Sruokyacna Oaru Lom nuh ke Tohkohsrahi luhn God

“Elos tiac pac ma luhn facluh.”​—JOHN 17:16.

On: 18, 54

KOM KUH IN TOHPOHKLAH?

Efuh kuh Jesus el tiac nuhnkuh muh sie u wo liki sie pac u sahyac?

Kuht finne tiac wi sie u ke government kuh mwet kol, lacyen luhn suc kuht wi uh? Efuh?

Kom ac ahkpahye kom fuhkah in oaru nuh sin Jeova ac nuh ke Tohkohsrahi lal uh?

1, 2. (a) Meac kuhpahsr luhn ma luo inge, in oaru nuh sin Jeova ac in tiac weack kuhtwena u ke pacl oasr ma upac luhn mwet uh? (Liye petsac se meet ke mwe lutlut inge.) (b) Meac mwet pucspucs eltahl oaru nuh kac, tuhsruhktuh meac sahflahiyac uh?

MWET kuhlwacnsap luhn Jeova uh tiac sifacna eisacltahl nuh ke ma upac ma sraclihk inmahsrlon mwet uh, oacna wiwi acn, wiwi mwet, kuh wiwi facsin. Efuh? Ke srihpen kuht luhngse Jeova, kuht ahkkahlwemye oaru lasr nuh sel ac kuht ahksol. (Sie John 5:3) Kuht finne muhta na ke acn sesr kuh tuhkuh ke siena acn sahyac, kuht ukwe oakwuck luhn God. Yohk srihpac in oaru nuh sin Jeova ac nuh ke Tohkohsrahi lal uh yohk liki kuhtwena ma sahyac. (Matthew 6:33) Pa inge srihpac se pwacnacng kuht kuh in fahk muh kuht “tiac pac ma luhn facluh.”​—Riti John 17:11, 15, 16; Isaiah 2:4.

² Ke pacl inge, puhs mwet fin facluh ma arlacna oaru nuh ke muhtuhnfacl, sruf, facsin, kuh finne u in sritacl laltahl. Mwe ahsor se lah ma inge kol nuh ke amaci yohk inmahsrloltahl, sruhnga inmahsrlon sie sin sie, ac ke kuhtuh pacl uh eltahl uniyac mwet ma weack ac oaru nuh ke u sahyac uh. Kuht finne tiac wi ke ma upac ma sikyak inge, ma inge srackna ahkkulukye kuht ac sucu lasr uh ac kuht sun pac mwe kweok ke srihpen orekma sesuwohs inge. God el orekuhtlac tuh kuht in etuh akihlen ma fal ac ma suhfal. Pwacnacng, ac arlac fihsracsr in eiskuhtyang ac weack u ma kuht nuhnkuh muh suwohs ke pacl se government uh tiac ahkkahlwemye inkacnek suwohs ke sulaclah ma eltahl oraclah. (Genesis 1:27; Deuteronomy 32:4) Meac kom puhla ke pacl se oasr ma sikyak ac tiac suwohs sulaclah ma oreklac nuh kac uh? Yac kom kuh in tu na kuh ac tiac weack kuhtwena u?

3, 4. (a) Efuh kuh kuht in tiac weack kuhtwena u ke pacl ma oasr ma upac? (b) Meac kuht ac fah sramsramkihn ke mwe lutlut se inge?

³ Mwet pucspucs eltahl weack sie u ke pacl ma oasr ma upac, mweyen government uh fahk nuh seltahl muh pa inge ma mwet wowo ke acn se ac fah oruh. Tuhsruhktuh, mwet Christian pwacye uh ukwacl Jesus. Pwacnacng kuht tiacna eiskuhtyang nuh ke mukuikui luhn politic ac kuht tiac wi ke mweun. (Matthew 26:52) Mwet Christian pwacye uh tiac nuhnkuh muh sie ip ke facl lal Satan uh wo liki sie pacna ip. (Luo Corinth 2:11) Kuht sruhnga eiskuhtyang nuh ke kuhtwena ma upac luhn facl se inge.​—Riti John 15:18, 19.

⁴ Ke srihpen kuht sesuwohs, pwacnacng sahp srackna oasr nuhnak in srisri lasr nuh sin mwet ma siena liki kuht uh. (Jeremiah 17:9; Ephesus 4:22-24) Ke mwe lutlut se inge kuht ac fah lotwelah kuhtuh kahs in kahsruh ma ac kahsre kuht in lain ac kuhtanglah kain in nuhnak ma ac sraclihk inmahsrlon mwet uh. Kuht ac fah oacyacpac sramsramkihn lah kuht ac kuh in oaru fuhkah nuh ke Tohkohsrahi uh ke kuht ahkpahye kuht sifacna in nuhnak oacna Jeova ac Jesus.

EFUH KUHT TIAC ENENUH IN AHKKWEYE KUHTWENA U KE FACL SE INGE

5, 6. Ke pacl se ma Jesus el muhta fin facluh ah, meac nuhnak lal nuh ke un mwet pucspucs fin facluh, ac efuh?

⁵ Ke pacl se ma kom puhla muh upac in tu na kuh ac tiac weack kuhtwena u, siyuck sum sifacna lah, ‘Meac Jesus el ac fah oruh el fin sun ma inge?’ Ke pacl se Jesus el muhta fin facluh ah, puhs ma upac ac alein inmahsrlon mwet Judea, Galilee ac Samaria. Nuhnkuh ke kuhtuh mwe puhpuhlyuck inge. Mwet Jew ac mwet Samaria tiac sramsram nuh sin sie sin sie. (John 4:9) Mwet Pharisee ac mwet Sadducee tiacna insese ke ma pucspucs. (Orekma 23:6-9) Mwet Jew ma lutlut ke masap ah nuhnkuh muh eltahl wo liki mwet ma tiacna wi lutlut. (John 7:49) Oacyacpac, puhs mwet ma sruhnga mwet in eisacni tax ac mwet Rome. (Matthew 9:11) Tuhsruhktuh Jesus el tiac sifacna eisaclacng nuh ke ma upac inge nuhkewa. El finne tu kuh in fahkwack ma pwacye kacl Jeova ac etuh pac lah mwet Israel pa muhtuhnfacl se ma sulohsohllah sin God, wacngihn sie pacl el luti nuh sin mwet tuhma lutlut lal ah muh eltahl wo liki mwet sahyac uh. (John 4:22) Tuhsruhktuh, el lotweltahl in luhngse mwet nuhkewa.​—Luke 10:27.

⁶ Efuh kuh Jesus el tiac nuhnkuh muh sie un mwet eltahl fuhlwact kuh wo liki sie pac sahyac? Ma ke srihpen puhlakihn lal ac Pahpah tuhmwacl nuh sin mwet uh. Jeova el oraclah mwet uh tuh eltahl in nwacklah facluh ke kain in mwet. (Genesis 1:27, 28) Pwacnacng Jeova ac Jesus eltahl tiac nuhnkuh muh sie mwet, acn, kuh kahs wo liki sie pac sahyac. (Orekma 10:34, 35; Fwackyuk 7:9, 13, 14) Kuht enenuh in ukwe mwe srihkasrak suwohswohs laltahl uh.​—Matthew 5:43-48.

7, 8. (a) Lacyen luhn suc kuht wi uh ac efuh? (b) Meac kuht enenuh in esam ke ma upac nuhkewa luhn mwet uh?

⁷ Efuh kuh kuht tiac wi ke kuhtwena u luhn mwet kol kuh government luhn facluh? Mweyen kuht wi ke lacyen luhn Jeova. El pa Mwet Kol lasr uh. Ke imac Eden, Satan el fahk lah tiac Jeova pa fal in kol mwet uh. Satan el ke mwet uh in luhlahlfongi muh inkacnek lal in oruh ma uh wo liki inkacnek luhn God uh. Jeova el lwelah kuht in sifacna sulaclah lah piyac kac u ma kuht ke wi uh. Ac fuhkah nuh sum? Yac kom ahkos Jeova ke srihpen kom luhlahlfongi muh inkacnek lal in oruh ma uh wo liki inkacnek lom uh? Yac kom luhlahlfongi na pwacye lah Tohkohsrahi lal uh muhkwena pa kuh in ahkwoyelah ma upac lasr uh? Kuh yac kom nuhnkuh muh mwet uh kuh in sifacna kol moul laltahl in wo fin wacngihn kahsruh luhn God?​—Genesis 3:4, 5.

⁸ Ke sie mwe puhpuhlyuck, meac kom ac fahk mwet se fin siyuck sum lah meac nuhnak lom ke sie u luhn politic kuh u ma lain government kuh ke kuhtwena kain in u inge? Kuhtuh sin u inge eltahl inse pwacye ac eltahl ke kahsruh mwet uh. Tuhsruhktuh kuht akihlen lah Tohkohsrahi luhn God uh muhkwena pa kuh in ahkwoyelah ma upac luhn mwet uh ac ahkwacngihnyelah kuhtwena orekma sesuwohs. Ke inkacnek luhn congregation lal uh, kuht oacyacpac ukwe kahs in kolyuck luhn Jeova ac kais sie mwet tiac sifacna oruh ma el nuhnkuh muh wo. Pa inge srihpac pwacnacng congregation uh inse sefanna.

9. Ma upac fuhkah se inmahsrlon mwet lili ke pacl luhn mwet sap ah, ac meac el enenuh in oruh kac?

⁹ Ke pacl luhn mwet sap ah, kuhtuh sin mwet Christian fin acn Corinth inge akuhkuhinlac inmahsrloltahl: “Sie fahk muh, ‘Nga ma lal Paul’, sie fahk muh, ‘Nga ma lal Apollos’, ac sie fahk muh, ‘Nga ma lal Peter’, ac sie fahk muh, ‘Nga ma luhn Christ.’” Ke pacl se Paul el lohngack ma inge, el arlacna lut. Ma na upac se pa sikyak inge, mweyen mislac luhn congregation uh sun mwe sensen. Pwacnacng el siyuck sin mwet lili wiyacl uh: “Yac Christ el kihtakatwelihk nuh ke u puhs?” Paul el fahk kahs in kai inge nuh seltahl: “Ke inen Leum lasr Jesus Christ, nga kwacfe nuh suwos nuhkewa, mwet lili ac lucluc, tuh kowos in insese ke ma kowos fahk, tuh in fah wacngihn srisrielik inmahsrlowos. Kowos nuhkewa in tuhkweni na nuhnak sefanna ac pwacpa sefanna.” Ma inge oacpacna nuh ke lwen lasr uh. Enenuh in wacngihn kuhtwena ma sraclihk inmahsrlon congregation uh.​—Sie Corinth 1:10-13; riti Rome 16:17, 18.

10. Meac Paul el ahkacsmakihnye mwet Christian ah, ac meac kuht kuh in lotwelah kac?

¹⁰ Paul el ahkacsmakihnye mwet Christian akmuhsralah nuhkewa lah acn seltahl uh oasr lucng ac eltahl tiac enenuh in nuhnkaclah ke “ma luhn facl se inge.” (Philippi 3:17-20)a (Liye footnote.) Mwet akmuhsralah uh oacna mwet tuhtahfpo luhn God ac Christ. Ke pacl se ma sie mwet tuhtahfpo el som nuh ke siena acn, el tiac sifacna eisaclacng nuh ke ma upac luhn acn sacn kuh nuh ke mukuikui luhn politic. Ke inkacnek se pacna inge, tiac fal mwet akmuhsralah uh in eisacltahl nuh ke kuhtwena ma upac kuh kuhtwena mukuikui luhn politic fin facluh. (Luo Corinth 5:20) Mwet ma oasr finsrak la ke moul ma pahtpaht fin facluh uh eltahl oacyacpac oaru nuh ke Tohkohsrahi uh ac tiac wi kuhtwena un mwet ke kuhtwena ma upac fin facluh.

AHKPAHYE KOM IN OARU NUH KE TOHKOHSRAHI LUHN JEOVA

11, 12. (a) Ohiyac fuhkah kuht enenuh in fahsr liki kuht fin ke sruokyacna oaru lasr nuh ke Tohkohsrahi luhn God? (b) Meac puhlakihn luhn sie muhtwacn lili nuh sin kuhtuh mwet in acn sel, ac meac kahsrel in eklac?

¹¹ Ke acn pucspucs fin facluh, mwet uh puhla muh eltahl fototo nuh sin mwet ma oacna sie nuh ke kapkapack, facsin, ac kahs laltahl uh. Inkaiyen pacl uh, eltahl kohnkihn acn ma eltahl tuhkuh we me uh. Tuhsruhktuh, kuht enenuh in tiacna lwelah kain in ohiyac inge in ahkkulukye kuht. A kuht enenuh in ekuhllah nuhnak lasr uh ac ahkpahye nuhnak luhn insiacsr tuh kuht in tu na kuh ac tiac weack kuhtwena u ke kuhtwena ohiyac ma sikyak. Kuht ac oruh ma inge fuhkah?

¹² Ke sie mwe puhpuhlyuck, Mirjetab (liye footnote) el isuslac ke acn se ma tuh pahngpahng Yugoslavia in pacl meet ah. Ke acn se ma el mahtuhlah we inge, mwet kac ah sruhnga mwet Serbia. Ke pacl se ma el etwacllah Jeova, el akihlenack lah el tiac enenuh in srisri mwet ac lah Satan pa ke mwet uh in sruhnga sie sin sie uh. Pwacnacng el kwacfeacng elan ekuhllah ma el puhla ah. Tuhsruhktuh ke pacl se ma mweun se muhtwacwack inmahsrlon kais kuhtuh u srihsrihk ke acn sel uh, Mirjeta el sulpac na muhtwacwack in sruhnga mwet Serbia. El sruhnga pac som fahkwack pweng wo nuh seltahl. El etuh lah tiac wo ma inge, pwacnacng el puhruhe nuh sin Jeova ac siyuck sel elan kahsrel eslah ma el puhla inge. El oacyacpac siyuck sel elan kahsrel in muhtwacwack pioneer. Mirjeta el fahk: “Nga konwacack lah ke pacl se nga lohacng na nuh ke orekma in luti uh, pa inge mwe kahsruh se ma wo emeet. Ke orekma in luti uh, nga srihke nga in etahi ohiyac wo luhn Jeova ke luhngse ac nga liye lah wacngihnlac nuhnak kuluk ma nga puhla ah.”

13. (a) Meac sikyak nuh sel Zoila, ac meac el oruh? (b) Meac kuht kuh in lotwelah ke ma sikyak nuh sel Zoila inge?

¹³ Zoila el sie muhtwacn lili fin acn Mexico suc som nuh Europe. Ke congregation lal uh, oasr mwet lili ke kuhtuh pac acn sahyac fin acn Latin America. Zoila el fahk lah kuhtuh sin mwet inge isrucn acn el tuhkuh we me, facsin lal, ac on ke acn sel ah. El arlacna ahsor, pwacnacng el puhruhe nuh sin Jeova elan kahsrel in tiac nuhnkuh ke ma eltahl fahk inge. Meac kuht ac oruh fin ma inge sikyak nuh sesr? Kuhtuh sin mwet lili wiyacsr uh srackna puhla muh ma na upac se eltahl in kutong puhlakihn laltahl ke pacl se mwet sahyac uh fahk ma kuluk ke acn seltahl uh. Pwacnacng, kuht sruhnga fahk kuh oruh kuhtwena ma ma ac oruh tuh sie u in wo liki sie pac u sahyac. Kuht sruhnga sraclihk inmahsrlon mwet lili wiyacsr ke congregation kuh inmahsrlon kuhtwena mwet sahyac.​—Rome 14:19; Luo Corinth 6:3.

14. Meac kuh in kahsre kom in puhla oacna ma Jeova el puhla nuh sin mwet sahyac?

¹⁴ Kuht nuhkewa etuh lah mwet kuhlwacnsap luhn Jeova uh inse sefanna oacna sie u, pwacnacng kuht tiac enenuh in nuhnkuh muh sie acn wo liki sie pacna acn. Tuhsruhktuh sahp sucu lom an kuh mwet ma kom wi mahtuhlah uh pa mokle kom in luhngse acn kom tuhkuh we me an. Pwacnacng sahp kuhtuh pacl uh kom ac nuhnak kuluk ke mwet ke siena acn, facsin, kahs kuh sruf la. Meac ac kuh in kahsre kom in ekuhllah kain in ohiyac se inge? Nuhnkuh ke puhlakihn luhn Jeova nuh sin mwet ma kohnkihn acn seltahl kuh puhla muh eltahl wo liki mwet sahyac uh. Oruh research ke sihfac se inge ke pacl in lutlut lom sifacna kuh ke pacl in lutlut luhn sucu lom uh. Na kom siyuck sin Jeova elan kahsre kom in puhla oacna ma el puhla nuh sin mwet nuhkewa.​—Riti Rome 12:2.

15, 16. (a) Meac kuhtuh mwet uh ac oruh ke srihpen kuht siena luhkeltahl? (b) Pahpah ac ninac uh ac kahsruh fuhkah tuhlihk nahtuhltahl uh in sruokyacna oaru laltahl nuh sin Jeova?

¹⁵ Kuht ke kuhlwacnsuhpuh Jeova ke sie nuhnak ac elah nwacsnwacs, pwacnacng kuhtuh pacl uh kuht ac arlacna siena liki mwet ma wi kuht orekma, tuhlihk lutlut wiyacsr, mwet tuhlan lasr, kuh sucu lasr uh. (Sie Peter 2:19) Jesus el sang kahs in sensen lah mwet sahyac uh ac fah sruhngwac kuht ke srihpen kuht siena. Esam lah inkaiyen mwet ma lain kuht uh tiac etuh ke Tohkohsrahi luhn God. Pwacnacng eltahl tiac kahlwem kac lah efuh arlacna yohk srihpac nuh sesr in oaru nuh ke Tohkohsrahi ac tiac nuh ke government luhn mwet uh.

¹⁶ In ahkkahlwemye oaru lasr nuh sin Jeova, ac tiac ma mwet uh oruh kuh fahk nuh sesr uh in ahkohs. (Daniel 3:16-18) Mwet fuhsr, sahp komtacl ac puhla muh arlacna upac nuh sumtacl in siena liki mwet sahyac uh. Pahpah ac ninac, kahsruh tuhlihk nuhtumtacl an in puhlaik ke acn in lutlut ah. Sahp tuhlihk nuhtum an ac sahngweng in fahk lah el tiac kuh in wi kuhtwena mwe ahkfuhlwact ke acn sum. Ke pacl in lutlut luhn sucu lom, kom kuh in lutlutkihn lah meac puhlakihn luhn Jeova ke ma inge. Lotweltahl in ahkuhtweyac ma eltahl luhlahlfongi uh ke inkacnek ma kahlwem ac ahkkahlwemye suhnak. (Rome 1:16) Oacyacpac, fin fal, kahsruh tuhlihk nuhtum an in sramsram nuh sin teacher lal an ac ahkuhtweyac nuh seltahl luhlahlfongi lasr uh.

ENGANKIHN MA OREKLAC NUHKEWA LUHN JEOVA

17. Kain in nuhnak fuhkah kuht enenuh in fahsr liki, ac efuh?

¹⁷ Kuht kwacna engankihn mongo, kahs, facsin ac kahtoiyac luhn acn sesr uh. Tuhsruhktuh yac kuht puhla muh ma kuht luhngse uh wo pacl nuhkewa liki na ma mwet sahyac uh luhngse? Jeova el ke kuht in engankihn kain in ma nuhkewa ma el oraclah uh. (Psalm 104:24; Fwackyuk 4:11) Pwacnacng kuht tiac enenuh in kwacfe muh sie inkacnek in oruh sie ma el wo liki sie pac sahyac.

18. Efuh kuh wo kuht in nuhnkuh ke mwet sahyac uh oacna ke Jeova el oruh uh?

¹⁸ Jeova el luhngse mwet nuhkewa in lutlut kacl, alu nuh sel ac in moul ma pahtpaht. (John 3:16; Sie Timothy 2:3, 4) Pwacnacng, ke pacl se mwet lili wiyacsr uh ahkkahlwemye nuhnak laltahl ac siena liki ma kuht nuhnkuh, kuht engan in lohng fin ma inge fal nuh ke ma Jeova el luhngse. Kuht fin oruh ohinge, moul lasr uh pwacr ac engan, ac kuht tuhkweni yurin mwet lili wiyacsr uh ke inse sefanna. Oacna ke kuht sramsramkihn tari, ke srihpen kuht oaru nuh sin Jeova ac nuh ke Tohkohsrahi lal uh, kuht tiacna wi kuhtwena u ke ma upac ma sikyak fin facluh uh. Kuht sruhnga ohiyen inse fuhlwact ac alein ma sikyak ke facl lal Satan uh. Pwacnacng kuht arlacna srui lah Jeova el luti kuht in luhngse ohiyac mislac ac inse puhsisacl. Puhlakihn lasr uh pa oacna ma mwet sihm luhn psalm el fahk inge: “Fuhkah woiyac ac fuhkah insewowoiyac ke mwet luhn God elos tuhkweni muhta ac inse sefanna.”​—Psalm 133:1.

[Sihm srihsrihk e ten]