Lela Kut In Akkalemye Moniyuk Paye Lasr In Alu Nu Sin Jeova!
“Moniyuk nu ke loom sum fwa kangyula.”—JON 2:17.
1, 2. Ke tempel in yea 30 C.E., mea Jisus el oru, a efu?
SRIKE lumala ke nunak lom ke ma sikyuk in pal meeta. Ke pal in Kofwen Alukela, in yea 30 C.E. Malem onkosr meet liki pal se inge, Jisus el mutamwauk oru orekma lal in luti peng mwo. Inge el akola in som nu Jerusalem. In an se inge, ke tempel su oasr ke inkalkal se su met puspus su tia met Ju oru tukeni lalos we, Jisus el koneak in tempel “elos su kukakunla kao a sip a mwulioa, a met ayaol mani muta we.” A el orekmakin sie me sringsring ke fwu, a siselosla nukewa liki in tempelu, a sip pa a kao. Jisus el okoila pa mani lun met ayaol mani a topkakunla tebu lalos. El fwak nu selos su kukakunla mwulioa in som liki an se inge a us me kuka lalos.—Jon 2:13-16.
2 Orekma lun Jisus inge el akkalemye la tempel el arlana mutal a yok sripe. El sapkin nu selos: “Nik komwos oru loom sin Papa tumuk tu in loom kuka!” Ke met tumal lutlut lun Jisus liye ma sikyak inge, elos esam ke ma Devid el simusla ke century puspus meet liki pal sa: “Moniyuk nu ke loom sum fwa kangyula.”—Jon 2:16, 17; Sam 69:9.
3. (a) Mea se inge moniyuk? (b) Kusensiyuk puspus fuka kut ku in siyuk sesr sifwana?
3 Moniyuk a nunak mwomwo lal Jisus nu ke loom sin God moklel in oru orekma inge. Moniyuk pa “alken a insemwomwo yok in oru ma se.” Ke century ak 21 inge, pus liki million itkosr sin met Kristian elos akkalemye nunak mwomwo a moniyuk lalos nu ke loom sin God. Kais sie sesr ku in siyuk, ‘Nga ku in akyokye fuka moniyuk luk nu ke loom sin Jeova?’ In kasre kut in eis me top ka, lela kut in tuni meet la mea se loom sin God ke pal inge. Tokin ma inge kut fwa lutlutkin ke me srikasrak lun met oaru puspus in Baibel su akkalemye moniyuk ke loom sin God. Me srikasrak lalos simusyukla “in luti kut” a in ku in akkeye kut in oasr moniyuk yok lasr.—Rom 15:4.
Loom sin God—In Pal Meeta a ke Pal Inge
4. Tempel se su Solomon el musaela el orekmakinyuk fuka?
4 In an Israel in pal meeta, loom sin God pa tempel in an Jerusalem. Aok, Jeova el tia muta in loom se inge. El fwak: “Kosrao tron luk, a fwalu ma loangeyen niuk. Kain loom su komwos fwa musai nu sik, a yen su fwa nien mongla sik?” (Isaia 66:1) Ne ouinge, tempel se su musaeyukla ke pal in kolyuk lal Solomon el orekmakin yok ke orekma in alu nu sin Jeova, su pre nukewa orek nu sin God we.—1 Togusra 8:27-30.
5. Orekma in alu nu sin God ke tempel lal Solomon el lumeyuk nu ke mea?
5 Ke pal inge, loom sin Jeova el tia loom paye se su oasr in Jerusalem ku ke kutena an. A, el sie akwuk mwomwo nu sesr kut in alu nu sin God ke inkanek lun me kise lun lango lun Kraist. Met kulansap nukewa lun Jeova elos inse sefwanna in alu nu sin Jeova ke inkanek lun akwuk mwomwo nukewa in kulansap nu sel su lumeyuk nu ke tempel.—Isaia 60:4, 8, 13; Orekma 17:24; Hibru 8:5; 9:24.
6. Su togusra akosr fwin an Juda su akkalemye moniyuk yok lalos nu ke alu paye?
6 Tokin mutanfwal lun Israel el kitakitelik nu ke togusra luo in yea 997 B.C.E., oasr togusra 4 inmasrlon togusra 19 su kol an Juda, su oasr leyen epang, elos akkalemye moniyuk yok lalos nu ke alu paye. Togusra akosr inge pa Esa, Jihosafat, Hezekaia, a Josaia. Me lutlut yok sripe fuka kut ku in lotela ke me srikasrak mwomwo lalos?
Orekma in Kulansap su Orek ke Inse Kewa Ase Me Insemwomwo Puspus
7, 8. (a) Kain in orekma fuka Jeova el lungse in akinsemwomwoyeyuk? (b) Kain in me lutlut fuka kut ku in lotela ke me srikasrak lal Togusra Esa?
7 Ke lusen pal in kolyuk lal Togusra Esa, Jeova el supwela met palu puspus in kasru met nukewa lal in fwasr ke inkanek sumwos. Ke sie me pupulyuk, Baibel el akkalemye nu sesr la Esa el porongo met palu Asaraia, mwen natul Oded. (Ridi 2 Kronikel 15:1-8.) Kafweang lal Esa in akmwoye orekma nu sin God oru met Juda in oasr inse sefwanna lalos, a oasr pa met puspus ke togusra lun Israel su welulos pa ke sie tukeni lulap fwin an Jerusalem. Elos nukewa akkalemye sulela mwomwo lalos in kulansap nu sin Jeova ke inse paye lalos. Kut ku in rid ouinge: “A elos fulak nu sin Jeova ke pusra lulap, a ke sasa, a ke ukuk, a ke kornet. A met Juda nukewa engun ke fulak se inge, tu elos fulak ke insielos kemwa, a sokol ke lungse lalos kemwa, a el konoiyukyak yurolos; a Jeova el sang mongla nu selos yen nukewa.” (2 Kronikel 15:9-15) Jeova el fwa akinsemwomwoye kut pa kut fwin kulansap nu sel ke inse kewa lasr.—Mark 12:30.
8 Sie me asor, ke sripen tok kutu Esa el tia eis kas in aksumwos sel Hananai met liyaten. (2 Kronikel 16:7-10) Oiya fuka kut akkalemye fwin Jeova el akkalemye nu sesr kas in kai lal ku masap lal ke inkanek lun met Kristian elder? Ya kut lungse in loang nu ka a in orekmakin kas in kasru lalos su tuku ke ma Simusla tu kut in tia srufweyukla ke me sruf in pilesru kas in kai?
9. Me sensen fuka sikyak nu sel Jihosafat a nu sin met Juda nukewa? Oiya fuka elos akkalemye nu ka?
9 Jihosafat el kol oana sie togusra fwin an Juda ke lusen century aksengoul B.C.E. El a met Juda nukewa elos sun ma upa meyen oasr me sensen nu selos su tuku ke un met meun lun met Ammon, met Moab, a met su muta ke an puspus su oasr fwin eol Seir. Fwinne el sangeng, mea togusra se inge el oru? El a mokul kulansap nukewa lal, wi pa mutan kiyelos a tulik nutulos, elos tukeni nu sie ke loom sin Jeova in pre. (Ridi 2 Kronikel 20:3-6.) In oana sie nu ke kas lal Solomon su akkalemyeyuk ke pal se tempel el kisekinyukla, Jihosafat el pre siyuk sin Jeova: “O God lasr, ya kom fwa tia nununkalos? Tu wangin ku yurosr lain u lulap se inge su tuku in lain kut; a kut tia etu ma kut in oru, a mutasr nget nu sum.” (2 Kronikel 20:12, 13) Tokin Jihosafat el pre, a “in masrlon mwalilu,” ngunin Jeova el moklel Jaheziel, sie met Livai, in akkalemye kas lun God su akkeye lulalfongi lalos nukewa.—Ridi 2 Kronikel 20:14-17.
10. (a) Fuka Jihosafat a met Juda elos eis kas in kolyuk lun Jeova? (b) Kut ku in akkalemye fuka kulo lasr nu ke kas in kolyuk su Jeova el ase nu sesr ke pal inge?
10 Aok, in pal se ingo, Jihosafat a met nukewa ke togusrai lun Juda elos eis kas in kasru sin Jeova ke inkanek lal Jaheziel. Ke pal inge, kut eis kas in akkeye a kas in kasru ke inkanek lun met kulansap oaru a lalmetmet. Paye la, kut enenu in akesrui a akkalemye sunak nu sin met elder nukewa, su moniyuk in kasre kut a in akpayeye kas in kasru sin “met kulansap oaru a lalmetmet.”—Mattu 24:45; 1 Tessalonika 5:12, 13.
11, 12. Me lutlut mwomwo fuka kut ku in lotela ke ma sikyak nu sel Jihosafat a nu sin met Juda?
11 In oana ke Jihosafat a met lal elos tukeni nu sie in suk me kasru lun Jeova, lela kut in tia pulesru meeting lasr nukewa ke congregation wi met lili wiyesr nukewa. Kut fwin sun ma upa puspus ke pal inge, a tia etu la mea kut ku in oru, lela kut in etawi me srikasrak mwomwo lal Jihosafat a lun met Juda nukewa in pre nu sin Jeova wi lulalfongi yok nu Sel. (Soakas 3:5, 6; Filippai 4:6, 7) Fwinne kut loes liki un met lili wiyesr, tusruktu pre lasr nu sin Jeova el oru kut in inse sefwanna yurin ‘met lili wiyesr fwin fwalu nufon.’—1 Piter 5:9.
12 Jihosafat a met nukewa su oasr ke kolyuk lal elos akos kas lun God su Jaheziel el akkalemye nu selos. Mea sikyak tokin elos porongo kas lun God? Elos eis kutangla ke meun a elos folokla nu in an Jerusalem “wi engan” a “wi salteri a harp a ukuk nu ke loom sin Jeova.” (2 Kronikel 20:27, 28) Kut lungse pa in porongo a orekmakin kas lun Jeova su akkalemyeyuk nu sesr ke inkanek lun u lal a kut wi in sang kaksak nu sel.
Lela Kut in Karungin Mwo An in Tukeni Nukewa Lasr
13. Orekma fuka Hezekaia el oru ke mutaweyen kolyuk lal?
13 Ke malem se meet lun kolyuk lal, Hezekaia el akkalemye moniyuk lal nu ke akwuk in alu nu sin Jeova ke el sifwil pa ikasla a akmwoye tempel u. El orala akwuk nu sin met tol a met Livai nukewa elos in aknasnasye loom sin God. Elos akpayeye akwuk inge ke lusen len 16. (Ridi 2 Kronikel 29:16-18.) Akwuk inge akesmakinye kut ke orekma nukewa in akmwoye a onala an in tukeni lasr su akkalemye ke moniyuk lasr in alu nu sin Jeova. Ya kom tia long ke experience puspus su akkalemyeyuk la met puspus elos kaksakin moniyuk lun met lili wiyesr su wi ke kain in orekma inge? Aok, kafweang lalos in akpayeye akwuk inge sang kaksak yok nu sin Jeova.
14, 15. Orekma fuka ke pal inge sang kaksak yok nu sin Jeova? Sang me pupulyuk.
14 Ke sie siti su oasr leyen eir fwin an England, oasr sie mokul su lungse in lain orekma in onon nu ke sie Kingdom Hall su on ke sisken an sel. Ne ouinge met lili su orekma we elos akkalemye oiya mwomwo nu sel. Ke elos liye la kalkal ku pot su oasr inmasrlon Kingdom Hall a an sin met se inge enenu in akmwoyeyuk pa, elos fwak nu sel la elos fwa akmwoye ma inge ke wangin molo. Elos orekma upa, a sifwil pa musaela pot nukewa ka. Orekma mwomwo lun met lili nukewa inge oru mokul se inge in ekulla nunak a ella lal. Paenang ke pal inge el lungse pa in sang kasru in liaung Kingdom Hall se inge.
15 Met kulansap nukewa lun Jeova elos wi pa ke orekma in musa fwin fwalu nufon. Met lili puspus su muta yen selos elos lungse in wi u lun met lili wiyesr su pangpang international servants in musai Kingdom Hall a Asembly Hall puspus, a loom lulap puspus su pangpang Bethel. Sam a mutan kiyel, su pangpang Ruth, elos som nu ke mutanfwal puspus in an Europe a Africa in sang kasru nu ke orekma in musa puspus. Yen nukewa elos som nu we, elos engan pa in wi ke orekma in luti peng mwo wi met lili puspus lun congregation. Sam el akuteye la mea akkeyel in wi ke orekma in musa inge su orek fwin fwalu nufon, el fwak: “Me srikasrak mwomwo lun met lili wiyesr su oru kulansap lalos ke Bethel in an se inge a in an puspus saye. Ke nga liye moniyuk lalos a insemwomwo lalos akkeye yu in oru orekma in kulansap ke inkanek inge.”
Akos Masap Nukewa lun God
16, 17. Met kulansap nukewa lun God elos wi ke kain in orekma saoklana fuka? A mea fwako mwomwo lun orekma inge?
16 In wekunang orekma in akmwoye tempel, Hezekaia el sifwil pa oru Kofwen Alukela su Jeova el sapkin nu sin met kulansap lal in oru ke yea nukewa. (Ridi 2 Kronikel 30:1, 4, 5.) Hezekaia a met nukewa su muta fwin an Jerusalem elos suli met nukewa ke mutanfwal sa, wekunang met Israel ke togusrai su oasr leyen eir, in wi ke me akfulat saok inge. Met roso elos kasrusr a us leta ke me solsol nu sin met nukewa ke mutanfwal se inge.—2 Kronikel 30:6-9.
17 Ke lusen yea puspus, kut wi pa ke sie orekma in solsol met in wi ke me akfulat lun Memorial. Kut orekmakin me solsol mwomwo in suli met puspus ke territory lasr in wi akfulatye me esmakin ke Mongo in Eku lun Leum, in akos masap lun Jisus ka. (Luk 22:19, 20) Kut eis kas in kasru ku akwuk mwomwo nu ka ke Service Meeting a kut wi ke orekma saok inge ke moniyuk yok lasr. A Jeova God el akinsemwomwoye ke inkanek yok ke orekma lasr inge! Aok, ke yea taria, kut nukewa su wi ke orekma in kitelik me solsol inge oasr ke million itkosr, a oasr met 17,790,631 su wi ke me akfulat inge!
18. Efu ku moniyuk lasr nu ke alu paye el arlana yok sripe?
18 Kas ouinge fwakyuk kel Hezekaia: “El lulalfongi Jeova, God lun Israel; a ou inge wangin sie oana el in masrlon togusra Juda tukol, ku in masrlolos su muta meet lukel. Tu el fulyung nu sin Jeova. El tia kufla liki in fwasr tukol, a el liaung masap lal, su Jeova el sapkin nu sel Moses.” (2 Togusra 18:5, 6) Lela kut in etawi pa me srikasrak mwomwo lal. Moniyuk lasr nu ke loom sin Jeova fwa kasre kut in ‘kafweang in fulyung nu sin Jeova’ ke kut nunku yok ke fwinsrak mwo lasr ke moul ma patpat.—Duteronomi 30:16.
Akos Masap a Kas in Kasru Nukewa
19. Kafweang yok fuka orek ke pulanpal lun Memorial?
19 Ke pal se Josaia el kol oana sie togusra, el orala pa akwuk in akfulatye Kofwen Alukela, a el akola yok in kasru met Juda nukewa in wi ke me akfulat inge. (2 Togusra 23:21-23; 2 Kronikel 35:1-19) Kut akpayeye pa la kut akola mwo nu ke toeni lulap lun district, tukeni lun circuit, a ke len lun special assembly, a ke me akfulat ke Memorial. Met lili puspus wiyesr in mutanfwal puspus elos kafweang in wi ke me akfulat ke mise lun Kraist fwinne oasr me sensen nu ke moul lalos. Met elder su moniyuk elos akpayeye la met nukewa ke congregation ku in wi ke me akfulat inge. Met lili nukewa su matou a munasla tari elos eis kasru tu elos in ku in wi pa ke me esmakin inge.
20. (a) Mea sikyak ke pal in kolyuk lal Togusra Josaia, a oiya fuka el akkalemye? (b) Me lutlut fuka kut enenu in nunku yok ka?
20 Ke lusen pal su Togusra Josaia el orala akwuk in sifwil pa akmwoye loom sin God, met tol fulat Hilkaia el “konoiyuk buk in masap lun Jeova su etukyang kel Moses.” El sang ma inge nu sin met sim lun togusra su pangpang Sefan, a met sim se inge el mutamwauk in rid nu sel Josaia koanon buk in masap inge. (Ridi 2 Kronikel 34:14-18.) Mea fwokin orekma inge? Togusra se inge el seye nuknuk lal ke sripen asor yok lal a el sapkin met tol luo inge elos in siyuk sin Jeova ka. Ke inkanek lun mutan palu se inge Hulda, God el fwakak la oasr me srungeyuk puspus su orek ke alu lun met puspus fwin an Juda. Ne ouinge, arlana kalem a eteyuk kafweang lal Josaia in akwanginyela kain in orekma in alu nu ke ma srolela inge. Ke ma inge Jeova el insemwomwo kel fwinne oasr ongoiye puspus su palyeyuk nu ke mutanfwal se inge. (2 Kronikel 34:19-28) Mea kut ku in lotela ke me srikasrak lal? Aok lungse yok lasr el oana ma Josaia el akpayeye. Kut lungse in akos masap lun Jeova, a lela kut in nunku yok la mea fwa ku in sikyak kut fwin lela apostasy ku me luti kikiap a oiyen seoaru in orek pa ke alu lasr nu sin God. A kut ku in lulalfongi la Jeova el etu a insemwomwo ke moniyuk lasr nu ke alu paye, oana ke ma el akkalemye nu sel Josaia.
21, 22. (a) Efu ku kut enenu in akkalemye moniyuk lasr ke loom sin Jeova? (b) Mea kut fwa lutlutkin ke me lutlut toko?
21 Togusra akosr lun an Juda inge, Esa, Jihosafat, Hezekaia, a Josaia, elos akkalemye me srikasrak nu sesr ke moniyuk yok lalos nu ke loom sin God a ke orekma in alu nu sel. Moniyuk lasr enenu in mokle kut in lulalfongi Jeova a kut in kafweang yok in akpayeye akwuk in alu lasr nu sel. Paye la orekma lasr in akos masap nukewa lun God pa inkanek mwomwo a ku in oru kut in insemwomwo yok. A in aksaokye me karungin mwomwo a in tia pulesru kas in aksumwos nukewa su tuku ke congregation a nu sin met elder nukewa.
22 Ke me lutlut toko kut fwa lutlutkin moniyuk nu ke orekma in luti peng mwo. A me lutlut inge fwa sang me akkeye nu sin met fwusr nukewa in kulansap nu sin Papa tumasr su kulang ke inkanek moniyuk. Kut fwa lutlutkin pa la fuka kut ku in kutangla sie me akkoluk upa lun Setan. Ke kut akos kas in esmakin nukewa lun Jeova, kut fwa etawi me srikasrak lun Jisus, su ma simsula el fwak kel: “Tu moniyuk ke loom sum fwa kangyula.”—Sam 69:9; 119:111, 129; 1 Piter 2:21.
Ya Kom Esam?
• Kain in orekma in kulansap fuka Jeova el lungse in akinsemwomwoye, a efu?
• Kut ku in akkalemye fuka lulalfongi lasr nu sin Jeova?
• Fuka moniyuk lasr ku in akkeye kut in akos masap nukewa lun God?
[Pictures on page 15]
Esa, Jihosafat, Hezekaia a Josaia elos akkalemye fuka moniyuk lalos ke loom sin Jeova?