YAC KOM ETUH?

Yac acn Israel in pacl meet ah nwacnwaclah ke insack oacna ke ma Bible uh ahkkahlwemye?

BIBLE uh ahkkahlwemye lah oasr acn ac finohl pucspucs ke Facl Wuhlelah ma oacna insack ac “arlacna puhkantwen” sahk we. (Sie Tokosra 10:27; Joshua 17:15, 18) Tuhsruhktuh, ke pacl inge mwet uh fin liye mwesahslah yohk luhn acn inge, eltahl ac suhlahlahlfongi kuh sahp nuhnkuh fin pwacye.

Puk se inge Life in Biblical Israel ahkutweyac lah “arlacna puhs kain in sahk ke insack Israel in pacl meet ah liki na pacl inge.” Sahk ma kap ke finohl we uh pa Aleppo pine (Pinus halepensis), evergreen oak (Quercus calliprinos), ac terebinth (Pistacia palaestina). In acn Shephelah, sie inkucl ma oan inmahsrlon acn inging pucspucs ke finohl fuhlwact ac ke Mediterranean Coast, puhs kain in sahk inge ma pahngpahng sycamore fig (Ficus sycomorus).

Puk se inge Plants of the Bible ahkkahlwemye lah wacngihnlac na pwacye sahk inge ke kuhtuh inkucl luhlahp fin acn Israel. Efuh kuh ma inge sikyak? Puk se inge ahkuhtweyac lah ohiyac inge sikyak kais kuhtuh srihsrihk na. Ma inge ahkkahlwemye lah: “Mwet uh kuhnahoslah sahk ma oan ke acn inge, tuh eltahl in kuh in ahkyohkye acn in orek imac, ac ahkyohkye pac acn in liyacacng kosro nahtuhltahl uh. Sahyacn ma inge, eltahl pakwelah pac sahk pucspucs in muhsah lohm ac etongkihn.”