Lela Kas Lun God In Kol Inkanek Lom
“Kas Lom lam nu ke niuk, a kalem nu ke inkanek luk.”—SAM 119:105.
1, 2. Efu ku met puspus elos tia ku in koneak misla a insemwomwo paye?
YA KOM ku in esamak ke sie pal su kom siyuk sin sie met in kasre kom ke innek sumwos su kom fwa fwasr ka? Saap kom apkurun tari nu ke an se su kom lungse in sun tusruktu kom tia etu na paye la piye ka innek se su kom ku in som sumwos nu we. Ku saap kom tula ke sripen kom tia etu na paye inkaneku a oasr ma eneneyuk in orek in sang aksumwos fwusrasryesr lom. Ke kutena oiya, ya tia mwo in akos kas in kasru lun sie met su etu na paye an san? Met se inge ku in kasre kom na paye in sun an se su kom lungse in som nu we.
2 Ke lusen tausan yea puspus, metu elos srike in aksumwosye moul lalos ke wangin kasru su tuku sin God. Tusruktu, ke sripen elos tia suk kasru sin God, met sesumwos nukewa elos tula na paye ku wanginla fwinsrak lalos. Elos kofla koneak inkanek in misla a insemwomwo paye. Efu ku elos koflanu koneak misla a insemwomwo paye? Pus liki yea 2,500 somla, met palu Jeremaia el fwak: “Tia ma lun met su fwasr in aksumwosye fwalkel.” (Jeremaia 10:23) Kutena met su srike in aksumwosye fwalkel fwin el tia eis me kasru fwal a mwo fwa sun me asor yok. Paye la, metu elos enenu me kolyuk!
3. Efu ku Jeova God el arlanu fwal in kol metu, a mea el mwulela in oru?
3 Jeova God el arlanu fwal in sang me kasru inge. Efu? Meyen el etu yok liki kutena met ke oiyen met ku ke inkanek su metu orekla ka. A el arlanu etu a oasr kalem yok lal ke sripe su paenang metu tila fwasr ke inkanek sumwos a elos tula. El etu pa la mea eneneyuk nu selos in sifwilpa fwasr ke inkanek sumwos. Sayen ma inge, in oana Met su Orala Ma Nukewa, Jeova el etu pal nukewa ke ma mwo emeet nu sesr. (Isaia 48:17) Ke ma inge, kut ku in lulalfongi na paye ke mwulela lal su simusyukla in Sam 32:8: “Nga fwa aketeye nu sum a luti nu sum inkanek kom fwa fwasr we. Nga fwa papu nu sum ke mutuk su on fwom.” Aok kut arlanu lulalfongi la: Jeova el ase nu sesr me kolyuk su mwo emeet. Tusruktu, ke inkanek fuka el kol kut?
4, 5. Fuka kas nukewa lun Jeova ku in kol kut?
4 Sie met sim lun Sam el akkalemye kas inge ke pre lal nu sin Jeova: “Kas Lom lamp nu ke niuk, a kalem nu ke inkanek luk.” (Sam 119:105) Kas lun God a kas in akesmakin lal oasr in Baibel, a ma inge ku in kasre kut in kutangla kutena me kutong su kut ku in sun ke moul lasr. Aok, ke kut ridi Baibel a lela ma inge in kol kut, kut ku in pulakin sesr sifwana ke ma su akkalemyeyuk in Isaia 30:21: “A srem fwa long sie kas tukum, fwakang: ‘Pa inge inkaneku. Komwos fwasr we.’ ”
5 Fwinne oinge, loang akmwoye nu ke Sam 119:105 su akkalemye ke oiya luo su Kas lun God el ku in orekmakinyuk. Ma se meet, el orekma oana sie lam nu ke niyesr. In oana ke kut sun kain in ma upa puspus len nukewa, akwuk mwomwo a fwal su oasr ke Kas lun God fwa sang me kasru yok nu ke inkanek lasr in kasre kut in oru sulela mwomwo a in fwasr liki me sruf puspus lun fwal se inge. Ma se akluo, Kas lun God el sang kalem nu ke inkanek lasr, el kasre kut in orala sulela mwomwo su fwal nu ke fwinsrak lasr in moul ma patpat ke Paredais su God el mwulela ka. Fwin oasr lam su yok kalem ka inkaneku, kut ku in liye ke kain in ma puspus su sikyak—fwin ma mwo ku ma koluk. (Rom 14:21; 1 Timote 6:9; Fwakyuk 22:12) Lela kut in liye ke inkanek yok la fuka kas nukewa lun God su oasr in Baibel el ku in sie lam nu ke niyesr a sie kalem nu ke inkanek lasr.
“Sie Lam nu ke Niyuk”
6. Ke oiya puspus fuka kas nukewa lun God el ku in sie lam nu ke niyesr?
6 Len nukewa kut oru sulela puspus lasr. Kutu sin sulela inge saap ma nu ke ma srisrik, tusruktu oasr kutu pal sie ma el sikyak su ku in me srike nu ke oiyen nasnas lasr, oiyen oaru lasr, ku oiya mwomwo lasr in tia wi ke kutena kain in u su lain sie sin sie. In kutangla kain in me srifwe puspus inge, kut enenu in “orekmakin ku lun nunak lasr in akilen ma mwo a ma koluk.” (Hibru 5:14, NW) Ke inkanek in eis etauk sumwos ke Kas lun God a in akyokye etauk lasr ke principles ku akwuk lun me lutlut yok sripe a mwo nukewa lun ma inge, kut enenu akpa nu ke nunak ku pulakin lasr a ke sripe inge kut ku in oru sulela puspus su akinsemwomwoye Jeova.—Soakas 3:21.
7. Akuteye sie oiya su saap sie met Kristian el lungse in asrouki nu sin met su tia lulalfongi su welul ke niyen orekma.
7 Nunku ke sie me pupulyuk. Ya kom sie met matu su lungse na paye in akenganye insien Jeova? (Soakas 27:11) Fwin aok, fwal in kaksakinyuk kom. Tusruktu srike lumala ke nunak lom ke kitin pal fwin kutu sin met su wi kom ke niyen orekma elos sot nu sum sie ticket in welulos som a liye sie sritel su orek. Elos insemwomwo na paye in asrouki nu sum ke niyen orekma a elos lungse in asrouki pa nu sum fwinne ke pal su tari orekma. Saap kom arlanu lulalfongi mu met nukewa inge elos tia met koluk. Saap ke kutu oiya ke moul lalos elos akkalemye oiya mwomwo. Mea kom fwa oru? Ya oasr me sensen fwin kom welulos? Fuka Kas lun God ku in kasre kom in oru sie sulela mwomwo ke ma se inge?
8. Akwuk mwomwo fuka ke ma Simusla kasre kut in nunku yok ke kain in asrouki nukewa?
8 Nunku ke kutu akwuk mwo lun ma Simusla. Ma se meet su kut ku in esam pa ke ma simusla su oasr in 1 Korint 15:33, su fus inge el akkalemye: “Met kawuk [asrouki, NW] koluk me akkolukye oiya mwo.” Fwin kom akos akwuk mwomwo inge, ya kom enenu in pulesru met su tia lulalfongi ke inkanek nukewa? Me top su fwal nu ke ma Simusla ke kusensiyuk inge pa mo. Aok, met sap Poul el akkalemye oiya mwo a kulang nu sin “kain in met nukewa,” wekunang met su tia lulalfongi. (1 Korint 9:22) Ke akwuk mwomwo lun met Kristian el sapkin kut in akkalemye insemwomwo lasr nu sin met puspus—wekunang nu sin met nukewa su tia wi ke lulalfongi lasr. (Rom 10:13-15) Paye, fuka kut ku in akos kas in kai inge in “oru mwo nu sin met nukewa” kut fwin srikutla liki met puspus su saap enenu kasru lasr?—Galetia 6:10.
9. Kas in kai fuka lun Baibel el kasre kut in akkalemye nunak mwomwo ke oiyen asrouki lasr nu sin met su wi kut orekma ke niyen orekma?
9 Tusruktu, oasr ma tia oana sie su arlanu kalem ke oiyen kulang su akkalemyeyuk nu sin sie met ke niyen orekma a ke oiya in arlanu fototo nu sel. Pa inge sie luma ku ma sikyak su akwuk mwomwo ke ma simusla el ku in orekmakinyuk nu ka. Met sap Poul el sang kas in sensen nu sin met Kristian nukewa: “Komwos in tia awi komwosi nu ke met selulalfongi.” (2 Korint 6:14) Mea kalmen kas inge “in tia awi komwosi nu ke met selulalfongi”? Kalmen ma inge pa in fwasr liki a tia asrouki, ku in tia orala fototo nu sin met puspus su selulalfongi. Piya pal akwuk fototo nu sin met su wi ke niyen orekma el ekla me sensen su tia fwal a mwo? Nge pal se su me asrouki el tia mwo a ekla sie orekma in awi nu sin sie met selulalfongi? Kas lun God, Baibel el ku in kasre kom in aksumwosye fwalkom ke oiya se inge.
10. (a) Fuka Jisus el sulela met asrouki lal? (b) Kusensiyuk puspus fuka ku in kasru sie met in orala sulela mwomwo ke oiyen asrouki lal?
10 Loang akmwoye nu ke me srikasrak lal Jisus, su mutamwauk ke pal in orekla lun ma nukewa fwasru yok tari lungse lal nu sin metu. (Soakas 8:31) Ke pal se el oasr fwalu, el akyokye fototo mwomwo lal yurin met tuma lutlut nukewa lal. (Jon 13:1) El pulakin “lungse” nu sin mokul su lela me kasrup lal in kutongilye in fwasr tokol. (Mark 10:17-22) Tusruktu Jisus el akkalemye arlana kalem ke met su el fwa tia fototo nu se a oru asrouki paye nu se. El tia oru fototo lal nu sin met puspus su tia insemwomwo in oru ma lungse lun Papa tumal. Oasr sie pal, Jisus el fwak: “Komwos met kawuk luk, komwos fwin oru ma nga sapkin nu sumwos.” (Jon 15:14) Paye la, kom ku in akkalemye kulang ku oiyen kawuk nu sin sie met ke niyen orekma. Tusruktu siyuk sum sifwana: ‘Ya met se inge el lungse in oru ma Jisus el sapkin? Ya el lungse in lutlut kel Jeova, el su Jisus el sapkin kut in alu nu se? Ya oasr yurol oiyen moul nasnas su oasr yuruk in oana met Kristian?’ (Mattu 4:10) Ke kom kaskas nu sin met su wi kom ke niyen orekma a akkalemye la kom tu na ku in orekmakin masap lun Baibel ke moul lom, me top nu ke kusensiyuk nukewa inge el arlanu kalem.
11. Sang me pupulyuk nu ke oiya puspus su kas lun God ku in kol ke inkanek lasr.
11 Oasr pa oiya puspus saye su kas lun God el ku in orekmakinyuk oana sie lam nu ke niyesr. Ke sie me pupulyuk, fwin oasr sie orekma su saap akkalemyeyuk nu sin sie met Kristian su wangin orekma la. Tusruktu, akwuk nu ke orekma se inge oasr ma eneneyuk yok nu ka in orekmakin pal yok, a fwin el sruokya orekma se inge, el fwa tia ku in wi ke meeting lun met Kristian ke pal puspus a el fwa tia pa ku in wi ke kutupa orekma su kupasr nu ke alu paye. (Sam 37:25) Sie pa met Kristian el srifweyuk yok in liye ke me akengan su kunausla akwuk mwomwo lun Baibel. (Efesus 4:17-19) Saap oasr kutupa met su sa in aktukulkulyeyuk ke sripen me munas lun met lili puspus. (Kolosse 3:13) Ke oiya nukewa oinge, kut fwa lela Kas lun God in orekma oana sie lam nu ke niyesr. Paye, ke inkanek in akos akwuk mwomwo lun Baibel, kut ku in kutangla kutena ma upa su sikyak nu ke moul lasr. Kas lun God el “oasr sripe in luti, in kai, in aksumwosye, a in aketeye ma sumwosmwos nu sin met.”—2 Timote 3:16.
“Kalem nu ke Inkanek Luk”
12. Fuka kas lun God el kalem nu ke inkanek lasr?
12 Sam 119:105 el akkalemye pa la kas lun God el ku in sang kalem nu ke inkanek lasr, tolak nu ke innek su on meet. Kut etu ma fwa sikyak ke pal fwasru, meyen Baibel el akuteye ke me asor yok ke sripen ma koluk nukewa su sikyak fwin fwalu a ke ma fwa sikyak tokin ma inge. Aok, kut etu la, kut moul ke “len safla” lun akwuk lun ma puspus inge. (2 Timote 3:1-5) Ke sripen kut etu ke ma su fwa sikyak ke pal fwasru paenang ma inge orala me kasru yok nu ke inkanek su kut moulkin moul lasr ke pal inge. Met sap Piter el simusla: “Ke ma inge, meyen ma inge nu kemwa fwa kunausyukla ou inge, yen met su fwa fwal nu sumwos in muta in moul mutal a sumwosmwos, in sano a tawi ke tuku lun len lun Jeova!”—2 Piter 3:11, 12.
13. Fuka oiyen silaklak su oasr ke pal lasr inge el sang me kasru nu ke nunak lasr a ke inkanek in moul lasr?
13 Nunak lasr a inkanek in moul lasr enenu in akkalemye lulalfongi fukoko la “fwalu wanginla a lung kolukla.” (1 Jon 2:17) Orekmakinyen akwuk mwomwo lun Baibel fwa kasre kut in oru sulela mwomwo nu ke niyen sun nukewa lasr ke pal fwasru. Ke sie me pupulyuk, Jisus el fwak: “A komwos suk meet togusrai lal, a ma inge nukemwa fwa etukot pa nu sumwos.” (Mattu 6:33) Ke kut liye met fwusr puspus su akkalemye lulalfongi nu ke kas lun Jisus ke elos sroang a oru orekma in luti pal nukewa, arlanu fwal kut in kaksakinelos ka! Oasr pa met lili puspus—wekunang met nukewa ke sou lalos—elos som nu ke an puspus saye su oasr ma enenu yok nu ke met orekma puspus in sang kasru in sulkakin peng mwo lun Togusrai.
14. Fuka sie sou su met Kristian elos akyokye orekma in luti lalos?
14 Nunku ke met akosr in sie sou su met Kristian ke elos som liki an United States nu ke an Dominican Republic in oru orekma in kulansap ke sie congregation ke sie mura su oasr met 50,000 muta we. Oasr met 130 su met orekma in sulkakin peng mwo lun Togusrai ke congregation se inge. Ne oinge, ke April 12, 2006, oasr met 1,300 kutu elos wi ke Me Esmakin nu ke mise lun Kraist! In oana ke kas in pupulyuk nu ke imae in an se inge el arlanu “fwosfwos nu ke kosrani” paenang tokin malem limekosr na, papa, nine, tulik mokul, a tulik mutan ke sou se inge elos sang me kasru nu sin met 30 in lutlutkin Baibel. (Jon 4:35) Papa se inge el akuteye: “Ke congregation oasr met lili 30 su tuku nu in an se inge in sang kasru. Inmasrlon met lili 30 inge, met lili 20 elos tuku liki an United States, a met lili su lula elos tuku liki an Bahamas, an Canada, an Italy, an New Zealand, a an Spain. Elos tuku a lungse na paye in wi ke orekma in luti peng mwo a oasr me akkeye yok nu sin met lili nukewa su muta in an se inge.”
15. Me insemwomwo puspus fuka kom engankin ke sripen kom oru ma lun Togusrai meet ke moul lom?
15 Aok kalem la, wangin pal mwo lun met lili puspus in som nu ke an saye su oasr ma enenu yok nu sin met sulkakin peng mwo in oru orekma in kulansap we. Tusruktu nu selos su ku in oru—ku nu selos su ku in akfwalye luma a ma sikyak nu ke moul lalos in akmwesasyelos—elos fwa ku in liye a eis me insemwomwo puspus ke elos wi ke akwuk in orekma in luti peng mwo. A ke yen nukewa su kom oru orekma in kulansap we, kom ku in eis na paye me insemwomwo su kom sifwana ku in pulakin ke kom oru kulansap nu sin Jeova ke ku lom kewa. Kom fwin oru ma lun Togusrai meet ke moul lom, Jeova el mwulela ka la el fwa “okoila me insemwomwo nu fwom, tu a fwa tia fwal an in eis.”—Malakai 3:10.
Eis Ma Lane ke Me Kolyuk lun Jeova
16. Ke inkanek fuka kut fwa eis ma lane kut fwin lela kas lun God in kol kut?
16 Oana ke ma kut akuteye ka tari, kas lun Jeova el kasre kut ke inkanek luo. Kas nukewa lun Jeova el sie lam nu ke niyesr, kasre kut in fwasr nu meet ke inkanek sumwos a kol kut ke pal su kut oru kain in sulela puspus. A ma inge sang kalem nu ke inkanek lasr, su kasre kut tu kut fwa ku in liye ma nukewa su on meet. A el kasre kut in akos kas in kasru lal Piter: “Ke ma inge komwos in akoela insiomwos, komwos in okak a oakiye fwinsrak lomwos fwin lungkulang se su a fwa utukot nu sumwos ke fwakyuk lun Jisus Kraist.”—1 Piter 1:13.
17. Fuka orekma in lutlutkin Baibel el kasre kut in akos me kolyuk lun God?
17 Wangin alolo ka la Jeova el sang me kolyuk a me kasru. Tusruktu kusensiyuk u pa, Ya kom fwa akpusiselye kom nu ka? In kalem ke masap ku me kolyuk su Jeova el sang, kom ku in oru sulela in ridi Baibel len nukewa. Nunku yok ke ma kom rid, kafweang in eis etauk ke ma lungse lun God nu ke ma puspus, a nunku ke inkanek puspus su me lutlut el ku in orekmakinyuk ka nu ke moul lom. (1 Timote 4:15) Tokin ma inge kom ku in orekmakin “ku lun nunak lom in sang me top” a liyaten lom kom fwin oru sulela puspus lom sifwana.—Romans 12:1, NW.
18. Kut fwin lela Kas lun God in kol kut, me insemwomwo puspus fuka kut fwa eis?
18 Kut fwin lela kas nukewa lun God a me lutlut yok sripe nukewa su oasr ke Kas lun God fwa ase kalem nu sesr a in oru nu sesr me kolyuk su kut enenu ke kut oru sulela puspus ke inkanek sumwos su kut enenu in ukwe ku fwasr ka. Kut ku in lulalfongi la kas lun Jeova su simusyukla el ku in “aklalmetmetye met nukin.” (Sam 19:7) Kut fwin lela Baibel in kol kut, kut akinsemwomwoyeyuk ke sripen conscience nasnas fwa oasr yurosr a ke engan yok su tuku ke orekma in akinsemwomwoye Jeova. (1 Timote 1:18, 19) Kut fwin lela kas nukewa lun God in kol inkanek lasr len nukewa, Jeova el fwa akinsemwomwoye kut ke me insemwomwo su mwo emeet nu ke moul ma patpat.—Jon 17:3.
Ya Kom Esam?
• Efu ku yok sripe in lela Jeova God in kol inkanek lasr?
• Ke inkanek fuka kas nukewa lun Jeova ku in sie lam nu ke niyesr?
• Fuka kas nukewa lun God el sie kalem nu ke inkanek lasr?
• Fuka orekma in lutlut Baibel el kasre kut in akos kas in kolyuk lun God?
[Picture on page 15]
Ngea asrouki nu sin sie met selulalfongi el tia mwo?
[Picture on page 16]
Jisus el asrouki fototo nu selos su oru ma lungse lun Jeova
[Pictures on page 17]
Ya inkanek in moul lasr el akkalemye la kut oru ma lun Togusrai meet ke moul lasr?