Tahfwelah In Moniyuck ke Orekma In Luti Lom

OREKMA in fahkwack pweng wo pa orekma se ma yohk srihpac emeet fin facluh ke pacl inge. Oacna sie mwet Loh luhn Jeova, kom ahksacohkye orekma inge in luti mwet in eklac mwet tuhmal lutlut. Tuhsruhktuh, kuhtuh pacl uh upac nuh sin pioneer kuh mwet lili suc wi orekma in luti eltahl in tahfwelah na moniyuck ke orekma in luti uh. Efuh?

Mwet lili pucspucs puhla muh suhpuhs mwet eltahl sramsram nuh se ke eltahl oruh orekma in som lohm nuh ke sie lohm, mweyen inkaiyen mwetuh wacngihn ke lohm seltahl. Ac fin oasr mwet ke lohm se, inkaiyen pacl uh eltahl tiac na ke lohng pweng ke Tohkohsrahi uh ac kuhtuh pacl uh eltahl kasrkuhsrak sesr. Nuh sin kuhtuh pac mwet lili, arlac yohk acn in forfor laltahl ac inkaiyen mwet we uh luhngse lohng, tuhsruhktuh eltahl tiac kuh in sun mwet nuhkewa. Kuh kuhtuh pac mwet lili uh muhnahslah ke srihpen eltahl wi orekma in luti ke lusen yac pucspucs tuhsruhktuh sahflah uh soenna tuhkuh.

Pwacye lah ac oasr na ma upac kuht sun in ahkmuhnahsye moniyuck lasr ke orekma in luti uh. Kuht muhta ke sie facl suc oan ye kolyuck lal Satan suc Devil, “el suc kuluklacna.” Pwacnacng, kuht etuh lah ac upac nuh sesr in luti pweng wo uh.​—Sie John 5:19.

Finne oasr ma upac kom sun ke kom fahkwack pweng wo, luhlahlfongi lah Jeova el kuh in kahsre kom in kuhtanglah kuhtwena ma upac. Tuhsruhktuh, meac kom kuh in oruh in ahkyohkye moniyuck lom ke orekma in luti uh? Kuht kuh in tuni kuhtuh kahs in kahsruh.

KAHSRUH MWET LILI SASUC SUC TUHFAHNA WI FORFOR

Ke kais sie yac, tausin sin mwet eltahl bacptaislac ac welah Mwet Loh luhn Jeova. Kom fin tuhfahna bacptaislac, arlac yohk ma kom kuh in lotelah sin mwet ma wi ke orekma in luti ke lusen yac pucspucs. Ac kom fin sie mwet lili suc wi forfor ke lusen yac pucspucs, kom kuh in kahsruh ahkpahye mwet ma srackna suhpah. Mwe ahkinsewowo se nuh sum kom fin oruh.

Jesus el etuh lah mwet tuhma lutlut lal ah enenuh kahsruh tuh fah eltahl pah ke orekma in luti laltahl. El weluhltahl ac lotweltahl in oruh orekma in luti uh. (Luke 8:1) Ke pacl inge, mwet sasuc ma srackna suhpah ke orekma in luti uh eltahl enenuh pac mwe ahkpah tuh fah eltahl pah ke orekma in luti uh.

Tiac wo kuht in nuhnkuh muh oasr ma sie mwet lili sasuc el lotelah ke orekma in luti uh kena srihpen el kwacna wi forfor. El enenuh sie mwet lili na kuhlwacng in lohacng ac sang ahkpah nuh sel. Mwet lili se ma sang mwe ahkpah nuh sel uh enenuh in lotel in (1) ahkolah ac ahkpahyacl sifacna ke ma el ac fahk nuh sin mwet ke lohm, (2) sramsram nuh sin mwet, (3) kihtaclah mwe rit, (4) fohlohk muhtwacta yurin mwet ma luhngse lohng, ac (5) muhtwacwack lutlut Bible nuh sin mwet. Sie mwet lili suc srackna suhpah el kuh in wo ke orekma in luti uh fin el tuni ac etahi inkacnek in luti luhn mwet se ma kahsrel inge. (Luke 6:40) Ac mwet ma eis ahkpah inge el ac puhlaik fin el etuh lah oasr mwet ahkolah in kahsrel ke pacl el enenuh. Sie pac ma suc kuh in kahsruh mwet lili ma eis ahkpah inge pa kahs in kaksak ac kahs in kahsruh ma ituckyang nuh sel.​—Ecclesiastes 4:9, 10.

SRAMSRAM NUH SIN PARTNER LOM KE PACL IN FORFOR

Finne kom kwacfeacng in sramsram nuh sin mwet ke lohm ma kom som nuh kac, kuhtuh pacl uh sramsram lom nuh sin partner lom ke forfor uh wo liki. Esam lah Jesus el suhpwaclah mwet tuhma lutlut lal ah “kais luo” (Luke 10:1) Ke eltahl tuhkweni orekma, eltahl kuh in kahsruh ac ahkkweye sie sin sie. Pacl wo se ituckuh nuh sesr in “akacsruhi” nuh sin sie ke kuht wi mwet lili wiyacsr ke orekma in luti uh.​—Rome 1:12.

Meac kuhtuh ma suc komtacl kuh in sruhmuhn? Yac oasr ma sikyak nuh sin sie sumtacl ke orekma in luti uh suc mwe ahkkweye na pwacye? Yac oasr ma kom lotelah ke lutlut lom sifacna kuh ke lutlut luhn sucu lom? Yac oasr mwe ahkkweye nuh sum ke ma kom lohng ke pacl in miting? Kuhtuh pacl uh mwet lili ma kom wi forfor uh mwet ma kom suhkwac wi. Sahp kom kuh in siyuck sel lah fuhkah nwe el welah ma pwacye uh. Meac ahkpwacyeye nuh sel lah pa inge u luhn Jeova uh? Kunohkohn kuh ma wo fuhkah el wi tari kuh sun? Sahp kom kuh in sruhmuhn nuh sel kuhtuh sin ma sikyak nuh sum ke lusen orekma in kuhlwacnsap lom nuh sin Jeova? Finne wo kuh kuluk ohiyacn mwet ke acn in forfor lom, ke pacl se kom wi sie mwet lili ke orekma in luti uh, pacl na wowo se in “kahsruh sie sin sie.”​—Sie Thessalonica 5:11.

AHKKAPYE OHIYACN LUTLUT LOM SIFACNA KE BIBLE

Kuht enenuh in ahkkapye ohiyacn lutlut lasr sifacna ke Bible, tuh kuht in tahfwelah in moniyuck ke orekma in luti lasr. “Mwet kuhlwacnsap oaru ac lahlmwetmwet” eltahl oraclah mwe lutlut pucspucs ke kain in sihfac ma kuht kuh in lutlut kac. (Matthew 24:45) Kuht kuh in tuni sie mwe puhpuhlyuck ke sie sihfac wo nuh ke lutlut lasr sifacna: Efuh arlac yohk srihpac orekma in luti uh? Pohk se inge, “Efuh Kom Enenuh In Moniyuck Pacl Nuhkewa ke Orekma In Luti uh?” use kuhtuh srihpac na wowo nuh sesr.

Kuht fin tuni srihpac nuhkewa ma tahklac ke pohk se inge, ma inge ac kuh in mokle kuht in tahfwelah in fahkwack ke inkacnek moniyuck. Ke sie lutlut lom, sahp kom kuh in oruh oacna sie project ke kom suk kuhtuh pac Ma Suhmuhslah suc ahkuhtweyac yohk srihpaciyac in fahkwack ke moniyuck. Tohkoh, sifwil pac nuhnkuh srihpac inge nuhkewa. Ke kom oruh ma inge, moniyuck lom ke orekma in luti uh ac fah kuhi liki meet ah.

SRIHKE ORUH MA KOM SOENNA SRIHKE

U luhn Jeova uh use kahs in kahsruh pacl nuhkewa in kahsre kuht ahkkapye orekma in luti lasr uh. Ke sie mwe puhpuhlyuck, sahyen orekma lasr in som lohm nuh ke lohm, kuht kuh in sihm lwacta pac nuh sin mwet, pahngon mwet ke telefon, sang ma loh nuh sin mwet suc fahsr ke inkacnek kuh kuhtuh pac acn sahyac, ac kuht kuh in sang ma loh nuh sin mwet kuht sun ke pacl sahyac ma kuht tiac na forfor ac ke acn ma mwetuh orekma we. Sahp kuht kuh pac in oraclah oakwuck in fahkwack ke acn ma suhpuhs kuh wacngihn Mwet Loh we.

Yac kom kuh in oruh ma kom soenna srihke inge? Mwet pucspucs ma srihke orekmakihn kahs in kahsruh inge engan na pwacye ke sahflahiyac uh. Nuhnkuh ke mwe puhpuhlyuck tolu inge.

April, sie muhtwacn lili, el sulaclah in srihke kahs in kahsruh suc tuhkuh ke sie mwe lutlut ke Orekma Luhn Tohkohsrahi in muhtwacwack lutlut Bible nuh sin mwet. El siyuck sin mwet tolu ma weluhl orekma fin eltahl luhngse in lutlut Bible. April el lut ac enganwack ke mwet tolu inge nohfohn insese in lutlut ac oacyacpac muhtwacwack wi miting luhn congregation uh.

Ahkkweyeyuck pac kuht in suk mwet ma ac luhngse in riti kais kuhtuh mwe lutlut ke magasin nahtuhsr uh. Sie mwet suc oruh orekma in fuhfahsryacsr nuh ke congregation pucspucs fin acn Macrike el sulaclah in sang sie mwe rit ke Awake! suc sruhmuhnyuck wheel nuh sin mwet nuhkewa ma karihngihn acn in kuhka wheel ke acn seltahl. El ac muhtwacn kiacl tuhkweni kihte pac mwe rit inge, “Understanding Your Doctor” nuh ke ohfuhs 100 luhn doctor. El fahk lah muhtwacta laltahl inge kahsruh mwet pucspucs in etwaclah orekma in luti lasr uh ac mwe rit nahtuhsr uh. Tukun eltahl etwaclah mwet ke acn inge, mwet fuhfahsryacsr se inge ac muhtwacn kiacl eltahl kuh in sifwil pac fohlohk nuh yurin mwet pucspucs.

Judy, sie muhtwacn lili el sihm nuh ke ohfuhs luhlahp luhn Mwet Loh luhn Jeova in ahkkahlwemye srui yohk lal ke mwe kahsruh suc ahkkweyacltahl in sang ma loh ke inkacnek luhn telefon. El fahk lah ninac kiyacl, suc yac 86 ac sun kain in mas upac, inkaiyen pacl uh el sang ma loh ke inkacnek luhn telefon. Ma wo kac uh pa el muhtwacwack lutlut Bible nuh sin sie muhtwacn suc yac 92.

Kahs in kahsruh ma ituckyang nuh ke mwe rit nahtuhsr uh orekma na pwacye. Srihke! Ac kuh in kahsre kom in tahfwelah in engan ac moniyuck ke orekma in luti uh.

OAKIYAC FINSRAK MA KOM AC KUH IN SUN

Meac oruh orekma in luti lasr uh in fahlac wo? Tiac ma ke pihsen mwe rit kuht kihtaclah, kuh pihsen mwet kuht lutlut Bible nuh se, kuh pihsen mwet kuht kahsruh in welah mwet Loh luhn Jeova. Nuhnkuh kacl Noah. Mwet ekahsr, sahyen mwet ke sucu lal ah el kahsruh in eklac sie mwet kuhlwacnsap luhn Jeova? Finne wacngihn, srackna wo sahflahiyen orekma in luti lal ah. Ma yohk srihpac uh pa kuht in kuhlwacnsapuh Jeova ke oaru.​—Sie Corinth 4:2.

Mwet lili pucspucs akihlen lah eltahl enenuh in oakiyac finsrak ma eltahl kuh in sun tuh eltahl kuh in pwacr pacl nuhkewa ke orekma in luti uh. Meac kuhtuh sin finsrak inge? Kuhtuh pa tahklac ke pohk inge “Oakiyac Finsrak Ma Kom Ac Kuh In Sun.”

Siyuck kahsruh luhn Jeova el in ahkinsewowoye orekma in luti lom. Ke kom sun finsrak lom uh, kom ac puhla engan mweyen kom etuh lah kom sang kuhiyom nohfohn in fahkwack pweng wo.

Pwacye lah orekma in fahkwack pweng wo upac kuhtuh pacl uh. Tuhsruhktuh oasr ma kom kuh in oruh tuh kom in moniyuck ke orekma in luti lom uh. Kom ac partner lom uh sramsram ac ahkkweye sie sin sie, ahkfalye lutlut lom sifacna in ahkkweye kom, srihke orekmakihn kahs in kahsruh sin mwet kuhlwacnsap oaru ac lahlmwetmwet, ac oakiyac finsrak ma kom ac kuh in sun. Yohk liki nuhkewa, esam lah Jeova God el usot nuh sum sie orekma sacohk in fahkwack pweng wo oacna sie Mwet Loh lal. (Isaiah 43:10) Kom ac puhla engan yohk ke kom tahfwelah in moniyuck ke orekma in luti uh.