“Len Lulap Lun Jeova Apkurun Me”
“Len lulap lun Jeova apkuran me. Apkuran a arulanu sa.”—ZEFENAIA 1:14.
1, 2. (a) Len saok fuka met Kristian elos sano? (b) Kusensiyuk puspus fuka kut enenu in siyuk, a efu?
OASR sie mutan fwusr su insemwomwo pal nukemwa ke sripen el arlana engan in sano nu ke len in payuk lal. Sie nine ke el pututu el ngetla nu ke pal in isusla lal ke pal fwasru in oswela sie awowo natul. Sie met orekma su arlana totola el arlana lungse mutamweyen pal in vacation lal ku pal in mongla lal su el sano ke pal loeloes. Oiya fuka su oana sie oasr yurulos kemwa? Elos nukemwa sano nu ke sie len saok—sie len su oasr kalme yok nu ke moul lalos. Pulakin lalos arlana yok tusruktu tia oana sie. Len se su elos sano inge fwa tuku, a ke len se inge tuku, elos akola na paye nu ka.
2 Met Kristian paye nukemwa ke pal inge elos kafweang pa in sano ke sie len saok nu selos. Len se inge pa “len lulap lun Jeova.” (Isaia 13:9; Joel 2:1; 2 Piter 3:12) Mea se inge “len lun Jeova” su fwa tuku, a fuka tuku lun len se inge ku in kasru metu? Sayen ma inge, fuka kut ku in etu na paye la kut akola nu ke tuku lun len inge? Arulanu yok sripe kut in suk me top nu ke kusensiyuk nukemwa inge ingena meyen oasr me akpayeye su akkalemye ke kas in Baibel la arlana paye: “Len lulap lun Jeova apkuran me. Apkuran a arulanu sa.”—Zefenaia 1:14.
“Len Lulap lun Jeova”
3. Mea kalmen “len lulap lun Jeova”?
3 Mea kalmen “len lulap lun Jeova”? In ma Simusla, kas inge “len lulap lun Jeova” el sramsramkinyuk nu ke sie pal yok sripe su Jeova el ako in oru nununku lal nu sin met lokwalok nukemwa lal a akmutalye e mwolana lal. Met nu kemwa su tia oaru in an Juda a an Jerusalem a met sulallel nukemwa su muta in an Babulon a in an Ijipt elos nukemwa sun pa ‘len lun Jeova’ ke pal se elos pulakin orekma lun Jeova ke el oru nununku lal. (Isaia 2:1, 10-12; 13:1-6; Jeremaia 46:7-10) Tusruktu, “len lun Jeova” su len lulap se emeet fwa tuku ke pal fwasru. Pa inge “len” se ke pal in nununku lun Jeova fwa orek nu sin met nukemwa su akkolukye in el. Len se inge fwa mutamwauk ke pal se kunanula lun “Babulon Lulap,” kunanula lun alu kikiap nu kemwa, a fwa aksafyeyukla ke pal in kunanela lun ma nukemwa su lula ke akwuk koluk lun ma puspus ke meun lun Armagedun.—Fwakyuk 16:14, 16; 17:5, 15-17; 19:11-21.
4. Efu ku met puspus elos enenu in sangeng ke len lun Jeova su arlana apkurun?
4 Pus sin met elos sangeng ke len se inge su arlana apkurun, fwinne elos etu ma inge ku tia. Efu? Ke inkanek lun met palu Zefenaia, Jeova el topuk: “Len sa sie len in koskusrok, sie len in ongoiye a keok, sie len in kunausten a sukela, sie len in losr a ok, sie len in pukunyeng a losr matoltol.” Sie me aksangeng na paye pa inge! Sayen ma inge, met palu el akkalemye pa: “A Nga fwa use ongoiye nu fwin metu . . . meyen elos oru ma koluk lain Jeova.”—Zefenaia 1:15, 17.
5. Nunak mwomwo fuka oasr yurin million puspus sin met ke len lun Jeova, a efu?
5 Tusruktu, million puspus sin met elos arlana engan a lungse in sano ke len lun Jeova in tuku. Efu? Meyen kalmeyen len se inge nu selos pa molela nu sin met sumwos, sie len su Jeova el fwa sifwana akfulatyeyuk a e mwolena lal fwa akmutalyeyuk. (Joel 3:16, 17; Zefenaia 3:12-17) Fwin metu elos sangeng ku elos sano nu ke len se inge, ma inge fwal nu ke orekma su elos oru nu ke moul lalos in pal inge. Mea kom nunku ke tuku lun len se inge? Ya kom akola tari nu ke tuku lun len se inge? Ke sripen len se inge el arlana apkurun, ya ma inge mokle moul lom ku sang me kasru nu ke moul lom ke len nukemwa in pal inge?
“Met Aksruksruk, Fwa Tuku in Aksruksruke”
6. Nunak fuka met puspus elos akkalemye ke “len lun Jeova,” a efu ku met Kristian elos tia lut ke ma inge?
6 Fwinne pa inge ma efwa sikyak, tusruktu pus sin met fwin fwalu elos tia nunku ke “len lun Jeova” su fwa tuku. Elos kaskas koluk a aksruksruk koluk nu sin met nukemwa su sang kas in sensen nu selos ke tuku lun ma inge su arlana apkurun me. Met Kristian paye elos tia lut ke oiya lalos inge. Elos esam kas in sensen su simusyukla sin met sap Piter: “A komwos etu ma inge meet, tu in len safla met aksruksruk, a fwa tuku in aksruksruke, a fwafwasryesr oana lung koluk lalos sifwana a fwak: ‘Piye mwuleung lun tuku lal? Tu in len ingo me ke papa tumasr elos mise, ma nukemwa on oana ke mutamwauk ke ma orekla.’”—2 Piter 3:3, 4.
7. Mea fwa kasre kut in sruokye sie nunak ku oiya lun nunak in aksayeak?
7 Mea ku in kasre kut in lain kain in nunak in alolo inge a in sruokye oiyen nunak in aksayeak? Piter el akkalemye nu sesr: “Nga okasek nunak munas [ku lun nunak mwo, New World Translation] lomwos ke akesmakinye komwos, tu komwos in esam kas fwakak meet ke met palu mutal, a sap lun Leum a met Lango ke met sap lomwos.” (2 Piter 3:1, 2) Orekma lasr in loang akmwoye nu ke kas palu nukemwa fwa kasre kut in ‘okasak ku lun nunak mwo lasr.’ Saap kut long tari ke kas in akesmakin nukemwa inge ke pal pus, tusruktu yok sripe nu in pal inge, yok liki meeta, kut enenu in tafwela in loang akmwoye nu ke kas in sensen nukemwa inge.—Isaia 34:1-4; Luk 21:34-36.
8. Efu ku met puspus elos srunga in loang akmwoye nu ke kas in akesmakin lun Baibel?
8 Efu ku kutu met elos pulesru a tia loang mwo nu ke kas in akesmakin nukemwa inge? Piter el tafwela in akkalemye kas inge: “Tu elos lungse in mulkunla ma inge la kosrao oasr omeet me, a fwalu orekyuk liki kof a tu infulwen kof, ke kas lun God; ke ma inge fwalu su on meeta, salongla ke kof a musalla.” (2 Piter 3:5, 6) Aok, oasr met puspus su tia lungse len lun Jeova in tuku. Elos srunga kutena ma in tulokinye inkanek in moul lalos. Elos srunga la inkanek in moul lalos sifwana fwa nununkeyuk sin Jeova! Oana ke Piter el akkalemye, elos moul “fwal nu ke lung koluk lalos sifwana.”
9. Oiya fuka akkalemyeyuk sin met puspus in len lal Noa a Lot?
9 Ke sripen “lungse lalos,” met aksruksruk koluk inge elos sulela in pulesru ma paye ka la Jeova el kunausla met koluk puspus in pal meeta. Jisus Kraist a met sap Piter elos sramsramkin pa ke ma luo su sikyak in pal meeta, ke “len lal Noa” a ke “len lal Lot.” (Luk 17:26-30; 2 Piter 2:5-9) Meet liki sronot, metu elos tia loang akmwoye nu ke kas in sensen su akkalemyeyuk nu selos. Oapana, meet liki ke kunanula lun an Sodom a Gomora, nu sin met su payuk nu sin an natul, elos nunku mu Lot “el oana sie met aksruksruk.”—Genesis 19:14.
10. Mea nunak lun Jeova nu sin met nukemwa su tia loang mwo?
10 Oapana ke pal inge. Tusruktu, loang akmwoye nu ke nunak lun Jeova nu selos su tia loang mwo nu ka: “Nga fwa kai met su on fwin ma lalos, su fwak insielos, ‘Jeova el fwa tia oru ma mwo, a el fwa tia oru ma koluk.’ A me kasrup lalos fwa ekla ma wap, a loom selos fwa an sikeyukla. Aok, elos fwa musai loom, a elos fwa tia muta lu, a elos fwa eoki nien grepu, a fwa tia nim wain ka.” (Zefenaia 1:12, 13) Metu ku in tafwela in oru orekma lalos ke len nukemwa, tusruktu elos fwa tia eis kutena ma lane su ku in on pat ke orekma upa lalos. Efu? Meyen len lun Jeova fwa sa na tuku, a kutena me kasrup su tuku ke kafweang lalos fwa tia molelosla.—Zefenaia 1:18.
“Sano nu Ka”
11. Mea kas in kaifwe su kut enenu in esam pal nukemwa?
11 Tia oana sie nu ke oiya su akkalemyeyuk sin met puspus su raunikutla, kut enenu in esam pal nukemwa kas in kaifwe su simusyukla sin met palu Hebakkuk: “Tu aruruma se inge srakna on nu ke pal pakiyuki, a aksaye nu ke safla, a fwa tia kikiap. Fwinne pat, sano nu ka; tu paye a fwa tuku. A fwa tia pat.” (Hebakkuk 2:3) Fwinne ke nunak sesumwos lasr ke len se inge in luman patla, kut enenu in esam la Jeova el tia patla. Len lal e fwa tuku ke pal fwal, ke sie ao su metu elos tia nunku ku tupan ka.—Mark 13:33; 2 Piter 3:9, 10.
12. Jisus el sang kas in sensen nu ke mea, a fuka ma inge tia oana sie nu ke orekma lun met tuma lutlut oaru lun Jisus?
12 Jisus el akkalemye yok sripaiyen orekma in sano nu ke tuku lun len lun Jeova, paenang el sang kas in sensen fwinne kutu sin met tuma lutlut inge fwa tula nunak in salka lalos. El palye kelos: “A met kulansap koluk sa fwin fwak insiel, ‘Leum luk patlanu in tuku,’ a el mutamwauk in uni met kulansap wiyel, a fwa mongo a nim yurin met srui, leum lun met kulansap sa fwa tuku in sie len, ke el tia tawi, a in aur se ke el tia etu, a fwa otelalik [el fwa sang me kai upa nu sel, NW].” (Mattu 24:48-51) Ke oiya su tia oana sie, u lun met kulansap oaru a lalmetmet elos oaru in sruokye nunak in salka lalos. U lun met kulansap sa elos kafweang in sano pal nukemwa a akpayeye la elos akola. Jisus el srusrngelosi “fwin ma nukemwa lal” fwin fwalu.—Mattu 24:42-47.
Me Enenu in Salkeyuk
13. Fuka Jisus el akkalemye ke ma su eneneyuk nu ke oiyen nunak in salkeyuk?
13 Arlana yok sripe ke met Kristian in century se meet elos sruokye nunak in salkeyuk lalos. Elos enenu in sa orala sulela lalos in kaengla liki an Jerusalem ke pal se su elos liye la oasr “met meun puspus su raunela” an se inge. (Luk 21:20, 21) Ma inge sikyak in yea 66 C.E. Loang akmwoye nu ka la fuka Jisus el akkalemye yok ke ma su eneneyuk nu ke oiyen mukuikui sulaklak lun met Kristian in pal sa: “Lela el su muta fwin mangon loomu in tia fwuni in eis ma on in loom sel; a lela el su muta in imae in tia folokla in eis nuknuk lal.” (Mattu 24:17, 18) Fwinne me sramsram lun fwalu el akkalemye la an Jerusalem el tia kunausyukla ke lusen yea akosr, efu ku met Kristian elos enenu in arlana salkeyuk in loang akmwoye nu ke kas lun Jisus in yea 66 C.E.?
14, 15. Efu ku yok sripe nu sin met Kristian in century se meet in sa kaengla ke elos liye oasr met meun puspus su raunela an Jerusalem?
14 Fwinne paye la met meun lun an Rom elos tia kunausla an Jeruslaem nu ke yea 70 C.E., tusruktu ke lusen yea akosr inge wangin na paye misla fwin an we. Aok oasr me keok sikyak! Ke lusen yea akosr inge yok orekma sulallel a akmas sikyak. Oasr sie met sim ke me sramsram lun metu el akkalemye ke ma sikyak fwin an Jerusalem ke lusen pal inge su oana “pal in meun lun met puspus, wekunang orekma sulallel su arlana koluk.” Met fwusr elos sapkinyuk in wi un met orekma in akmwoye an in me loeyuk nukemwa lalos, a in eis kofwen me meun, a in kulansap oana met meun. Elos akpayeyuk len nukemwa nu ke orekma lun met meun. Met nukemwa su tia insese nu ke akwuk lalos nunkeyuk elos oana met lain masap. Fwin oasr met Kristian su muta pat ke siti inge, elos ku in pulakin ma upa su sikyak we.—Mattu 26:52; Mark 12:17.
15 Kut enenu in loang akmwoye nu ke kas lun Jisus su el fwak la “elos su muta in an Juda,” a tia nu selos su muta in an Jerusalem mukena, enenu in mutamwauk kaeng. Ma inge arlana yok sripe meyen tokin malem ekasr na ke elos som liki an Jerusalem, met meun lun an Rom elos sifwilpa mutamwauk ke orekma in meun lalos. Ma se meet, elos sruokye an Galili in yea 67 C.E., a tokin ma inge elos sruokye pa an Juda ke yea tok a. Ma inge orala me keok lulap nu fwin an nukemwa inge. Ma sikyak inge oru pa in oasr ma upa yok nu sin kutena met Ju su lungse in kaengla liki an Jerusalem. Oasr met meun puspus su topangi mutonoa nukemwa ke siti se inge, a fwin oasr kutena met su srike in kaengla elos ku in nunkeyuk mu elos som liki met Ju a suk in weang met Rom.
16. Oiya fuka enenu in oasr yurin met Kristian in century se meet tu elos ku in moulla ke pal in ongoiye inge?
16 In sruokye ma nukemwa inge nu ke nunak lasr, kut ku in kalem ka la efu ku Jisus el akkalemye yok ke oiyen mukuikui su salkeyuk nu ke ma sikyak inge. Met Kristian elos enenu in akkalemye inse mulala in tia oru ma puspus su elos lungse in oru, a tia lela elos in sifwana nunku yok ke ma saok puspus lun fwalu. Elos enenu in akkalemye la elos lungse in filiye ma lalos nukemwa a suk in akos kas in sensen lun Jisus. (Luk 14:33) Elos nukemwa su akos a kaengla nu ke lefwal lun an Jordan elos moliyukla.
Sruokye na Oiyen Nunak Sulaklak Lasr
17. Efu ku kut enenu in akkeye nunak in sulaklak lasr?
17 Kas palu puspus in Baibel akkalemye la kut moul tari ke pal safla. Kut enenu in akkeye oiyen nunak in sulaklak lasr yok liki meeta. Sie met meun ke pal in misla el tia pulakin ma upa a me sensen lun meun. Ne oinge, fwin el tia sruokye nunak in fosrnga wi elya lal in loang akmwoye pal nukemwa a fwin salkeyuk in pangpang el nu ke meun, saap el tia akola, a fwin oinge ku in oasr fwako koluk puspus su fwa sikyak ka. Oiya inge eneneyuk na paye pa nu sesr su oana met Kristian. Kut fwin lela oiyen nunak in sulaklak in munasla, kut ku in pulakin pa la kut tia na akola in karungin kut sifwana liki me akkoluk nukemwa su sun kut ke pal se len lun Jeova tuku. (Luk 21:36; 1 Tessalonika 5:4) Fwin oasr kutena met su ‘tui in akos Jeova,’ pa inge pal su elos ku in sifwilpa sokol.—Zefanaia 1:3-6; 2 Tessalonika 1:8, 9.
18, 19. Mea fwa kasre kut in nunku pal nukemwa ke “len lun Jeova”?
18 Pa inge sripe se su met sap Piter el kaifwe kut in sano a tawi nu ke “len lun Jeova”! Fuka kut ku in oru ma inge? Oasr sie inkanek su eneneyuk nu sesr “in muta in moul mutal a sumwosmwos.” (2 Piter 3:11, 12) In akkafofoye kut sifwana nu ke orekma nukemwa inge fwa ku in kasre kut in kafweang sano nu ke tuku lun “len lun Jeova.” Kas Grik su lungasyukla nu ke “sano a tawi” el kalmekin nu ke oiya se inge “aksaye.” Kut koflana aksayeak pal su lula inge ne ke na sun pal in tuku lun len lun Jeova. Tusruktu, ke kut sano nu ke len se inge, pal u arlana mui a sa in wanginla ku tia akilenyuk kut fwin kafofo in oru orekma in kulansap nu sin God.—1 Korint 15:58.
19 Orekma in sifwilpa nunku ke Kas lun God a in nunku akmwoye ke kas in akesmakin nukemwa fwa ku in kasre kut in oru pa ma inge—“kafweang in sano ke (tawi a aksaye) tuku” lun len sa, aok, in “tawi pal nukemwa” ka. (2 Piter 3:12, The Amplified Bible; The New Testament, by William Barclay) In wekunang nu ke kas in akesmakin inge pa ke kas palu nukemwa su palye ke tuku lun len lun Jeova a ke me insemwomwo nukemwa su fwa itukyang nu sin met nukemwa su ‘sano Jeova pal nukemwa.’—Zefenaia. 3:8.
20. Kas in kasru fuka kut enenu in filiye ke insiesr?
20 Pa inge pal mwo nu sesr nukemwa kut in filiye ke nunak a insiesr kas in kaifwe inge su akkalemyeyuk ke inkanek lun met palu Zekaraia: “Meet liki ma sap sikyuk, meet liki len sa alukela oana kulin witu, meet liki koskusrok lun Jeova tuku nu fwomwos, meet liki len in mulat lun Jeova tuku nu fwomwos, suk Jeova, komwos met fulpap lun fwalu nu kemwa, su liaung ma sap Lal. Suk sumwosmwos, suk fulpap. Saap komwos fwa mwukinyukla in len in mulat lun Jeova.”—Zefenaia. 2:2, 3.
21. Sulela fuka oasr yurin met kulansap nukemwa lun God ke lusen yea 2007?
21 Ke ma inge, arulanu fwal nu ke yeartext lasr ke yea 2007 su akkalemye la: “Len lulap lun Jeova apkurun me.” Met kulansap nukemwa lun God elos lulalfongi na paye la ma inge “apkuran a arulanu sa.” (Zefenaia. 1:14) “A fwa tia pat.” (Hebakkuk 2:3) Oinge ke kut sano nu ke pal sa, lela kut in loang akmwoye pal nukemwa nu ke pal inge su kut moul ka, a in etu la me akpayeye safla nu ke kas palu nukemwa inge arlana apkurun!
Ya Kom Ku In Topuk?
• Mea se inge “len lulap lun Jeova”?
• Efu ku met puspus elos tia loang mwo nu ke oiyen sa lun pal ku salkeyen pal?
• Efu ku met Kristian in century se meet elos enenu in aksaye orekma wi oiya lun nunak elya ku mukuikui sulaklak?
• Fuka kut ku in akyokye nunak in elya ku mukuikui sulaklak lasr?
[Blurb on page 7]
Yeartext nu ke yea 2007 pa: “Len lulap lun Jeova apkurun me.”—Zefenaia. 1:14.
[Petsa ke sra 4, 5]
In oana ke len lal Noa, met aksruksruk koluk elos fwa lut ke pal se Jeova el oru orekma lal
[Petsa ke sra 6]
Met Kristian elos enenu in sa kaengla ke elos liye an Jerusalem “rauniyukla sin met meun puspus”