‘Putaka . . . Nga Pang Nu Sum ke Kasru?’
Jayne el tung a fwak: “Nga lungse na in tia pulakin ngal upa!” Oasr cancer lal, a mas lal inge oasr tari ke manol nufon. Met nukewa ke sou lal a met kawuk lal elos fwinsrakkin mu elos fwa ku in akwanginyela mas lal a ngal upa su el pulakin fwin elos ku in oru! Elos pre nu sin Jeova in kasrel. Ya God el long pre lalos? Ya el nunku a lungse in karungunul?
GOD el etu ke ma sikyak nu sin met nukewa. Baibel el akkalemye kas inge: “Ma orekla nukewa sao a tukeni ngalnu nu ke pal se inge.” (Rom 8:22) God el etu la oasr million puspus sin met oana Jayne, su pulakin ngal a sasao len nukewa, ke manolos, pulakin, ku ke nunak lalos. God el liye million 800 sin met su wangin mongo nelos a som nu fwin bed kiyelos fong nukewa musrinsral. El liye pa million puspus su sun me keok ke sripen orekma koluk lun met in sou lalos, a ke papa a nine puspus su arlana fosrnga ke ma a fwa sikyak ke moul lun tulik nutulos ke pal fwasru. Ya kom wi muta nunku fwin God el fwa oru me aksumwosyeyen ma upa nukewa inge? Paye, ke sripen kut lungse in sang kasru nu sin met su kut lungse, ya God el tia lungse in sang kasru nu sin metu, su el orala?
Tia kom mukena siyuk kusensiyuk oapana inge. Yea 2,600 kutu somla, sie met oaru su pangpang Hebakkuk el pula pa oana met puspus elos pula, a el siyuk sin God: “O Jeova, Nga fwa tung putaka, a kom fwa tia long? Nga pang nu sum ke ma sulallel, a kom fwa tia molela? Efu kom fwakak nu sik ma koluk, a nget nu ke ma sesumwos? Tu kunausten a sulallel on ye mutuk; oasr amei, a akukuin sikyak?” (Hebakkuk 1:2, 3) Hebakkuk el sie met palu Hibru, su liye orekma koluk, akmas, a me kutasrik upa ke len lal. Ke pal inge, kain in orekma inge pa news len nukewa su akasorye a aktoasrye met mwo a pakoten.
Ya God el pulesru ma Hebakkuk el nunku yok ka? Mo. El loang nu ke kusensiyuk yok sripe lal Hebakkuk a ke ma inge el akpwaryel a akkeye met su asor se inge. Jeova God el akkeye lulalfongi lal Hebakkuk, a el mwulela la El efwa aksafyela me keok. Mwulela lun God ke fwinsrak mwomwo ku in akkeye kom pa, oana fwinsrak mwo inge el oru nu sel Jayne a ke sou lal. Me lutlut toko fwa sang me top ke kusensiyuk inge nukewa: Kut ku in etu fuka la God el nunku kesr a karungin kut na paye? Mea God efwa oru in aksafyela me keok, a ngea?