Karungin Komyang Sifwana Liki Ngun Koluk Puspus

JEMES el isusla a matula ke sie tuka srisrik pangpang Malaita, ke an Solomon Islands. Ke el srikyak, el lutiyuk in lulalfongi a akfulatye ngun mwomwo a ngun fokfok. “Nga fwa tia siyuk sin kutena ngun in oru ma koluk nu sin kutu met,” el fwak, “tusruktu nga tia lulalfongi mu nga ku in eis engan a insemwomwo ke sie moul fwin wangin orekmakinyen inutnut su pangpang rarafono [pa inge fasin lalos in eis kasru ke ngun lun inutnut] in loangelosla liki me fosrnga.”

Nu sin met puspus fwin fwalu, oana met fwin an Solomon Islands elos lulalfongi mu ngun nukewa elos ku in kasru ku akngalye met se. Fwal nu ke nunak lalos, met puspus fwin an Melanesia elos filiye lulalfongi lalos mu oasr sie ngun su pangpang ngun fulatlana a pengpeng su tia sangeng a tingtingi na ke pakoten.

Lulalfongi fukoko ke orekma lun ngun fokfok el ku in liyeyuk ke inkanek puspus. Ke sie me pupulyuk, ke pal se Jemes el tulik srisrik, el liye mutan nukewa ke mura lal fwin longak pusren won soksok inge korokoro (su pangpang koel) el kaskas na elos sangeng a kaeng us tulik natulos nu in loomu. Efu? Meyen elos lulalfongi mu pusren won inge akkalemye la oasr met efwa akkolukyeyuk.

Kutu sin met in mura se inge elos filiye eot fasrfasr fwin srungul in utyak ke loom selos. Jemes el wi pa oru ma inge, meyen el lulalfongi mu eot inge ku in loangelosla liki orekma koluk lun ngun fokfok. A ke pal se Jemes el oasr ke orekma, tokin el mongo ke infwulwen len el srike in orani kutena mongo ma lula nu ke sie bag in fwa sisila tok. Meyen el nunku mu fwin met orek inutnut el koneak luen mongo inge el fwa orek inutnut nu ka a tok el fwa masak.

Fwinne kain in orekma inge tia orek in fwal sum, saap kom ku in nunku oapana ma Jemes el nunku mu kom enenu pa in orekmakin fasin puspus ke an sum in sang karungin kom yang liki orekma lun ngun fokfok nukewa. Saap kom nunku mu in akos akwuk a fasin inge yok sripe nu ke moul lom.

Fwin kom sie met su lulalfongi ke Baibel, wangin alolo ka la kom lungse in etu la mea me top lun Baibel nu ke kusensiyuk inge: (1) Mea me akkoluk su ngun fokfok el ku in oru nu sum? (2) Ya fwin akosyuk kutu akwuk a fasin lun anu el ku in oru kom in sremla nu ke me akkoluk lun dimon puspus? (3) Kom ku in koneak fuka me karunginyuk mwomwo liki ngun fokfok nukewa a in eis engan a misla paye?

Fuka Ngun Fokfok el Ku in Orala Me Akkoluk

Baibel el akkalemye la ngun fokfok el tia ku in tuku ke ngunin met nukewa su mise tari. Kas lun God el akkalemye la “met moul etu tu elos fwa mise, a met mise tia etu kutena ma.” (Ekklisiastis 9:5) Payeiye pa ngun fokfok eltal lipufan koluk nukewa su welul Setan in kiapela met nukewa.​—Fwakyuk 12:9.

Ma simusla el akkalemye la kut enenu me kasru in karungin kut liki ngun fokfok nukewa. Met sap Poul el simusla nu sin met Kristian nukewa in an Efesus: “Tu asruoki lasr tia lain ikwe a sra, a lain togusrai, a in lain . . . un ngun koluk yen engyengu.” Met sap Piter el akkalemye la leum lun ngun koluk nukewa pa Setan su Devil, su oana “soko laion ngutngut, el fwafwasryesr, in suk su el fwa kangla.”​—Efesus 6:12; 1 Piter 5:8.

Setan el akkolukye met ke el kiapelosla, el orekmakin inkanek kutasrik ku el srufwelosla in oru kain in orekma sufwal in aktoasrye God. Baibel el akkalemye la Setan el “sifwana oral sie lipufan lun kalem.” (2 Korint 11:14) El orek luma na la el sie lipufan ku ngun mwomwo, tusruktu akwuk lal arlana koluk. Setan el akkunye nunak lun met tu elos in tia etu ma paye kel a ke ma paye ke God. (2 Korint 4:4) Efu ku el lungse in kiapela metu?

Setan el lungse met nukewa in alu nu sel. Ke pal se mwen nutin God el oasr fwin fwalu, Setan el lungse elan “putati a alu” nu sel. Tusruktu Jisus el fwak nu sel: “Fwala, Setan! Tu ma simusla, ‘Kom fwa alu nu sin Jeova God lom.’” (Mattu 4:9, 10) Aok Jisus el srunga in oru kutena ma su akkalemye la el akos Setan, ke orekma in alu nu sel.

Jeova el ku liki ma orekla in ngun nukewa a el fwa tia lela kutena me akkoluk in oasr pal nukewa nu selos su aksol. (Sam 83:18; Rom 16:20) Tusruktu kut fwin lungse in akinsemwomwoye Jeova God oana ma Jisus el oru, kut enenu in tia oru kutena fasin ku orekma in akinsemwomwoyel Setan ku dimon puspus lal, su oana sie nu ke orekma in alu nu sel. Ke sripe se inge, kut enenu in etu ke fasin nukewa su sang me akfulat nu ke ngun koluk nukewa? Fuka kom ku in oru?

Kom ku in Etu Fasin Nukewa su Tia Akinsemwomwoye God

Jeova God el sang kas in sensen nu sin met lal in pal meeta, nu sin met Israel in tia etawi a oru fasin puspus lun mutanfwal nukewa su oasr ke an on apkuran. El fwak: “A fwa tia konoiyukyak yurum kutena met su . . . orek inutnut, ku sie met susfwe, ku sie met tefwat.” Nu selos nukewa su oru kain in fasin inge, Baibel el akkalemye: “Tu kutena met su oru ma inge el me srungeyuk nu sin Jeova.”​—Duteronomi 18:10-12.

Ke ma inge, fwin kom nunku ke fasin puspus su pengpeng ke an sum, siyuk kusensiyuk nukewa inge: Ya fasin se inge el kupasr nu ke orekma in akkalemye ke ma e fwa sikyak ke pal fwasru? Ya orekma se inge el lulalfongiyuk mu oasr me kasru yok su tuku ke kain in ma su wangin moul ka in karungin metu? Ya metu elos orekmakin kain in kas in susfwe in akkolukye ku in sang karungin sie met? Ya orekma se inge el oru sie met in alu nu sin sie ngun fokfok a tia nu sin Jeova God ku nu sin Jisus, su met tutafpo lal?​—Rom 14:11; Filippai 2:9, 10.

Arlana yok sripe kom in tia orekmakin kutena fasin su akkeye orekma nukewa inge. Efu? Met sap Poul el simusla: “Komwos tia ku in mongo ke ‘tebu lun Jeova’ a tebu lun dimon.” El sang kas in sensen nu sin met nukewa su srike in akinsemwomwoye Jeova a in pal sepana akinsemwomwoye ngun fokfok, elos fwa ‘akmulatye Jeova nu ke sok.’ (1 Korint 10:20-22) Jeova God el sapkin met kulansap nukewa lal in alu nu sel mukena, a el arlana fwal in oru ma inge nu sel.​—Exodus 20:4, 5.

Nunku pa ke kusensiyuk se inge: Ya fasin se inge el akkalemye la sie met el tia eis meta ke orekma lal? Ke sie me pupulyuk, ke mutanfwal puspus metu elos srunga a tia insese ke orekma lun kosro a orekma lun mokul a mutan in tukeni oan meet liki payuk, a Baibel el akkalemye la orekma inge tia mwo. (1 Korint 6:9, 10) Tusruktu, ke an puspus su oasr ke Pacific, metu elos lulalfongi mu wangin ma koluk ke kain in orekma inge fwin oasr sie mutan fwusr el fwak mu el kangla mongo su oasr ke “sra.”a Ke sripe se inge, el ku in fwak mu el pula la el lungse in oan yurin sie mokul ke sripen oasr me purakak su tuku ke pulo kas in akkolukyel.

Tusruktu Baibel el akkalemye la kut fwa eis nununku ke orekma nukewa lasr. (Rom 14:12; Galetia 6:7) Ke sie me pupulyuk, If el pula la Setan el kiapella in seakos God, a el fwak: “Serpent el kiape yu, a nga mongo.” Tusruktu, Jeova el nununkel If fwal nu ke orekma lal. (Genesis 3:13, 16, 19) El nununke kut pa fwal nu ke orekma ku oiyesr.​—Hibru 4:13.

Mea Kom Enenu in Oru?

Kom fwin lungse in akinsemwomwoye God a moulkin moul fwal nu ke akwuk puspus lun Baibel, kom enenu in oru ma nukewa kom ku in oru in karungin kom sifwana liki Setan a dimon nukewa lal. Met nukewa su auliyak paye in an Efesus in century se meet elos orala me srikasrak mwomwo ke luma se inge. In kasrelos ke inkanek mwomwo tu elos fwa ku in srelosla liki ngun fokfok nukewa, elos orani buk nukewa natulos su akuteye ke inkanek lun inutnut a “esukak ma inge ye mutun met nukewa.”​—Orekma 19:19.

Meet liki buk inge nukewa isisyak, met nukewa su lulalfongi “elos tuku a fwakak a akuteye ke orekma lalos.” (Orekma 19:18) Ma inge nukewa sun insiyelos ke me luti lal Poul kel Kraist, su moklelos in kunausla buk nukewa natulos ke inkanek in orekmakin inutnut. Elos ekulla pa oiyen moul lalos ke inkanek puspus lun fasin.

Paye, la suk in tia akos akwuk lun fasin el tia ma fusrasr se in orek. Jemes, el fwakak ke mutamwauk, la akwuk se inge fwa oasr me lain nu ka. Ke pal se el mutamwauk in oru lutlut ke Baibel yurin Met Lo lun Jeova el arlana engankin ma nukewa el lotela. Tusruktu, el srakna lulalfongi ke inutnut su pangpang rarafono. Ke pal se el mutamwauk in loang akmwoye nu ke nunak lal ke inkanek lun inutnut, el koneak la el lulalfongi na paye ke wulela nukewa lun Jeova ke pal fwasru tusruktu el pulakin mu el lungse in oasr me karunginyuk mwomwo nu sel, a el nunku mu inkanek sefwanna ku in kasrel pa in lulalfongi ke inutnut a akwuk lun fasin.

Mea kasrel James in ekulla oiyen nunak lal? El tafwela in fwak: “Nga pre nu sin Jeova in kasre yu a nga siyuk pa ke kasru lal in akkeye lulalfongi luk nu sel. A ke pal sepana inge, Nga kafweang in ekulla oiyen orekma luk ke inutnut a ke akwuk lun fasin.” Ya oasr kutena me akkoluk sikyuk nu sel? “Mo, wangin,” James el akkalemye. “Tusruktu ma nukewa ma sikyak pa nga akyokyelik etauk luk in lulalfongi kel Jeova. Nga etu tari ke oiyen Jeova la el ku in sie met kawuk fototo a paye.” Oasr me akpayeye puspus, ke lusen yea itkosr, James el oru orekma lal oana sie met orekma ke len nukewa, in kasru met puspus elos in eis etauk paye ke me luti lun Baibel.

Ya tia mwo in etawi me srikasrak mwomwo lal Jemes? Loang akmwoye nu ke oiyen fasin su orek in an sum an, a srike in orekmakin “ku lun nunak sumwos” in liye la fwal nu ke “lungse lun God.” (Rom 12:1, 2) In oru ouinge fwa ku in kasre kom in srikomla liki orekma fokfok nukewa lun alialu a inutnut. Fwin kom oru ouinge, kom fwa ku in oasr lulalfongi fukoko lom la Jeova el fwa “wi kom” a karungin kom. (2 Korint 6:16-18) In oana Jemes, kom ku in pulakin ma paye nukewa su Baibel el wulela ka: “En Jeova sie tauer ku. Met sumwosmwos kasrusr nu lu a moul.”​—Soakas 18:10.

[Footnote]

[Picture on page 10]

“Korokoro”

[Credit Line]

Courtesy of Dr. Bakshi Jehangir

[Picture on page 10]

Sie mutan el oreni mongo srisrik ma lula tu in tia ku in orekmakinyuk in orek inutnut