Tu Misla A Liye Molela Lun Jeova!
“Komwos tuyuk, tu misla a liye molela lun Jeova yurumwos.”—2 Kronikel 20:17.
1, 2. Efu ku meun lun “Gog lun Magog” su apkurun in tuku upa liki me sensen su tuku ke orekma lun terrorist?
MET puspis elos sang kalmen orekma lun terrorist oanu sie kain in meun lain met nu kemwa fwin fwalu a akmwuk lun moul nu kemwa. Ke sripe se inge, kut arulanu kalem efu kain in me sensen inge enenu na paye in aksumwosyeyuk. Tusruktu, ke inkanek saye, su yok liki ma inge, oasr pa sie kain in meun su upa liki, tusruktu met puspis fwin fwalu elos tia loang nu ka. Mea se inge?
2 Pa inge meun lun “Gog lun an Magog,” Baibel el sramsram ke ma se inge in buk lun Ezekiel sapter 38. Ya kut kaskas alukela ma fwal ke pal se ma kut fwak la meun lal Gog el upa liki me sensen su tuku ke orekma lun terrorist fwin fwalu nu fon? Mo na mo, meyen meun lal Gog el tia lain mukena guferment lun met. El meun lain guferment lun God in kosrao! Tusruktu, Met Orekutla el ku in lain na paye meun upa lal Setan, el tia oanu met su arulanu srik na paye ku lalos in kurunganang akmwuk lalos sifwanu.
Sie Meun Lain Guferment lun God
3. Mea me solsol nu sin met kol lun fwalu nu kemwa elos enenu in oru mutamwauk 1914, a fuka topuk lalos?
3 Meun upa inmaslon Togusra lun God su kol ke pal inge a akmwuk koluk lun Setan el tafwela nu misenge mutamwauk ke 1914 tokin oakiyuki lun Togusrai lun God in kosrao. Ke pal ingo, akkalemyeyuk nu sin met kol lun fwalu in akpusisilyelos sifwanu nu sin met kol su God el sulela. Tusruktu, elos srunga in oru ou inge, oanu kas palu el fwak: “Togusra lun fwalu elos sifwanu takla, a met leum elos tukeni papu, lain Jeova a lain met akmusrala lal, a fwak: ‘Lela kut in otelik me kapur lalos, a sisla sul lalos liki kut!’ ” (Sam 2:1-3) Me lain ke kolyuk lun Togusrai e fwa sun safla lal ke lusen pal in meun lal Gog lun Magog.
4, 5. Fuka metu elos ku in lain Togusrai lun God in kosrao su tia ku in liyeyuk?
4 Saap kut nunku fuka metu elos ku in meun lain guferment in kosrao su elos tia ku in liyeyuk. Guferment se inge, su Baibel el akkalemye, orekla sin “siefok anngoul akosr tausen, su moliyukla tari liki fwalu,” a muta yurin “Lam,” Jisus Kraist. (Fwakyuk 14:1, 3; Jon 1:29) Meyen guferment se inge el oasr in kosrao, paenang guferment sasu se inge kutupal Baibel el pangpang “kosrao sasu,” a met nu kemwa su muta fwin fwalu ye koko lal elos fwal in pangpang “sie fwalu sasu.” (Isaia 65:17; 2 Piter 3:13) Pus sin 144,000 inge su akola in welul Kraist in kol in kosrao elos aksafyela tari orekma lalos fwin fwalu ke oaru. Ke ma inge elos sang me akpayeye la elos fwal in eis kunokon sasu lalos in kosrao.
5 Tusruktu, sie ma lula srisrik ke 144,000 elos srakna muta fwin fwalu. Inmaslon 15,000,000 met su wi ke me akfulat ke Mongo in Eku lun Leum in yiu 2002, oasr na 8,760 met su akkalemye fwinsrak lalos oanu met solosola ke kunokon inge in kosrao. Kutena met su srike in meun lain met lula inge nu kemwa su oasr fwinsrak in ekla sie met ke Togusrai, elos meun lain Togusrai lun God.—Fwakyuk 12:17.
Togusra El Aksafyela Kutangla Lal
6. Fuka nunuk lun Jeova a Jisus Kraist ke me lain su orekla nu sin met lun God?
6 Ma Jeova el pula ke me lain ke Togusrai lal su oakiyuki tari akkalemeyuk meet ke kas inge: “El su muta in kosrao fwa isrun; Jeova el e fwa aksruksruk elos. Na el fwa kaskas nu selos in koskusrok lal, a akongoiyelos in mulat lulap lal, el fwak: ‘Tusruktu, Nga filiye tari Togusra luk fwin Saion, eol mutal sik.’ ” (Sam 2:4-6) Pal inge el tuku tari nu sel Kraist, ye koko lun Jeova, el e “fwa aksafyela kutangla lal.” (Fwakyuk 6:2) Mea nunuk lun Jeova nu ke me lain su orekla nu sin met lal ke lusen pal in kutangla safla? Jeova el nunku la meun inge orekla in lainul a in lain Togusra lal su mutamwauk in kol. “Tu el su kalkomwosi kalye atron mutuk,” Jeova el fwak. (Zekaraia 2:8) A Jisus el akkalemye na paye la el loang nu ke ma metu elos oru ku tia oru nu sin met akmusrala wiel, a ma elos oru ku tia elos oanu oru pa nu sel.—Mattu 25:40, 45.
7. Ke sripe puspis fuka “u lulap,” su akkalemyeyuk in Fwakyuk 7:9, elos pulakin mulat lal Gog?
7 Paye, elos nu kemwa su kafofo in akkeye met akmusrala elos ku in pulakin pa mulat lal Gog. Met inge nu kemwa su oasr fwinsrak in ekla “fwalu sasu” lun God, pa “u lulap” sin “mutanfwal nu kemwa, a sin sruf nu kemwa, a fwil nu kemwa, a loa nu kemwa.” (Fwakyuk 7:9) Elos inge sramsramkinyuk oanu elos “tu ye mutun tron a ye mutun Lam, nukomang nuknuk fwasrfwasr. Ke ma inge elos eis insemwomwo lun God a Kraist Jisus. “Pam on in paulos,” elos kaksakin Jeova oanu Sie Met Kol su oasr sumwos in kol in kosrao a fwalu, su kolyuk lal akkalemyeyuk ke inkanek lun Togusra lal su el sulela, Jisus Kraist, el su “Lam lun God.”—John 1:29, 36.
8. Mea meun lal Gog ku in mokle Kraist in oru, a mea fwokin ma inge?
8 Meun lal Gog fwa mokle Togusra lun God su el sulela in oru Armagedun in mutamwauk. (Fwakyuk 16:14, 16) Elos nu kemwa su srunga in akilen kolyuk lun Jeova elos e fwa mise. Aok, elos nu kemwa su muteng ke ongoiye lulap ke sripen oaru lalos ke Togusrai lun God, elos e fwa pulakin me insemwomwo lulap su wangin safla. Ke pal se el sramsram ke ma se inge, met sap Poul el simusla: “Su sie me akul kalem ke nununku sumwos lun God, tu komwos fwa ku in oekla oanu fwal nu ke Togusrai lun God, su komwos ouyepa keok ka. Fwin sumwos yurin God in akkeokyelos su akkeokye komwos, a nu sumwos su keok, komwos in mongle yurosr, ke Leum Jisus el fwa sikme in kosrao me wi lipufon in ku lal in e furrurur, in eis foloksak selos su tia etu God, a nu selos su tia akos mwosasu lun Leum Jisus.”—2 Tessalonika 1:5-8.
9, 10. (a) Fuka Jeova el sang kutangla nu sin Juda lain met lokwalok yok lalos? (b) Mea met Kristian elos enenu in tafwela in oru?
9 Ke lusen pal in ongoiye lulap su apkurun in tuku, su e fwa safla nu ke Armagedun, Kraist el oru meun lal lain ma koluk nu kemwa. Tusruktu, tia enenu nu sin met kulansap lal in wi ke meun inge, oanu met nu kemwa su muta ke sruf luo ke togusrai lun an Juda elos oru meet tausen yiu puspis somla. Meun se inge ma lun Jeova, a el sang kutangla nu selos. Record el fwak: “Jeova el filiye met srumsruwanma lain tulik nutul Amon, Moab, a Eol Sier, su tuku lain Juda, a elos uniye sie sin sie. Tu tulik nutul Amon a Moab elos tuyuk lain met su muta fwin eol Sier, in arulanu uniye a kunauselosla; a ke elos uniye tari met Sier, kais sie selos kasru in kunausla siepa. A ke met Juda elos tuku nu ke tauer in san yen mesis. Elos ngetla nu ke u lulap se inge, a liye, elos monin met mise su putatla nu in foko, a wangin su kaengla.”—2 Kronikel 20:22-24.
10 Ma sikyuk inge fwal nu ke ma Jeova el palye: “Komwos fwa tia enenu in anwuk.” (2 Kronikel 20:17) Ma sikyuk inge sie me srikasrak nu sin met Kristian nu kemwa ke ma elos enenu in oru ke pal se Jisus el mutamwauk in orekma in “aksafyela kutangla lal.” Ke pal inge, elos tafwela in lain ma koluk, tia ke kofwen me meun su ku in liyeyuk ke mutasr, a ke ma lun ngun. Ke ma inge elos “kutangla ma koluk nu ke ma mwo.”—Rom 6:13; 12:17-21; 13:12; 2 Korint 10:3-5.
Su Ku In Kol Meun lal Gog?
11. (a) Kain in un met fuka Gog el orekmakin in akpayeye meun lal? (b) Mea ku in weang nu ke akola in ngun?
11 Gog lun Magog pa Setan su Devil ke luma koluk lal mutamwauk 1914. Oanu sie ma orekla in ngun, el tia ku in orek meun na paye in ikwe, tusruktu, el orekmakin u lun met in oru ma lungse lal. Su un met inge su el ku in orekmakin? Baibel el tia aketeye nu sesr, tusruktu el ase nu sesr kutu akul su ku in kasre kut in akilen su un met inge. Ke kut liye ma sikyuk puspis fwin fwalu in akpayeye kas palu lun Baibel, kais kutu srisrik kut e fwa kalem ke ma se inge. Met lun Jeova elos srunga in palye tusruktu elos akola pal nu kemwa a tia mutol in ngun, a elos etu na paye mokukui lun politic a alu su akpayeyen kas palu lun Baibel.
12, 13. Fuka met palu Daniel el palye sie meun safla lain met lun God?
12 Met palu Daniel el akkalemye mea e fwa sikyuk ke meun safla lain met lun God, ke pal se el simusla: “A el [togusra lun eir] fwa illa wi silolel lulap in kunausla met puspis a akwanginyela. A el fwa eokiye loom nuknuk lun loom in togusra lal in maslon mwea a eol mutal Mwolanu.”—Daniel 11:44, 45.
13 Ke context lun Baibel, “mwea” se inge pa Great Sea, ku mwea lun Mediterranean, a “eol mutal mwolanu” pa Saion, su ke an inge Jeova el fwak: “Tusruktu, Nga filiye tari togusra luk fwin Saion, eol mutal sik.” (Sam 2:6; Josua 1:4) Ke ma inge, kut fwin sramsram ke ma lun ngun, an se inge su ku in konoiyukyuk “inmaslon mwea a eol mutal mwolanu,” el lumeyuk nu ke luma mwomwo in ngun lun met Kristian akmusrala. Elos tia sifwil ipen mwea su lumeyuk nu ke met puspis su srunga God, a elos ngetuk nu ke pal in kolyuk lalos welul Kraist Jisus ke Togusrai in kosrao. Arulanu kalem, met kulansap akmusrala lun God, wekunang met asrouki oaru lalos pangpang u lulap, elos fwa nien sun lun togusra lun eir ke pal se el mutamwauk ke meun upa lal in akpayeye kas palu lun Daniel.—Isaia 57:20; Hibru 12:22; Fwakyuk 14:1.
Mea Met Kulansap lun God Elos Enenu in Oru?
14. Mea ma tulo su met lun God elos fwa oru fwin elos sun orekma koluk lun met lokwalok lalos?
14 Mea met kulansap lun God elos enenu in oru ke pal se meun su lainelos el mutamwauk? Sulpa, mutanfwal lun God in pal lal Jiosafat elos oru in pal meeta ase nu sesr me srikasrak. Esam la met nu kemwa ke mutanfwal inge sapkinyuk in oru ma tulo: (1) elos enenu in tuyuk, (2) tu misla, a (3) liye molela lun Jeova. Mea met kulansap lun God elos enenu in oru ke pal inge in akpayeye kas inge?—2 Kronikel 20:17.
15. Mea kalmen tuyuk nu sin met lun Jeova?
15 Elos enenu in tuyuk: Met lun God elos tia fuleak ke oaru lalos in akkeye pal nu kemwa Togusrai lun God. Oanu met Kristian, elos tafwela in tia wi ke kutena u su lain sie sin sie. Elos fwa “tu ku, tia mokuikui” ke orekma in kulansap oaru lalos nu sin Jeova a elos fwa tafwela in sang kaksak nu sin Jeova ye mutun met nu kemwa ke sripen lungkulang lal. (1 Korint 15:58; Sam 118:28, 29) Wangin kutena ma upa ke pal inge su ku in moklelos in fuleak ke orekma mwo inge su tuku sin God.
16. Ke inkanek fuka met kulansap lun Jeova elos fwa tu misla?
16 Tu misla: Met kulansap lun Jeova elos fwa tia srike in sifwanu molelosla, a elos filiye lalalfongi lalos nu kemwa nu sin Jeova. El mukena ku in molela met kulansap lal liki ma upa nu kemwa lun fwalu, a el mwolela tari in oru ou inge. (Isaia 43:10, 11; 54:15; Eoksra 3:26) Toeni nu ke lalalfongi Jeova pa, lalalfongi nu ke me kasru su ku in liyeyuk su el orekmakin ke lusen yiu puspis in akpayeye akmwuk lal. Yok liki meeta, met Kristian paye elos enenu na paye in filiye lalalfongi lalos nu sin met lili wielos su Jeova a Togusra lal elos sulela in kol. Met oaru inge nu kemwa elos fwa kasru met lun God. Pilesru ke kolyuk lalos ku in kol nu ke ongoiye.—Mattu 24:45-47; Hibru 13:7, 17.
17. Efu ku met kulansap oaru lun God elos e fwa liye molela lun Jeova?
17 Liye molela lun Jeova: Molela pa me sang nu selos nu kemwa su srukye oaru lalos oanu met Kristian a elos su lalalfongi Jeova ke molela. Nu ke pal in aur safla—a ke ku lalos kemwa—elos fwa sulkakin tuku lun len in nununku lun Jeova. Ma orekla nu kemwa elos enenu in etu la Jeova mukefwunnu pa God paye a oasr met kulansap oaru lal fwin fwalu. Tia sifwil eneneyuk sie me sramsram yok ke sumwos lun Jeova in kol.—Ezikiel 33:33; 36:23.
18, 19. (a) Fuka on in kutangla in Exodus sapter 15 el akkalemye pulakin lun met nu kemwa su e fwa moula liki meun lal Gog? (b) Mea met lun God elos enenu in oru ke pal inge?
18 Ke sie ku su aksasuyeyuk, met lun God elos fwa ilyuk nu ke fwalu sasu, arulanu insemwomwo in on sie on in kutangla, oanu met Israel in pal meeta elos oru tokin elos sasla nu ke Mwea Srusra. Meyen elos sang kulo nu sin Jeova ma patpat ke kurungin lal, paenang kais sie selos a oanu sie u, elos fwa sifwil kalweni kas inge su fwakyuk tari in pal meeta: “Nga fwa on nu sin Jeova, tu el arulanu akfulatyeyuk. . . . Jeova el sie met meun. El Jeova. . . . Lepoum leyut, O Jeova, foklelik met lokwalok. A in yok lun mwolanu lom kom afnulosla su tuyuk lain kom; kom supaot mulat lom, a elos esukak oanu srua. . . . In lungkulang lom kom kol met su kom molela; kom penolos in ku lom nu yen mutal sum. . . . Kom fwa wiselosyuk nu lu, a eokelosi fwin eol lun usru lom, an su, O Jeova, kom oru tu kom in muta we, loom sum, O Jeova, su poum oakiye. Jeova el fwa Leum ma patpat a ma patpat.”—Exodus 15:1-19.
19 Ke pal inge su fwinsrak ke moul ma patpat el kalem liki meet, pa inge pal mwo lun met kulansap lun God in akkalemye oaru in kulansap lalos nu sin Jeova a in aksasuye kaifweung lalos in kulansap nu sel oanu Togusra ma patpat!—1 Kronikel 29:11-13.
Ya Kom Ku In Aketeye?
• Efu ku meun lal Gog e fwa orek lain met akmusrala a sip ngie?
• Fuka met lun God elos tuyuk?
• Mea kalmen in tu misla?
• Fuka met lun God elos fwa liye molela lun Jeova?
[Picture on page 26]
Jeova el sang nu sel Jiosafat a met nu kemwa lal kutangla, a elos tia enenu in anwuk
[Picture on page 28]
Met akmusrala a sip ngie elos akkeye sumwos lun Jeova in kol
[Picture on page 30]
Oanu met Israel in pal meeta, kitin pal lula met lun God elos fwa on in kutangla