Kut Fwa Fwasr In En Jeova God Lasr
“Kut fwa fwasr in En Jeova God lasr ma patpat a ma patpat.”—MAIKA 4:5.
1. Mea ma sikyak ke oiyen met in pal lal Noa, a fuka oiyel Noa el siena liki oiyen met puspus?
MET se meet su akkalemyeyuk in Baibel la el fwufwasryesr wi God pa Inuk. Met se akluo pa Noa. Ma simusla el akkalemye nu sesr: “Noa el met mwo. El sumwosmwos in fwil lal. Noa el fwafwasryesr yurin God.” (Genesis 6:9) In pal lal Noa, met puspus elos som liki alu paye. Oiya koluk in pal sa yokyokelik ke sripen lipufon sesumwos puspus su orek payukyak nu sin mutan puspus nutin metu su akwuk inge tia mwo, a oswela tulik nu selos su pangpang Nefilim, elos “met ku,” a “met pengpeng” in pal ingo. Tia me lut ke sripen fwalu sesesla ke ma koluk! (Genesis 6:2, 4, 11) Ne oinge, Noa el akpayeye nu sel sifwana la wangin meta lal a el “sie met luti lun sumwosmwos.” (2 Piter 2:5) Ke pal se sapkinyuk nu sel in musai soko oak in sang molela moul lun ma orekla puspus, Noa el akkalemye akosten lal a “Noa el oru; oana ma nu kemwa God El sap nu sel. Oinge el orala.” (Genesis 6:22) Paye, Noa el fwufwasryesr wi God.
2, 3. Me srikasrak mwomwo fuka Noa el orala nu sesr ke pal inge?
2 Poul el akkalemyel Noa ke ma simusla lal ke oiyen met lo oaru ke el simusla: “Ke lalalfongi Noa ke God El kaifwel ke ma su sumwena tuku, in sangeng lal sin God el akoela soko oak nu ke molela lun sou lal; a ke ma inge el lusla fwalu, a el ekla met usru nu ke sumwosmwos fwal nu ke lalalfongi.” (Hibru 11:7) Sie me srikasrak na mwomwo pa inge! Meyen el lulalfongi la kas lun Jeova fwa akpayeyuk, Noa el orekmakin pal lal, ku lal, a ma saok puspus lal in akpayeye masap nukemwa lun God. Ke luma su oana sie, met puspus ke pal inge elos tia eis pal mwomwo lalos in suk ma puspus ke akwuk lun fwalu a elos orekmakin pal lalos, ku lalos a ma saok puspus lalos in akos masap lun God. Lulalfongi lalos arulanu akilenyuk a ke sripe inge elos fwa ku in molela moul lalos sifwana a met puspus su longolos.—Luk 16:9; 1 Timote 4:16.
3 In akkalemye lulalfongi saap el sie ma upa nu sel Noa a nu sin sou lal oapana nu sel Inuk, papa tumun papa tumal Noa, su aketeyuki ke me lutlut se meet. In len lal Noa oana in len lal Inuk, pisen met puspus su wi ke alu paye arulanu supus—met oalkosr mukena akpayeye oaru lalos a elos moliyukla liki sronot. Noa el sulkakin ma sumwosmwos nu sin sie fwal su sesesla ke orekma sulallel a oiya fokfok. Sayen ma inge, el a sou lal elos musai sogo oak lulap su orekla ke sak in akoeyukla nu ke sie sronot lulap fwin fwalu, fwinne wangin met liye tari sronot oinge in pal meeta. Orekma lalos orala sie ma sakuruk nu selos su liyelos.
4. Ma tafongla fuka lun met puspus in len lal Noa Jisus el akkalemye yok?
4 Kalem la, ke pal se Jisus el sramsramkin len lal Noa, el tia kaskaskin orekma koluk, alu kikiap, ku orekma lun kosro—fwinne ma puspus inge arulanu koluk. Ma koluk su Jisus el akkalemye yok ke oiyen met inge pa ke srunga lalos in long kas in sensen su akkalemyeyuk. El fwak la elos “mongo a nim, elos mari a sang in mari, nu ke len se ke Noa el sroak nu fwin oaku.” In mongo a in nim, in mari, a sang in mari—mea ma tia mwo ke orekma inge? Elos engankin “moul mwomwo”! Tusruktu oasr sie sronot fwa tuku, a Noa el sulkakin a luti ma sumwosmwos. El akkalemye me sensen nu selos ke kas lal a oiyel. Tusruktu, elos “tia etu nu ke pal se sronot tuku a wiselosla nukemwa.”—Mattu 24:38, 39.
5. Oiya mwo puspus fuka eneneyuk nu sel Noa a nu sin sou lal?
5 In sifwilpa ngetla nunku ke pal ingo, kut ku in liye inkanek lalmetmet ke moul lal Noa. Tusruktu, in len puspus meet liki Sronot, enenu in oasr nunak in pulaik nu sin sie met in akkalemye la el siena liki met nukemwa. Lulalfongi fukoko eneneyuk nu sel Noa a sin sou lal in orala sogo oak lulap a in nekla ma inge ke kain in kosro nukemwa. Ya oasr kutu pal kutu sin met oaru inge elos lungse elos in tia arlana akkalemyeyuk ke elos oru orekma lalos a in moulkin na “moul mwomwo”? Fwinne elos nunku ka ke kutu pal, elos tia akmunasye oiyen oaru a paye lalos. Tokin yea puspus—su loes liki kutena pal nu sesr in muteng nu ke akwuk lun ma puspus inge—lulalfongi lal Noa kol nu ke molela lal liki Sronot. Tusruktu, Jeova el oru nununku lal nu selos nukemwa su moulkin “moul mwomwo” a tia loang mwo nu ke kalmeyen pal su elos muta ka.
Orekma Koluk Sifwilpa Akkolukye Met Nukemwa
6. Tokin Sronot, oiya fuka srakna oasr?
6 Tokin kof ke Sronot paola ku wanginla, oasr akwuk sasu lun metu mutamwauk. Tusruktu, metu srakna sesumwos, a “nunak lun insien met koluk ke pal el tulik” a tafwela na in oru ma koluk. (Genesis 8:21) Sayen ma inge, fwinne dimon puspus elos tila ku in orekmakin mano lun ikwe, elos srakna oru orekma in akkolukye metu. Tia pat fwalu ku metu su tia lulalfongi ke God elos sa in akkalemye la elos “oan ke ku lun met koluk se,” a oana in pal inge, met nukemwa su wi ke alu paye elos enenu in lain “orekma kutasrik nukemwa lun Devil.”—1 Jon 5:19; Efesus 6:11, 12.
7. Fuka orekma koluk yokelik tokin Sronot lulap?
7 In len lal Nimrod, fwalu ke tokin sronot el sifwilpa sesesla ke orekma koluk upa ku orekma sulallel lun met. In oana ke fwokin metu yokyokelik ke piselos a kapkapek ke technology, oasr orekma koluk yokyokelik pa ke kais sie pal. In pal meeta, oasr kutlas, me pus a sakan me pus, mwusra, a sariot. Ke kutu pal somla, oasr kain in likesik su pangpang musket a cannon, tokin ma inge oasr likesik su pangpang rifle a kofwen me meun fukoko orekmakinyuk ke mutamweyen century ak 20. Meun Lulap se meet el akkalemye kofwen me meun su arulanu aksangeng, oana oaksok in meun, tank in meun, oak ut in kof, a poison gas. Kofwen me meun nukemwa su orekmakinyuk ke meun lulap inge uniye million puspus sin met. Ya ma sikyak inge tia eteyuk in sanoeyuk ka ku tupanyuk? Mo.
8. Fuka Fwakyuk 6:1-4 el akpayeyuk?
8 In yea 1914, God el oralla Jisus oana Togusra ke Togusrai lun God in kosrao, a “len lun Leum” mutamwauk. (Fwakyuk 1:10) Ke sie aruruma su simusyukla ke buk lun Fwakyuk, liyeyuk Jisus oana sie Togusra mwolana su muta fwin soko ors fwosrfwosr. Wi kutupa met su muta fwin ors elos kasrusr tokol, kais sie selos akkalemyeyuk oana me lokwalok su tia oana sie nu sin metu. Sie selos kasrusr fwin soko ors srusra, a “etukyung nu sel su muta fwe tu el fwa eis misla liki fwalu, a tu elos in uni sie sin sie: a etukyang nu sel sie kutlas lulap.” (Fwakyuk 6:1-4) Ors soko inge a met su muta fwe elos petsaela meun, a kutlas lulap inge el lumeyuk nu ke kofwen me meun ke pal inge su kuiyen ma inge ku in kunausla ma puspus su soenna liyeyuk in pal meeta. Wekunang nu ke kofwen me meun ke pal inge pa bakudang su pangpang nuclear, kais sie bakudang inge ku in kunausla ngoul puspus lun tausen sin metu; rocket puspus su ku in usla kofwen me meun inge nu ke target puspus su oasr ke lusen mail puspus tausen; oapana kofwen me meun su pangpang chemical a biological su ku in orekmakinyuk in uniye met puspus.
Kut Loang Mwo Ke Kas in Sensen lun Jeova
9. Fwalu ke pal inge ku in srikeyuk fuka nu ke fwalu su oasr meet liki Sronot?
9 In len lal Noa, Jeova el kunausla metu ke sripen ma koluk upa lun metu su orek sin met yok fulat a ku puspus in pal meeta su pangpang Nefilim. Na fuka misenge? Ya ma koluk fwin fwalu tia oasr ma koluk yok ka oana oiyen fwalu in pal meeta? Mo tia oinge! Sayen ma inge, in oana len lal Noa, metu ke pal inge elos sifwana oru orekma lalos ke kais sie len, a elos srike in moulkin sie “moul mwomwo,” elos srunga in long kas in sensen su akkalemyeyuk. (Luk 17:26, 27) Ke ma inge, ya oasr kutena sripe in alolo kin mu Jeova el fwa sifwilpa kunausla met koluk? Mo.
10. (a) Kas in sensen fuka akkalemyeyuk pal puspus ke kas palu lun Baibel? (b) Kain in inkanek lalmetmet mukena fuka metu enenu in oru ke pal inge?
10 Ke yea puspus meet liki Sronot, Inuk el palye tari ke kunanula se su fwa tuku a orek ke len lasr. (Jud 14, 15) Jisus el oayepa sramsram ke “ongoiye lulap” su fwa sikyak. (Mattu 24:21) Met palu puspus elos sang pa kas in sensen ke pal se. (Ezikiel 38:18-23; Daniel 12:1; Joel 2:31, 32) A ke buk lun Fwakyuk, kut ku in ridi sie me akkalemye ke me kunausla safla su fwa tuku. (Fwakyuk 19:11-21) Oana met se met se, lela kut in etawi Noa a kut in moniyuk oana met luti ke ma sumwosmwos. Kut fwa loang mwo nu ke kas in sensen lun Jeova a ke sripen lungse lasr nu sin met tulan lasr kut kasrelos in oru pa oiya inge. Ke ma inge, in oana Noa, kut fwufwasryesr wi God. Paye la, arulanu yok sripe la fwin kutena met elos lungse in eis moul elos enenu in fwasr wi God pal nukemwa. Ke sripen oasr ma upa puspus su kut sun ke kais sie len fuka kut ku in fwasr wi God? Kut enenu in akkeye lulalfongi fukoko lasr ke akpayeyen akwuk ku mwolela nu kemwa lun God.—Hibru 11:6.
Fwufwasryesr Wi God Pal Nukemwa ke Pal in Ma Upa Puspus
11. Ke inkanek fuka kut etawi met Kristian puspus in century se meet?
11 In century se meet, met Kristian akmusrala elos sramsramkinyuk oana met puspus su wi ke oiya inge ku “Inkanek” inge. (Orekma 9:2) Oiya nukemwa ke moul lalos akkalemye la elos lulalfongi Jeova a Jisus. Elos fwasr tokin inkanek su Leum lalos fwasr ka. Ke pal inge, met Kristian oaru nukemwa elos oru pa oiya inge.
12. Mea sikyak tokin Jisus el kite sie u lulap lun met ke inkanek lun mwenmwen?
12 Yok sripaeyen lulalfongi akkalemyeyuk ke sie oiya su sikyak kelusen pal in orekma in luti lal Jisus. Ke sie pal, Jisus el kite met puspus su piselos pus liki 5,000 ke inkanek lun mwenmwen. Met puspus elos lut a arlana enganak. Tusruktu nunku ke ma su sikyak tok. Kut ku in rid: “Ke met inge elos liye me akul su El oru, elos fwak: ‘Paye el inge met palu se su fwa tuku nu fwalu.’ Ke ma inge, ke Jisus el akilen tu elos apkurun in tuku a esal ke ku, in aktogusrayel, El sifwil som nu fwin eolu muku.” (Jon 6:10-15) Ke fong sa el fwufwasryesr a som nu ke an saye. Ke sripen Jisus el srunga in eis ku oru kunokon lun togusra saap ma inge orala me akasorye yok nu sin met puspus in pal sa. Paye la, el akkalemye tari la el fwal in ekla togusra meyen el lalmetmet a oasr ku lal in akkupye ma enenu in ikwe lun met puspus. Tusruktu, soenna sun pal pakiyuki lun Jeova nu sel in oru kunokon lun Togusra. Sayen ma inge, Togusrai lun Jisus fwa oakiyuki in kosrao, a tia fwin fwalu.
13, 14. Kain in nunak fuka met puspus elos akkalemye, a fuka lulalfongi lalos srikeyuk?
13 Ne oinge, u lulap lun met puspus inge elos arulanu lungse in ukwel Jisus a elos konealak, “lefwalo nu mwea,” oana ma Jon el fwak. Efu ku elos lungse in ukwel Jisus tokin el kaengla tari lukelos ke pal se elos lungse in oral oana sie togusra? Kalem la orekma lalos elos nunku yok ke ma lun fwalu ku ke ma lun ikwe, meyen elos srumun nunak ku pulakin lalos ke me mongo su Jeova el sang nu sin met Israel yen mesis in len lal Moses. Ma inge akkalemye la Jisus el enenu in tafwela in sang me mongo nelos. Ke Jisus el etu ke nunak tia sumwos lalos, el mutamwauk in lotelos ke ma paye ke kas lun God su ku in sang kasru in aksumwosye nunak lalos. (Jon 6:17, 24, 25, 30, 31, 35-40) Ke sripe inge, kutu met elos torkaskas lainul, yokna ke el fwak me pupulyuk inge: “Payenu, payenu, Nga fwak nu sumwos, Komwos fwin tia mongo ke ikwen Mwen nutin met a nim sral, wangin moul in komwos sifwana. El su mongo ke ikuk a nim srak moul ma patpat ma lal; a nga fwa akmoulyelak in len se safla.”—Jon 6:53, 54.
14 Me pupulyuk puspus lal Jisus mokle met puspus pal nukemwa in akkalemye fwin elos lungse in fwufwasryesr wi God. Me pupulyuk inge el mokle pa met puspus. Ma inge oru met puspus in akkalemye pulakin fukoko lalos. Kut rid: “Ke ma inge met puspus sin met Tumal lutlut, ke elos long, elos fwak: Kas inge upalanu; su fwa ku in long?’” Jisus el aketeye nu selos la elos enenu in suk la mea kalmen kas lal inge. El fwak: “Ngun me sang moul; wangin sripen ikwe. Kas su Nga fwak nu sumwos, kas inge ngun, a moul.” Tusruktu, met puspus elos tia longol, a ma simusla el akkalemye: “Tokin ma se inge met puspus sin met Tumal lutlut elos folokla, a tia sifwil oelul fwafwasryesr.”—Jon 6:60, 63, 66.
15. Kain in nunak fuka oasr yurin kutu met tuma lutlut lal?
15 Ne oinge, tia met tuma lutlut nukemwa lun Jisus akkalemye oiya inge. Paye la, met tuma lutlut oaru elos tia kalem na paye ke kalmen ma Jisus el fwak. Fwinne oinge, lulalfongi lalos nu sel srakna fukoko. Piter, sie sin met tuma lutlut inge, el akkalemye pulakin lun met nukemwa su muta yurol ke el fwak: “Leum, kut fwa som nu yurin su? Kas lun moul ma patpat oasr Yurum.” (Jon 6:68) Sie oiya na mwomwo pa inge, a sie me srikasrak na mwomwo!
16. Fuka kut ku in srifeyukla, a kain in nunak fuka kut enenu in akkeye?
16 Kut ku pa in srikeyuk ke pal inge oana met tuma lutlut in pal meeta. Saap kut e fwa akmunasyeyuk ke sripen mwolela lun Jeova soena akpayeyuk oana ma kut lungse ke oiya su kut nunku ka. Kut ku pa in pula mu me aketeye ke me rid puspus nutusr su tuku in Baibel upa in kalem. Kutu oiya su akkalemyeyuk sin met lili ku in akmunasye kut. Ya sumwos in tui tila fwufwasryesr wi God ke sripe puspus inge ku ke kutupa sripe? Mo tia oinge! Met puspus su som lukel Jisus elos akkalemye la elos nunku ke ma lun ikwe. Kut enenu in fwasr liki oiya inge.
“Kut Tia Sie Selos su Tapulla”
17. Fuka kut ku in kasreyuk in fwufwasryesr wi God pal nukemwa?
17 Met sap Poul el simusla: “Baibel nukemwa etuku ke ngun lun God.” (2 Timote 3:16) Ke inkanek lun Baibel, Jeova el akkalemye nu sesr: “Pa inge inkaneku, komwos fwasr we.” (Isaia 30:21) In akos masap lun God kasre kut in “arulanu liaung oiyen fwafwasryesr lasr.” (Efesus 5:15) In lutlutkin Baibel a in sifwilpa nunku ke ma kut lotela tari fwa kasre kut in “fwafwasryesr in ma paye.” (3 Jon 3) Paye, oana ma Jisus el fwak, “ngun . . . el me sang moul; a wangin sripen ikwe.” Me kasru ku me kolyuk mukena su ku in kol inkanek lasr pa me kolyuk lun God, su tuku ke Kas lun Jeova, ke ngun mutal lal, a ke u lal.
18. (a) Mea kutu met tia lalmetmet elos oru? (b) Kain in lulalfongi fuka kut akkeye?
18 Ke pal inge, elos su pulakin toasr ke sripen nunak sesumwos ke ma lun ikwe ku ma elos tupan ka tia akpayeyuk oru elos in orekmakin ma mwomwo puspus lun fwalu ke inkanek nu kemwa. Ke sripen tula oiyen nunak in elya nu ke moniyuk lalos, paenang elos tila pulakin me enenu yok in “kaifweang in sano,” a elos oru sulela nu ke nien sun lalos sifwana a elos tia oru Togusrai lun God pa ma se ma yok sripe emeet ke moul lalos. (Mattu 24:42) In orekmakin ku fwufwasryesr ke kain in oiya inge tia ma mwomwo se. Loang akmwoye nu ke kas lun met sap Poul: “A kut tia sie selos su tapulla nu ke kunausla; a kut sie selos su lalalfongi nu ke molela lun ngun.” (Hibru 10:39) Oana Inuk a Noa, kut muta ke pal in me keok puspus, tusruktu oana elos, oasr kunokon mwomwo lasr in fwufwasryesr wi God. In oru oinge, oasr fwinsrak paye lasr la kut fwa liye mwolela nukemwa lun Jeova ke akpayeyuk, ma koluk fwa kunausyukla, a sie fwalu sasu oakiyukla. Sie fwinsrak mwolana pa inge!
19. Fuka Maika el akkalemye inkanek lun met kulansap paye nukemwa?
19 Met palu Maika el fwak ke mutanfwal puspus la elos fwa “fwasr kais sie selos in en god lal.” El sramsram pa kel a ke met kulansap oaru nukemwa a el fwak: “Kut fwa fwasr in En Jeova God lasr ma patpat a ma patpat.” (Maika 4:5) Fwin sulela lom el oana sulela lal Maika, kom kaifweang in futoto nu sin Jeova fwinne pal u arulanu yok ma koluk a ma upa puspus. (Jemes 4:8) Lela kut nukemwa in akkalemye lungse lun kais sie sesr in fwufwasryesr wi Jeova God lasr inge a nu tok ma patpat, aok ma patpat!
Kom E Topuk Fuka?
• Mea ma oana sie su oasr in len lal Noa a ke len lasr misenge?
• Noa a sou lal elos fwasr ke oiya fuka, a kut ku in etawi fuka lulalfongi lalos?
• Kain in nunak tia sumwos fuka akkalemyeyuk sin kutu met tuma lutlut lal Jisus?
• Mea met Kristian paye elos arulanu lungse in oru?
[Petsa ke sra 26]
In oana len lal Noa, met puspus ke pal inge elos kafofo upa ke orekma lalos len nukemwa
[Petsa ke sra 27]
Oana met luti ke peng mwo lun Togusrai,“kut tia oana elos su tapulla”