Pwacye lah Kuht Kuh In Ahkinsewowoye God?

Ahkuhtweyucki in Bible lah Job el oacna sie mwet “inse pwacye . . . sie mwet na wo.” (Job 1:1) Pahngpahng Lot sie “mwet wo.” (Luo Peter 2:8) Ac fwack muh David el sie mwet suc oruh ma God el “insewowo kac muhkwena.” (Sie Tokosra 14:8) Tuhsruhktuh, kuht srihke tuni ahkwoyac moul luhn mwet inge in Bible. Kuht ac kuh in akihlen lah (1) oasr pacl eltahl tahfonglac, (2) yohk ma kuht kuh in lotwelah ke mwe srihkasrak laltahl uh, ac (3) pwacye, mwet sesuwohs uh kuh pac in ahkinsewowoye God.

OASR PACL ELTAHL TAHFONGLAC

Job el sun kain in ma upac pucspucs ac el tiac kahlwem kac lah efuh ma inge sikyak nuh sel. Tahfonglac nuhnak lal uh, ke el nuhnkuh muh God el tiacna elyah el fin sruokyacna luhlahlfongi lal uh kuh tiac. (Job 9:20-22) Job el luhlahlfongi na pwacye suwohswohs lal uh, pwacnacng nuh sin mwet sahyac uh oacna in muh Job el srihke in fahk muh el suwohs liki God.—Job 32:1, 2; 35:1, 2.

Lot el ahlohloh in oruh sulaclah lal ke sie ma na kahlwem ac fihsracsr. El arlacna “kweok ac toasr” ke srihpen orekma koluk luhn mwet Sodom ac Gomorrah ac ke ohiyacltahl. (Luo Peter 2:8) God el fahkwack tari lah el ac kuhnahoslah siti koluk nuhkewa ac lah el sang pacl na wowo se nuh sel Lot elan us sucu lal uh ac kahinglac. Sahp kom petsacelah muh Lot el ac sa na som ke srihpen ma upac ma sikyak inge. Tuhsruhktuh, ke pacl na yohk srihpac se inge, el kahkahsrisrihk in mukuilac. Enenuh lipufacn ma suhpweyucklac in molwellah ac sucu lal uh in sruokyac paholtahl ac pwacnuhltahllah liki siti se inge.—Genesis 19:15, 16.

Ke sie pacl ah David el tiac ahkkahlwemye ohiyen sifacna leum fac ac el orek kosro nuh sin muhtwacn kiyacn sie pacna mukul. Ma el sulaclah in oruh in okanlah ma sikyak inge uh sie mwe lut, David el uniyac mukul tuhmwacn muhtwacn se inge. (Luo Samuel, sapta 11) Bible uh fahk lah Jeova “el tiac insewowo ke ma David el oruh inge.”—Luo Samuel 11:27.

Job, Lot ac David eltahl kewana oraclah ma tahfonglac, ac kuhtuh sin ma tahfonglac laltahl inge kuluk na pwacye. Tuhsruhktuh, in oacna ke ma kuht ac fah liye, eltahl nohfohn na sang insiacltahl kewa ke kena laltahl in kuhlwacnsuhpuh God. Eltahl engan in ahkkahlwemye lah eltahl auliyak ac ekuhllah ohiyac koluk laltahl inge. Na oruh, God el srackna insewowo seltahl ac yohk liki na, Bible uh pahngloltahl mwet oaru.

MEAC KUHT KUH IN LOTWELAH?

Kuht tiac kuh in fahsr liki ma koluk ke srihpen kuht mwet sesuwohs. (Rome 3:23) Tuhsruhktuh kuht fin oraclah sie ma kuluk, kuht enenuh in ahkkahlwemye lah kuht auliyak na pwacye ac sang kuhiyacsr kewa in ahksuwohsye ma kuluk lasr uh.

Job, Lot ac David ahksuwohsye fuhkah ma tahfonglac laltahl uh? Job el sie mukul suc arlacna oaru ac suwohs. Tukun God el kahskahs nuh sel Job, el ahksuwohsyelah nuhnak lal ac auliyak ke ma el fahk ah. (Job 42:6) Nuhnak lal Lot ke ohiyen moul fohkfohk luhn mwet Sodom ac Gomorah uh oacpacna oakwuck fuhlwact luhn God. Ma se ma tiac wo sel ah pa el tiac suhlahklahk ke pacl se ma salkweyuck el ah. Ne ohinge, el ahkos ac kahinglac liki siti inge ac moullac liki nuhnuhnkuh luhn God. El ahkos ac tiac tahpuhllac in liye ma pucspucs laltahl ke siti se inge. David el oraclah ma koluk upac ke el kuhnahoslah masap luhn God, ne ohinge el ahkkahlwemye lah meac na pwacye oan ke insiacl ke el auliyak na pwacye ac siyuck sin Jeova in nuhnak muhnahs ma koluk lal.​—Psalm 51.

God el etuh na pwacye ke orekma ac ke ohiyen mwet sesuwohs, oacna ke el etuh nuhnak luhn mwet tolu inge. God “el etuh lah meac orekuhtlac uh, lah kuht tuhkuh ke kutkut.” (Psalm 103:14) Ke ma inge, God el fin etuh lah kuht tiac kuh in fahsr liki ma kuluk pacl nuhkewa, meac el ke kuht in oruh?

MWET SESUWOHS UH AC AHKINSEWOWOYE GOD FUHKAH?

Kahs in kahsruh lal David nuh sel Solomon kahsre kuht in etuh pac lah kuht ac ahkinsewowoye fuhkah God. El fahk nuh sel Solomon: “Wen nuhtihk, nga sap kuh nuh sum tuh kom in etuh ac akihlen God luhn pahpah tumom, ac kuhlwacnsuhpwacl ke insewowo ac nuhnak [“inse,” NW] pwacye.” (Sie Chronicle 28:9) Meac se inge nuhnak kuh inse pwacye? Kalmen ma inge pa insiacn sie mwet suc luhngse na pwacye God ac ke in ahkos ma luhngse lal ac ma sap lal. Kain in inse se inge tiac suwohswohs, tuhsruhktuh ma tuhkuh ke insiacn sie mwet ma engan in ahkos God ac luhngse in eis mwe ahksuwohs fin enenweyuck. Ke srihpen eltahl luhngse God ac engan in ahkos ma el fahk, pwacnacng God el pahnglol Job sie mwet “inse pwacye . . . sie mwet na wo,” Lot el pahngpahng sie “mwet wo,” ac David el sie mwet suc oruh ma God el “insewowo kac muhkwena.” Ac finne oasr pacl eltahl tahfonglac, eltahl srackna ahkinsewowoye God.

Pwacnacng ac fin oasr kuhtwena nuhnak kuluk ma kuht sruhnga in ilyak nuh ke nuhnak lasr uh kuh kuht in fahk kuh oruh sie ma kuht ac mwekihnlac kac kuh auli kac tok, kuht kuh in eis mwe ahkkweye ke mwe srihkasrak ma sramsramkihnyuck lucng inge. God el etuh lah suwohswohs uh arlacna loessalah nuh sesr ke pacl inge. Tuhsruhktuh el srackna ke kuht in luhngse na el ac kwacfeacng na in ahkos ma el fahk uh. Kuht fin ac oruh ma inge ke inse pwacye lasr, kuht luhlahlfongi pac lah kuht kuh in ahkinsewowoye God.