Efuh Kuh Jesus El Kweok Ac Misac?

Meac kom ac fahk fin siyuckyuck sum, “Yac kom luhngse in moul ma pahtpaht?” Sahp inkaiyen mwet uh ac fahk muh eltahl luhngse tuhsruhktuh eltahl puhla muh tiac kuh in sikyak. Mwet pucspucs fahk muh misac uh ma na ac sikyak nuh ke moul luhn sie mwet ac lah pa inge sahflahiyen moul lasr uh.

Tuhsruhktuh, srihke nuhnkuh fin pa ikihlyucklac kihsen siyuck se inge ac siyuckyuck sum, “Yac kom ahkolah in misac?” Inkaiyen mwet uh ac topuk fahk muh moh. Meac ma inge ahkkahlwemye? Finne oasr ma upac kuht sun kuh mwe srihfe ma kuht puhla, ma kuht luhngse ac kena yohk uh pa in moul. Bible uh ahkkahlwemye lah God el oraclah mwet uh tuh in oasr kena yohk se laltahl in moul. Pa inge ma sihmlac kac uh, “el fihliyac ma pahtpaht insiaclos.”​—Ecclesiastes 3:11, BMK.

Ke ma na pwacye uh, mwet uh tiac moul ma pahtpaht. Srihpac fuhkah se pwacnacng kuht tiac uh? Ac yac oasr ma God el oruh in ahkwoyelah ma inge? Top luhn Bible uh mwe ahkkweye nuh sesr ac oasr mwe ahkuhtweyac nuh kac lah efuh Jesus el kweok ac misac.

EFUH KUHT TIAC MOUL MA PAHTPAHT

Sapta tolu emeet ke puk luhn Genesis uh fahk lah God el oraclah sie finsrak nuh sin mwet uh ke el oraclah siacnyacn se emeet ah tuh in wacngihn sahflahiyen moul. El oacyacpac ahkutweyac ma eltahl enenuh in oruh tuh eltahl in engankihn ma inge. Tohkoh, ma suhmuhslah uh ahkuhtweyac lah fuhkah nwe eltahl tiac ahkos God ac ke wacngihnlac finsrak se inge luhkeltahl. Ke srihpen mwe sramsram se inge ahkuhtweyucki ke inkacnek na fihsracsr, pwacnacng kuhtuh mwet uh puhla muh pihlenfong na pa inge. Tuhsruhktuh, in oacna puk ahkosr ma sramsramkihn moul lal Jesus uh, puk luhn Genesis uh sang mwe ahkpwacyeye nuh kac lah ma suhmuhslah mahtuh inge arlacna suwohs.a

Meac sikyak ke srihpen Adam el tiac ahkos? Pa inge top luhn Bible uh: “Ma kuluk tuhkuh nuh facluh ke mwet se [Adam], ac ma kuluk lal use pac misac. Ke srihpac se inge, misac ma nuh sin mwet nuhkewa, mweyen mwet nuhkewa orekma kuluk.” (Rome 5:12) Adam el oraclah ma kuluk upac se ke el tuh seahkos God inge. Pa inge srihpac se pwacnacng wacngihnlac finsrak wowo lal in moul ma pahtpaht ac tok el misac. Ke srihpen kuht tuhkuh sel me, pwacnacng kuht usrui ma kuluk lal uh. Ac ke srihpac se inge kuht sun mas, mahtuhoh ac misac. Mwe ahkuhtweyac nuh ke srihpac se pwacnacng kuht misac uh fal nuh ke ma scientist ke pacl inge konwacack nuh ke kais kuhtuh ohiyac ma tuhlihk uh usrui sin pahpah ac ninac kiyacltahl uh. Tuhsruhktuh, yac oasr ma God el oruh in ahkwoyelah ma sikyak inge?

MEAC GOD EL ORUH

Ahok, God el oraclah oakwuck se in molwelah kuh in sifwil fohlohkuhnack finsrak in moul ma pahtpaht se ma Adam el sislah ac oruh mwet nuhkewa tohkohl tiac engankihn inge. God el oruh fuhkah ma inge?

Bible uh fahk ke Rome 6:23 lah “molin ma kuluk pa misac.” Adam el oraclah ma kuluk pwacnacng el misac. In oacpacna, kuht oruh ma kuluk pwacnacng kuht moli ma kuluk inge, ke pacl se kuht misac. Tuhsruhktuh tiac ma lasr pa kuluk uh, mweyen ke pacl se kuht isuslac oasr tari ma kuluk lasr. Ke srihpen luhngse luhn God el suhpwaclma Jesus, wen nahtuhl tuh elan ‘moli ma kuluk’ lasr uh. Ma inge orek fuhkah?

Ke srihpen Adam, mwet suwohswohs se pa oraclah ma kuluk ac misac ke seahkos lal, pwacnacng enenweyuck sie mwet suc suwohswohs ma ac ahkos nwe ke el misac tuh el in molikuhtlac liki ma kuluk lasr uh. Bible uh ahkuhtweyac ohinge: “Na oacna ke mwet nuhkewa elos mwet kuluk ke srihpen seahkos luhn mwet sefanna, in ohiyac sac na, mwet nuhkewa kuh in ahksuwohsyeyuck ye muhtuhn God ke srihpen ahkos luhn mwet se.” (Rome 5:19) Jesus pa “mwet se” inge. El som liki inkuhsrao, el eklac sie mwet suwohswohsb ac el misac kacsr. Ke srihpen ma inge, kuht kuh in suwohs ye muhtuhn God ac oasr finsrak lasr in moul ma pahtpaht.

EFUH JESUS EL KWEOK AC MISAC

Tuhsruhktuh, efuh kuh Jesus el enenuh in kweok ac misac tuhfah ma inge ahkfahsryeyuck? Yac God Kuhlacna el tiac kuh in oraclah masap lah tuhlihk nuhkewa nahtuhl Adam uh ac kuh in moul ma pahtpaht? Pwacye lah oasr kuh lal in oruh ma inge. Tuhsruhktuh, el fuhnuh oruh ohinge, luhkuhn tiac fahsr fal nuh ke masap lal ma fahk muh molin ma kuluk pa misac. Masap se inge tiac ma oreklac tuh in ikihlyucklac kuh pihlesreyuck fin enenuh. Tuhsruhktuh, ma inge yohk srihpac nuh ke nuhnuhnkuh suwohs.​—Psalm 37:28.

God el fuhnuh tiac sruokyacna nuhnuhnkuh suwohs lal ac tiac ukwe masap se inge, mwet uh ac kuh in nuhnkuh el fin ac oruh pac ohinge ke kuhtuh pac ma sahyac. Ke sie mwe puhpuhlyuck, sahp mwet uh ac kuh in nuhnkuh lah suwohs nuhnuhnkuh lal nuh ke tuhlihk nahtuhl Adam lah suc fal in eis moul ma pahtpaht uh. Kuh fin fal in luhlahlfongiyuck ke wuhlelah lal uh. Oaru luhn God in fahsr fal nuh ke nuhnuhnkuh suwohs lal uh ac ukwe na masap lal ke el molikuhtlac uh pa ahkkweye luhlahlfongi lasr in etuh lah God el ac fah oruh ma wo ac suwohs pacl nuhkewa.

Ke srihpen God el kihsackuhnlah moul lal Jesus, ma inge oraclah sie inkacnek in oasr moul ma pahtpaht ke sie Paradise fin facluh. Lohacng nuh ke kahs lal Jesus ke John 3:16 inge: “God el luhngse facluh ohinge, el acse wen sefanna nahtuhl, tuh elos nuhkewa suc luhlahlfongi in el fah tiac misac, a elos fah eis moul ma pahtpaht.” Ke srihpac se inge, misac lal Jesus uh ahkkahlwemye nuhnuhnkuh suwohs luhn God ma ac fah oan ma pahtpaht, tuh yohkna luhngse yohk lal nuh sin mwet uh.

Tuhsruhktuh, efuh kuh Jesus el enenuh in kweok ac misac ke sie inkacnek na upac oacna ma ahkuhtweyucki ke puk ahkosr in Bible ma sramsramkihn moul lal Jesus uh? Ke el sruokyacna oaru lal uh ac muhtwacnglah ke mwe srihfe upac ma orek nuh sel inge, el ahkpwacyeye lah tiac pwacye kahs lal Satan ke mwet uh muh eltahl tiac kuh in sruokyacna oaru laltahl nuh sin God ke pacl eltahl sun ma upac. (Job 2:4, 5) Sahp, pwacye ma inge ke pacl se Satan el kihfasuhllah Adam mwet suwohswohs se in oruh ma kuluk. Tuhsruhktuh, Jesus suc oacna Adam sie mwet suwohswohs, el sruokyacna ahkostwen lal finne upac mwe kweok ma el sun. (Sie Corinth 15:45) Ke ma inge, el ahkpwacyeye lah Adam el kuh in ahkos God el fuhnuh sulaclah in oruh. Ke Jesus el muhtwacnglah mwe kweok upac, el oakiyac mwe srihkasrak se nuh sesr in ukwe. (Sie Peter 2:21) God el ahkinsewowoye ahkostwen pwacye luhn Wen nahtuhl, ac el sang moul ma pahtpaht nuh sel Jesus inkuhsrao uh.

MA WO FUHKAH KOM KUH IN EIS KAC

Misac lal Jesus ah sikyak na pwacye. Oreklac sie inkacnek tuh kuht in moul ma pahtpaht. Yac kom luhngse in moul ma pahtpaht? Jesus el ahkkahlwemye ma kuht enenuh in oruh uh ke el fahk: “Ac kalmen moul ma pahtpaht pa inge: in etwekom, God pwacye sefanna, ac in etuh Jesus Christ, suc kom suhpwacma.”—John 17:3.

Mwet suc oraclah mackuhsin se inge kwacfe kom in ahkyohkye etwacack lom kacl Jeova suc God pwacye ac Jesus Christ suc wen nahtuhl. Mwet Loh luhn Jeova ke acn sum an ac engan in kahsre kom. Kom kuh pac in eis mwe kahsruh yohk kom fin som nuh ke website se lasr inge, www.jw.org.