20, 21.

In wekuhnacng ma inge, mwet sap Paul el suhmuhslah: “Kowos in tiac fohlohksahk, . . . tuh Ma Suhmuhslah uh fahk, ‘Leum God El fahk, Ma luhk in fohlohksahk; nga fah fohlohkihn molin ma kuluk.’” (Rome 12:19) Paul el kalweni ma God el fahk ke yac pucspucs somlah ah ma sihmlac ke Leviticus 19:18 ac Deuteronomy 32:35. In oacna ma kahlwem ke mwe lutlut se tari ah, sie inkacnek ma God el fohlohkihn molin ma kuluk ma orek nuh sin mwet lal in pacl meet ah pa ke el kahsreltahl in mweun lain mwet lokoalok laltahl ah. Pwacnacng, kahs lal Paul inge ahkkahlwemye lah tiac eklac nuhnak luhn God ke mweun uh. Ke pacl luhn mwet sap ah, God el srackna puhla muh mweun uh sie inkacnek in fohlohkihn ma kuluk luhn mwet uh ac in ahkwacngihnyelah pac kain in mwe ahkkweok ac orekma suhlallacl. Tuhsruhktuh, in oacna ke pacl meet ah, God muhkwena pa ac fahk lah piyac pacl se ma mweun inge ac fah orek ac suc ac wi kac uh.

Kahlwem lah God el tiac lwelah mwet Christian in pacl luhn mwet sap ah in som wi ke mweun. Tuhsruhktuh, fuhkah nuh mihsenge? Yac God el lwelah kuhtwena un mwet in wi som nuh ke mweun ke pacl inge? Yac pa inge pacl luhn God in saplakyang ac mweun lain mwet lokoalok nuhkewa luhn mwet kuhlwacnsap lal uh? Meac nuhnak luhn God ke mweun ke pacl inge? Mwe lutlut se tohkoh uh ac fah tohpohklah kihsen siyuck inge nuhkewa.