Sifwil Moulyuk​—Ya Ma Inge Paye Nu Sum?

“E fwa oasr sifwil moulyuk.”​—OREKMA 24:15.

1. Efu ku mise el ku in sikyak na paye?

“FWIN fwalu oasr ma luo su sikyak na paye a tia ku in kaengkinyukla, ma luo inge pa mise a molin tax.” Kas inge el simusyukla in yea 1789 sin sie met kol pengpeng fwin an America su pangpang Benjamin Franklin, a kutu met elos kaksakin kas lal inge mu mwo ke sripen el akilen ma sikyak na paye inge. Oasr met sesumwos puspus su orek kutasrik a elos fwasr liki ku tia moli lupa nukewa ke tax lalos. Tusruktu, elos tia ku in fwasr liki ku kaengkunla mise, su ma inge sikyak na paye. Ke ku lasr sifwana fwin wangin me kasru, wangin kutena sesr ku in kutangla ku fwasr liki mise. Ma inge sun kut nukewa. Sheol​—su inkalyuk lun metu—​el oana ma se su musrinsral upa ku ikakelik pal nukewa sano in kangla ku in eis met puspus su kut lungse. (Soakas 27:20) Tusruktu nunku akmwoya nu ke sie oiya su oasr me akkeye nu ka.

2, 3. (a) Efu ku met puspus ke pal inge elos tia etu la oasr kutu met su fwa tia mise? (b) Mea kut fwa akuteya ke me lutlut inge?

² Kas lun Jeova el ase nu sesr sie fwinsrak mwomwo a paye nu ke sifwil moulyuk, in sifwil akmoulyeyukyak nu ke moul. Ma se inge el tia mwemwe se mukena, a wangin kutena kain in ku in kosrao a fwalu ku in tulokinye Jeova in akpayeye fwinsrak se inge. Tusruktu, oasr met puspus ke pal inge elos tia etu la oasr kutu met elos fwa tia mise. Efu? Meyen oasr sie “u lulap” su tia ku in oekyukla elos fwa moliyukla liki “ongoiye lulap,” su apkurun in tuku. (Fwakyuk 7:9, 10, 14) Elos fwa moulla tokin ma inge, su fwa oasr fwinsrak nu ke moul ma patpat. Ke ma inge, mise el ku in tia sikyak nu selos. Sayen ma inge, “met lokwalok se tok El fwa ella, mise.”​—1 Korint 15:26.

³ Kut enenu in nunku ke sifwil moulyuk la paye ma inge oana ke Poul el oru, su fwak: “Tu e fwa oasr sifwil moulyuk nu sin met sumwos a met sesumwos.” (Orekma 24:15) Lela kut in akuteye ke kusensiyuk tolu nu ke sifwil moulyuk inge. Ma se meet, mea oru fwinsrak inge in arlanu paye? Ma se akluo, fuka kom sifwana ku in eis me akkeye nu ke fwinsrak lun sifwil moulyuk? Ma se aktolu, mea fwinsrak inge ku in oru nu ke inkanek su kom moulkin moul ke pal inge?

Sifwil Moulyuk​—Fwa Sikyak Na Paye

4. Fuka sifwil moulyuk el yok sripe nu ke akwuk lun Jeova?

⁴ Oasr ma puspus su oru sifwil moulyuk in ku in sikyak na paye. Yok liki nukewa, el yok sripe nu ke akwuk lun God. Esam la, Setan el kol metu nu ke ma koluk, su oasr fwako koluk ka su ku in sikyak na paye, saflaiya pa mise. Ke ma inge Jisus el fwak kel Setan: “El sie met akmas ke mutamwauk me.” (Jon 8:44) Tusruktu Jeova el mwulela ka la u lal in kosrao su pupulyukkinyuk oana “mutan” kiyel, e fwa orala sie “fute” su fwa kunausla sifwen “serpent matu,” ku kunausella Setan ke inkanek nukewa. (Genesis 3:1-6, 15; Fwakyuk 12:9, 10; 20:10) Ke Jeova el akkalemye kais kutu srisrik akwuk lal nu ke Fute se su oana Messaia, arlanu kalem la Fute se inge e fwa oru ma puspus sayen in kunausulla Setan mukena. Kas lun God el akkalemye: “Ke sripe se inge Mwen Nutin God el sikme, tu lan kunausla orekma lun Devil.” (1 Jon 3:8) Mise su tuku ke ma koluk su kut usrui sel Adam el ma se meet ke orekma puspus lal Setan su Jeova el orala ke akwuk in akwanginyela ma inge, ku in kunausyukla ke inkanek lun Jisus Kraist. Ke ma inge, me kise lun lango kel Kraist a sifwil moulyuk su kewana ma luo inge arlanu yok sripe.​—Orekma 2:22-24; Rom 6:23.

5. Efu ku sifwil moulyuk fwa akmutalye inen Jeova?

⁵ Jeova el lungse na paye in akmutalye e mutal lal. Setan el akkolukye inen God a el akkalemye kas kikiap lal. El fwak kas kikiap mu Adam a If elos ‘fwa tia mise’ fwin elos kal a kang fwokunsak se ma God el sapkin nu selos in tia mongo ka. (Genesis 2:16, 17; 3:4) Mutamwauk in pal se ingo, Setan el akkalemye kas kikiap su oana sie, oana ke me luti kikiap su fwak mu oasr sie ngun su srakna moul tokin met se el mise tari. Tusruktu, ke inkanek lun sifwil moulyuk inge, Jeova el fwa akkalemye la kas a me luti nukewa inge el kikiap tia paye. El fwa akpayeye nu tok ma patpat la el mukena pa Met in Molela a Met in Sang Moul.

6, 7. Mea pulakin lun Jeova ke orekma in sifwil akmoulyeak met puspus, a kut etu fuka ke pulakin ku nunak lal?

⁶ Jeova el arlanu lungse in akpayeye ke sifwil moulyuk. Baibel el akkalemye pulakin lun Jeova ka. Ke sie me pupulyuk, nunku ke kas inge lal Job sie met oaru: “Ya sie met fwin el mise el fwa sifwil moul? Len nukewa in meun luk [orekma in kulansap luk su enenu in orek, NW] Nga fwa sano, nu ke pal se tulala luk fwa tuku. Na kom fwa pang, a Nga fwa topuk kom. Na kom fwa lungse orekma lun poum.” (Job 14:14, 15) Mea kalmen kas nukewa inge?

⁷ Job el etu la tokin mise lal, el fwa sano ke lusen sie pal ke el motul in mise lal. El nunkeyuk ke pal se inge oana “orekma in kulansap su enenu in orek,” su kalmekin nu ke lusen sie pal su el enenu in sano nu ke pal el taltalla ka. Nu sel, pal in taltalla inge el ma na paye se. Job el etu la me kasru lal fwa tuku. Efu? Meyen el etu ke pulakin lun Jeova. Jeova el “lungse” na paye in sfiwilpa liye met kulansap lal. Aok, God el lungse in akmoulyeak met sumwos nukewa. Jeova el sang pa pal mwomwo nu sin met puspus saye in moul ke sie Paredais fwin fwalu. (Luk 23:43; Jon 5:28, 29) Ke sripen ma lungse lun God pa in akpayeye akwuk inge, su ku in tulokinelya?

8. Fuka Jeova el “akpayeye” fwinsrak lasr ke pal fwasru?

⁸ Fwinsrak lasr ke pal fwasru fwa akpayeyuk ke sripen sifwil moulyuk lal Jisus. Ke pal se Poul el oru me sramsram lal in an Athens, el akkalemye: “El [God] pakiye tari sie len, ke el a fwa nununku fwalu in sumwosmwos ke sie met su el srusrngeye; a el akpayeye ma se inge nu sin met e nu kemwa, ke el akmoulyelak liki met mise.” (Orekma 17:31) Kutu sin met su longol Poul elos aksruksrukel ke pal se elos long ke sifwil moulyuk. Tusruktu, oasr kutu met su ekla met lulalfongi. Saap ke sripen oasr me akpayeye ka la fwinsrak inge fwa akpayeyuk na paye su ma inge purakak nunak lalos. Ke pal se Jeova el akmoulyelak Jisus, El orala mwenmwen su yok emeet liki mwenmwen nukewa. El akmoulyeak Mwen natul liki mise nu ke sie moul oana sie ngun kulanu. (1 Piter 3:18) Jisus su akmoulyeyukyak el oasr ku a mwolena su yok liki ku a mwolena su oasr yurol meet liki el moul fwin fwalu oana sie met. Jisus el tia ku in mise a oasr ku lulap lal su akluo nu sin Jeova, a ke pal inge el ku in akpayeye kunokon na mwomwo lal sin Papa tumal. Jeova el fwa orekmakinul Jisus in akmoulyeak met mise puspus​—nu ke moul in kosrao ku moul fwin fwalu. Jisus el sifwana fwak: “Nga fwa sifwil moulyuk a me moul.” (Jon 5:25; 11:25) Ke inkanek in akmoulyeak Mwen natul, Jeova el akpayeye fwinsrak inge nu sin met oaru nukewa.

9. Fuka ma simusla in Baibel el sang me akpayeye ke sifwil moulyuk la ma inge paye?

⁹ Sifwil moulyuk el akkalemyeyuk ye mutun met lo puspus a simusyukla ke Kas lun God. Oasr in Baibel ma simusla ke ma puspus su sikyak ke sifwil moulyuk lun met oalkosr su sifwil akmoulyeyukyak oana sie met fwin fwalu. Mwenmwen nukewa inge orekla tia ke inkanek lukma a ye mutun met puspus, pal nukewa orek ye mutun met lo puspus. Jisus el akmoulyelak Lazarus, su mise tari ke lusen len akosr, ye mutun u lulap lun met puspus su asor ka​—wekunang sou lun mokul se inge, kawuk lal, a met atulani lal. Me akpayeye inge la Jisus el supweyukme sin God el arlanu fukoko pasis met kol puspus lun alu su met lokwalok lal Jisus elos tia lafwekin la ma inge sikyak. A, elos orala me lemlem in unilye Jisus a Lazarus pa! (Jon 11:17-44, 53; 12:9-11) Aok, kut ku in lulalfongi la sifwil moulyuk el ma na paye se. God el ase nu sesr sie ma simusla ke sifwil moulyuk in pal meeta in akpwarye kut a in akkeye lulalfongi lasr.

Eis Me Akkeye ke Fwinsrak ke Sifwil Moulyuk

10. Mea fwa kasre kut in eis me akkeye ke ma simusla lun Baibel ke sifwil moulyuk?

¹⁰ Ya kom lungse me akkeye fwin oasr pal moul lom oasr ke me sensen in mise? Sie sropon me akkeye ku in koneyukyak ke me sramsram lun sifwil moulyuk su akkalemyeyuk in Baibel. In ridi ma simusla inge, srike in sifwilpa nunku ka, a in lumala ke nunak a ke oiya puspus ka ku in oru me fwinsrak nu ke sifwil moulyuk in arlanu paye nu sum. (Rom 15:4) Ma inge el tia me sramsram in pihlenfong mukena. Ma inge sikyak na paye nu sin metu oana kut, su moul ke lusen pal se a fwin anu. Lela kut in loang akmwoye ke kitin pal in nunku ke sie me pupulyuk​—ke sifwil moulyuk se meet ke ma simusla lun Baibel.

11, 12. (a) Kain in ongoiye fuka sikyak nu sin mutan katinmas se in an Sarefat, a oiya fuka el akkalemye ke mutamwauk? (b) Akkalemye mea Jeova el oru in akkeyel Elaija met palu lal in oru nu sin mutan katinmas.

¹¹ Srike nunku ke sie luma. Ke lusen kutu week, met palu Elaija el muta oana sie met muteta nu ke loom sin mutan katinmas se in an Sarefat, ke sie infwokil ye fasu lal. Ma inge el sie pal in asor. Wangin af a oasr sral su sikyak in an sa. Oasr met puspus su mise. Jeova el orekmakunal Elaija in orala sie mwenmwen su oasr ke pal loeloes in akinsemwomwoye lulalfongi lun mutan katinmas pusisel se inge. Mutan se inge a mwen natul elos apkurun na in sun sral upa, ke sripen oasr mongo srisrik nelos lula, ke pal inge God el sang ku nu sel Elaija in orala sie mwenmwen tu flour a oil nelos fwa tia wanginla a oasr pal nukewa. Tusruktu, ingena oasr sie ongoiye su sikyak nu sel. Mas upa sa akkolukye tulik natul, a tia pat el tui in momong. Fuka lupan asor yok lun mutan katinmas se inge! Arlanu upa in moul ke wangin kasru lun sie mokul tuma, a inge tulik sefwanna natul el mise. Ke sripen el asor yok, el nunku mu Elaija a God lal, Jeova pa uniye tulik natul! Mea met palu inge el fwa oru?

¹² Elaija el tia sang kas in kai nu sin mutan katinmas ke kas tia paye lal. A, el fwak: “Ase nu sik mwen natum.” Tokin el wise tulik su mise inge nu in infwokil, Elaija el pre ke pal puspus in folokonma moul lun tulik srisrik inge. Ke saflaiye, Jeova el topuk! Nunku ke lupan insemwomwo su arlanu kalem ke mutal Elaija ke el liye inimwen tulik el mukuikui ke el mongyuk. Kufwin mutun tulik ikakla, a mutal arlanu insemwomwo a enganak ke el moul. Elaija el wise tulik mokul sa nu sin nine kiyel a el fwak: “Liye, mwen natum el moul.” El arlanu enganak a insemwomwo. Mutan sa el fwak: “Inge nga etu tu kom sie met lun God, a tu kas lun Jeova in oalum paye.” (1 Togusra 17:8-24) Lulalfongi lal nu sin Jeova a nu sin met tutafpo lal el fukoko liki meeta.

13. Efu ku ma simusla ke orekma lal Elaija in akmoulyeak mwen nutin mutan katinmas sa el ase me akkeye nu sesr ke pal inge?

¹³ In nunku ke ma simusla oinge ku in orala me akkeye yok nu sum. Arlanu kalem la Jeova el ku in kunausla mise oana met lokwalok lasr! Nunku ke len se su engan yok lun mutan katinmas sa fwa pulakin pa sin tausan puspus sin met su muta fwin fwalu ke pal in sifwil moulyuk lun met puspus su mise! E fwa oasr insemwomwo yok pa in kosrao ke Jeova el engan in sapkin Mwen natul in akpayeye sifwil moulyuk lun met puspus fwin fwalu nufon. (Jon 5:28, 29) Ya oasr sie met su kom lungse el mise? Arlanu mwo in etu la Jeova el ku a el fwa akmoulyeak met mise!

Fwinsrak Lom a Inkanek in Moul Lom ke Pal Inge

14. Fuka fwinsrak ke sifwil moulyuk ku in kasru moul lom?

¹⁴ Fuka fwisrak ke sifwil moulyuk ku in sang me kasru nu ke inkanek su kom moulkin ke moul in pal inge? Kom ku in eis me akkeye ke fwinsrak inge kom fwin sun me keok puspus, ma upa puspus, me kalyai, ku me sensen. Setan el lungse kom in sangeng yok ke mise tu kom in fuleak oiyen oaru lom a kom mutamwauk in lulafongi ke kutu mwulela ke me karungin su wangin sripe. Esam la Setan el fwak nu sin Jeova: “Ma nu kemwa yurin sie met el fwa sang ke moul lal.” (Job 2:4) In akkalemye kas inge, Setan el akkolukye kut nukewa ke kaskas kikiap lal, wi kom yang pa. Ya paye la kom fwa tui in kulansap nu sin God kom fwin sun me sensen? Ke inkanek in nunku ke fwinsrak lun sifwil moulyuk, kom ku in oru sulela lom in fukoko in tafwela in oru ma lungse lun Papa tumum in kosrao.

15. Fuka kas lun Jisus su simusyukla in Mattu 10:28 el ase me akkeye nu sesr kut fwin sun me sensen?

¹⁵ Jisus el fwak: “A nik komwos sangeng selos su uniye mano, a koflanu uniye ngun; a mwo tu komwos in sangeng sel su ku in kunausla ngun a mano pa in Gehenna.” (Mattu 10:28, NW) Kut tia enenu in sangeng sel Setan ku sin met nukewa su el orekmakinyuk. Paye la, saap oasr ku lun kutu met in oru me sensen, fwinne mise. Tusruktu, ma koluk emeet su elos ku in oru el ma na ke kitin pal. Jeova el ku a el fwa akwanginyela kutena me akkoluk su orek nu sin met kulansap oaru nukewa lal, paye el fwa akmoulyelosyuk. Nu sin Jeova mukena fwal kut in akkalemye sangeng lasr, lungse yok lasr, a sunak lasr. El mukena oasr ku in eis moul a ke fwinsrak nukewa ke moul, in kunausla mano a ngun in Gehenna. Aok, Jeova el tia lungse ma inge in sikyak nu sum. (2 Piter 3:9) Ke sripen fwinsrak ke sifwil moulyuk, kut su met kulansap lun God ku in lulalfongi pal nukewa la oasr me karungin nu sesr. Moul ma patpat oasr ye mutasr ke kut akpayeye la kut oaru, a wangin kutena ma su Setan a met kulansap nukewa lal ku in oru ka.​—Sam 118:6; Hibru 13:6.

16. Fuka nunak lasr ke sifwil moulyuk sang kasru nu ke ma yok sripe su kut oakiye?

¹⁶ Fwin fwinsrak nu ke sifwil moulyuk el paye in kut, ma inge ku in akmwoye oiya ku nunak lasr nu ke moul. Kut akilen la ‘fwinne kut moul ku kut mise, kut ma lun Jeova.’ (Rom 14:7, 8) In oakiye ma yok sripe puspus, ke ma inge kut orekmakin kas in kasru lal Poul: “Komwos in tia oana luman met fwal se inge; a komwos in ekla ke aksasu lun nunak lomwos, tu komwos in srike mea lungse lun God, su mwo a me akinsemwomwo a sumwoslanu.” (Rom 12:2) Oasr met puspus elos silaklak in akinsemwomwoye kena nukewa lalos, niyen sun nukewa lalos, a lungse nukewa lun nunak lalos. Meyen elos nunku la moul el arlanu fototo, paenang elos kafweang yok in suk me akengan, a fwin oasr kain in orekma in alu su elos oru, ma inge el tia fwal nu ke “ma lungse lun God su sumwoslanu.”

17, 18. (a) Fuka Kas lun Jeova el akkalemye la lusen moul lun metu el arlana fototo, tusruktu mea God el lungse in oru nu sesr? (b) Efu ku kut akkeyeyuk in kaksakin Jeova ke len nukewa?

¹⁷ Paye la, moul el fototo. Ma inge el “sa wanginla, a kut sokla,” saap ke lusen yea 70 ku 80. (Sam 90:10) Metu elos moul ke kitin pal na oana maa srik folfol, ke sie lul el uli sa in wanginla, oapana ke momong. (Sam 103:15; 144:3, 4) Tusruktu God el tia orala akwuk tu kut in orekmakin kutu yea in kapek nu ke matwe matu a eis kutu etauk a lalmetmet, a tokin kut orekmakin kutu yea mano el munasla a sun kain in mas puspus a mise. Jeova el orala metu in oasr kena ku lungse in moul ma patpat. “El filiye ma patpat insielos,” Baibel el akkalemye. (Ekklisiastis 3:11) Ya God el sekulang a sulallel, in filiye yurosr kena oinge a tok el tia akpayeye ma inge? Mo, tia oinge, meyen “God el lung.” (1 Jon 4:8) El fwa orekmakin akwuk lun sifwil moulyuk tu met puspus su mise tari elos fwa ku in eis moul ma patpat.

¹⁸ Ke sripen oasr fwinsrak nu ke sifwil moulyuk, kut ku in eis sie moul mwo su oasr misla ka ke pal fwasru. Kut tia enenu in arlana fosngala yok, in kafweang in orekmakin ku nukewa lasr in akpayeye ma puspus ke pal inge. Kut tia enenu in “arlanu orekmakin fwal” se inge. (1 Korint 7:29-31; 1 Jon 2:17) Tia oana sie nu sin met puspus su wangin fwinsrak paye yuru, oasr yurosr me sang mwomwo in etu ka la kut fwin sruokye lulalfongi paye lasr nu sin Jeova God, e fwa oasr yurosr pal mwomwo nu tok ma patpat in kaksakunal a engankin moul lasr. Ke ma inge, lela kut in kaksakin Jeova ke len nukewa, su akpayeye fwinsrak nu ke sifwil moulyuk!

Kom E Topuk Fuka?

• Mea pulakin lasr ke sifwil moulyuk?

• Ma puspus fuka sang me akpayeye la fwinsrak nu ke sifwil moulyuk el paye?

• Fuka kom ku in eis me akkeye nu ke fwinsrak lun sifwil moulyuk?

• Fuka me fwinsrak nu ke sifwil moulyuk el ku in sang kasru nu ke inkanek su kom moulkin ke moul lom?

[Picture on page 10]

Job el etu la Jeova el lungse in akmoulyeak met sumwos

[Picture on page 11]

“Liye, mwen nutum el moul”