SIFAC KE KOLO | MEAC NUHNAK LUHN GOD KE MWEUN UH?

Nuhnak luhn God ke Mweun in Pacl Meet ah

Mwet Israel ah ahkkohsyeyuck. Eltahl kalweni na in puhruhe nuh sin God ke kahsruh, tuhsruhktuh ke lusen pacl na loeloes se wacngihn na mwe kahsruh ma ituckyang nuh seltahl. Mwet Israel inge pa mwet luhn God in pacl meet ah. Mwet ma ahkkohsyacltahl inge pa mwet ke muhtuhnfacl Egypt. (Exodus 1:13, 14) Ke lusen yac pucspucs, mwet Israel ah sano God elan tulokihnyac kolyuck kuluk luhn mwet Egypt inge. Ke pacl pakiyucki luhn God, el ahkfahsrye ma el enenuh in oruh uh. (Exodus 3:7-10) Bible uh ahkkahlwemye lah God el sifacna som mweun ac lain mwet Egypt inge. El kalyei acn Egypt ke mwe kweok pucspucs, na el ahkwacngihnyelah tohkohsrah luhn acn Egypt wi solse nuhkewa lal ke Meoa Sruhsrah. (Psalm 136:15) Jeova God el ahkpwacyeye lah el “oacna sie mwet mweun” na kuh suc karihngihn mwet lal.​—Exodus 15:3, 4.

Ke God el sifacna som mweuni mwet Egypt inge, ma inge ahkkahlwemye lah tiac kain in mweun nuhkewa el sruhnga. Ke kuhtuh pac pacl sahyac, el sang kuh nuh sin mwet lal Israel inge in som mweun. Ke sie mwe puhpuhlyuck, el sapkihn eltahl in som mweun lain mwet Canaan, suc arlacna kuluk. (Deuteronomy 9:5; 20:17, 18) El kohluhl Tohkohsrah David luhn acn Israel in som mweuni mwet Philistia ma ahkkohsye mwet sahyac uh. God el oacyacpac oraclah ac sang nuh sel David sie pwacpa ke inkacnek in mweun laltahl tuh elan kuhtanglah na pwacye.​—Luo Samuel 5:17-25.

Ma suhmuhslah nuhkewa in Bible inge ahkkahlwemye lah ke pacl ma ahkkulukyeyuck ac ahkkohsyeyuck mwet Israel inge, God el sang kuh nuh seltahl in som mweun in karuhnguhnuhltahlacng sifacna ac karihngihn alu pwacye. Tuhsruhktuh, esam ma yohk srihpac tolu ma kuht ac fah sramsramkihn ke mweun ma God el lwelah ac oakiyac uh.

1. GOD MUHKWENA PA AC FAHK LAH SUC AC SOM WI MWEUN UH. Ke sie pacl ah, God el fahk nuh sin mwet Israel inge: “Kowos ac fah tiac mweun ke mweun se inge.” Meac srihpac uh? Mweyen God el ac sifacna mweun kacltahl. (Luo Chronicle 20:17; 32:7, 8) Pacl puhs el oruh ma inge, oacna ke fwack ke muhtwacwackiyen mwe lutlut se inge. Ke kuhtuh pac pacl sahyac, God el sapkihn mwet lal inge in som mweun ke mweun ma el lwelah uh, yohkna mweun ma ac karihngihn Facl Wuhlelah sac.​—Deuteronomy 7:1, 2; Joshua 10:40.

2. GOD MUHKWENA PA AC FAHK LAH PIYAC PACL ELTAHL ENENUH IN SOM MWEUN UH. Mwet kuhlwacnsap luhn God inge enenuh in mongfihsracsr ac sano pacl pakiyucki luhn God in som lain ma kuluk ac mwe ahkkweok ma rauneltahllah inge. Ke puhlan pacl ma eltahl sano inge, eltahl tiac kuh in sifacna som ac muhtwacwacack mweun. Eltahl fin seahkos, na wacngihnlac insewowo luhn God nuh seltahl. Bible uh ahkkahlwemye lah ke pacl ma mwet Israel inge som nuh ke mweun ma God el tiac lwelah, ke sahflahiyac uh eltahl sun mwe ongaiyac.a

3. GOD EL TIAC INSEWOWO KE MISAC LUHN MWET UH, FINNE MWET KULUK. Jeova God pa sropon moul ac el pa oraclah mwet uh. (Psalm 36:9) Pwacnacng, el tiac engan in liye ke mwet uh misac. Tuhsruhktuh, mwe ahsor se lah oasr mwet kuluk ma orek pwacpa suhlallacl in ahkkohsye ac uniyac mwet sahyac. (Psalm 37:12, 14) In tulokihnyac orekma suhlallacl inge, oasr pacl ma God el lwelah in mweuniyuck mwet kuluk inge. Ac finne ohinge, ke lusen yac ekahsr somlah ah mwet Israel inge wi ke kain in mweun, el srackna “pahkotwen” ac “mongfihsracsr” nuh sin mwet suc ahkkohsye mwet Israel inge. (Psalm 86:15) Ke sie mwe puhpuhlyuck, meet liki mwet Israel inge som mweun lain sie siti, el sapkihn nuh seltahl in “ahkkahlwemye nuh sin mwet we ke inkacnek in orek mislac,” tuh in sang pacl nuh sin mwet ke acn inge in ekuhllah ohiyacltahl ac in tilac mweun. (Deuteronomy 20:10-13) Ke inkacnek se inge, God el ahkkahlwemye lah el ‘tiac engankihn in liye ke sie mwet kuluk el misac. El kena liye elan tui liki orekma kuluk lal, tuh elan moul.’​—Ezekiel 33:11, 14-16.b

Ke ma nuhkewa kuht sruhmuhn ke nuhnak luhn God nuh ke mweun in pacl meet ah, arlacna kahlwem lah God el liye muh mweun uh pa inkacnek se ma ac ahkwacngihnyelah kain in mwe ahkkweok ac orekma kuluk nuhkewa uh. Tuhsruhktuh, God muhkwena pa fal in fahk lah suc kuh in wi ac lah piyac pacl in som mweun inge, tiac mwet uh. Yac God el som mweun lain muhtuhnfacl sahyac uh ke inkacnek suhlallacl? Moh, el tiac. El sruhnga orekma suhlallacl uh. (Psalm 11:5) Yac nuhnak luhn God ke mweun uh eklac ke pacl se Jesus, Wen nahtuhl el muhtwacwack ke orekma in luti lal ah?

[Sihm srihsrihk e ten]

[Mwe ahkuhtweyac srihsrihk ke sra 4]

God el finne mweun lain mwet Canaan, el molwelah kuhtuh mwet inge oacna Rahab ac sucu lal uh