Met Matou​—Elos Aksaokyeyuk Ke U Lasr Oana Met Kristian

“Elos su eoki in loom sin Jeova . . . elos fwa kapkapek in kalkal lun God lasr. Elos fwa ouyepa isus fwako ke elos matou.”​—SAM 92:13, 14.

1. Fuka liye lun met puspus nu sin met matou?

JEOVA el lungse met kulansap oaru lal nukemwa, wekunang met matou. In fwal nu ke ma motkoeyuk sin mutanfwalu, ke yea nukemwa oasr tausen lumfoko sin met matou in an Merika elos akkolukyeyuk ku tia karunginyuk. In oapana report su akkalemye ke ma sikyuk fwin fwalu nufon akkalemye la me keok lun met matou pa ma upa yok in pal inge. Sropon ma inge akkalemyeyuk sin sie u su fwak la “oiya su akilenyuk sin met nukemwa . . . pa wanginla sripen met matou, ke sripen elos tia ku in oru kutena orekma, a elos sano na kasru lun kutu met.”

2. (a) Fuka Jeova el liye met kulansap oaru puspus lal su matou tari? (b) Kain in pulakin fuka lun inse kut ku in koneak in Sam 92:12-15?

² Jeova God el aksaokye met kulansap oaru lal su matou tari. El liye “oiya mwo lun insiesr”​—oiyen ma lun ngun lasr—​a tia me munas lun manosr. (2 Korint 4:16) Ke Kas Lal, Baibel, kut ku in koneak kas in akkeye puspus inge: “Met sumwosmwos fwa kapkapek oana sak palm; el fwa kapek oana sak sitar in Lebanon. Elos su eoki in loom sin Jeova elos fwa kapkapek in kalkal lun God lasr. Elos fwa oayepa isus fwako ke elos matou, elos fwa sesesla ke sroninsak, a fwa folfol. In fwakak tu Jeova el sumwos; El eot ku luk, a wangin sesumwos in el.” (Sam 92:12-15) In nunku ke fus inge su akkalemye la oasr ma puspus su met matou elos oru in sang kasru akmwoye u lun Met Kristian.

“Elos fwa Isus Fwako ke elos Matou”

3. (a) Efu ku met sumwosmwos elos pupulyukinyuk nu ke sak palm? (b) Fuka met matou puspus elos ku in ‘isus fwako ke elos matou’?

³ Met sim lun Sam el lumala met sumwos nu ke sak palm su ‘eoki in kalkal lun Jeova.’ Elos tafwela in isus fwako ke elos matou.” Ya kom tia insese ka la kain in nunak inge me akkeye? Sak palm su kato, fulat a sumwos ku in liyeyuk pal nukemwa in kalkal puspus in pal meeta su akkalemyeyuk in Baibel. In wekunang nu ke me naweyuk su sak soko inge ku in oru, sak palm el karunginyuk mwo ke sripen fwako puspus ka, a kutu sin sak inge tia tui in isus fwako ke lusen yea siofok kutu.a In tu ku ke alu paye, kom ku in oapana sak soko inge in “isus fwako in orekma mwo nukemwa.”​—Kolosse 1:10.

4, 5. (a) Kain in fwako yok sripe fuka met Kristian puspus elos enenu in oru? (b) Sang me srikasrak lun met matou puspus su oasr in Ma Simusla ke isus “fwako lun ngoasro.”

⁴ Jeova el lungse met Kristian nukemwa in isus “fwako lun ngoasro”​—kalmen kas inge pa in sang kaksak nu sin God a in fwakak akwuk mwolana lal. (Hibru 13:15) Ya ma inge sapkinyuk nu sumwos pa met matou? Aok me siyuk lun God inge sapkinyuk pa nu sumwos.

⁵ Baibel el akkalemye me srikasrak nukemwa lun met matou su sang ma lo nu ke en God a ke akwuk nukemwa lal. Moses el alukela tari “yea itngoul” ke pal se Jeova el sapkin nu sel in oru orekma lun sie met palu a met tutafpo lal. (Sam 90:10; Exodus 4:10-17) Daniel el fwinne matou el tia fuleak in fwakak ma lo ke akwuk mwolana lun Jeova ke inkanek pulaik. Saap Daniel el yea 90 tari ke pal se Belsazar el siyuk sel in akkalemye kalmen sim su simusyukla ke pesinke. (Daniel, sapta 5) A fuka met sap Jon ke el matou tari? Ke saflaiyen orekma in kulansap lal el kapuri ke niyen prison fwin tuka Patmos ke sripen el fwakak “ke kas lun God a ma lo lun Jisus.” (Fwakyuk 1:9) Paye kom ku in koneak la oasr met kulansap puspus su sramsramkinyuk in Baibel ke isus “fwako lun ngoasro” elos met matou tari.​—1 Samuel 8:1, 10; 12:2; 1 Togusra 14:4, 5; Luk 1:7, 67-79; 2:22-32.

6. Jeova el orekmakin fuka “met matou puspus” in palye ke len safla inge?

⁶ In orekmakin ma met palu Joel el simusla, met sap Piter el fwak: “ ‘A fwa te oru in len safla,’ God el fwak, ‘Nga fwa okoila Ngunik nu fwin ikwe nukemwa [wekunang “met matou”], . . . a elos fwa palye.’ ” (Orekma 2:17, 18; Joel 2:28) In fwal nu ke kas inge, Jeova el orekmakin met matou nukemwa su wi ke u lun met akmusrala a u lun “sip ngie” in fwakak ku sulkakin akwuk mwolana lal ke len safla inge. (Jon 10:16) Kutu sin met inge elos fwakak fwako lun Togusra ke lusen yea puspus.

7. Sang me pupulyuk ke met matou su tafwela in fwakak ke fwako lun Togusrai fwinne elos munasla tari.

⁷ Sie me srikasrak mwo pa Sonia, su ekla sie met orekma lun togusra oana full-time in yea 1941. Fwinne el sun mas upa el muteng, el tafwela na in oru lutlut Baibel nu sin met in loom sel pal nukemwa. “In oru orekma in luti ke peng mwo pa inge sie ip ke moul luk,” Sonia el aketeye. “Ke ma paye, pa inge moul luk. Nga srunga in tui in oru orekma in luti.” Tia pat tok, Sonia a mutan se wiyel, pangpang Olive, elos fwakak ke fwinsrak mwo lun Baibel nu sel Janet, sie mutan su oasr mas upa lal elos sun ke an in ituk buk lun loom onoa. Nine kiel Janet, el sie mutan su moniyuk in lalalfongi lal ke alu lun Catholic, el arulanu insemwomwo ke lungse su akkalemyeyuk nu sin tulik mutan natul paenang el insemwomwo in lela sie akwuk ke lutlut Baibel in orek a ke pal inge el kapkapek ke ma lun ngun. Ya kom orekmakin pal fwal nukemwa lom in luti ke akwuk lun Togusrai?

8. Mokul matou se inge Kaleb el akkalemye fuka lalalfongi lal nu sin Jeova, a fuka met Kristian matou elos ku in etawi me srikasrak lal?

⁸ In kaifweung in oru orekma in luti ke peng mwo lun Togusrai fwinne elos munasla ke sripen matou lalos, met Kristian puspus su matou tari elos srakna etawi me srikasrak lun sie met Israel oaru su pangpang Keleb, su welul Moses in an mesis ke lusen yea angoul. Keleb el yea 79 matwel ke pal se el sasla Infwal Jordan nu ke Fwal Mwolela. Tokin el wi un met meun lun mutanfwal Israel su kutangla pal nukemwa ke lusen yea onkosr, el ku in muta eis mongle a insemwomwo ke kutangla su el liye tari. Tusruktu tia oinge, a el siyuk ke inkanek pulaik in eis sie kunokon upa su eneneyuk in sruokye sie “siti ku su oasr pot we” ke fwin eol lun an Juda, su an se inge met Enak, mokul fulat puspus elos muta we. Ke kasru lun Jeova, Keleb el ku in luselosla liki an inge, oana Jeova el mwolela tari.” (Josua 14:9-14; 15:13, 14) In lalalfongi paye la Jeova el fwa wi kom, oana Jeova el welul Keleb, kom ku in tafwela in fwakak ke akwuk lun Togusrai ke len in matou lom. A kom fwin sruokye ku lalalfongi lom, el fwa sot nu sum me usru ke fwal sasu su el mwolela ka.​—Isaia 40:29-31; 2 Piter 3:13.

“Elos Fwa Sesesla Ke Sroninsak a Fwa Folfol”

9, 10. Fuka met Kristian matou elos sruokye ku lalalfongi in pal nukemwa a elos sifwil pa eis fuka ku lalos in ngun?

⁹ In akkalemye ke orekma in kulansap lun met matou puspus lun Jeova su srakna ku in isus fwako mwomwo pal nukemwa, met simusla sam el onkin: “Met sumwosmwos fwa kapkapek oana sak palm; el fwa kapek oana sak sitar in Lebanon. Elos fwa oayepa isus fwako ke elos matou, elos fwa sesesla ke sroninsak a fwa folfol oinge pal nukemwa.”​—Sam 92:12, 14.

¹⁰ Kom ku in sruokye fuka ku lom in ngun fwin kom matou tari? Oasr sripe mwomwo lun sak palm in paenang in tia paola su ma inge sikyuk ke sripen kof yok su sroksrokin sak inge. Ke ma inge, kom ku in eis pa me akkeyeyen lalalfongi lom ke kof lun ma paye lun Baibel ke inkanek in lutlut ke Kas lun God a in wi u lal pal nukemwa. (Sam 1:1-3; Jeremaia 17:7, 8) Fwin oasr ku paye lom ke ma lun ngun kom ku in sang me kasru mwo nu sin met lili wiyom ke lalalfongi lalos. Nunku ke me srikasrak mwomwo lun sie met tol fulat Jihoiada ke el oru me akpayeye lun ma inge.

11, 12. (a) Kain in orekma yok sripe fuka Jihoiada el orala ke me sramsram lun togusrai lun an Juda? (b) Ke inkanek fuka Jihoiada el orekmakin ku lal in kasru alu paye?

¹¹ Ke pal se ma mutan koluk inge Kasra Atalaia el eis ku in kol an Juda tokin el uniye tulik mokul nukemwa natul a ke pal se inge Jihoiada el yea siofok kutu. Mea mokul matou se inge Jihoiada el ku in oru? Ke lusen yea onkosr el a mutan kiel elos okanla in temple tulik mokul sefwanna su moulla sin sruf lun togusra, tulik se inge pa Joas su ku in ekla sie togusra. Tokin ma inge, oasr sie ma sakuruk sikyuk, su Jihoiada el akkalemyela Joas el inge ekla sie togusra ke el srakna yea itkosr a Atalaia el anwuki.​—2 Kronikel 22:10-12; 23:1-3, 15, 21.

¹² Oana sie met kasru lun Togusra, Jihoiada el orekmakin ku lal in oakiye alu paye. El “orala sie mwuleang inmasrlol sifwanu a met nukemwa a togusra tu elos fwa met lun Jeova.” Jihoiada el sapkin nu sin met nukemwa, in kunausla loom sin god kikiap Beal a eisla me loang lal, me srulela, a met tol puspus lal. Ke kasru lal Jihoiada paenang Joas el folokunak orekma lun temple ke alu paye nu a in akmwoyela temple. “A Joas el oru ma sumwos ye mutun Jeova in len lal nukemwa ke Jihoiada met tol el lotel.” (2 Kronikel 23:11, 16-19; 24:11-14; 2 Togusra 12:2) Ke pal se el mise el yea 130 matwel, a Jihoiada el akfulatyeyuk ke pal se el pukpuki inmasrlon togusra puspus meyen “el oru ma mwo in Israel, a nu sin God in loom sel.”​—2 Kronikel 24:15, 16.

13. Fuka met Kristian matou elos ku in ‘oru ma mwo nu sin God a nu ke loom sel?

¹³ Ke sripen munas lun mano ku ke kutu pa ma sikyuk su paenang kom in kofla oru kutena ma su eneneyuk nu ke alu paye. Fwin pa inge ma sikyuk nu sum, kom srakna ku in ‘oru ma mwo nu sin God paye a ke loom sel.’ Kom ku in akkalemye moniyuk nu ke loom sin Jeova in ngun ke inkanek in wi meeting nukemwa a in wi orekma lun forfor pal nu kemwa. Me kasru mwo lom in eis kai lun Baibel a me kasru paye lom nu sin “met kulansap oaru a lalmetmet” a ke congregation ku in sang me akkeye nu sin met lili nukemwa. (Mattu 24:45-47) Kom ku pa in akkeye met lili nukemwa in akkalemye “lungse a orekma mwo.” (Hibru 10:24, 25; Failimon 8, 9) A kom ku pa in sang me akinsemwomwo nu sin kutu met kom fwin orekmakin me kai lal Poul: “Tu met matou elos in sifwana liaung, in wangin metalos, in mwo ellalos, sumwos in lalalfongi, in lungse, in mongfusresr. Tu oayepa mutan matou elos in fwal in orekma lalos, tia met utuk in masrol ku met srui ke wain, a elos in met luti ke ma mwo.”​—Taitus 2:2-4.

14. Mea met Kristian su eis kunokon in liaung ke lusen pal loes el ku in oru in kasru alu paye?

¹⁴ Ya kom kulansap oana met elder ke lusen yea puspus? “Orekmakin lalmetmet su kom eis ke experience lom ke lusen yea puspus ke inkanek mwo,” pa inge me kai lun sie met elder su oru kunokon lal ke lusen pal loeloes. “Sang kunokon, a luti ma kom etu tari nu selos su kena in lutlut. . . . Tuni oiya mwo lun met lili puspus. Akyokye a akkeye oiya mwo inge. Akola nu ke pal fwasru.” (Duteronomi 3:27, 28) Insemwomwo lom ke orekma in luti peng mwo lun Togusrai su yokyokelik fwa sang kasru a me insemwomwo nu sin met lili puspus ke u lasr oana met Kristian.

“Fwakak Tu Jeova El Sumwos”

15. Fuka met Kristian matou elos ku in “fwak la Jeova el sumwos”?

¹⁵ Met kulansap matou puspus lun Jeova elos insemwomwo in oru kunokon lalos in “fwakak la Jeova el sumwos.” Kom fwin sie met Kristian elder, kas lom a orekma lom ku in akkalemye nu sin kutu met la ‘Jeova pa Eot ku lom, a wangin sesumwos in el.’ (Sam 92:15) Sak palm el ku in sang ma lo nu ke oiya mwo puspus lun Met su Orala. Tusruktu Jeova el sot nu sum pal mwomwo in sang ma lo kel nu selos nukemwa su wi ke alu paye. (Duteronomi 32:7; Sam 71:17, 18; Joel 1:2, 3) Efu ku in oru ma lo kel Jeova arulanu yok sripe?

16. Me srikasrak fuka in Baibel akkalemye la in ‘fwakak la Jeova el sumwos’ yok sripe?

¹⁶ Ke pal se met kol lun Israel Josua el “matou tari,” el “pangon met Israel nukemwa, met matou lalos, a met leum lalos a met nununku lalos a met kol lalos,” a akesmakinyelos ke orekma sumwos lun God. El fwak: “Wangin ma tula liki ma mwo nukemwa su Jeova God lomwos el fwak keyumwos. Ma nukemwa akpayeyuk tari nu sumwos, wangin sie ma tula ka.” (Josua 23:1, 2, 14) Tia pat tok, kas inge akkeye sulela lun metu in srukye ku lalalfongi lalos. Tusruktu, tokin mise lal Josua, sie pa fwil mutamwauk in sikyuk . . . fwil se su nukin Jeova ku orekma mwo su el oru ke Israel. A tulik natul Israel elos oru ma koluk ye mutun Jeova a elos kulansapul Beal.”​—Met Nununku 2:8-11.

17. Kain in oiya a kasru fuka Jeova el oru nu sin met kulansap puspus lal ke pal inge

¹⁷ Oaru lun met nukemwa su wi ke congegation lun met Kristian in pal inge tia me akpayeye kas lun met kulansap matou lun God. Tusruktu, lalalfongi lasr nu sin Jeova a ke mwolela lal pa akkeye kut fwin kut sifwana long sramsram ke “orekma mwolanu” su el orala tari in sang kasru met kulansap lal in len safla inge. (Met Nununku 2:7; 2 Piter 1:16-19) Kom fwin wi ke u lun Jeova ke lusen yea puspus, saap kom ku in esam ke pal met orekma lun Togusrai elos mutamwauk in an sum arulanu supus ku ke pal met orekma elos sun me kolyai upa. In pal meeta, saap kom akilen tari ke kasru su Jeova el oru in eisla kutena me lain a el ‘aksaye’ kapkapek ke pisen met orekma lun togusrai. (Isaia 54:17; 60:22) Kom liye tari akwuk lun ma paye ke Baibel el akmwoyela ma puspus a kom liye pa tari akwuk ke u lun God su liyeyuk fwin fwalu aksumwosyeyuk. (Soakas 4:18; Isaia 60:17) Ya kom suk in akkeye kutu pa met ke ma kom srumon nu selos ke experience puspus lom ke oiya su Jeova el akkalemye ke kulang a orekma sumwosmwos lal? Fuka lupan me akkeye a me kasru lun ma inge nu sin met lili nukemwa ke u lun met Kristian!

18. (a) Sang me pupulyuk ke fwako mwo ke pal inge a ke pal fwasru lun orekma in ‘fwakak nu sin met puspus la Jeova el sumwos.’ (b) Fuka kom sifwana liye a pula sumwosmwos lun Jeova?

¹⁸ Fuka pulakinyen lom nu ke lungse a karunginyuk mwomwo lun Jeova a me kasru lun moul lom sifwanu? (Sam 37:25; Mattu 6:33; 1 Piter 5:7) Oasr sie sister matou su pangpang Marta el engun in akkeye met lili puspus ke el fwak: “Fwinne oasr kutena ma sikyuk, nikmet srike in som liki Jeova. El fwa me kasru mwolana lom.” Me kai inge akkeyel Tolmina, el sie sin met lutlut Baibel lal Marta su baptaisla in yea 1960 kutu. “Ke pal se mokul tumuk el mise,” Tolmina el esamyak, “Nga arulanu asor, tusruktu kas mwo ingo oru Nga in fukoko in wi meeting nukemwa. A Jeova el akkeye yu na paye in tia tui.” Tolmina el sang pa me kai mwo inge nu sin met su el kasru in eis lutlut Baibel lalos ke lusen yea puspus. Aok, in sang me akkeye a kalweni in srumon orekma kulang puspus lun Jeova, kom ku in akkeye pa lalalfongi lun met lili wiyesr.

Jeova El Aksaokye Met Matou Puspus

19, 20. (a) Fuka Jeova el liye orekma puspus lun met kulansap matou nukemwa lal? (b) Mea fwa aketeyuki ke me lutlut toko?

¹⁹ Fwalu misenge, in orekmakin sang kulo el arulanu sriksrikeni, karunginyen met matou srikeni in wanginla wekunang pal in sang kasru nu selos wanginla. (2 Timote 3:1, 2) Fwin oasr esamyen met matou sin met puspus in pal inge, ma inge orek ke sripen orekma mwomwo su elos orala tari meet​—aok ke ma su elos orala in pal meeta, tia ke ma elos oru ke pal inge. Ke luma saye, Baibel el fwak: “Tu God el tia sesumwos in mwulkunla orekma lomwos, a lungse su komwos fwakak nu ke El, ke komwos kasru met mwo ku met mutal meeta, a oayepa komwos tafwela in kulansap in pal inge.” (Hibru 6:10) Aok, Jeova God el esam orekma mwo lomwos in pal meeta. Tusruktu El insemwomwo pa ke komwos tafwela in oru orekma in kulansap nu sin God ke ku kemwa lomwos. Aok, El liye met matou oaru puspus oana sie met Kristian su ku in oru ma puspus, fukoko ke ma lun ngun, a met Kristian ku​—su sang me akpayeye puspus ke ku mwolana lun God.​—Filippai 4:13.

²⁰ Ya kom liye met matou puspus ke u lun met Kristian lasr oana Jeova el liyelos? Kom fwin oru oinge, kom fwa ku in akkalemye lungse lom nu selos. (1 Jon 3:18) Me lutlut toko fwa aketeye kutu inkanek mwo in sang akkalemye lungse oinge in sang karunginelos a sang ma enenu lalos.

[Footnote]

Mea Topuk Lom?

• Fuka met matou elos ku in “isus fwako”?

• Efu ku moniyuk ke ma lun ngun sin met matou sie ma saok?

• Fuka met matou elos ku in “fwakak la Jeova el sumwos”?

• Efu ku Jeova el karungin a aksaokye met kulansap matou nukemwa lal?

[Picture on page 8]

Met matou elos oswela fwako mwolana puspus lun Togusrai

[Picture on page 10]

Yok sripe orekma lun met matou nu ke ma lun ngun su oana sie ma saok