Met Fwusr—Akkeye Lungse Lom in Kulansap nu sin Jeova
“Esam pa Met Orekomla in len in fwusr lom.”—EKKLISIASTIS 12:1.
1. Kain in me solsol fuka akkalemyeyuk nu sin tulik nukewa fwin an Israel?
YEA 3,500 kutu somla, Moses, met palu se lun Jeova el sapkin met tol a mokul matu puspus lun Israel: “Suloini metu nu sie, mokul a mutan a tulik srisrik . . . , tu elos fwa ku in long, a tu elos fwa ku in lutlut, a sangeng sin Jeova God lomwos, a liaung in oru kas nu kemwa in ma lo se inge.” (Duteronomi 31:12) Loang akmwoye ka la su sapkinyuk in wi ke tukeni in alu nu sin God: elos pa mokul, mutan, a tulik srisrik. Aok, God el sapkin pa nu sin tulik srisrik elos in long a in lutlut a in akos masap lun Jeova.
2. Jeova el akkalemye fuka nunak mwomwo lal ke met fwusr ke congregation lun met Kristian in pal meeta?
2 In century se meet, Jeova el tafwela in akkalemye nunak mwomwo lal nu sin met fwusr inmasrlon u lun met kulansap nukewa lal. Ke sie me pupulyuk, el akkeye met sap Poul in simusla weang kutu leta nu sin congregation puspus ke akwuk a masap puspus nu sin tulik srisrik. (Ridi Efesus 6:1; Kolosse 3:20.) Met Kristian fwusr su orekmakin kas in kasru inge elos kapkapek na paye a lungse na paye in kulansap nu sin Papa tumalos su oasr in kosrao a elos eis me insemwomwo puspus.
3. Met fwusr ke pal inge elos akkalemye fuka lungse lalos in kulansap nu sin God?
3 Ya God el suli met fwusr ke pal inge in tukeni nu sie tu elos in ku in alu nu sin Jeova? Aok! Ke ma inge, sie me insemwomwo yok nu sin met kulansap nukewa lun Jeova in liye met fwusr puspus su kulansap nu sin God fwin fwalu nufon su lungse in orekmakin kas in akkeye lal Poul: “A lela kut in nunku ke sie sin sie in akkeye kut nu ke lungse a orekma mwo, a kut in tia likiye tukeni nu sie lasr in alu, oana lia lun kutena, a kut in kaifwe sie sin sie, a akyokye, oana komwos liye tu len apkuran me.” (Hibru 10:24, 25) Sayen ma inge, oasr tulik srisrik puspus su fwal a ku in wi papa a nine kiyelos in sulkakin peng mwo ke Togusrai lun God. (Mattu 24:14) A in akkalemye lungse lalos nu sin Jeova, oasr tausan puspus sin met fwusr elos mwulela moul lalos ke inkanek lun baptais ke kais sie yea a elos engunkin me insemwomwo puspus su elos pulakin ke sripen elos kafweang in fwasr tokin Kraist.—Mattu 16:24; Mark 10:29, 30.
Eis Me Solsol Ke Pal Inge
4. Ngea met fwusr ku in eis a akpayeye me solsol lun God in kulansapul?
4 Ekklisiastis 12:1 el akkalemye: “Esam pa Met Orekomla in len in fwusr loom.” Met fwusr, matwe ekasr komwos enenu in sun meet liki komwos akpayeye me solsol in alu a kulansap nu sin Jeova? Wangin matwe ku yea su akkalemyeyuk ke ma Simusla. Ke ma inge, lela kom in tia patla in oru sulela lom in mutawauk in long a in kulansap nu sin Jeova, meyen kom nunku mu kom arlana fwusr. Fwinne kom srakna fwusr na paye ku matula kutu, kut akkeye kom in eis a akpayeye me solsol se inge.
5. Fuka papa a nine elos ku in kasru tulik natulos in akkeye fototo lalos nu sin God?
5 Oasr met fwusr in masrlomwos eis kasru sin papa a nine kiyomwos in akmwoye fototo lomwos nu sin God. Ke ma inge, kom oana Timote in pal meeta. Ke pal se el tulik srisrik, nine kiyel su pangpang Eunice a nine matou kiyel su pangpang Lois elos lotel ke ma simusla mutal. (2 Timote 3:14, 15) Kalem la papa a nine kiyom elos sang pa akpa mwomwo nu sum ke inkanek in lutlutkin Baibel nu sum, elos wi kom pre, akkeye kom in wi ke meeting nukewa lun congregation a ke toeni lulap nukewa, a wi kom ke orekma in sulkakin peng mwo. Paye la, orekma lalos in luti kom ke inkanek nukewa lun God pa sie kunokon na mwomwo lun papa a nine kiyom su elos eis sin Jeova. Ya kom aksaokye lungse lalos a karungin lalos nu sum?—Soakas 23:22.
6. (a) In fwal nu ke Sam 110:3, kain in oiya fuka ke alu me akinsemwomwoye nu sin Jeova? (b) Mea kut fwa lutlutkin ke pal inge?
6 Ne ouinge, ke komwos kapkapek a matula, Jeova el lungse komwos in akpayeye a “srike ma lungse lun God,” oana ke ma Timote el oru. (Rom 12:2) Kom fwin oru ma inge, kom engun in wi ke orekma nukewa lun congregation, tia ke sripen pa inge ma papa a nine elos lungse kom in oru, tusruktu kom oru ma inge meyen kom lungse in oru ma lungse lun God. Kom fwin kulansapu Jeova ke inse mulala lom, ma inge fwa akinsemwomwoyel. (Sam 110:3) Ke ma inge, fuka kom ku in akkalemye la kom lungse in akkeye lungse lom in porongo Jeova a in akos masap nukewa lal? Kut fwa lutlutkin inkanek yok sripe tolu su ku in kasre kom in oru ma inge. Inkanek tolu inge pa lutlut, pre, a oiya mwo. Lela kut in lutlutkin kais sie inkanek inge.
Eis Etauk Kel Jeova
7. Jisus el akkalemye fuka me srikasrak mwo oana sie tulik lutlut ke ma Simusla? A su kasrel in oru ma inge?
7 Inkanek se meet kom ku in akkalemye la kom lungse in akyokye kena lom in kulansap nu sin Jeova pa ke orekma lom in ridi Baibel len nukewa. Kom ku in akkeye lulalfongi a eis etauk ke Baibel su arlana yok sripe ke kom rid Kas lun God pal nukewa. (Mattu 5:3) Jisus el akkalemye me srikasrak mwomwo. Oasr sie pal, ke el yea 12, papa a nine kiyel konealak in tempel, “muta in masrlon met luti, in longolos, a in siyuk selos.” (Luk 2:44-46) Oana sie tulik srisrik, Jisus el akkeye tari lungse lal a akyokye etauk lal ke ma Simusla. Mea kasrel in oru ma inge? Mary, nine kiyel, a Josef, papa tumal, elos kasrel in oru ma inge. Elos met kulansap lun God a elos lotel Jisus ke God mutawauk el tulik srisrik.—Mattu 1:18-20; Luk 2:41, 51.
8. (a) Ngea papa a nine ku in mutawauk in filiye ke insien tulik srisrik in akkeye lungse lalos ke Kas lun God? (b) Kalweni ke kas fototo sie experience su akkalemye ke yok sripaiyen orekma in sang akpa nu sin tulik mutawauk ke pal elos awowo?
8 Ke inkanek ouinge, papa a nine puspus ke pal inge elos etu a akilen ke saokiyen orekma in luti a in sun insien tulik srisrik in oasr lungse yok nu ke ma paye lun Baibel mutawauk ke elos tulik srisrik. (Duteronomi 6:6-9) Pa inge ma Rubi, sie mutan Kristian el oru tia pat tokin el oswella Joseph, tulik mokul se meet natul. Len nukewa, el rid nu sel buk se inge Buk in Sramsram lun Baibel Nutik. Ke pal tulik natul se inge matula, Rubi el kasrel in oan ke nunak lal ma simusla puspus. Ya Joseph el eis ma lane ke orekma lun nine kiyel in sang akpa nu sel? Tia pat tokin el lotela in kaskas, el ku in kalweni me sramsram puspus ke Baibel ke kas lal sifwana. A ke pal se el yea limekosr, el oru kunokon se meet lal ke Theocratic Ministry School.
9. Efu ku ridi Baibel a in sifwilpa nunku ke ma kom ridi arlana yok sripe?
9 Nu sin tulik srisrik nukewa su lungse in kapkapek yok ke orekma in kulansap lalos nu sin God, komwos enenu in akpayeye in rid Baibel len nukewa a kafweang in oru ma inge nu ke pal se komwos met fwusr a nu ke komwos matula. (Sam 71:17) Efu ku orekma in rid Baibel ku in kasre kom in kapkapek? Loang akmwoye ke ma Jisus el fwak ke pre lal nu sin Papa tumal: “A pa inge moul ma patpat, tu elos fwa ete kom God paye mukefwanna, a Jisus Kraist su kom supalma.” (Jon 17:3) Aok, kom fwin eis etauk yok kel Jeova, kom ku in etel na paye a akyokye lungse lom nu sel. (Hibru 11:27) Ke ma inge, pal nukewa kom rid Baibel, orekmakin pal se inge in lutlut kel Jeova. Siyuk sum sifwana: ‘Mea ma simusla se inge el luti nu sik kel Jeova oana sie God paye? Ma simusla inge in Baibel el akkalemye fuka ke lungse a nunak mwo lun God keik?’ Fwin kom orekmakin pal inge in nunku yok ke kusensiyuk inge fwa kasre kom in lotela la mea nunak a pulakin lun Jeova, a mea el siyuk sum. (Ridi Soakas 2:1-5.) In oana Timote, kom fwa ku in “etu ma paye,” a lulalfongi ke ma kom lotela ke ma Simusla, a kom fwa eis me akkeye yok in kulansap a alu nu sin Jeova ke inse mulala lom.—2 Timote 3:14.
Fuka Pre el Ku In Akkeye Lungse Lom nu sin Jeova
10, 11. Pre el ku in kasre kom fuka in akkeye lungse lom in kulansap nu sin Jeova?
10 Inkanek akluo in kasre kom in akkeye lungse lom in kulansap nu sin Jeova ke inse kewa lom pa ke pre lom. Sam 65:2 el akkalemye: “O Kom su long pre, nu sum ikwe nu kemwa fwa tuku.” Aok in pal san met Israel pa met lun God su el oru mwuleang nu selos, ne ouinge met sa nukewa su tuku ke tempel lun Jeova, elos ku pa in pre nu sel. (1 Togusra 8:41, 42) God el tia sulosol met. God el mwulela nu sin met nukewa su porongo masap lal la el fwa long pre lalos. (Soakas 15:8) Aok, el long “ikwe nukewa,” wekunang tulik sriksrik a met fwusr.
11 Kom etu la kawuk mwo el fwal nu ke sramsram mwomwo. Kalem la, kom engun in akkalemye nunak lom, a pulakin lom nu sin sie met kawuk mwomwo. Ke inkanek ouinge, ke pal se kom pre ke inse kewa lom, kom sramsram nu sin God su Orekomla. (Filippai 4:6, 7) Sramsram nu sin Jeova oana fwin kom sramsram nu sin papa a nine kiyom su kulang, ku nu sin met kawuk su arlana fototo nu sum. Aok inkanek lom in pre el akkalemye ke nunak a pulakin lom nu sin Jeova. Kom ku in liye la fwin kom fototo nu sin Jeova, pre lom e fwa oasr kalme yok.
12 Tusruktu, esam pal nukewa la pre su oasr kalme yok el tia akkalemye ke kas mukena. Enenu in akkalemye pa nunak a pulakin paye lom. Ke pre lom, akkalemye lungse paye lom, sunak yok lom, a lulalfongi yok nu sin Jeova. Ke pal se kom akilen inkanek su Jeova el topuk pre lom, kom fwa akilen liki pal meeta la “Jeova el apkuran nu selos su pang nu sel.” (Sam 145:18) Aok, Jeova el fwa kalukyang nu sum, a el fwa akkeye kom in lain Devil a in orala sulela mwomwo ke moul lom.—Ridi Jemes 4:7, 8.
13. (a) Fuka kawuk nu sin God el kasru sie sister wiyesr? (b) Fuka kawuk nu sin God kasre kom in kutangla ke me purakak lun met asrouki?
13 Nunku kel Cherie la fuka el eis ku ke sripen fototo mwomwo lal nu sin Jeova. Ke pal se el lutlut ke high school, el eis opi puspus ke sripen el arlana lalmetmet ke lutlut a el sumat a fokoko ke kain in sritel puspus. Ke pal se el srola ke lutlut lal, oasr pal mwomwo su akkalemyeyuk nu sel la el ku in lutlut ke college ke wangin molo. “Oiya inge el arlana mwo” Cherie el fwak, “a coach puspus a tulik lutlut wiyuk elos patokyu a fwak nu sik in eis offer mwomwo se inge.” Tusruktu el akilen la fwin el eis lutlut yok ke college, el enenu in orekmakin pal yok lal in lutlut a in akpa ke kain in sritel puspus, a wanginla pal in kulansap nu sin Jeova. Mea Cherie el oru? El fwak, “Tokin nga pre nu sin Jeova, Nga tia eis scholarship a Nga mutawauk in kulansap oana sie regular pioneer.” Ke pal inge, el kulansap oana sie pioneer ke lusen yea limekosr. “Nga tia auli ke sulela luk,” el fwak. “Meyen Nga etu la nga orala sulela mwomwo su ku in akinsemwomwoye Jeova, ma inge oreyu in arlana engun. Paye la, kom fwin suk meet Togusrai lun God, ma nukewa fwa etukot nu sum.”—Mattu 6:33.
Oiya Mwomwo Lom Akkalemye la “Mutal Insiom”
14. Efu ku oiya mwomwo lom el yok sripe nu sin Jeova?
14 Inkanek aktolu kom ku in akkalemye la kom kulansap nu sin Jeova ke inse mulala lom pa ke oiya nasnas. Jeova el akinsemwomwoye met fwusr su moulkin moul nasnas. (Ridi Sam 24:3-5.) Samuel ke el srakna met fwusr el srunga in etawi moul fokfok lun tulik luo natul Ilai, met tol fulat. Oiya mwomwo lal Samuel arlana eteyuk. Baibel el akkalemye: “A tulik Samuel el kapek, a yokelik in oi yurin Jeova, a oayepa yurin met.”—1 Samuel 2:26.
15. Mea kutu sripe paenang kom kafweang in moulkin oiya mwomwo?
15 Kut moul ke pal se inge su fwalu nenela sin met puspus su sifwana lungselos, met konkun, seakos papa a nine, tia sang kulo, tia mutal, met sulallel, met lemnak, lungse me akengan yok liki lungse lun God, oana ke ma Poul el simusla ke oiya koluk lun met puspus. (2 Timote 3:1-5) Ke ma inge paye la upa nu sum in akkalemye pal nukewa oiya mwomwo meyen met su raunekomla akkalemye oiya koluk inge. Tusruktu, pal nukewa kom oru ma sumwos a kom pulesru in wi oru oiya koluk, kom akpayeye la kom sang kasru in akfulatye sumwos lun Jeova in kol. (Job 2:3, 4) Kom insemwomwo meyen kom etu la kom porongo kas inge lun Jeova: “Mwen nutik, kom in lalmetmet, a akengunye insiuk, tu nga fwa ku in topkul su angon yu.” (Soakas 27:11) Sayen ma inge, meyen kom etu la Jeova el insemwomwo keim, ma inge ku in akkeye kom in kulansap nu sel.
16. Fuka sie sister el oru insien Jeova in engun?
16 Oasr sie mutan Kristian su pangpang Carol el kafweang in orekmakin ke moul lal akwuk mwomwo lun Baibel ke pal se el lutlut ke el met fwusr, ke ma inge met puspus liye a etu ke oiya mwomwo lal. Mea fwokin orekma mwo lal inge? Tulik lutlut elos anglol Carol meyen el orekmakin akwuk mwomwo lun Baibel, a el tia wi ke me akfulat puspus lun anu. Ke sie pal, oasr pal mwomwo lal in akuteye nu sin tulik lutlut puspus lulalfongi lal. Tokin yea puspus, Carol el eis sie card sin sie classmate lal in pal meeta, su simusla kas inge: “Nga fwinsrakkin pal nukewa in liye a sramsram nu sum in akkalemye kulo luk nu sum. Oiya mwomwo a me srikasrak lom oana sie met Kristain fwusr, wekunang pulaik lom in tu na ku in tia wi ke me akfulat nukewa, el eteyuk sin tulik lutlut puspus. Kom pa Met Lo se meet su Nga etu.” Me srikasrak lal Carol orala me akkeye yok nu sin tulik lutlut se wiyel paenang tok tulik lutlut se inge el mutawauk in lutlut Baibel. El simusla ke card nu sel Carol la el baptaisla tari oana sie met Kristian ke lusen yea 40 kutu! In oana Carol, komwos met fwusr ke pal inge su pulaik in tu ku in orekmakin akwuk mwomwo lun Baibel ku in akkeye met puspus su paye insielos in eis etauk kel Jeova.
Met Fwusr Puspus su Akfulatye Jeova
17, 18. (a) Mea nunak a pulakin lom nu sin met fwusr nukewa ke congregation lom? (b) Ke pal fwasru, ma mwomwo fuka sano met fwusr su sangeng sin God?
17 Kut nukewa su oasr ke lun lun Jeova fwin fwalu nufon arlana insemwomwo in liye tausan puspus sin met fwusr su moniyuk in oru orekma in kulansap nu sin God! Met fwusr nukewa inge elos akkeye lungse lalos in kulansap nu sin Jeova ke inkanek lun ridi Baibel, pre, a moulkin oiya mwomwo fwal nu ke ma lungse lun God. Met fwusr inge su akkalemye me srikasrak mwomwo elos me akkeye nu sin papa a nine kiyelos a nu sin met kulansap nukewa lun Jeova.—Soakas 23:24, 25.
18 Ke pal fwasru, met fwusr nukewa su oaru elos fwa wi u lulap su fwa moliyukla nu ke akwuk sasu su God el mwulela. (Fwakyuk 7:9, 14) Ke fwal sasu, elos fwa engankin me insemwomwo puspus ke elos kapkapek ke eatuk lalos nu sin Jeova, a elos fwa ku in kaksakunul a akfulatyel nu tok ma patpat.—Sam 148:12, 13.
Ya Kom Ku In Akuteye?
• Fuka met fwusr ke pal inge elos wi ke orekma in kulansap nu sin God?
• Kom fwin lungse in eis ma lane yok ke orekma lom in rid Baibel, efu ku yok sripe in sifwilpa nunku ka?
• Pre el kasre kom fuka in akfototoye kom nu sin Jeova?
• Mea oiya mwomwo lun sie met Kristian ku in oru?
12. (a) Efu ku pre su oasr kalme yok oasr ma eneneyuk yok sayen kas mukena? (b) Mea fwa kasre kom in etu a akilen la Jeova el apkuran nu sum?
[Petsac ke sra 5]
Ya kom pala in rid Baibel pal nukewa?