SIFAC KE KOLO
Meac Nuhnak luhn God ke Mweun uh?
Kom ac topuk fuhkah kihsen siyuck se inge? Puhs mwet suc nuhnkuh muh God el insewowo ke mweun uh. Eltahl nuhnkuh ohinge ke srihpen in pacl meet ah el sapkihn kuhtuh mwet kuhlwacnsap lal in som nuh ke mweun ac ma sihmlac in Bible uh ahkpwacyeye ma inge. Tuhsruhktuh, oasr mwet nuhnkuh muh Jesus, suc Wen nuhtin God, el luti mwet tuhma lutlut lal ah in luhngse mwet lokoalok laltahl uh. (Matthew 5: 43, 44) Pwacnacng eltahl nuhnkuh muh ke kuhtuh srihpac, nuhnak luhn God ke mweun uh eklac ac ke pacl inge el sruhnga orekma in mweun.
Meac kom nuhnkuh? Yac God el insewowo ke mweun uh? Fin ahok, ke pacl ma oasr ma upac ke pacl inge, lacyen oyac kac el wi uh? Kom fin konwacack top nuh ke kihsen siyuck inge, ma inge ac kuh in kahsre kom ke nuhnak lom sifacna ke mweun uh. Ke sie mwe puhpuhlyuck, kom fin etuh lah God el insewowo ke mweun ac el oacyacpac ahkkweye lacyen se ma kom wi ke sie mweun, sahp kom ac engan ke nuhnak lom ke ip sacn ac kom luhlahlfongi lah lacyen lom an ac fah kuhtanglah. Tuhsruhktuh, meac kom ac puhla kom fin konwacack lah God el ahkkweye lacyen se sahyac an? Sahp kom ac ke sulpac nuhnkaclah ahkwoyac sulaclah lom nuh ke lacyen ma kom wi an.
Ma na yohk srihpac se pa kuht enenuh in tuni ingena uh. Ke kom etuh nuhnak luhn God ke mweun uh, ma inge ac kuh in kahsruh nuhnak lom ke God. Kom fin wi inmahsrlon million sin mwet suc kweok ke srihpen mweun, wacngihn ahlohloh kac lah kom enenuh in etuh top nuh ke kihsen siyuck inge, ‘In oacna ke kuhtuh ma mwet uh nuhnkuh uh, yac God el puhrakack ac ahkkweye mwe kweok ma tuhkuh ke mweun? Yac el tiac nuhnkuh ac elyah ke mwet ma orek kuluk nuh se uh?’
Sahp kom ac lut in konwacack lah top luhn Bible uh siena liki nuhnak inge kewa. In pacl meet ah fahsruh nwe mihsenge, nuhnak luhn God ke mweun uh tiacna eklac. Lwelah kuht in nuhnkuh ke ma Bible uh fahk ke nuhnak luhn God ke mweun in pacl meet ah ac ke pacl se ma Jesus el muhta fin facluh ah. Ma inge ac fah kahsre kuht in liye nuhnak luhn God nuh ke mweun ke pacl inge ac in etuh ma ac sikyak nuh ke mweun ke pacl fahsruh uh.