Ya Kom Akola nu ke Len lun Jeova?
“Len lulap lun Jeova apkuran me. Apkuran a arulanu sa.”—ZEFANAIA 1:14.
LEN LUN Jeova el tia sie len su oasr ke ao 24. Len se inge el oasr ke sie lusen pal su nununku lal el oru nu sin met koluk nukewa. Met nukewa su tia kulansap nu sin God elos sangeng ke len sa su len in losr, mulat, kasrkusrak, me asor yok, a kunausten. (Isaia 13:9; Emos 5:18-20; Zefenaia 1:15) Joel el fwak: “We nu sesr ke len sa, tu len lun Jeova apkuran me, a a fwa tuku oana kunausten liki El su Ku liki Ku!” (Joel 1:15) Tusruktu, ke len lulap se inge, God el fwa molela met nukewa su “sumwos insielos.”—Sam 7:10.
1-3. (a) Mea Baibel el akkalemye ke len lun Jeova? (b) Kut apkurun in sun kain in “len lun Jeova” fuka?
2 Kas se inge “len lun Jeova” el orekmakinyuk nu ke pal in nununku lun God ke pal se su tia oana sie. Ke sie me pupulyuk, oasr sie “len lun Jeova” tuku ke pal se God el orekmakin met Babulon in oru nununku lal nu sin met nukewa su muta fwin an Jerusalem in yea 607 B.C.E. (Zefenaia 1:4-7) Oasr sie pa pal su nununku lun Jeova orek in yea 70 C.E. ke pal se God el orekmakin met Rom in akpayeye nununku lal nu sin met Ju su tia eis a pulesru Mwen natul. (Daniel 9:24-27; Jon 19:15) Baibel el palye pa ke sie “len lun Jeova” ke pal se el ‘meun nu sin mutanfwal nukewa.’ (Zekaraia 14:1-3) Ke kasru lun ngun mutal, Poul el simusla ke len sa a el akkalemye la len se inge kupasr nu ke oasr tari lun Kraist, su mutamwauk tari ke pal se Jisus el ekla Togusra in kosrao in yea 1914. (2 Tessalonika 2:1, 2) Ke sripen oasr me akpayeye puspus su arulana kalem la len lun Jeova el apkurun, yeartext lun Met Lo lun Jeova nu ke yea 2007 el arulanu fwal. Ma inge el simusyukla in Zefenaia 1:14, su akkalemye: “Len lulap lun Jeova apkurun me.”
3 Ke sripen len lulap lun God el apkurun, pa inge pal in akpayeye nu sum sifwana la kom akola tari. Fuka kom ku in akola nu ke len se inge? Mea pa kom enenu in oru in akola nu ke len lun Jeova?
Akpayeye Nu Sum Sifwana la Kom Akola
4. Ke me srifwe yok fuka Jisus el akola nu ka?
4 Ke kas palu lal ke saflaiyen len safla, Jisus Kraist el fwak nu sin met tuma lutlut lal: “Ke ma inge komwos ouyepa ako.” (Mattu 24:44) Ke pal se Jisus el fwak kas inge, el sifwana el akola tari nu ke sie me srifwe upa—pa ke mise lal oana sie me kise lun lango. (Mattu 20:28) Mea kom ku in lotela ke inkanek su Jisus el akolla sifwana nu ka?
5, 6. (a) Fuka lungse nu sin God a nu sin met puspus el kasre kut in akola nu ke len lun Jeova? (b) Ke lungse nu sin met tulan, me srikasrak fuka Jisus el akkalemye?
5 Jisus el lungse Jeova a masap sumwosmwos lal ke insiel kewa. Kel Jisus, Hibru 1:9 el akkalemye: “Kom lungse mutal, a Kom srunga ma koluk. Ke ma inge God, God Lom, El moswekomla ke oil lun akinsemwomwo yok lukelos su muta yurum.” Meyen el lungse Papa tumal su oasr in kosrao, paenang Jisus el sruokye paye a oaru lal nu sel. Fwin oasr pa yurosr kain in lungse paye inge nu sin God a akos masap nukewa lal, el fwa karungin kut. (Sam 31:23) Kain in lungse a akosten oinge fwa kasre kut in akola nu ke len lulap lun Jeova.
6 Lungse ke met puspus arulana kalem ke oiya mwo lun Jisus. Aok, el “pakomutalos, tu elos ongoiye, a fwasrelik, oana sip su wangin met sropu.” (Mattu 9:36) Ke ma inge, Jisus el sulkakin peng mwo nu sin met puspus, oana lungse el mokle kut in sulkakin peng mwo lun Togusrai nu sin met atulani nukewa lasr. Lungse nu sin God a nu sin met tulan lasr oru kut in moniyuk oana met Kristian su oru orekma in luti a in kasre kut in akola nu ke len lulap lun Jeova.—Mattu 22:37-39.
7. Ke kut sano nu ke len lun Jeova, efu kut ku in insemwomwo?
7 Jisus el insemwomwo in oru ma lungse lun Jeova. (Sam 40:8) Fwin oasr yurosr kain in oiya mwomwo inge, kut ku in insemwomwokin in akpayeye orekma in kulansap lasr nu sin God. In oana Jisus, kut fwa ku in akkalemye la kut oana kain in met su lungse in sang, a ma inge fwa oru kut in insemwomwo na paye. (Orekma 20:35) Aok, “engun lun Jeova ku lasr.” Ke me akengan lasr inge, kut ku in akola na paye nu ke len lulap lun Jeova.—Niemaia 8:10.
8. Efu ku kut enenu fototo nu sin Jeova ke kasru lun pre?
8 Pre nu sin God ke inse paye sang kasru yok nu sel Jisus in akola nu ke me srifwe puspus ke lulalfongi lal. El pre ke pal se Jon el baptaisella. Jisus el pre ke fong fon se ke pal se el sulela met sap nukewa lal. (Luk 6:12-16) A su met su rid Baibel el tia purakak nunak nu ke pre ke inse kemwa lal Jisus ke fong safla nu ke moul lal fwin fwalu? (Mark 14:32-42; Jon 17:1-26) Ya kom sie met su pre pal nukewa, oana Jisus el oru? Sramsram nu sin Jeova pal nukewa, kom tia sulaklak in pre, suk me kasru lun ngun mutal, a aksaye in suk in eis me kolyuk ke pal se el arulana kalem. Sie fototo mwomwo nu sin Papa tumasr su oasr in kosrao el yok sripe nu ke pal in ma upa puspus sikyak inge su akkalemye la len lulap lun God el arulana apkurun in tuku. Ke ma inge, ke oiya nukewa lela kut in fototo nu sin Jeova ke kasru lun pre.—Jemes 4:8.
9. Fuka yok sripaiyen nunak lasr nu ke orekma in akmutalye inen Jeova?
9 Nunak paye lasr in akmutalye inen Jeova su arulana mutal el kasrel Jisus in akola nu ke me srifwe puspus su sonol. Aok, el luti met tuma lutlut nukewa lal la pre lalos nu sin God enenu in siyukyak pa ke ma inge: “Em in akmutalyeyuk.” (Mattu 6:9) Kut fwin lungse na paye inen Jeova in akmutalyeyuk, ku in orek in mutal, kut enenu in kafweang in tia oru kutena ma su ku in akkolukye ma inge. Ke ma inge, kut ku in akola na paye nu ke len lulap lun Jeova.
Ya Kom Fwa Oru Kutena Me Aksumwos?
10. Efu ku arulana fwal kut in tuni moul lasr?
10 Fwin len lun Jeova tuku lutu, ya kom akola tari nu ka? Kais sie sesr enenu in tuni moul lasr sifwana in liye fwin oasr kutena orekma ku ella lasr su enenu in aksumwosyeyuk. In esam la moul lun met ke pal inge arulana fototo a tia etu ke ma su fwa sikyak nu ka, paenang kais sie sesr enenu in nunku yok ke inkanek puspus in akkeye a in sruokye ku fototo lasr nu sin Jeova pal nukewa. (Ekklisiastis 9:11, 12; Jemes 4:13-15) Ke ma inge lela kut in akuteye ke kutu oiya nu ke moul lasr su kut enenu in loang yok nu ka.
11. Mea akwuk su kom lungse in oru in ridi Baibel?
11 Sie ma yok sripe nu ke kas in kasru lun ‘met kulansap oaru’ pa in rid Baibel len nukewa. (Mattu 24:45) Kom ku in orala akwuk in rid ma Simusla mutamwauk ke Genesis nu ke Fwakyuk ke kais sie yea, a ke kom oru ma inge kom orekmakin pal in nunku yok ka. Ke kom ridi sapta akosr ke kais sie len, kom ku in aksafyela in ridi Baibel su oasr sapta 1,189 ka ke lusen yea se. Kais sie togusra lun an Israel elos enenu in ridi Masap lun Jeova “len nukewa in moul lalos.” Arulana kalem la, Josua el oru pa ma inge. (Duteronomi 17:14-20; Josua 1:7, 8) Aok paye la yok sripe nu sin met elder nukewa in ridi Kas lun God len nukewa, ke sripen ma inge ku in kasrelos in akkalemye “me luti sumwos”!—Taitus 2:1.
12. Ke sripen len lun Jeova arulana apkurun, mea ma inge ku in mokle kom in oru?
12 Ke sripen len lun Jeova arulana apkurun paenang ma inge fwa mokle kut in wi meeting nukewa lun met Kristian pal nukewa a in oru ma kunesr a sang me top mwomwo ke pal in meeting. (Hibru 10:24, 25) In oru ma inge ku in kasre kom in akmwoye inkanek lom ku ku lom oana sie met sulkakin peng mwo lun Togusrai, su kafweang in koneak a sang kasru nu sin met nukewa su paye insielos nu ke moul ma patpat. (Orekma 13:48) Saap oasr pa ma kom ku in oru in moniyuk ke orekma saye nukewa ke congregation, oana in sang kasru nu sin met matou a in akkeye met fwusr. Orekma nukewa inge ku in oru kom in arulana engan a insmwomwo!
Fototo Lom nu sin Met Puspus
13. Kusensiyuk puspus fuka kut ku in siyuk sesr sifwana ke orekma in nukomang oiyen met sasu?
13 Ke sripen len lun Jeova el apkurun, ya kom enenu in kafweang yok in “nukomang met sasu, su fwal nu sin God orekla tari in sumwosmwos a mutal lun paye”? (Efesus 4:20-24) Ke kom akkeye oiya mwomwo puspus oana God el akkalemye, met puspus elos fwa liye la kom ‘fwufwasryesr ke ngun lun God’ a kom akkalemye fwako nukewa lun ma inge. (Galetia 5:16, 22-25) Ya oasr kafweang yok su kom a sou lom orala in nukomang oiyen met sasu? (Kolosse 3:9, 10) Ke sie me pupulyuk, ya kom eteyuk oana sie met su kulang nu sin met lili nukewa a nu sin met nukewa? (Galetia 6:10) Lutlut lun ma Simusla su orek pal nukewa ku in kasre kom in akkeye oiya mwomwo puspus oana ke oiya su God el akkalemye su ku in kasre kom in akola nu ke len lun Jeova.
14. Efu ku sie met el enenu in siyuk ke ngun mutal ke el kafweang in akkeye oiya mwo lal in sifwana leumi?
14 Fuka kom fwin sa in mulat a kom akilen la kom enenu in akkalemye ke inkanek yok ke sifwana leum fwom? Oiya mwo inge el sie fwako lun ngun mutal lun God su ku in orekma pa nu sum. Ke ma inge, pre ke ngun mutal, in fwal nu ke kas lun Jisus: “Siyuk, a a fwa etukot nu sumwos; a suk, a komwos fwa konoiyuk; tomwolak, a a fwa ikasla nu sumwos. . . . Na komwos met koluk fwin etu fuka in sang me sang mwo nu sin tulik nutumwos, fuka yokeyen Papa tumomwos su in kosrao el fwa sang ngun mutal nu selos su siyuk sel!”—Luk 11:9-13.
15. Me aksumwos fuka enenu in orek fwin oasr ma upa sikyak in masrlom a sie met lili wiyom?
15 Fwin oasr sie ma upa su sikyak in masrlom a sie met lili wiyom. Ke ma inge, kafweang in sa akmwoye fototo lomwos, a akkeye misla a inse sefwanna lun congregation. (Sam 133:1-3) Kafweang in orekmakin kas in kai lun Jisus su oasr in Mattu 5:23, 24 ku Mattu 18:15-17. Kom fwin lela fwatu in tilli a kom srakna sruokye ma upa, kom enenu in sulaklak in aksumwosye ma upa inge. Pal nukewa ma eneneyuk pa kom in sang nunak munas ke inse mulala lom. Met sap Poul el simusla: “Komwos in kulang nu sin sie sin sie, ke mwo insiomwos, nunak munas nu sin sie sin sie, oana God El ouyepa nunak munas nu sumwos in Kraist.”—Efesus 4:25, 26, 32.
16. Ke inkanek puspus fuka pakoten el eneneyuk nu ke moul in payuk?
16 In sang kasru nu ke fototo lun met payuk nukewa elos enenu in akkalemye pakoten, a ke pal puspus in sang nunak munas. Kom fwin lungse in akkalemye lungse a pakoten yok nu sin mutan kiyom ku mokul tumom, kom kafweang yok in sun kain in akwuk mwomwo inge ke kasru lun God a Kas lal. Ya oasr kutena ma su kom enenu in akmwoye in akos 1 Korint 7:1-5 in akwanginyela ma upa a in akkalemye oaru pal nukewa nu sin mutan ku mokul tumom? Paye la ke oiya lun moul oasr ma eneneyuk nu sin mokul payuk a mutan payuk in akkalemye ke inkanek in “pakoten.”
17. Inkanek puspus fuka enenu in orek fwin sie met el orala ma koluk upa?
17 Na fuka kom fwin oru ma koluk upa ke kutu oiya? Oru me aksumwos ke pal na sa. Paye, kom enenu in suk me kasru sin met Kristian elder. Pre a kas in kasru lalos ku in kasre kom in sifwilpa akmwoye fototo lom nu sin God. (Jemes 5:13-16) Pre nu sin Jeova a akkalemye la kom auliyuk. Kom fwin tia oru ma inge, kom ku in pulakin toasr ke ma koluk lom pal nukewa a conscience lom tia mwo pal nukewa. Devid el pulakin ma inge, tusruktu arulanu mwo pulakin lal ke pal se el akkalemye ma koluk lal nu sin Jeova! Devid el simusla: “Insemwomwo met se su ma koluk lal nunak munas nu sel ka, a ma sito lal afwinyuki. Insemwomwo met se su Jeova el tia oekla ma koluk lal nu sel, a wangin kutasrik insiel.” (Sam 32:1-5) Jeova el sang nunak munas nu selos su oru ma koluk su akkalemye auliyuk paye.—Sam 103:8-14; Soakas 28:13.
Kafweang in Tia Ma lun Fwalu
18. Mea nunak lom nu ke fwalu?
18 Paye la kom ngetot nu meet in sano ke fwal sasu mwolana su mwuleyukla sin Papa tumasr su oasr in kosrao. Ke ma inge, kain in nunak fuka oasr yurum ke met puspus su tia kulansap nu sin God? Setan su “leum lun fwalu,” el tia ku in akkolukyel Jisus Kraist. (Jon 12:31; 14:30) Paye la kom srunga Devil a met nukewa su oasr ye kolyuk lal in akkolukye kom, ke ma inge kom enenu in porongo kas su met sap Jon el simusla: “Komwos in tia lungse fwalu.” Aok pa inge sie orekma ku inkanek mwomwo, meyen “fwalu wanginla, a lung kolukla, a el su oru ma lungse lun God fwa muta ma patpat.”—1 Jon 2:15-17.
19. Met Kristian fwusr elos akkeyeyuk in orala kain in niyen sun fuka?
19 Ya kom sang kasru nu sin tulik nukewa nutum in ‘karunginelos in tia oasr tunelos ke fwalu’? (Jemes 1:27) Setan el lungse in sruokye tulik nutum oana ke sie met el orekmakin pa puspus in sruokye soko ik. Oasr u puspus su orekla in oru met fwusr puspus in akfwalye moul lalos nu ke akwuk ke fwal lal Setan. Tusruktu met kulansap nukewa lun Jeova elos wi tari ke u sefwanna su fwa moulla liki saflaiyen akwuk koluk inge. Ke ma inge met fwusr su met Kristian enenu in akkeyeyuk elos in oasr “orekma nu sin Leum pal e nu kemwa.” (1 Korint 15:58) Papa a nine su kulansap nu sin God elos enenu in kasru tulik natulos in orala akwuk mwomwo su ku in sang tulik natulos sie moul engan a insemwomwo su akfulatye God a kasrelos in akola nu ke len lun Jeova.
Nunku ke Pal Mwomwo su Oasr Tokin Len Lulap lun Jeova
20. Efu kut enenu in nunku pal nukewa ke moul ma patpat?
20 Kom ku in sano ke len lun Jeova ke inse paye kom fwin nunku pal nukewa ke moul ma patpat. (Jud 20, 21) Kom ngetla nu ke pal fwasru ke moul ma patpat ke sie Paredais, a ke ma inge oasr yurum me fwinsrak inge in aksasuye monum sifwana oana monin met fwusr a oasr pal mwomwo lom in oru niyen sun mwomwo a in eis etauk yok kel Jeova. Kom ku in lotela ke God ma patpat meyen ke pal inge ma metu elos etu pa “kutu srisrik ke inkanek lal.” (Job 26:14) Sie me fwinsrak na mwomwo pa inge!
21, 22. Me sramsram ku orekma fuka ku in sikyak in masrlom a sin met puspus su akmoulyeak?
21 In Paredais, met nukewa su akmoulyeyukyak elos fwa ku in kasre kut in eis etauk ke pal meeta. Inuk el fwa oasr pa we in akuteye nu sesr ke oiyen pulaik su oasr yurol su el enenu in akkalemye kas lun Jeova nu sin met nukewa su tia kulansap nu sin Jeova. (Jud 14, 15) Paye la Noa el fwa srumon nu sesr ke orekma su elos oru in musaela oak soko. Ebream a Sera elos fwa akkalemye ke pulakin lalos ke pal se elos som liki an Ur su moul lalos we arulana mwo a elos muta ke loom nuknuk. Nunku ke pal se Ester el fwa akuteye ke ma sikyak puspus ke pal se el sang kasru na yok ke met lal a kunausla akwuk koluk lal Heman in kunauselosla. (Ester 7:1-6) Srike nunku ke pal se Jona el fwa akuteye nu sesr ke len a fong tolu ke el oasr ke insien ik lulap soko ku ke Jon Baptais el srumon ke insemwomwo lal ke el baptaisella Jisus. (Luk 3:21, 22; 7:28) Paye la oasr ma mwomwo puspus su kut ku in lotela!
22 Ke lusen Sie Tausan Yea Kolyuk lun Kraist, oasr pal mwomwo lom in sang kasru nu sin met nukewa su akmoulyeak in eis “etauk lun God.” (Soakas 2:1-6) Ke pal inge, sie me insemwomwo in liye la oasr met puspus eis etauk ke Jeova God a elos akfwalye moul lalos nu ke etauk su elos lotela! Tusruktu nunku ke insemwomwo lom ke pal fwasru inge ke pal se Jeova el akinsemwomwoye kaifweang lom in luti met puspus su moul in pal meeta a elos akkalemye la elos lungse in eis etauk oinge wi sang kulo lalos su tuku ke insielos!
23. Mea kut lungse na paye in oru?
23 Me insemwomwo nukewa su kut engankin ke pal inge oana met kulansap lun Jeova arulana puslala a tia ku in oekla. (Sam 40:5) Yokna kut aksaokye a sang kulo ke me insemwomwo lun God ke ma lun ngun. (Isaia 48:17, 18) Ke oiya nukewa lasr, lela kut in oru orekma in kulansap lasr ke inse kewa ke kut sano ke len lulap lun Jeova.
Kom E Topuk Fuka?
• Mea se inge “len lun Jeova”?
• Fuka kom ku in akpayeye nu sum sifwana la kom akola nu ke len lun Jeova?
• Ke len lulap lun God arulana apkurun, kain in me aksumwos fuka saap kut enenu in oru?
• Mea kom ngetla nu ke pal fwasru ke pal se len lun Jeova el sikyak tari?