Jeova El Kahsruh Orekma In Luti Lasr Fin Facluh Nohfohn

1. Meac oruh upac orekma in luti uh?

YAC 130 somlah, ke pacl se mwet luhn Jeova eltahl muhtwacwack luti pweng wo, ma upac pucspucs eltahl sun.a (Liye footnote.) Mwet Christian ke pacl luhn mwet sap ah eltahl u na srihsrihk se ac eltahl luti sie pweng suc mwet pucspucs sruhnga. Kuhtuh mwet ah liyacltahl muh srihk etuh laltahl. Ke pacl se Satan el sisilac nuh facluh, kalyeiyuck eltahl. (Fwackyuk 12:12) Ac ke pacl sac fahfahsruh nwe mihsenge, eltahl srackna forfor luti ke lusen “lwen sahflah” inge suc kahlwem ke “mwe ongaiyac luhlahp sikyak” uh.​—Luo Timothy 3:1.

2. Meac Jeova el oruh in kahsruh orekma in luti lasr ke pacl inge?

² Tuhsruhktuh, Jeova el nuh na kahsruh mwet lal uh. El ke eltahl in luti pweng wo uh fin facluh nohfohn, ac el ac tiac lwelah kuhtwena ma in tulokihnyac orekma se inge. El kahsruh mwet lal uh in alu nuh sel ke inkacnek ma el luhngse. El oruh ma inge ke el sreluhltahllah liki alu kikiacp. El oruh pac ma inge in pacl meet ah ke el ahksukohsohkyelah mwet Israel liki acn Babylon. (Fwackyuk 18:1-4) Ac ma Jeova el luti nuh sesr uh ma ac wo nuh sin kais sie sesr. El kahsre kuht in muhta in mislac inmahsrlon sie sin sie, ac el ahkpahye kuht in luti mwet sahyac uh kacl. (Riti Isaiah 48:16-18.) Finne Jeova el kahsruh orekma lasr uh, tiac kalmac pa el ac ekuhllah ma nuhkewa suc sikyak fin facluh in kahsre kuht ke orekma in luti uh. Pwacye lah kuhtuh ma suc sikyak fin facluh uh ahkfihsracsrye orekma in luti lasr uh. Tuh srackna kalyeiyuck kuht ac kuht puhla pac ma upac ma sikyak ke facl sel Satan uh. Kahsruh luhn Jeova muhkwena pa oruh kuht srackna kuh in forfor luti uh.​—Isaiah 41:13; Sie John 5:19.

3. Ahkpwacyeyuck fuhkah kahs pahluh lal Daniel uh?

³ Daniel el palye lah ke lusen lwen sahflah, mwet pucspucs ac kahlwem ke ma pwacye lun Bible uh. (Riti Daniel 12:4, BMK.) Kihtin pacl meet liki muhtwacwack lwen “sahflah,” Jeova el kahsruh mwet lal uh in kahlwem ke mwe luti yohk srihpac in Bible uh ac in tiac eis kuhtwena mwe luti kikiacp luhn alu kikiacp. Ke pacl inge, mwet lal uh luti ma pwacye ke Bible nuh sin mwet fin facluh nohfohn. Arlac kahlwem lah kahs pahluh lal Daniel uh ahkpwacyeyuck. Apkuhran nuh ke million oalkosr sin mwet lotelah ma pwacye uh ac luti pac nuh sin mwet sahyac. Pwacnacng, meac kuhtuh ma suc kahsruh mwet luhn Jeova inge in oruh orekma in luti fin facluh nohfohn?

LWENG LUHN BIBLE

4. Ke yac 1900 kuhtuh, kahs ekahsr luhngasyucklac Bible uh nuh kac?

⁴ Mwet pucspucs ke pacl inge oasr Bible nahtuh ac ma inge kahsre kuht in luti pweng wo. Tuhsruhktuh, tiac ouinge na emeet me. Ke lusen yac pucspucs, mwet kol ke alu kikiacp eltahl sruhnga mwet uh in rit Bible. Eltahl kalyei mwet ma riti ac uniyac kuhtuh mwet ma luhngas uh. Tuh ke yac 1800, oasr u suc luhngaslah kuh printelah Bible nuh ke kahs 400 kuhtuh. Ke yac 1900 kuhtuh, puhs mwet ma oasr Bible nahtuh sifacna. Tuhsruhktuh, eltahl tiac kahlwem na pwacye ke ma Bible uh luti.

5. Orekma fuhkah Mwet Loh luhn Jeova uh oruh tuh in oasr lweng na kahlwem ke Bible uh?

⁵ Mwet luhn Jeova ah etuh lah eltahl enenuh in luti nuh sin mwet sahyac ma Bible uh luti, ac pa inge ma eltahl oruh ah. Ke muhtwacwackiyac ah eltahl orekmakihn kain in Bible ma oasr ke pacl sac, ac eltahl kihte pac nuh sin mwet ah. Muhtwacwack ke yac 1950 eltahl muhtwacwack oruh New World Translation of the Holy Scriptures nuh ke kahs sahyac. Kahs 120 luhngaslah kuhtuh kuh nohfohn ip ke Bible se inge. Ke yac 2013, eltahl ahksasucyelah New World Translation nuh ke kahs English. Lweng sasuc se inge arlac fihsracsr nuh sin mwet uh in kahlwem kac. Ac ke kuht orekmakihn Bible ma mwet uh kahlwem kac, ac fihsracsr in riti, ma inge kahsre kuht in lotweltahl ke ma pwacye.

PACL MISLAC

6, 7. (a) Mweun fuhkah orek kuh sikyak ke lusen yac 100 somlah ah? (b) Puhlan pacl in mislac ke muhtuhnfacl sahyac uh kahsre kuht fuhkah ke orekma in luti uh?

⁶ Ke yac 100 somlah ah, puhs suhnuhn mweun orek, ac oacyacpac mweun luhlahp luo sikyak. Million sin mwet eltahl misac. Pwacnacng, efuh kuht kuh in fahk muh oasr mislac? Ac fin pwacye, ma inge kahsruh fuhkah mwet luhn Jeova uh in forfor luti? Ke puhlan pacl se ma mweun luhlahp ahkluo ah orek, Nathan Knorr pa liyacacng Mwet Loh luhn Jeova in pacl sac. Ke sie toeni luhlahp ke yac 1942, el oruh mwe sramsram se ac sihfac kac ah pa “Mislac uh Kuh In Oan Nwe Tok?” Brother Knorr el ahkuhtweyac kahs pahluh ke Fwackyuk sapta 17 lah mweun upac sac tiac kol nuh ke Armageddon, a nuh ke sie pacl in mislac.​—Fwackyuk 17:3, 11.

⁷ Kahlwem lah tiac kalmacn ma inge pa tukun na mweun ah acn nuhkewa puhla mislac. Kuht etuh ma inge mweyen tukun na mweun luhlahp ahkluo ah, million sin mwet eltahl misac ke mweun sahyac. Tuhsruhktuh ke muhtuhnfacl pucspucs, oasr puhlan pacl in mislac ma oruh fihsracsr nuh sin mwet luhn Jeova uh in oruh orekma in luti uh. Meac tuhkuh ke orekma se inge? Ke puhlan pacl luhn mweun ahkluo ah, suhpuhs liki mwet 110,000 wi ke Mwet Loh luhn Jeova. Tuh mihsenge, apkuhran nuh ke million oalkosr seltahl! (Riti Isaiah 60:22.) Pwacnacng, ke puhlan pacl in mislac uh, puhs mwet kuht kuh in luti pweng wo uh nuh se.

KAPKAPACK KE MWE WIWAC AC INKACNEK IN FUHFAHSRYACSR LASR

8, 9. Meac oruh fihsracsr uh in oruh fuhfahsryacsr lasr, ac ma inge kahsruh fuhkah orekma lasr uh?

⁸ Ke mwet luhn Jeova fin acn Macrike eltahl muhtwacwack oruh orekma in luti uh, tiac fihsracsr nuh seltahl in forfor. Ke yac 1900, apkuhran yac 21 tukun eltahl muhtwacwack printi mwe rit inge The Watchtower, apkuhran nuh ke sitosah 8,000 pa oasr in pacl sac ac suhpuhs pac inkacnek wo laltahl. Tuhsruhktuh mihsenge, puhs liki billion sie tahfuh ke sitosah fin facluh nohfohn ac puhs inkacnek wo ke inkaiyen acn inge. Pwacnacng kuht kuh in orekmakihn sitosah ac inkacnek in som luti mwet ke acn ma loes liki acn mwetuh muhta kac ac ke acn ma upac in sun. Tuhsruhktuh, finne kuht muhta ke sie acn ma tiac fihsracsr in forfor we, kuht sang kuhiyacsr nohfohn in som ac luti mwet ke acn nuhkewa.​—Matthew 28:19, 20.

⁹ Kuht oacyacpac orekmakihn kain in mwe wiwac. Kuht suhpwaclihk Bible ac mwe rit nahtuhsr uh ke sitosah luhlahp, oak, ac train. Kalmac pa, ke wik na ekahsr, mwe rit nahtuhsr uh kuh in sun mwet lili ma muhta ke acn ma srenglah. Mwet fuhfahsryacsr nuh ke congregation pucspucs, mwet suc wi ke Un Mwet ma liyacacng orekma luhn Mwet Loh luhn Jeova ke sie muhtuhnfacl, missionary, ac kuhtuh pac sahyac wi oaksohk in som oruh mwe sramsram ke toeni luhlahp ac kahsruh congregation pucspucs. Mwet suc wi ke Un Mwet Elder ma karihngihn congregation nuhkewa fin facluh ac kuhtuh pac mukul lili sahyac ke ohfuhs luhlahp luhn Mwet Loh luhn Jeova uh, eltahl wi oaksohk ac som nuh ke muhtuhnfacl pucspucs in ahkkweye ac ahkpahye mwet lili wiyacltahl uh. Ma inge nuhkewa kahsruh mwet luhn Jeova uh in tuhkweni nuh sie.​—Psalm 133:1-3.

KAHS AC LWENG

10. Orekmakihnyuck fuhkah kahs English fin facluh nohfohn?

¹⁰ Ke pacl luhn mwet sap ah, puhs mwet suc muhta ye kolyuck luhn acn Rome etuh kahs Greek. Ke pacl inge, puhs mwet, fin facluh nohfohn etuh kahs English. Ke puk se inge, English as a Global Language, sihmlac muh percent 25 ke mwet fin facluh kahlwem kac kuh etuh kahs English. Puhs mwet etuh kahs English ke srihpen pa orekmakihnyuck fin facluh nohfohn ke business, government, science ac ma sasuc pucspucs ma mwet uh oraclah.

11. Kahs English uh kahsruh fuhkah orekma luhn mwet luhn Jeova uh?

¹¹ Ke srihpen kahs English etweyuck ke acn pucspucs, ma inge kahsruh fahsrelihk luhn ma pwacye uh. Ke pacl meet ah, mwe rit nahtuhsr uh oreklac meet ke kahs English. Puhs mwet kuh in riti, mweyen kahs English uh orekmakihnyuck fin facluh nohfohn. Kahs English pac pa orekmakihnyuck ke ohfuhs luhlahp lasr uh. Ac mwet lili ma tuhkuh ke muhtuhnfacl sahyac ac kahlwem ke kahs English, eltahl ahkpahyeyuck ke lutlut lasr fin acn Patterson, New York.

12. Kahs ekahsr kuht luhngaslah mwe rit nahtuhsr uh nuh kac, ac program pucspucs ke computer uh kahsre kuht fuhkah?

¹² Tuhsruhktuh oasr ma kunacsr in luti pweng wo nuh sin mwet nuhkewa fin facluh nohfohn. Pa inge srihpac pwacnacng kuht luhngaslah mwe rit nahtuhsr uh nuh ke kahs 700 kuhtuh. Ma inge orek fuhkah? Computer ac program pucspucs ke computer, oacna MEPS, kahsre kuht in oruh orekma in lweng uh. Ke srihpac se inge, kuht inse sefanna mweyen, fin facluh nohfohn, kuht orekmakihn “kahs nwacsnwacs” suc tuhkuh ke ma pwacye in Bible.​—Riti Zephaniah 3:9, BMK.

MA SAP AC SULACLAH LUHN COURT

13, 14. Ma sap ac sulaclah pucspucs luhn court kahsre kuht fuhkah?

¹³ Ma sap luhn acn Rome ke pacl luhn mwet sap ah kahsruh mwet Christian in pacl sac ke inkacnek pucspucs. Mihsenge pac, ma sap ke muhtuhnfacl pucspucs kahsre kuht ke orekma in luti lasr uh. Ke sie mwe puhpuhlyuck, ma sap luhn acn Macrike sang sukohsohk luhn mwet ke alu, in sruhmuhn ma eltahl luhlahlfongi, ac in tuhkweni nuh sie. Kalmac pa ituckyang nuh sin mwet lili fin acn Macrike sukohsohk laltahl in oruh miting uh ac in som forfor ke acn inge. Oacyacpac, eltahl sukohsohk in oraclah oakwuck nuh ke orekma in luti fin facluh nohfohn ke ohfuhs luhlahp fin acn Macrike. Tuhsruhktuh, srackna oasr pacl eltahl enenuh in som nuh court in ahkkahlwemye suwohs laltahl in luti pweng wo uh. (Philippi 1:7) Ac ke mwet nuhnuhnkuh ke court uh srihke in eslah suwohs laltahl in forfor luti, eltahl usack nuh ke nuhnuhnkuh fuhlwact ac kwacna kuhtanglah.

¹⁴ Ke muhtuhnfacl sahyac pac, kuht som nuh court in ahkkahlwemye suwohs lasr in alu nuh sin Jeova ac in oruh orekma in luti uh. Ke kuht kuf, kuht usack nuh ke nuhnuhnkuh fuhlwact. Ke sie mwe puhpuhlyuck, kuht kwacna som nuh European Court of Human Rights. Ke June 2014, pacl 57 kuht kuhtanglah ke Court se inge. Inkaiyen muhtuhnfacl ma oan ye acn Europe enenuh in ahkos sulaclah nuhkewa ma wotlac ke Court se inge. Finne ‘mwet e nuhkewa . . . sruhngac kuht,’ ma sap ke muhtuhnfacl pucspucs inge lwelah kuht in sukohsohk ke alu lasr nuh sin Jeova uh.​—Matthew 24:9.

KUHTUH PAC MA SUC KAHSRUH OREKMA IN LUTI LASR UH

15. (a) Kapkapack fuhkah inkacnek in print uh? (b) Ac ma inge kahsre kuht fuhkah?

¹⁵ Inkacnek sasuc ke print uh kahsre kuht in puhseni mwet ma kuht luti pweng wo uh nuh se. Ke yac pucspucs, mwetuh orekmakihn inkacnek in print se suc oreklac sel Johannes Gutenberg ke yac 1450. Tuhsruhktuh, ke yac 200 somlah ah, engine in print inge kapkapack ke inkacnek pucspucs. Tukun oreklac offset printing, suc sie inkacnek in print, muhiyak ac wolac ma printiyuck uh. Oacyacpac, fihsracsruh molo in orek pwepuh ac oraclah nuh ke puk. Eklac inge kahsre kuht fuhkah ke mwe rit nahtuhsr uh? Ke yac 1879, Tower in San se meet printiyucklac ke kahs English muhkwena. Wacngihn petsac kac, ac 6,000 ke mwe rit sac printiyucklac. Ke pacl inge, Tower in San uh printiyucklac ke kahs suc puhs liki 200 kuhtuh. Petsac kac uh kahto ac kain in tuhn kac. Oacyacpac, ke kais sie mahlwem ahluhkwelah 50 million sin mwe rit inge printiyucklac.

16. Meac kuhtuh ma sasuc ma oreklac suc kahsruh orekma in luti fin facluh nohfohn? (Liye petsac se meet ke mwe lutlut inge.)

¹⁶ Ma sasuc pucspucs suc oreklac ke lusen yac 200 somlah ah kahsruh mwet luhn Jeova uh in luti pweng wo. Kuht sruhmuhn tari train, stosah, ac oaksohk. Tuh oreklac pac bicycle, typewriter, Braille, telegraph, telefon, camera, mwe record, retio, tv, movie, computer, ac internet. Finne tiac mwet luhn Jeova pa oraclah ma inge nohfohn, eltahl orekmakihn ma inge in sang oraclah Bible ac kuhtuh pac mwe rit sahyac nuh ke kahs pucspucs, ac in luti nuh sin mwet fin facluh nohfohn. Ke inkacnek se inge, ahkpwacyeyuck kahs pahluh ke Bible ma fahk muh eltahl “fah engankihn mwe kahsruhp luhn muhtuhnfacl pucspucs.”​—Riti Isaiah 61:6.

17. (a) Meac kahlwem ke orekma lasr uh? (b) Efuh Jeova el luhngse kuht in weluhl orekma?

¹⁷ Arlacna kahlwem lah Jeova el ahkinsewowoye orekma in luti lasr uh. Jeova el use nuh sesr orekma se inge, tiac ke srihpen el koflah oruh, tuhsruhktuh mweyen el luhngse kuht ac el ke kuht in weluhl orekma. Ke orekma in luti lasr uh, kuht ahkkahlwemye lah kuht luhngse el ac mwet sahyac uh. (Mark 12:28-31; Sie Corinth 3:9) Kuht arlacna kuloh nuh sin Jeova ke el kahsre kuht in luti nuh sin mwet fin facluh nohfohn. Ke ma inge, pacl nuhkewa kuht kwacfeacng in luti kacl Jeova ac ke Tohkohsrahi lal uh!