Kas lun Jeova el Moul

Kas Fulat su Tuku ke Buk lun Hosia

ALU PAYE el wanginla liki sruf sengoul ke leyen eir ke togusrai lun an Israel. Ke pal in kolyuk lal Jeroboam II, oasr me inse mwomwo yok a me kasrup puspus sikyak fwin an Israel, tusruktu tia pat tokin el mise wanginla ma inge nukewa. Ma sikyak ke pal se inge pa oasr ma upa puspus sikyak a wekunang pa fosak yok ke akwuk lun politic. Togusra akosr su oru kolyuk lalos tokul elos anwuki pa. (2 Togusra 14:29; 15:8-30; 17:1-6) Lusen yea 59 ke kas palu lal Hosia, su mutamwauk in yea 804 B.C.E., nu ke pal se ingo su oasr ma upa puspus sikyak.

Pulakin yok lun Jeova nu ke inkanek lun met Israel inge akkalemyeyuk yok ke akwuk su sikyak ke moul in payuk lal Hosia. Orekma in akkalemye ke inkanek koluk lun met Israel a ke kas in palu su fwakak ke akwuk lun nununku in sang lainul a ke togusrai lun an Juda su pa inge koanon nu ke me fwakak yok ke kas lal Hosia. Orekmakinyen kas kulang a me kasru yok ka a ke kas in kai su arulanu fukoko a kalem meyen akuteyuki mwo, Hosia el simusla ma inge nukewa ke buk se su akkalemyeyuk ke inel sifwana. In oana sie ma simusla ke Kas lun God, kas nukewa ke buk inge el moul a ku in ma nukewa.​—Hibru 4:12.

“EIS SIE MUTAN KOSRO KIYOM”

(Hosia 1:1–3:5)

Jeova el fwak nu sel Hosia: “Fwala, eis sie mutan kosro kiom.” (Hosia 1:2) Hosia el akos a el orala sie tulik mokul natul su osweyukla sin mutan kiyel su pangpang Gomer. Tulik mokul luo su sifwil pa osweyukla tok sin mutan kiyel elos tia ma natul Hosia. Nu ke kalmeyen inelos, Lo-ruhamah a Lo-ammi, pa Jeova el eisla pakoten lal liki Israel a liki met seakos nukewa lal.

Fuka na paye pulakin lun Jeova nu sin met lal su forla lukel suk in lainul? El akkalemye nu sel Hosia: “Sifwil fwala, lungse sie mutan su kulu yurin met kawuk lal, su mutan kosro, aok oana Jeova El lungse tulik natul Israel, elos fwinne forla nu sin god ngia.”​—Hosia 3:1.

Kusensiyuk Puspus Ke Ma Simusla Eis Top Ka:

1:1​—Efu ku Hosia el sramsramkin togusra akosr su kol an Juda ke pal el oru me luti lal tusruktu met kol sefwanna lun an Israel el akkalemye inel? El akkalemye oinge ke sripen akwuk lun togusra enenu in tuku ke sou lal David su pa inge akwuk sumwos su eteyuk nu sin met kol in karungin met lun God su el sulela. Togusra puspus su suleyukla liki an eir elos tia tuku ke sruf in sou lal David, tusruktu togusra se su suleyukla liki an Juda elos tuku ke sruf lal Devid.

1:2-9​—Ya paye la Hosia el eis sie mutan kosro? Aok, paye la Hosia el payuk nu sin sie mutan su tok el ekla sie mutan kosro. Met palu el tia na fwakak kalem ke kutena oiya in akkalemye ke moul na paye lal la ma inge mwemwe se na ku aruruma se na.

1:7​—Piya pal se loom fwin an Juda akkalemyeyuk nu selos pakoten a elos moliyukla? Akpayeyen ma inge sikyak in yea 732 B.C.E. ke len in Togusra lal Hezekaia. In pal sa, Jeova el aksafyela meun lun an Assiria nu sin an Jerusalem ke pal se lipufan se el uniye met meun 185,000 ke fong sefwanna. (2 Togusra 19:34, 35) Oinge Jeova el molela an Juda, tia “ke kutlas, ku ke meun, ke orsu, ku ke met kasrusr fwin orsu,” tusruktu ke sie lipufan.

1:10, 11​—Ke pal se togusrai lun Israel ke leyen eir el sruu in yea 740 B.C.E., fuka tulik nukewa fwin an Israel elos “etukeni nu sie,” wi tulik nukewa fwin an Juda? Pukanten met ke togusra leyen eir elos tuku nu Juda meet liki sruu lun an Juda a utukla met nukewa nu ke kapur lalos fwin an Babulon in yea 607 B.C.E. (2 Kronikel 11:13-17; 30:6-12, 18-20, 25) Ke pal se met Ju elos folokla nu in an selos in yea 537 B.C.E., oasr tulik puspus sin met ke togusrai layen eir lun an Israel elos welulos folokla.​—Ezra 2:70.

2:21-23​—Mea se palyeyuk ke kas lun Jeova inge: “Nga fwa taknelik el nu sik fwin fwalu; a Nga fwa pakomutal”? Inen tulik se meet isusla natul Hosia sel Gomer pa Jezriel. (Hosia 1:2-4) Kalmen e se inge pa, “God Fwa Taknelik Fute,” su pa inge kalmen kas palu nu ke sulosolla lun met lula nukewa su oaru in yea 537 B.C.E. a elos kapkapak oana ke taknelik lun fute u in an Juda. Nu ke sie an su musrasrla ke lusen yea 70 el inge oasr eneneyen fukunsak puspus inge grain, wain mwo, a oil in eokiyuki a kapak we. In fwal nu ke kas in pupulyuk, kas palu inge el akkalemye la ma mwomwo nukewa inge fwa siyuk ke kasru lun fwalu in orala me mongo puspus su me akkeye nu sin metu, a fwalu fwa siyuk ke kasru lun af liki in kosrao. A kosrao, fwa oayepa, siyuk sin God ke af in nekla pukunyeng puspus. Akwuk inge nukewa eneneyuk in sang kasru me enenu puspus lun met lula nukewa su folokla. Met sap Poul a Piter elos orekmakin Hosia 2:23 nu ke sulosolla lun met akmusrala lun met Israel in ngun su lula.​—Rom 9:25, 26; 1 Piter 2:10.

Me Lutlut Nu Sesr:

1:2-9; 3:1, 2. Loang akmwoye nu ke nunak pusisel lal Hosia in sruokya na akwuk in payuk lal fwal nu ke ma su sapkinyuk nu sel sin God! In akos ma lungse lun God, fuka yokiyen inse akola lasr in pusisel nu ke kas lal in akos?

1:6-9. Jeova el srunga kutena kain in inkanek in orek kosro ke ma lun ngun, oapana ke el srunga orekma lun kosro ke mano.

1:7, 10, 11; 2:14-23. Kas nukewa su Jeova el fwakak ke an Israel a Juda akpayeyuk. Kas lun Jeova akpayeyuk pal nukewa.

2:16, 19, 21-23; 3:1-4. Jeova el akola in sang nunak munas nu selos nukewa su akkalemye auliyuk paye ke insiyelos. (Niemaia 9:17) In oana Jeova, kut enenu in pakoten a kulang in orekma lasr nu sin met saye.

“OASR SIE AKUKUIN LUN JEOVA”

(Hosia 4:1-13:16)

“Oasr sie akukuin lun Jeova yurin met muta in fwal se inge.” Efu? Meyen “wangin ma paye, ku ma mwo, ku etu God fwal se inge.” (Hosia 4:1) Met Israel su seakos elos oru kain in orekma fokfok nukewa a aksororyela sra a orek kosro ke mano a lun ngun. Wanginla lulalfongi lalos in eis kasru sin God, “elos pang nu Ijipt, elos som nu Assiria.”​—Hosia 7:11.

Jeova el akkalemye nununku lal, fwakeng: “Israel el okomyukla.” (Hosia 8:8) Togusrai lun an Juda tia sukosokla liki metalos. “Oasr pa yurin Jeova sie akukuin yurin Juda,” Hosia 12:2 el akkalemye, “a el fwa kael Jekob fwal nu ke inganek lal; El fwa moli nu sel fwal nu ke orekma lal.” Tusruktu paye la efwa oasr sifwil naweyuk orek, meyen Jeova el mwulela ka: “Nga fwa molelosla liki ku lun Hedis; Nga fwa langolosla liki mise.”​—Hosia 13:14.

Kusensiyuk Puspus Ke Ma Simusla Eis Top Ka:

6:1-3​—Su fwak: “Fwasru, a lela kut in folokla nu sin Jeova”? Met Israel su fuleak lulalfongi lalos saap elos sifwilpa akkeye sie sin sie in sifwil folokla nu sin Jeova. Fwin oinge, elos orek luma mukena ke auliyuk lalos su tia paye. Lung-kulang lalos ma na nu ke kitin pal a sa wanginla in oana ke “pukunyeng lun lututang, a oana aunfong su sa somla.” (Hosia 6:4) Ke luma saye, met se ma sramsram inge pa saap Hosia su kaifwe metu in forla nu sin Jeova. Ke kutena oiya, oasr eneneyen inkanek koluk nukewa lun met ke sruf-sengoul elos in auliyak ke paye a forla nu sin Jeova.

7:4​—Ke inkanek fuka met kosro lun an Israel elos oana “sie nien um”? Me lumeyuk se inge el lumeyukla nu ke kain in lungse koluk yok puspus su oan insiyelos.

Me Luti Nu Sesr:

4:1, 6. Kut fwin lungse Jeova el an insemwomwo nu sesr pal nukewa, kut enenu in kafweang in eis etauk kel a in moul fwal nu ke ma nukewa su kut lotela.

4:9-13. Jeova el fwa oru nununku lal nu sin met nukewa su oru orekma lun kosro a wi ke alu su tia nasnas.​—Hosia 1:4.

5:1. Met kol nukewa su karungin met lun God elos enenu in arlana sensenkin kain in met luti kikiap nukewa. Fwin tia karunginyuk, elos fwa ku in furokla kutu selos nu ke alu kikiap, su ku in orala ‘me kaisrip a sie kwa’ nu selos.

6:1-4; 7:14, 16. Fwin akwuk lun auliyuk el orek ke kas mukena e fwa wangin ma paye sikyak ka a efwa wangin sripe. Fwin oasr eneneye in eis nunak munas lun God, met se su orala ma tafongla enenu in akkalemye ke inse paye lun nunak in auliyuk lal, in ku in akilenyuk ke el auliyuk nu ke oiyen moul sumwos su “fulatlana,” su kalme pa in folokla nu ke akwuk paye lun alu. Orekma lal enenu in fwal nu ke akwuk sumwosmwos lun God.​—Hosia 7:16, NW, footnote.

6:6. Orekmakinyen moul fokfok el sie me akul su akkalemye la wangin lungse paye nu sin God. Wangin kutena kain in fako ke orekma lun ngun ku in aolla fwin wanginla lungse paye se inge.

8:7, 13; 10:13. Akwuk paye se la “kutena ma sie met el taknelik, ma inge el fwa kosrani ouyepa” su akpayeyuk nu sin met Israel puspus su alu nu ke ma srolela.​—Galetia 6:7.

8:8; 9:17; 13:16. Kas palu puspus nu ke togusrai lun an eir akpayeyuk ke pal se musalla capital city lal su an Samaria, sin an Assiria. (2 Togusra 17:3-6) Kut ku in lulalfongi la God ela fwa oru ma nukewa su el fwakak a fwa akpayeye kas lal nukewa.​—Oekyuk 23:19.

8:14. Jeova el “supala sie e nu fwin siti” in yea 607 B.C.E. ke un met puspus lun an Babulon, elos akpayeye ma fwakak ke musalla lun an Jerusalem a Juda. (2 Kronikel 36:19) Kas lun God tia ku in tafongla.​—Josua 23:14.

9:10. Fwinne oasr mwulela orek nu sin God paye, met Israel “elos tuku nu Beal-pior, a sifwanu esalosyang nu ke me mekin.” Kut lalmetmet kut fwin loang akmwoye nu ke me sensen su sikyak ke me srikasrak koluk a in karunganeng mwulela lasr sifwana nu sin Jeova.​—1 Korint 10:11.

10:1, 2, 12. Kut enenu in alu nu sin Jeova ke inse paye wangin kutasrik ka. Fwin ‘kut taknelik sumwosmwos nu sesr sifwana in sumwosmwos, kut ku in kosrani fwal nu ke kulang.’

10:5. Bet-even (su kalmekin “Loom in Akkeok”) el oana sie kas in akpusisel nu ke e se inge Bethel (su kalmekin “Loom Sin God”). Ke pal se me srolela ke calf lun Bet-even el utukla ke pal in sruu lalos, met nukewa fwin an Samaria elos asor a tung ke sripen ma srolela lalos su elos akfulatye tula. Fuka yokiyen sitoela lun akwuk in fuliye lulalfongi nu ke sie me srolela su wangin moul ka a el tia pa ku in molella sifwana!​—Sam 135:15-18; Jeremaia 10:3-5.

11:1-4. Pal nukewa Jeova el akkalemye lungse nu sin met lal. Akos a pusisel nu sin God el tia oasr me kaifwe upa ka.

11:8-11; 13:14. Kas lun Jeova in sifwil pa orani met lal in folokunak alu paye ‘fwa tia folokla nu yurul a wangin sripe.’ (Isaiah 55:11) In yea 537 B.C.E., aksafyeyukla sruu lalos yurin met Babulon a elos nukewa su lula elos folokla nu fwin an Jerusalem. (Ezra 2:1; 3:1-3) Kas nukewa Jeova el sapkin nu sin met palu nukewa lal in fwakak fwa akpayeyuk a wangin sie fwa tafongla.

12:6. Kut enenu in oru sulela mwo lasr in akkalemye lung-kulang, in orekmakin moul sumwosmwos, a fwinsrak paye nu sin Jeova pal nukewa.

13:6. Met Israel nukewa “elos akkupyeyuk; elos sesesla, a insielos fulat. Ke ma inge elos mulkinyukla.” Kut enenu in karunganang a in lain kutena kain in nunak in sifwana-akfulatye.

“INKANEK LUN JEOVA SUMWOS”

(Hosia 14:1-9)

Hosia el kafweang in siyuk: “O Israel, foloko nu yurin Jeova God lom; tu kom ikuri ke ma koluk lom.” El kaifwe nu sin metu in fwak nu sin Jeova “Wisla ma koluk nu kemwa, a eis ke kulang ma mwo, oinge kut fwa sang oana kao mokulu me kise lun ngoasrosr.”​—Hosia 14:1, 2.

Sie met orekma koluk su auliyuk liki ma koluk lal fwa tuku nu yurin Jeova, in lutlut a eis ke inkanek lal, a sang kaksak ke me kise nu sel. Efu? Meyen “inkanek lun Jeova sumwos, a met sumwos fwa fwafwasryesr lu.” (Hosia 14:9) Fuka me insemwomwo lasr in liye met elos “fwa tuku wi sangeng nu sin Jeova a nu ke mwo Lal in len toka”!​—Hosia 3:5.

[Picture on page 29]

Moul in sou lal Hosia el pupulyukkin nu ke oiyen orekma lun Jeova nu sin met Israel

[Picture on page 31]

Ke pal se kunanula lun an Samaria in yea 740 B.C.E., togusrai lun sruf-singuol lun an Israel el wanginla tia sifwil eteyuk