Kom Ku In Eis Lalalfongi Paye

Ke pal se Sarah Jayne el 19 matwe, el koneak la el wi cancer ke ovary. Tokin laslas lal, el pulakin mwo a el fwinsrak mwo ke pal fwasru. Aok, arulanu yok fwinsrak lal paenang, ke pal se el sun 20 matwe, el akola tari in payuk nu sin sie mokul a mutamwauk in orala plan ke pal in mari. Ke yiu senpanu inge cancer lal sifwil fokolo, a el koneak la oasr na wik ekasr lula ke moul lal. Sarah Jayne el mise ke June 2000, meet liki el sun yiu 21 matwe.

MA se ma akpwarye met nu kemwa su muteta nu yurol ke hospital ke el srakna mas pa fwinsrak yok lal ke pal fwasru, weang nu ke lalalfongi fukoko lal nu sin God a ke Kas lal, Baibel. El fwinne sun kain in ma upa inge ke moul lal, tusruktu el lalalfongi na paye ke sifwil moulyuk​—su ku in kasrel in sifwil liye kamwuk lal nu kemwa. (Jon 5:28, 29) “Nga fwa sifwil liye komwos nu kemwa ke fwalu sasu lun God,” el fwak.

Kutu met elos nunku la kain in lalalfongi inge meme se na ku tia paye. “Mea se inge moul tokin mise, el sie kain in lalalfongi lun met nu kemwa su sangeng mukena,” pa inge ma Ludovic Kennedy el fwak, “ke ukok safla oasr cake a ale, caviar a pusren me ukok su akola nu selos, tu ke imae lun Eden elos fwa ku in akesrui ke insemwomwo nu sin met nu kemwa su mise meet lukelos a nu selos su akola in tuku ke pal fwasru?” Ke kas inge, kut ku in siyuk sie kusensiyuk in lain ma el fwak inge. Piye ma mwo​—in lalalfongi la, “moul lasr ke pal inge mukena pa oasr yurosr, paenang kut enenu in eis ma nu kemwa su kut ku in eis ka,” pa inge ma Kennedy el fwak, ku, in lalalfongi God a ke mwolela lal ke sifwil moulyuk? Sarah Jayne el sulela ma se tok. Fuka el akkapye kain in lalalfongi inge?

“Suk God . . . a Kom Fwa Konoielak”

In akkapye lalalfongi a tupan nu sin kutu met, kom enenu meet in etel a lutlut kel fuka nunuk a orekma lal. Kapsreni nu ke kain in orekma inge pa insie a nunuk. Kain in oiye se inge ku in orekmakin pa kut fwin lungse in akkapye lalalfongi paye nu sin God. Kom enenu in etel, in lutlut ke oiye a mokuikui lal, in lutlut fuka kom ku in lalalfongel na paye ke ma el fwak a oru.​—Sam 9:10; 145:1-21.

Kutu met elos fwak la ma inge tia ku in sikyuk. Elos fwak la, God el loes liki kut, kut tia ku akilenul​—el fwin oasr na paye. “Fwin God el arulanu paye nu sin met Kristian oanu Sarah Jayne,” met skeptic el siyuk, “efu el tia akkalemyel sifwanu nu sesr kemwa?” Aok, ya God el arulanu loes liki kut na paye a upa in konoielak? Ke sie me sramsram lal nu sin met lalmetmet in an Athens, met sap Poul el fwak la “God su oru fwalu a ma nu kemwa su on lu” el sang pa ma enenu nu kemwa “in suk [el] . . . a konielak.” Ke ma paye, Poul el fwak: “El fwinne tia loes liki kutena sesr.”​—Orekma 17:24-27.

Ke ma inge, fuka kom ku in “suk God . . . a konielak? Kutu met elos oru ou inge ke pal se elos loang akmwoye na ke kosrao a fwalu a ma nu kemwa su raunelosla. Nu sin met puspis, kosrao a fwalu mukena sang tari me akpayeye fwal su ku in kasrelos in lalalfongi la oasr Sie Met Su Orala ma nu kemwa.a (Sam 19:1; Isaia 40:26; Orekma 14:16, 17) Elos pulakin ma met sap Poul el pulakin meet, “ma lal [God] su koflanu in liyeyuk, ma inge arulanu kalem ke mutamweyen fwalu me, tu akilenyuk ke ma orekla, aok ku ma patpat lal a tu el mukena God.”​—Rom 1:20; Sam 104:24.

Kom Enenu Baibel

Tusruktu, in musaiyuk lalalfongi paye nu sin Met Orekutla, kom enenu ma se su el ase nu sesr. Mea ma se inge? Baibel​—Kas lun God, su akkalemye ma lungse lal a akmwuk lal. (2 Timote 3:16, 17) “Tusruktu sano,” kutu met elos fwak, “fuka kom ku in lalalfongi ke ma nu kemwa Baibel el fwak ke pal se kom liye la ma koluk upa puspis su sikyuk ke pal inge orekla sin met su fwakak la elos akos Baibel?” Paye, oasr record koluk na paye lun Kristendom ke orek luma, orekma silolel a orekma lun kosro. Tusruktu kutena met su lalmetmet elos ku in liye la Kristendom elos orek luma mukena la elos akos ma sap lun Baibel.​—Mattu 15:8.

Baibel el sang kas in sensen la met puspis elos fwakak elos alu nu sin God, tusruktu ke ma paye, elos “lafwekin leum pa su molelosla.” “Tu meyen elos ou inge,” met sap Piter el fwak, “inkanek paye pa kaskaskou ka.” (2 Piter 2:1, 2) Jisus Kraist el fwak la met inge “met orekma koluk” su ku in akilenyuk ke orekma koluk lalos. (Mattu 7:15-23) In akkalemye srunga ke Kas lun God ke sripen record koluk lun Kristendom, oanu kom sisla sie leta su tuku sin kamwuk su kom ku in lalalfongi ke sripen met su wis leta se inge nu sum el arulanu koluk.

Fwin wangin Kas lun God arulanu upa in musaiyuk sie lalalfongi paye. Ke inkanek lun Baibel mukena Jeova el akkalemyel sifwanu a ma lungse lal. El akkalemye topuk ke kusensiyuk puspis efu el lela me keok a ngal a mea el akola in oru ke ma inge. (Sam 119:105; Rom 15:4) Sarah Jayne el lalalfongi la Baibel el Kas lun God na paye. (1 Tessalonika 2:13; 2 Piter 1:19-21) Efu ou inge? Tia ke sripen papa a nine kiel elos sapkin nu sel in oru ou inge, a meyen el orekmakin pal ke oaru me akpayeye nu kemwa su akkalemye la Baibel el sie me fwakyuk sakuruk lun God. (Rom 12:2) Ke sie me pupulyuk, el akilen, ku lun Baibel in purakak met nu kemwa su akos ma sap lal. Ke kasru lun me rid inge The Bible​—God’s Word or Man’s?,b el ouyepa loang akmwoye ke me akpayeye puspis su el sifwanu akkalemye la el tuku sin God.

“Lalalfongi Tuku ke Long”

Tusruktu, tia fwal in oasr Baibel mukena a lalalfongi la ma inge tuku sin God. “Lalalfongi,” met sap Poul el simusla, “tuku ke long.” (Rom 10:17) In Long Baibel, tia in eis Baibel mukena, pa ku in musaiyuk lalalfongi. Kom ku in “long” ma God el fwak ke kom rid a lutlut ke Kas lal. Fwinne met fwusr elos ku in oru ou inge. Poul el fwak la “ke el tulik me” Timote el eis lutlut ke “ma simusla mutal” sin nine kiel a nine matu kiel. Ya ma inge akkalemye la elos liksreni na paye me lutlut inge nu sel alukela ma fwal? Mo! Elos tia keapella ku oru orekma alukela ma fwal nu sel Timote ke kutena inkanek. El inge “akkeyeyuk in lalalfongi” ke ma el long a rid.​—2 Timote 1:5; 3:14, 15.

Sarah Jayne el akkeyeyuk pa ke inkanek inge. Oanu met Berea ke century se meet, elos “eis kas [sin papa a nine kielos a met luti lalos] ke insielos kemwa.” Oanu tulik srisrik, wangin alollo la el filiye lalalfongi lal ke ma papa a nine kiel elos fwak nu sel. Tok, ke el kapek, el tia eis na ma nu kemwa su lutiyuk nu sel. A, el ‘liye Ma Simusla ke len nu kemwa a tuni fwin ma inge paye ku sito.’​—Orekma 17:11.

Kom Ku In Musaiyuk Lalalfongi Paye

Kom ku in ouyepa musa lalalfongi paye​—kain in lalalfongi su akkalemyeyuk sin met sap Poul ke leta lal nu sin met Kristian Hibru. El fwak la, kain in lalalfongi inge, pa “me etauk ma su a fwinsrak ka, me eyeinse lun ma su tia liyeyuk.” (Hibru 11:1) Fwin oasr kain in lalalfongi inge lom, kom ku in tupan na paye la fwinsrak lom nu kemwa tuku ke ma su oasr me akpayeye, a tia ke ma su kom tia etu el fwin tuku na paye ku tia. Kom ku in koneak la tia tula kutena ma mwo su Jeova el mwolela. (Josua 21:45; 23:14; Isaia 55:10, 11; Hibru 6:18) Mwolela lun God ke fwal sasu ku in arulanu paye sum oanu el tuku tari. (2 Piter 3:13) A kom ku in liye na paye ke mutun lalalfongi lom la Jeova God, Jisus Kraist, a Togusrai lun God arulanu paye a tia meme se na.

Tia kom mukena ku in musaiyuk lalalfongi paye lom. Sayen orekma lal in sang Kas lal, Jeova el ouyepa sang congregation lun met Kristian fwin fwalu nu fon su arulanu kafofo in kasru met sumwos in musaiyuk lalalfongi lalos nu sin God. (Jon 17:20; Rom 10:14, 15) Eis me kasru nu kemwa su Jeova el sang ke inkanek lun u lal. (Orekma 8:30, 31) A ke sripen lalalfongi el sie fwako lun ngun mutal lun God, paenang pre pal e nu kemwa ke ngun mutal inge in kasru kom in akkapye lalalfongi paye lom.​—Galetia 5:22.

Lela kom in tia akmunasyeyuk sin met skeptics su aksruksruk koluk nu sin kutena met su akkalemye lalalfongi nu sin God a ke Kas lal. (1 Korint 1:18-21; 2 Piter 3:3, 4) Ke ma paye, lalalfongi paye sie me kasru yok in akkeye kaifweung lom lain kain in meun inge lun met koluk. (Efesus 6:16) Sarah Jayne el koneak la ma inge arulanu paye, a el akkeye met nu kemwa su muteta nu sel ke loom ono in musaiyuk lalalfongi lalos sifwanu. “Lela ma paye in ma lom,” el fwak. “Lutlut Kas lun God. Muta futoto ke u lun God. Pre pal e nu kemwa. Oru in kafofo ke kulansap lom nu sin Jeova.”​—Jemes 2:17, 26.

Meyen el koneak lalalfongi lal ke God a ke sifwil moulyuk, paenang sie sin nurse el fwak nu sel: “Ya kom lalalfongi na paye ke ma se inge paye?” Ke pal se siyukyuk nu sel ma su akkeyel in srukye kain in fwinsrak mwo ke pal fwasru el fwinne muta ke me srifwe, el fwak: “Lalalfongi nu sin Jeova. El kamwuk luk na paye, a Nga arulanu lungse el.”

[Footnotes]

[Picture on page 6]

“Ke el tulik me” Timote el eis lutlut ke “ma simusla mutal” ke inkanek lun nine kiel a nine matu kiel

[Picture on page 6]

Met Berean elos eis kas in kaksak meyen elos tuni Ma Simusla len nu kemwa

[Credit Line]

Mutamwauk ke “Photo-Drama of Creation,” 1914

[Pictures on page 7]

In porongo a akos Baibel, a tia in oasr Baibel mukena pa ku in musaiyuk lalalfongi

[Picture on page 7]

“Nga fwa liye komwos nu kemwa ke fwal sasu lun God”