“Molwelah Lowos Apkuhran Me”!

“Kowos in tuyak ac kweyak sifowos nuh lucng, tuh molwelah lowos apkuhran me.”​—LUKE 21:28.

ON: 49, 43

KOM AC TOPUK FUHKAH?

Meac kuhtuh ma kuht ac fah sun ke pacl na sa ma oacna ma sikyak ke yac 66 ah?

Pacl in srihkeyuck fuhkah se ac fah orek tukun “Babylon Luhlahp” el kuhnanuclac?

Orekma in eisacni fuhkah se sramsramkihnyuck ke Matthew 24:31 ah?

1. Ma pucspucs fuhkah ma sikyak ke yac 66? (Liye petsac se meet ke mwe lutlut inge.)

SRIHKE luhmahlah ke nuhnak lom an muh kom sie mwet Christian suc muhta fin acn Jerusalem ke yac 66. Puhs ma sikyak in pacl sac. Sie mwet liyacacng masap fin acn Rome, pahngpahng Florus el pihsraclah talen 17 ke nien sruh mani luhn tempuhl uh. Mwet Jew in pacl sac arlacna kasrkuhsrak. Eltahl uniyac solse pucspucs luhn acn Rome ac suk in sihfacnalac ac sukohsohklah liki kolyuck luhn mwet Rome. Tuhsruhktuh, mwet Rome sa na tulokihnyac ma inge. Ke mahlwem na tolu, solse 30,000 kolyuck sel Cestius Gallus raunelah acn Jerusalem. Mwet Jew ma lain mukuikui laltahl inge som wihklac ke tempuhl laltahl uh in karuhnguhnuhltahl liki mwet lokoalok laltahl inge. Tuhsruhktuh, solse Rome inge som nuh ke lihkihn srowasrihk ke tempuhl inge ac srihke in kuhnahoslah ac utyak. Mwet nuhkewa lun siti se inge muhtwacwack in tuhfal ac sahngweng. Kom fin wi liye ke ma inge nuhkewa sikyak ah, meac kom ac puhla?

2. Meac mwet Christian inge enenuh in oruh ke pacl se eltahl liye solse luhn acn Rome raunelah siti sac, ac eltahl ac oruh ma inge fuhkah?

² Yac pucspucs meet, Jesus el tuh sensenkackihn mwet tuhma lutlut lal in pacl sac ke ma pucspucs ma ac fah sikyak ac el fahk nuh seltahl: “Kowos fin liye tuh acn Jerusalem rauniyucklac ke mwet mweun, na kowos ac etuh na lah kuhnausyucklac luhn acn we apkuhran me. In pacl sacn mwet ma muhta in acn Judea enenuh in kahinglac nuh finohl uh, ac mwet ma muhta in siti uh enenuh in som liki, ac mwet suc muhta in imac uh in tiac fohlohk nuh in siti uh.” (Luke 21:20, 21) Eltahl ac ahkos fuhkah kahs in sensen lal Jesus inge in som liki acn Jerusalem ke mwet solse inge raunelah acn we uh? Ma na usrnguck se sikyak. Solse luhn acn Rome inge som liki acn Jerusalem! Oacna ke Jesus el fahk ah, orekma in lain laltahl uh ‘ahkpuhyeyucklac.’ (Matthew 24:22) Ke pacl se na ma solse inge som liki acn we ah, pa inge pacl wo nuh sin Christian oaru inge in ahkos Jesus ac suhlahklahk na kahinglac nuh ke finohl ah.a (Liye footnote.) Tok kuhtuh, ke yac 70, sie un mwet solse sasuc luhn acn Rome fohlohklac nuh Jerusalem. Ac ke pacl se inge eltahl kuhnahoslah siti sac. Tuhsruhktuh mwet nuhkewa ma ahkos kahs in sensen lal Jesus ah moullac.

3. Oacna meet ah, kain in ohiyac fuhkah mwet Christian ke pacl inge uh ac fah sun ke pacl na sa? Meac kuht ac fah lutlutkihn ke mwe lutlut se inge?

³ Kahs in sensen lal Jesus inge arlacna fal pac nuh ke pacl lasr uh. Ke pacl na sa, kuht ac sun pac kain in ohiyac inge. Jesus el orekmakihn ma sikyak ke pacl luhn mwet sap ah in ahkuhtweyac ma ac sikyak ke pacl se ma “ongaiyac luhlahp” uh muhtwacwack. (Matthew 24:3, 21, 29, BMK) Oasr “u na luhlahp se” ma ac fah moullac liki mwe ongaiyac se ma fah sikyak fin facluh nohfohn, oacna mwet Christian oaru ma moullac liki kuhnanuclac luhn acn Jerusalem in pacl meet ah. (Riti Fwackyuk 7:9, 13, 14.) Arlacna yohk srihpac kuht in kahlwem ke ma Bible uh fahk nuh sesr ke ma ac sikyak inge. Efuh? Mweyen ma inge kalmackihn nuh ke molwelah lasr uh. Pwacnacng ingena, kuht kuh in lutlutkihn lah meac ma ac sikyak inge ac fah oruh nuh sin kais sie sesr.

MUHTWACWACYEN PACL IN ONGAIYAC LUHLAHP

4. Pacl in ongaiyac luhlahp uh ac muhtwacwack fuhkah?

⁴ Pacl in ongaiyac luhlahp uh ac muhtwacwack fuhkah? Ac muhtwacwack ke kuhnanuclac luhn alu kikiacp nuhkewa. In Bible, alu kikiacp uh pahngpahng “Babylon Luhlahp, ninac kiyacn muhtwacn kosro.” (Fwackyuk 17:5-7, BMK) Efuh kuh alu kikiacp uh pahngpahng muhtwacn kosro se? Ke srihpen mwet kol luhn alu kikiacp inge soaru nuh sin God. Eltahl tiac ahkkahlwemye oaru in sang kahsruh nuh sel Jesus ac nuh ke Tohkohsrahi lal uh, a eltahl sang kahsruh nuh ke government luhn mwet uh ac tiac lohacng nuh ke mwe luti luhn Bible tuh in yohk mwe kahsruh nuh seltahl. Alu laltahl uh tiac oacna alu nwacsnwacs luhn mwet akmuhsralah uh. (Luo Corinth 11:2; James 1:27; Fwackyuk 14:4) Tuhsruhktuh suc ac fah kuhnahoslah Babylon Luhlahp? Jeova el ac fah oruh tuh “koac singucul” luhn “kosro sruhsrah suhlallacl soko” in ‘oruh ma luhngse lal’ uh. “Kosro sruhsrah suhlallacl soko” inge luhmweyuck nuh ke United Nation ac “koac singucul” inge luhmweyuck nuh ke government nuhkewa ma sang kahsruh nuh ke ma inge.​—Riti Fwackyuk 17:3, 16-18.

5, 6. Efuh kuht kuh in fahk muh kuhnanuclac luhn Babylon Luhlahp uh tiac kalmackihn nuh ke misac luhn mwet nuhkewa kac?

⁵ Yac mwet nuhkewa ke alu kikiacp uh ac acnwucki ke pacl se Babylon Luhlahp uh kuhnanuclac? Moh. Jeova el sang kahs inge nuh sel mwet pahluh Zechariah elan suhmuhslah ma ac fah sikyak uh. Ke pacl sacn, sie mwet ma tuh wi ke alu kikiacp el ac fahk: “‘Nga tiac sie mwet pahluh, nga mwet imac se, nga nuhna imac acn uh in moul luhk nohfohn!’ Na mwet se fin siyuck sel, ‘Ac meac kalmen kihnet iniwom ingacn?’ Na el ac fah topuk ac fahk, ‘Ma oreklac in lohm sin mwet kawuck se luhk.’” (Zechariah 13:4-6) Pwacnacng finne mwet kol ke alu kikiacp uh, eltahl ac oruh na muh eltahl tiac mwet luhn alu ac lahfwekihn muh eltahl tuh kuhpahsr nuh ke alu kikiacp.

⁶ Meac ac fah sikyak nuh sin mwet luhn God ke pacl sacn? Jesus el ahkuhtweyac: “God El ahkpuhyelah tari pihsen lwen uh; El fuhnuh tiac oruh ohinge, luhkuhn wacngihn mwet moullac. Tuhsruhktuh ke srihpen mwet suc El sulaclah, God El ac ahkpuhyelah lwen uh.” (Matthew 24:22) Ke pacl luhn mwet sap ah, ongaiyac ma sikyak fin acn Jerusalem ah ‘ahkpuhyeyucklac.’ Ma inge sang pacl wo nuh sin “mwet suc El sulaclah”, kuh mwet Christian akmuhsralah inge in kahinglac. Ke inkacnek se pacna inge, ip se meet ke ongaiyac luhlahp uh ac fah ‘ahkpuhyeyucklac’ ke srihpen “mwet suc El sulaclah” uh. Government luhn mwet uh, kuh “koac singucul” inge ac tiac lweyucklac in kuhnahoslah mwet luhn God uh. Tuhsruhktuh ac oasr kihtin pacl in mislac tukun orekma in lain se meet.

PACL IN SRIHKEYUCK AC PACL IN NUHNUHNKUH

7, 8. Pacl wo fuhkah se ac fah oasr tukun kuhnanuclac alu kikiacp nuhkewa, ac fuhkah mwet luhn God uh ac fah siena liki mwet nuhkewa sahyac in pacl sacn?

⁷ Meac ac fah sikyak tukun kuhnanuclac luhn alu kikiacp nuhkewa? Pa inge pacl se ma ac fah kahlwem lah meac na pwacye oan ke insiacsr uh. Ke pacl sacn, inkaiyen mwet uh ac srihke in eis karihngihnyuck ac kahsruh sin “eot in eol uh,” ac ma inge mwe puhpuhlyuck nuh ke u pucspucs luhn mwet uh. (Fwackyuk 6:15-17) Tuhsruhktuh mwet luhn Jeova uh ac ngwet nuh sel ke karihngihnyuck lal. Ke pacl se ma ‘ahkpuhyeyucklac’ orekma in lain ke pacl luhn mwet sap ah, tilac pacl luhn mwet Jew inge in eklac mwet Christian. Tuhsruhktuh, pacl luhn mwet Christian inge in kahinglac liki acn Jerusalem oacna ke ma Jesus el fahk ah. Ke inkacnek se pacna inge ke pacl fahsruh uh, ke pacl se ma orekma in lain ma orek nuh sin Babylon Luhlahp uh ‘ahkpuhyeyucklac,’ kuht tiac kuh in nuhnkuh muh puhs mwet ma ac suhlahklahk na eklac oacna mwet Christian pwacye. Tuhsruhktuh, pacl sacn pa pacl wo nuh sin mwet ke alu pwacye in ahkpwacyeye luhngse laltahl nuh sin Jeova ac in kahsruh mwet akmuhsralah uh.​—Matthew 25:34-40.

⁸ Kuht tiac etuh lah meac na pwacye ac fah sikyak ke pacl in srihkeyuck inge. Tuhsruhktuh, kuht etuh lah moul uh ac tiac fihsracsr, kuht ac enenuh in kihsackuhnlah ma pucspucs. Ke pacl luhn mwet sap ah, mwet Christian ah enenuh in som liki lohm seltahl ac muhtwacnglah ma upac pucspucs tuh eltahl in moul. (Mark 13:15-18) Kuht enenuh in siyuck sesr sifacna, ‘Yac nga ahkolah in fuhleack ma sacohk pucspucs nuhkewa luhk? Yac nga engan in sang kuhiyuck kewa ke oaru luhk nuh sin Jeova?’ Srihke nuhnkuh! Finne meac sikyak ke pacl sacn, kuht muhkwena pa ac alu nuh sin God lasr, oacna mwet pahluh Daniel.​—Daniel 6:10, 11.

9, 10. (a) Pweng fuhkah se mwet luhn God uh ac fah fahkwack ke lusen pacl in ongaiyac luhlahp? (b) Ohiyac fuhkah mwet lokoalok luhn God uh ac fah ahkkahlwemye?

⁹ Ke pacl in ongaiyac luhlahp uh, tilac pa inge pacl in fahkwack “pweng wo” ke Tohkohsrahi uh.” Pacl in fahkwack ke pweng wo uh somlah tari. Pacl “sahflah” uh ac fah tuhkuh! (Matthew 24:14) Mwet luhn God uh ac fah puhlaik in fahkwack pweng na yohk srihpac se ke orekma in nuhnuhnkuh se ma ac fah sun mwet nuhkewa. Sahp pweng se inge pa in ahkkahlwemye lah facl lal Satan uh ac fah kuhnanuclac na pwacye. Bible uh srihkeyac pweng inge nuh ke sie kain in af suc oacna eot luhlahp pucspucs, ac fahk ma inge: “Af yohk kosra kahki inkuhsrao me nuh fin mwet uh. Kain af se inge oana eot luhlahp pucspucs, ac toasriyacn kais sie kosra suc paun siofok. Mwet uh selngawi God ke srihpen upaclah mwe lokoalok se inge ke af yohk kosra uh.”​—Fwackyuk 16:21.

¹⁰ Mwet lokoalok lasr uh ac fah lohng pweng na yohk srihpac se inge. Jeova el sang kahs inge nuh sel mwet pahluh Ezekiel elan ahkuhtweyac lah ohiyac fuhkah ac fah ahkkahlwemyeyuck sin un muhtuhnfacl se ma Bible uh pahngon Gog luhn Magog. El suhmuhslah ma inge: “Pa inge kahs luhn God Fuhlwactlacna nuh sel Gog: ‘Ke pacl se ac tuhkuh, kom ac muhtwacwack in nuhnkeack sie pwacpa kuluk. Kom ac sulaclah in utyak lain sie facl muhnahs, suc mwet uh muhtana in mislac ac wacngihn sensen lalos, pwacnacng siti selos tiac potyak, ac wacngihn pac nien wihklac lalos. Kom ac fah utyak in kuh lom ac pihsraclah ma luhn mwet suc muhta in siti ma muhsahllah meet. Orekeni elos liki muhtuhnfacl sahyac, ac inge oasr un kosro nahtuhlos ac acn selos, ac elos muhta infulwacn acn in fuhfahsryucsr luhn facluh.’” (Ezekiel 38:10-12) Mwet luhn God uh ac fah siena liki mwet nuhkewa sahyac, oacna eltahl in muhta “infulwacn acn in fuhfahsryucsr luhn facluh.” Muhtuhnfacl uh ac tiacna kuh in tulokihniltahluh sifacna. Eltahl ac arlacna ke kalyei mwet akmuhsralah luhn Jeova wi mwet kahsruh laltahl uh.

11. (a) Meac kuht enenuh in esam ke tahklac luhn ma nuhkewa ma ac fah sikyak ke pacl in ongaiyac luhlahp uh? (b) Fuhkah ohiyen mwet uh ke pacl se eltahl ac liye mwe akucl uh?

¹¹ Meac ac fah sikyak tohkoh? Bible uh tiacna fahk kahlwem tahklac luhn ma nuhkewa ma ac fah sikyak uh, tuhsruhktuh oasr kuhtuh pac ma sahyac ma ac kuh in sikyak pacna ke pacl sacn. Ke kahs pahluh lal ke sahflahiyen oakwuck kuluk se inge, Jesus el fahk: “Oasr mwe akucl ac fah sikyak ke faht, ac mahlwem, ac itu uh. Muhtuhnfacl nuhkewa fin facluh ac fah tuhninfong ac sahngweng ke ngihrngihr luhn meoa uh, ac kuh luhn noa uh. Mwet uh ac fah muhlallah ke sahngweng ke elos ac tuhpan lah meac ac sikyak nuh fin facluh nohfohn, mweyen kuh luhlahp luhn yen engyeng uh ac fah kihfucsyucklac liki acn selos. Na Wen nuhtin Mwet ac fah sikme, el tuhkuh in sie puhkuhnyeng ke kuh luhlahp ac wolacna.” (Luke 21:25-27; riti Mark 13:24-26.) Yac oasr mwe akucl na ahksahngweng ac ma ac fah sikyak inkuhsrao ke ahkpwacyeyacn kahs pahluh inge? Kuht enenuh in sano na kuht fah kuh in etuh na pwacye. Tuhsruhktuh, kuht etuh lah ke pacl se mwet lokoalok luhn God uh liye mwe akucl inge, eltahl ac fah arlacna sahngweng ac eltahl ac tuhfal.

12, 13. (a) Meac ac fah sikyak ke pacl se Jesus el tuhkuh “ke kuh luhlahp ac wolacna”? (b) Meac mwet kuhlwacnsap luhn God uh ac fah oruh ke pacl sacn?

¹² Meac ac fah sikyak ke pacl se Jesus el tuhkuh “ke kuh luhlahp ac wolacna”? Pa inge pacl ma mwet oaru uh fah eis mwe insewowo laltahl ac mwet ma soaru uh fah eis mwe kai. (Matthew 24:46, 47, 50, 51; 25:19, 28-30) Jesus el orekmakihn mwe puhpuhlyuck se in ahkuhtweyac ma inge ke inkacnek kahlwem. El fahk: “Ke Wen nuhtin Mwet el ac tuhkuh in wolacna lal wi lipufacn lal, el ac fah muhta fin tron fuhlwact lal. Ac mwet in muhtuhnfacl nuhkewa fah tuhkweni nuh ye mutal. Na el ac fah sraclihk mwet uh nuh ke u luo, oana ke mwet liyacacng sheep uh ac srelah sheep liki goat uh. El fah fihliyac mwet suwohswohs uh lac pahol lacyot, ac mwet ngiac lacyen lacsac.” (Matthew 25:31-33) Meac ac fah sikyak nuh sin sheep ac goat uh? Eltahl ac fah nuhnuhnkweyuck. Goat, kuh mwet soaru uh ac fah “suhpweyucklac nuh ke kai ma pahtpaht.” Tuhsruhktuh sheep, kuh mwet oaru uh, ac fah eis moul ma pahtpaht.​—Matthew 25:46.

¹³ Meac goat uh ac fah oruh ke pacl se eltahl akihlenack lah eltahl ac fah kuhnanuclac? Eltahl “ac fah tung” ke ahsor. (Matthew 24:30) Tuhsruhktuh meac mwet akmuhsralah ac mwet nuhkewa ma kahsreltahl uh ac fah oruh? Eltahl ac oruh ma Jesus el fahk inge: “Ke pacl ma inge muhtwacwack in sikyak, kowos in tuyak ac kweyak sifowos nuh lucng, tuh molwelah lowos apkuhran me.”​—Luke 21:28.

SAHROMROMELIHK KE TOHKOHSRAHI UH

14, 15. Orekma in eisacni fuhkah se ac fah orek tukun muhtwacwack orekma in lain lal Gog luhn Magog, ac ma inge ac sikyak fuhkah?

¹⁴ Meac ac fah sikyak tukun Gog luhn Magog muhtwacwack in kalyei mwet luhn God uh? Bible uh fahk lah Wen nuhtin mwet “el ac fah suhpwaclihk lipufacn lal nuh fin facluh nohfohn in eisacni mwet sulaclah luhn God liki acn nuhkewa facluh.” (Mark 13:27; Matthew 24:31) Orekma in eisacni se inge tiac sramsramkihn ke pacl se ma mwet Christian akmuhsralah uh tuhfahna suleyucklac. Ac ma inge tiac pac sramsramkihn ke pacl se ma mwet akmuhsralah luhlah fin facluh eltahl eis sil sahflah laltahl uh. (Matthew 13:37, 38) Sil sahflah sacn orek meet liki na pacl in ongaiyac luhlahp uh muhtwacwack. (Fwackyuk 7:1-4) Pwacnacng, meac orekma in eisacni se inge? Pa inge pacl se ma mwet akmuhsralah fin facluh uh eis mwe insewowo laltahl ac som nuh inkuhsrao. (Sie Thessalonica 4:15-17; Fwackyuk 14:1) Ma inge ac sikyak tukun Gog luhn Magog muhtwacwack in oruh kalyei lal uh. (Ezekiel 38:11) Na, oacna ke Jesus el fahk ah, “mwet luhn God elos ac fah sahromrom oacna faht uh in Tohkohsrahi luhn Pahpah tuhmwaclos.”​—Matthew 13:43.b (Liye footnote.)

¹⁵ Yac kalmen ma inge pa ac fah oasr “rapture” nuh sin mwet akmuhsralah nuhkewa? Mwet pucspucs ke alu ma ekihn muh eltahl mwet Christian eltahl luhlahlfongi muh mwet Christian nuhkewa ac utuckyak nuh in kuhsrao ke mahno in ikoac laltahl. Eltahl nuhnkuh pac muh eltahl ac liyacl Jesus ke muhtahltahl ke pacl se ma Jesus el ac fohlohk in kol facluh. Tuhsruhktuh, Bible uh ahkuhtweyac arlac kahlwem ke “mwe akucl luhn Wen nuhtin mwet,” ac lah Jesus el ac fah tuhkuh “inkuhsrao me fin puhkuhnyeng uh.” (Matthew 24:30) Bible uh fahk pac muh “ikoac ac srah koflah na ipeis ke Tohkohsrahi luhn God.” Pwacnacng mwet ma ac utuckyak nuh inkuhsrao uh ac enenuh in ma se meet “eklac in kihtin pacl na, oana sahruhp se, ke mwe ukuk sahflah uh ac kahslah.”c (Riti Sie Corinth 15:50-53.) Ke ma inge, kuht tiac orekmakihn kahs se inge “rapture” ke mwe lutlut inge in sang ahkuhtweyac ma sikyak inge ke srihpen kahs se inge kuhpahsr nuh ke mwe luti kikiacp luhn mwet ma ekihn muh eltahl mwet Christian. Tuhsruhktuh, mwet kuhlwacnsap oaru ma srackna oasr fin facluh uh ac fah orekeni nuh sie ke kihtin pacl na.

16, 17. Meac enenuh in sikyak meet liki macruht luhn Lamb uh?

¹⁶ Ke pacl se na ma mwet akmuhsralah 144,000 nuhkewa eltahl oasr tari inkuhsrao, ahkoeyacn macruht luhn Lamb ac fah muhtwacwack. (Fwackyuk 19:9) Tuhsruhktuh, oasr pac sie ma sahyac ma enenuh in sikyak meet liki pacl in engan se inge. Esam lah Gog el ac fah lain mwet luhn God ke pacl se ma mwet akmuhsralah na ekahsr luhlah fin facluh. (Ezekiel 38:16) Meac mwet luhn God uh ac fah oruh ke pacl sacn? Eltahl ac ahkos kahs in luti inge: “Kowos ac fah tiac mweun ke mweun se inge. Ahkolah na ac sano, kowos ac liye ke Leum God el ac acsot kuhtanglah nuh suwos. . . . Kowos in tiac ahlohloh kuh sahngweng.” (Luo Chronicle 20:17) Kihtin pacl tukun lain lal Gog uh muhtwacwack, mwet akmuhsralah ma luhlah oasr fin facluh uh ac fah utuckyak nuh inkuhsrao. Na ke Fwackyuk 17:14, fuhs se inge ahkuhtweyac nuh sesr ke ma ac sikyak inkuhsrao ac ma ac orek nuh ke orekma in lain lal Gog. Mwet lokoalok luhn God uh “ac fah mweun lainuhl Lamb; tuhsruhktuh Lamb ac elos suc fahsr tokol fah kuhtanguhloslac mweyen Lamb el Leum lun leum uh ac Tohkohsrah luhn tohkohsrah uh. Elos suc fahsr tohkohl pa mwet suc God El pahnglolos ac suleloslac, ac elos oaru nuh sel.” In pacl sacn, Jesus, wi mwet akmuhsralah 144,000 suc tohkohsrahlac inkuhsrao ac fah molwelah mwet luhn God fin facluh.

¹⁷ Ke molwelah se inge, pa inge pacl se ma mweun luhn Armageddon ac fah orek ac ine muhtahl luhn Jeova ac fah ahkmuhtahlyeyuck. (Fwackyuk 16:16) Mwet nuhkewa ma nuhnuhnkweyuck oacna goat, kuh mwet soaru ac fah kuhnanuclac. Ac fah wacngihnlac orekma kuluk fin facluh, ac “u na luhlahp se” pa ac moliyucklac liki Armageddon uh. Ac ke sahflahiyac an, pacl in engan se ma sramsramkihnyuck ke Fwackyuk uh ac fah sikyak, pa ke macruht luhn Lamb! (Fwackyuk 21:1-4)d (Liye footnote.) Mwet nuhkewa ma moullac fin facluh ac fah engankihn mwe insewowo luhn God ac puhla luhngse ac kuhlwacng yohk lal. Kuht rahrahlac na pwacye ke kuht ngetlah liye ke pacl se ingacn. Kuhfa in macruht na engan se pa ac fah orek uh!​—Riti Luo Peter 3:13.

18. Ke kahs pahluh nuh ke ma pucspucs ma ac fah sikyak ke pacl na sa, meac kuht enenuh in kwacfeacng in oruh ac tu na kuh kac?

¹⁸ Ke mwe engan yohk nuhkewa ma ac fah sikyak inge, meac kais sie sesr enenuh in oruh ingena? Jeova el sang kahs inge nuh sel mwet sap Peter elan suhmuhslah: “Ke srihpen ma inge nuhkewa ac fah kuhnausyucklac in luhmah se inge, moul lowos enenuh in muhtahl ac kihsackihnyuckyang nuh sin God. Ke kowos tuhpan Lwen luhn God. Kowos in sang kuhiyowos . . . Ohinge mwet kawuck luhk, ke kowos sano lwen sac, kowos in kwacfeacng tuh moul lowos in nwacsnwacs ac in wacngihn mwactuwos, ac kowos in moul in mislac ye muhtuhn God.” (Luo Peter 3:11, 12, 14) Pwacnacng, lwelah kuht in tu na kuh ac oruh alu lasr uh in nwacsnwacs ac in wacngihn kuhtwena ma kuhpahsr nuh ke alu kikiacp. Kuht oacyacpac sang kahsruh nuh sel Jesus Christ, Tohkohsrah luhn Mislac.

[Sihm srihsrihk e ten]