TOP NUH KE KIHSEN SIYUCK KE BIBLE

Efuh kuh kuht enenuh in ahkacsmakihnye misac lal Jesus?

Misac lal Jesus pa yohk srihpac emeet ke ma sikyak fin facluh. El misac in fohlohkohnwack oakwuck ke moul luhn mwet uh oreklac ke muhtwacwackiyac uh. Mwet uh tiac oreklac in oasr ohiyac in oruh ma kuluk, in tiac sun mas, ac in tiac misac. (Genesis 1:31) Tuhsruhktuh ma kuluk uh ilyak nuh facluh ke srihpacl Adam, mwet se meet. Jesus el sang moul lal in molikuhtlac liki ma kuluk ac misac.​—Riti Matthew 20:28; Rome 6:23.

God el ahkkahlwemye luhngse yohk lal ke el suhpwacma Wen nahtuhl in misac kacsr. (Sie John 4:9, 10) Jesus el fahk nuh sin mwet tumal lutlut uh in ahkacsmakihnye misac lal ke inkacnek luhn sie mwe ahkfuhlwact suc orekmakihnyuck bread ac wain. Kuht fin wi in ahkfuhlwactye mwe acsmakihn inge ke yac nuhkewa, kuht srui na pwacye luhngse yohk suc ahkkahlwemyeyuck sin God ac sel Jesus.​—Riti Luke 22:19, 20.

Suc kuh in wi mongo bread ac nim wain?

Ke pacl se meet ma Jesus el fahk nuh sin mwet tuma lutlut lal uh in ahkacsmakihnye misac lal, el sramsram ke sie wuhleacng kuh inseselac se. (Matthew 26:26-28) Ma inge sang finsrak nuh seltahl ac nuh sin kuhtuh pac sahyac in weluhl in tohkohsrah ac mwet tol in kuhsrao. Finne million pucspucs sin mwet wi ahkfuhlwactye misac lal Jesus, tuhsruhktuh mwet ma oasr na ke wuhleacng inge pa kuh in wi mongo bread ac nim wain.​—Riti Fwackyuk 5:10.

Ke lusen pacl suc apkuhran nuh ke yac 2,000, Jeova el sulaclah mwet suc ac fah wi tohkohsrah. (Luke 12:32) Pihsacltahl puh kuht fin oacklah nuh ke pihsen mwet suc ac fah moul ma pahtpaht fin facluh.​—Riti Fwackyuk 7:4, 9, 17.