Taran ke Asruoki Lom ke Lwen Sahflah Inge
“Mwet kawuck kuluk uh kuh in kuhnahoslah elah wo uh.”—SIE CORINTH 15:33.
1. Puhlan pacl fuhkah se kuht oasr kac inge?
KUHT muhta ke puhlan pacl na upac se. Bible uh pahngon puhlan pacl se inge “lwen sahflah,” suc muhtwacwack ke yac 1914. Muhtwacwack ke pacl sac ma upac ma sikyak fin facluh arlacna upaclah. (Luo Timothy 3:1-5) Ac kuht etuh lah ma upac inge ac tiac fihsracsruh a ac kuluklac liki na meet ah, mweyen Bible uh palye lah “mwet kuluk ac mwet wosounkahs ac fah yohkyohkwelihk in ma kuluk lalos.”—Luo Timothy 3:13.
2. Kain in sritacl kuh mwe ahkengan fuhkah ma mwet pucspucs uh pwacr kac? (Liye petsac se meet ke mwe lutlut inge.)
2 Mwet pucspucs ke pacl inge pwacr in oruh kuh liye ma ahkmas ac orekma fohkfohk kuh ma oasr mwenmwen kuh inutnut kac. Ke sie mwe puhpuhlyuck, Internet, tv, puk, ac mackuhsin uh kwacna oraclah in muh orekma in kosro ac ahkmas uh tiacna ma kuluk. Ac kain in ohiyac kuh elah ma tuh mwe lut na yohk ke kuhtuh pacl somlah ah, tilac ma kuluk se nuh sin mwet uh pwacnacng ke kais kuhtuh acn tilac acwaclah muh ma inge lain masap. Tuhsruhktuh, tiac kalmen ma inge pa Jeova el macnsiskihn kain in ohiyac inge.—Riti Rome 1:28-32.
3. Meac nuhnak luhn mwet pucspucs ke mwet suc moulkihn moul fal nuh ke oakwuck luhn God?
3 Ke pacl luhn mwet sap ah, oasr mwet ma pwacr in liye ma ahkmas ac orekma fohkfohk. Tuhsruhktuh mwet tuhma lutlut lal Jesus ah tiac, mweyen eltahl moulkihn moul laltahl fal nuh ke oakwuck luhn God. Ma inge oruh mwet ke acn seltahl uh in “lut.” Pwacnacng meac ma sikyak? Mwet ah isrucn ac ahkkulukye mwet Christian inge. (Sie Peter 4:4) Ke pacl inge, oacpacna, puhs mwet ma nuhnkuh muh mwet ma ukwe ac moulkihn oakwuck luhn God uh mwe isrucnyuck se. Ke ma inge, Bible uh sensenkihn nuh sesr lah mwet ma ukwe mwe srihkasrak lal Jesus uh “ac fah kalyeiyuck” pac.—Luo Timothy 3:12.
“MWET KAWUCK KULUK UH KUH IN KUHNAHOSLAH ELAH WO UH”
4. Efuh kuh tiac wo kuht in luhngse facluh?
4 Kuht ac fin ke oruh ma luhngse luhn God, kuht tiac kuh in luhngse facluh kuh kuhtwena ma oan facluh. (Riti Sie John 2:15, 16.) Satan, pa “god kuluk luhn facl se inge” ac el kol facluh nohfohn. El orekmakihn alu, politic, u in business pucspucs ac ma mwet uh liye ke internet, tv, kuh mwe rit in kiacpwelah mwet pucspucs. (Luo Corinth 4:4; Sie John 5:19) Kuht sruhnga facluh in kihfucskuhtlac, pwacnacng kuht enenuh na in fahsr liki asruoki kuluk lasr uh. Arlacna kahlwem kahs in sensen luhn Bible inge: “Kowos in tiac kiacpweyucklac. Mwet kawuck kuluk uh kuh in kuhnahoslah elah wo uh.”—Sie Corinth 15:33.
5, 6. Suc kuht tiac enenuh in asruoki nuh se uh? Efuh?
5 Kuht ac fin ke sruokyac na fototo wowo lasr nuh sin Jeova, kuht ac tiac asruoki nuh sin kuhtwena mwet ma oruh ma kuluk. Ma inge wekuhnacng kain in mwet ma fahk muh eltahl alu nuh sin Jeova tuhsruhktuh eltahl seahkos. Kain in mwet inge fin oraclah sie ma na kuluk ac el tiacna auliyak, kuht enenuh in tiac sifwil asruoki nuh sel.—Rome 16:17, 18.
6 Mwet uh kwacna suk in ahkenganye kawuck laltahl uh ac in luhngseyuck eltahl. Pwacnacng, kuht fin asruoki nuh sin mwet ma tiac ahkos God, eltahl kuh in srihfekuhtlac pac in oruh ma eltahl oruh uh. Ke sie mwe puhpuhlyuck, kuht fin asruoki ac arlacna fototo nuh sin mwet ma pwacrkihn orekma in kosro, kuht ac kuh in eklac oacpacna eltahl. Ma inge sikyak tari nuh sin mwet lili wiyacsr uh. Ac mwet ma tiac auliyak inge sisilac liki congregation uh. (Sie Corinth 5:11-13) Eltahl fin tiac auliyak, ohiyac kuluk ma eltahl sun kuh oasr kac uh ac kuh in sikyak oacna ma Peter el tuh ahkuhtweyac.—Riti Luo Peter 2:20-22.
7. Suc kuht enenuh in sulaclah in kawuck nuh se uh?
7 Kuht luhngse in kuhlwacng nuh sin mwet nuhkewa, ac finne ohinge kuht tiacna enenuh in arlac fototo nuh sin mwet ma tiac ahkos God. Tiac ma wo se nuh sin sie Mwet Loh luhn Jeova suc soenna pahyuck in ahko nuh sin sie mwet ma tiac kuhlwacnsuhpuh God ac tiac pac oaru nuh sel, oacyacpac mwet suc tiac ahkkahlwemye sunak ke oakwuck wowo Lal. Ma yohk srihpac pa God elan insewowo sesr liki na mwet ma tiac luhngse el inge in insewowo sesr. Kuht enenuh in kawuck nuh sin mwet ma oruh ma luhngse luhn God muhkwena. Jesus el fahk: “El suc oruh ma luhngse luhn God pa ma lihk, ma louk, ac ninac kiyuck.”—Mark 3:35.
8. Ma upac fuhkah mwet Israel in pacl meet ah sun ke srihpen asruoki kuluk laltahl?
8 Sahflahiyen asruoki kuluk uh ac use mwe ahsor na yohk. Ke sie mwe puhpuhlyuck, nuhnkuh ke ma sikyak nuh sin mwet Israel ah. Meet liki eltahl sun Facl Wuhlelah, Jeova el sensenkuhnuhltahl ke mwet ma muhta tari we inge. El fahk: “Nik kowos epahsr nuh sin god lalos kuh alu nuh selos, ac nik kowos etahi ohiyen alu lalos. Kuhnauselihk god lalos ac fukulyac loang eot muhtahl lalos. Kowos . . . alu nuh sihk, LEUM GOD [JEOVA] lowos.” (Exodus 23:24, 25) Tuhsruhktuh, inkaiyen mwet Israel inge tiac ahkos ma God el sapkihn nuh seltahl ac eltahl tilac pac oaru nuh sel. (Psalm 106:35-39) Meac sahflahiyac uh? Jeova el tilac insewowo sin muhtuhnfacl Israel ac el sulaclah congregation luhn mwet Christian tuh eltahl in mwet lal.—Matthew 23:38; Orekma 2:1-4.
TARAN KE MA KOM RITI AC LIYE
9. Efuh kuh ma pucspucs luhn facluh, oacna petsac ke tv, internet, ac puk uh kuh in mwe sensen se?
9 Ma pucspucs luhn facluh, oacna petsac ke tv, internet, ac puk kuh in ahkkulukye fototo lasr nuh sin Jeova uh. Kain in ma inge nuhkewa tiac oreklac in kahsruh mwet Christian uh in luhlahlfongi Jeova ac ke wuhlelah pucspucs lal uh. Tuhsruhktuh, ma inge ahkkweye mwet uh in luhlahlfongi facl na kuluk se lal Satan inge. Pwacnacng, kuht enenuh in arlacna taran kuht in tiac liye, riti, kuh lohng kuhtwena ma ac kuh in oruh kuht in luhngse facluh.—Titus 2:12.
10. Meac ac fah sikyak nuh ke ma pucspucs luhn facluh, oacna mwe rit ac petsac fohkfohk?
10 Ke pacl na sa, facl se lal Satan inge wi mwe sensen ke mwe rit ac petsac fohkfohk nuhkewa ac fah wacngihnlac. Bible uh fahk: “Facluh ac ma nuhkewa loac ma mwet uh mwel uh muhtwacwacack in wacngihnlac; a el suc oruh ma luhngse luhn God fah moul ma pahtpaht.” (Sie John 2:17) In oacna, mwet sihm luhn psalm el yuck on soko inge: “Mwet kuluk fah lihsyucklac.” El tahfwelah pac in fahk: “Mwet fakpacp ac fah usrui acn uh, ac elos fah engankihn mwe insewowo ac mislac.” Nwe ngac? “Mwet suwohswohs fah usrui acn uh [facluh], ac elos ac fah muhta fac ma pahtpaht.”—Psalm 37:9, 11, 29.
11. God el kahsre kuht fuhkah in sruokyacna oaru lasr nuh sel?
11 U luhn Jeova uh siena liki facl lal Satan. U se inge kahsre kuht in moulkihn moul lasr ke sie inkacnek ma kol nuh ke moul ma pahtpaht. Jesus el puhruhe nuh sin Jeova ac fahk: “Ac kalmen moul ma pahtpaht pa inge: in etwekom, God pwacye sefanna, ac in etuh Jesus Christ, suc kom suhpwacma.” (John 17:3) Jeova el orekmakihn u lal uh in use ma nuhkewa kuht enenuh tuh kuht in etwacl. Ke sie mwe puhpuhlyuck, puhs mackuhsin, mwe rit, puk, video ac mwe kahsruh ke internet tuh kuht in tahfwelah na in kuhlwacnsuhpuh God. U lal uh oakiyac pac acn kuht in toeni we ke pacl nuhkewa ke congregation pucspucs, ma puhs liki 110,000 fin facluh nohfohn. Ma kuht lotwelah in Bible ke toeni inge ac ke toeni luhlahp uh ahkkweye luhlahlfongi lasr nuh sin Jeova ac nuh ke wuhlelah pucspucs lal uh.—Hebrew 10:24, 25.
PAHYUCK NUH SIN “MWET CHRISTIAN” MUHKWENA
12. Ahkuhtweyac kalmen kahs in kahsruh luhn Bible inge in pahyuck nuh sin “mwet Christian” muhkwena.
12 Mwet Christian ma ke pahyuck uh enenuh in arlacna taran ke mwet ma eltahl sulaclah in asruoki nuh se. Kahs luhn God uh sensenkackihn nuh sesr: “Kowos in tiac kuhpahsryang nuh sin mwet tiac luhlahlfongi ke orekma lowos, mweyen tiacna kuh. Ma suwohs ac ma kuluk ac akacsruhi fuhkah? Kahlwem ac lohsr ac tuhkweni fuhkah?” (Luo Corinth 6:14) Bible uh ahkkahlwemye nuh sin mwet kuhlwacnsap luhn God uh in pahyuck nuh sin “mwet Christian” muhkwena, kalmen ma inge pa kom in pahyuck na nuh sin sie mwet suc wuhleacng moul lal, bacptaislac ac moulkihn moul lal fal nuh ke oakwuck suwohs luhn Jeova. (Sie Corinth 7:39) Kom fin pahyuck nuh sin kain in mwet se inge suc luhngse Jeova, el ac fah kahsre kom in sruokyacna oaru lom nuh sin God.
13. Masap fuhkah ke oakwuck luhn pahyuck ma God el sang nuh sin mwet Israel?
13 Jeova el etuh lah meac wo nuh sesr uh, ac masap se lal inge in pahyuck nuh sin “mwet Christian” muhkwena tiac ma sasuc se. Ke sie mwe puhpuhlyuck, nuhnkuh ke ma Jeova el fahk nuh sin mwet Israel ke mwet ma tiac kuhlwacnsuhpwacl uh. El fahk nuh sel Moses elan sapkihn nuh sin mwet Israel: “Nik kowos pahyuck sin kuhtwena selos, ac nik kowos fuhlwelah wen ac acn nuhtuwos in pahyuck sin kuhtwena selos. Mweyen elos ac muh furohklah tuhlihk nuhtuwos an liki LEUM GOD in alu nuh sin god ngiac. Fin sikyak ohiyac se inge, LEUM GOD El ac kasrkuhsrakack suwos ac sikikowoslac pacl sefanna.”—Deuteronomy 7:3, 4.
14, 15. Meac sikyak nuh sel Solomon ke srihpen el pihlesruh masap luhn Jeova?
14 Kihtin pacl tukun Solomon el eklac tohkohsrah luhn acn Israel, el puhruhe siyuck ke lahlmwetmwet ac Jeova el topuk puhruhe lal uh. Pwacnacng Solomon el pwengpweng ke srihpen lahlmwetmwet lal oacna sie mwet kol ke muhtuhnfacl na kahsruhp se. Ac ke srihpen kasra luhn acn Sheba el arlacna fwefwelac ke lahlmwetmwet lal Solomon inge, el fahk nuh sel: “Ma nga lohng ah tiac sun tahfuhn kahsruhp ac lahlmwetmwet lom, suc arlacna ahluhkwelah ma fwack nuh sihk.” (Sie Tokosra 10:7) Tuhsruhktuh, mwe srihkasrak lal Solomon uh luti pac nuh sesr ma ac kuh in sikyak fin mwet se pihlesruh masap luhn God ac pahyuck nuh sin sie mwet ma tiac kuhlwacnsuhpuh Jeova.—Ecclesiastes 4:13.
15 Finne Jeova el ahkinsewowoyacl Solomon, el seahkos masap luhn God. Solomon “el luhngse muhtwacn sac pucspucs” ma tiac kuhlwacnsuhpuh Jeova. Ke sie pacl ah, muhtwacn 700 kiacl ac muhtwacn kuhlwacnsap [concubine] 300 sahyac. Meac sahflahiyacl? Ke Solomon el mahtohuh, muhtwacn kiacl inge “kihfasuhllah nuh ke alu nuh sin god sahyac. . . . El oruh ma kuluk lain God.” (Sie Tokosra 11:1-6) Asruoki kuluk lal uh kihfasuhllah ac el tilac alu nuh sin Jeova. Ma inge fin kuh in sikyak nuh sel Solomon, ac kuh pac in sikyak nuh sin oacna sie mwet. Pa inge srihpac se pwacnacng kuht tiac pac nuhnkuh in pahyuck nuh sin sie mwet ma tiac luhngse Jeova!
16. Kahs in kahsruh fuhkah Bible uh sang nuh sin sie mwet suc pahyuck nuh sin sie mwet suc tiac wi ke ma pwacye?
16 Ac fuhkah fin sie mwet el welah ma pwacye a mukul kuh muhtwacn kiacl uh tiac wi? Bible uh fahk: “Muhtwacn pahyuck kowos in ahkos mukul tomowos, tuh kuhtwena selos fin tiac luhlahlfongi ke kahs luhn God, orekma wo lowos an ac fah pwacnuhlosme in wi luhlahlfongi. Ac tiac enenuh kowos in fahklah kuhtwena kahs.” (Sie Peter 3:1) Ma inge oacpacna nuh sin sie mukul pahyuck suc muhtwacn kiyac tiac alu nuh sin Jeova. Kahs luhn God uh arlac kahlwem: Kom in sie mukul kuh muhtwacn pahyuck na wowo se ac orekmakihn oakwuck suwohs luhn God ke moul in pahyuck. Ac ke mukul kuh muhtwacn kiyom uh akihlen lah arlacna wo eklac lom uh, el ac kuh pac in eklac ac kuhlwacnsuhpuh Jeova. Pa inge ma sikyak nuh sin siacnyacn pucspucs.
ASRUOKI NUH SIN MWET MA LUHNGSE JEOVA
17, 18. Meac kahsrel Noah elan moullac liki Sronot sac, ac meac kahsruh mwet Christian in pacl meet ah in moullac liki kuhnanuclac luhn acn Jerusalem?
17 Asruoki kuluk uh kuh in kuhnahoslah ohiyac wo ac oruh kom in seahkos Jeova, tuhsruhktuh asruoki wo uh kuh in kahsre kom in oaru nuh sel. Noah el mwe srihkasrak na wowo se nuh sesr. El moul ke puhlan pacl se ma “luhpan kuluk luhn mwet nuhkewa fin facluh ac luhpan nuhnak kuluk lalos” arlacna upac. (Genesis 6:5) Mwet in pacl sac arlacna kuluk pwacnacng Jeova el sulaclah elan kuhnahoslah mwet kuluk nuhkewa fin facluh. Tuhsruhktuh Noah el siena. Bible uh fahk lah, “el moul sie sin sie yurin God, ac el muhkwena moul suwohs ac wacngihn mwactal inmahsrlon mwet nuhkewa in fihl lal.”—Genesis 6:7-9.
18 Noah el tiac asruoki nuh sin mwet ma tiac luhngse Jeova. El ac sucu lal uh kahfofo ke muhsahi oak soko ah ac el oacyacpac sie mwet ma “fahkwack kahs suwohswohs luhn God.” (Luo Peter 2:5) Wo asruoki lal Noah, muhtwacn kiacl, wen tolu nahtuhl, ac muhtwacn kiyacltahl uh nuh sin sie sin sie. Eltahl kahfofo ke orekma ma God el insewowo kac, ac ke sahflahiyac ah eltahl moullac liki Sronot sac. Kuht nuhkewa ke pacl inge tuhkuh sin sucu se inge, pwacnacng kuht enenuh in arlac srui lah eltahl ahkos Jeova ac fahsr liki asruoki kuluk. Ke inkacnek se pacna inge, mwet Christian in pacl meet ah tiac pac asruoki nuh sin mwet ma tiac luhngse Jeova. Eltahl ahkos puhsracl ac moullac liki kuhnanuclac luhn acn Jerusalem ke yac 70.—Luke 21:20-22.
19. Meac ac fah kahsre kuht in sruokyac na oaru lasr nuh sin Jeova?
19 In oacna Noah, sucu lal ah, ac mwet Christian in pacl meet ah, kuht tiac pac asruoki nuh sin oacna sie mwet ma tiac luhngse Jeova. Kuht kuh in sulaclah kawuck lasr inmahsrlon million sin mwet lili wiyacsr. Eltahl ac kahsre kuht in “tu na kuh in luhlahlfongi” ke pacl na upac inge. (Sie Corinth 16:13; Soakas 13:20) Srihke nuhnkuh ke luhpan woiyac in moullac ke sahflahiyen oakwuck kuluk se inge ac in wi muhta ke facl sasuc luhn Jeova! Arlacna yohk srihpac kuht in fahsr liki asruoki kuluk ingena!