“Akkalemye Lungse Paye Nu Sin Sie Sin Sie”
“Ke lungse met lili komwos in akklemye lungse paye nu sin sie sin sie.”—ROM 12:10, NW.
1, 2. Futoto fuka lun met lili wiyelos engankinyuk sin sie missionary in pal inge a sin met sap Poul?
KE LUSEN yea 43 nu fon lun orekma in kulansap lal oana missionary in an Far East, Don el eteyuk ke lung se yok su el pulakin nu selos su el kulansap nu se. Ke pal se el sun mas keok safla lal, kutu sin met su el kasru in lutlut Baibel nu se elos fwafwasryesr ke lusen tausen mail in tuku muteta yurol a fwak, “Kamsahamnida, kamsahamnida!”—“Kulo nu sum, kulo nu sum!” ke kas Korea. Lungse yok lal Don mokle insielos.
2 Tia Don mukena pa oru me srikasrak oinge. In century se meet, met sap Poul el akkalemye lungse paye nu selos su el kulansapu. Poul el kisekin moul lal. Fwinne el sie mokul su oasr lalalfongi fukoko, oayepa el kulang a lungse in sang kasru, “oana sie nine ke el karunganang tulik natul sifwana.” El simusla nu sin congregation in an Tessalonika: “Ke kut arulanu lungse komwos, kut insemwomwo in sot nu sumwos, tia mwosasu lun God mukena, a oayepa ngunasr sifwana, meyen komwos arulanu kulo sesr.” (1 Tessalonika 2:7, 8) Tok, ke pal se Poul el fwak nu sin met lili lun an Efesus la elos fwa tia sifwil liyel, “elos nukemwa arulanu tung, a kui nu in kaiwel Poul a ngok mutal.” (Orekma 20:25, 37) Kalem la, futoto inmasrlol Poul a met lili nukemwa wiyel tia ke sripen elos wi ke lalalfongi sefwanna. Tusruktu oasr lungse paye lalos nu sin sie sin sie.
Kulang Paye a Lungse
3. Fuka kas inge in Baibel kulang a lungse kupasr sie sin sie
3 In Ma Simusla, lungse paye, el orekmakinyuk oana sie nu ke pulakin lun met tulan, a pakoten, kas inge kemwa kupasr nu ke oiya se meet lun Met Kristian nukemwa—lungse. (1 Tessalonika 2:8; 2 Piter 1:7) In oapana ke ip puspus lun sie diamond kato, oiya mwo inge nukemwa enenu in tukeni orekma in orala fwako mwo puspus. Ma inge oru met Kristian nukemwa in futoto nu sin sie sin sie a oayepa nu sin Papa tumalos in kosrao. Paenang, met sap Poul el kaifwe met lili wiyel nukemwa: “Lela lungse in tia kutasrik. . . . Ke lungse met lili komwos in lung nu sin sie sin sie..”—Rom 12:9, 10.
4. Mea kalmen kas inge “lungse paye”?
4 Kas Grik su Poul el orekmakin ke “lungse paye” el orekmakinyuk nu ke ip luo, sie ip el kalme nu ke met kawuk a ma se saye el, lungse paye. Oasr sie scholar ke Baibel el aketeye, la kalmen ma inge pa Met Kristian elos “akilenyuk ke sie oiya mwo su oasr ke pal nukemwa in sie sou su akkalemye lungse, futoto nu sie sin sie a lungse in sang kasru.” Ya pa inge ma kom pula ke Met Kristian brother a sister wiyom? Asrouki mwo su oasr lungse paye ka—sie pulakin mwo oana futoto lun sou—enenu in pulakinyuk sin met nukemwa ke congregation lun met Kristian. (Galetia 6:10) Paenang, The New Testament in Modern English, lal J. B. Phillips, el lungasla Rom 12:10 nu ke kas inge: “Lela kut in akkalemye lungse paye sie sin sie oana inmasrlon met lili.” A in The Jerusalem Bible kut ku in rid: “Komwos lungse sie sin sie oana met lili na paye.” Aok, met Kristian elos lungse sie sin sie tia ke sripen kut enenu na in oru ku ke sripen ma inge sumwos in orek. “Ke lungse paye nu sin met lili,” kut enenu in “lungse sie sin sie ke inse ma lulap” ku lungse su ma tuku na paye ke insiesr.—1 Piter 1:22.
“Lutiyuk sin God in Lungse Sie Sin Sie”
5, 6. (a) Fuka Jeova el orekmakin toeni lulap inge su pangpang international convention in luti met kulansap nukemwa lal ke lungse lun met Kristian? (b) Fuka futoto inmasrlon met lili puspus fukokoi ke lusen kitin pal?
5 Fwinne “lungse lun met puspus” fwin fwalu munasla, Jeova el luti met nukemwa lal in pal inge “in lungse sie sin sie.” (Mattu 24:12; 1 Tessalonika 4:9) Toeni Lulap puspus lun International convention lun Met Lo lun Jeova el sang pal mwo in akpaye ma inge. Ke toeni lulap puspus inge, met lo puspus elos osun nu sin met lili puspus su tuku ke mutanfwal loeloes, a elos paing met lili puspus su tuku ke an saye nu ke loom selos. Ke sie toeni lulap su tufwana orek, oasr kutu sin met elos tuku ke mutanfwal puspus su met ma muta ke an inge elos tia wi muta akkalemye inkanek in pulakin lalos. “Ke pal se met lili puspus su wi ke toeni inge elos tuku, elos tufwal na paye a elos mwekin,” sie met Kristian su karungin kunokon lun rooming el fwak. “Tusruktu tokin len onkosr ke elos fwak fong mwo, elos a met karungnalos elos tukeni asruila sie sin sie a tung. Elos engankin kain in lungse paye lun met Kristian inge su elos tia ku in mwulkunla.” In akkalemye oiya kulang nu sin met lili wiyesr, fwinne elos tuku ke kutena oiya ku mutanfwal, ma inge ku in purakak oiya mwo puspus nu sin met in loomu a nu sin met muteta.—Rom 12:13.
6 Experience puspus inge sikyuk ke pal in toeni lulap su, orani nu sie nunak in pulakin lun met Kristian puspus su kulansap nu sin Jeova in fototoeni ke lusen pal oinge. Kut fwin etu na paye met lili wiyesr, kut ku in engunkin aksaokye oiya mwomwo puspus lalos—paye lalos, lalalfongi lalos, oaru, kulang, etaten, oaru, pakoten, a insemwomwo in sang. (Sam 15:3-5; Soakas 19:22) Mark, sie su orekma oana sie missionary in an East Africa, el fwak “In oru orekma wi met lili wiyesr ke inkanek moniyuk orala in oasr sie oiya futoto su tia ku in musalla.”
7. Mea siyukyak sesr in engankin ke lungse lun met Kristian ke congregation?
7 In eis a karunganang futoto oinge in congregation, met nukemwa enenu in futoto nu sin sie sin sie. Ke inkanek in wi pal nukemwa ke meeting lun met Kristian, kut akkeye futoto ku lungse lasr nu sin brother a sister nukemwa wiyesr. In wi pal nukemwa ke meeting, asrouki nu sin met lili meet liki meeting mutamwauk a tokin meeting, a sang coment ke pal in meeting, kut akkeye a purakak sie sin sie nu ke “lungse a orekma mwo.” (Hibru 10:24, 25) Sie met elder fwin an Merika el fwak, “Nga engun in esam ke pal se Nga tulik srisrik, sou luk pa sie sin sou su safla in som liki Kingdom Hall, meyen elos engankin sramsram mwo lun met lili lalos.”
Ya Komwos Enenu in “Yokyokelik”?
8. (a) Mea Poul el lungse in akkalemye ke pal se el kaifwe met Korint in “yokyokelik”? (b) Mea kut ku in oru in akkeye lungse ke congregation?
8 In akkalemye kain in lungse inge ke inkanek nukemwa, kut enenu in “akyokyelik” ke insiesr. Nu sin congregation in an Korint, met sap Poul el simusla: “Insiesr yokelik. Komwos tia tingtingi in kut.” Poul el kaifwelos in “akyokyelik.” (2 Korint 6:11-13) Ya kom ku pa in “yokelik” ke lungse lom? Kom tia enenu in sano kutu met in tuku nu yurum. Ke leta lal nu sin met Rom, Poul el orani me enenu tu in oasr lungse paye nu ke me kai lal inge: “Ke sunakin, komwos kol in akfulatye sie sin sie.” (Rom 12:10) In akkalemye sunak nu sin kutu met, kom ku in paing nu selos ke pal in meeting. Kom ku pa in solalos in wi kom ke orekma lun forfor ku in akola nu ke meeting. In oru oinge oasr me kasru in akkapye lungse paye.
9. Step puspus fuka orala kutu met lili in kamwuk futoto nu sin met lili Kristian puspus? (Sang kutu me srikasrak ke an sum.)
9 Sou puspus a met puspus ke congregation elos ku in “akyokyeloselik” ke inkanek lun muteta nu yurin sie sin sie, saap in tukeni mongo ke me mongo mulala, a in tukeni akesrui ke kutu orekma mwomwo. (Luk 10:42; 14:12-14) Kais kutu pal oasr sie met pangpang Hakop el oakiye picnic puspus nu sin kais sie u srisrik. “Kain in matwe nu kemwa elos wi, wekunang single parent puspus,” el fwak. “Met nukemwa oasr me esmakin mwomwo lalos ke elos folokla nu in loom selos, a elos pulakin fototoeni lalos nu sin sie sin sie.” Oana met Kristian, kut enenu in kaifweang tia in met lili mukena a met kawuk paye pa.—3 Jon 14.
10. Mea kut ku in oru fwin oasr ma upa lasr nu sin brother a sister puspus wiyesr?
10 Tusruktu, kutu pal, oiya sesumwos el ku in kosrala oiya mwo nu sin met kamwuk a ke lungse. Mea kut ku in oru? Ma se meet, kut ku in pre siyuk ke futoto mwo lasr nu sin met lili wiyesr. Lungse lun God nu sin met kulansap nukemwa lal pa elos in kamwuk a insese nu sin sie sin sie, a el fwa topuk pre lalos. (1 Jon 4:20,21; 5:14, 15) Kut enenu pa in orekma fwal nu ke pre lasr. Ric, sie sin traveling minister in an East Africa, el esam ke upa nu sel in asrouki nu sin sie brother su oiyel upa tia mwo. “Nga tia fuleak in asrouki nu sel, a nga sulela in suk in eis etauk kel yok liki meet,” Ric el aketeye. “Nga koneak la papa tumun brother se inge el arlanu upa ke kai lal. Ke pal se nga etauk ke oiya upa lun brother se inge in kutangla oiya su tia mwo inge a fuka lupan kapkapek el orala tari, Nga kaksakunul. Kut ekla met kamwuk futoto.”—1 Piter 4:8.
Sang Insiom nu sin Kutupa Met!
11. (a) Mea eneneyuk tu lungse el ku in oasr ke congregation? (b) Efu ku in tia akkalemye pulakin lasr ku in akmunasye ku kunausla oiya in ngun lun kutu met?
11 Ke pal inge, met puspus elos lungse in moulkin moul su tia futoto nu sin kutena met. Sie me asor pa inge! Tia oinge—a ma inge tia enenu—in liyeyuk ke congregation lun met Kristian. Lungse paye lun met lili tia in oru sie sramsram mwo a akkalemye oiya mwo mukena; ku in akkalemye mukena pulakin ke inkanek yok. Ke ma inge, kut enenu in akkalemye ma su oasr ke insiesr, oana ma Poul el oru nu sin met lili puspus in an Korint, a in akkalemye nu sin met lili wiyesr la kut nunku yok pa kelos. Fwinne tia met nukemwa lungse in asrouki nu sin kutu met ku lungse in sramsram, tusruktu in sifwana srella liki kutu met ku in akkolukyel sifwana a kutupa met. “El su sifwana srella, el suk ma lungse lal,” Baibel el fwak. “A mulat lain lalmetmet paye nukemwa.”—Soakas 18:1.
12. Efu ku sramsram mwomwo yok sripe in oasr futoto paye ke congregation?
12 Arulanu yok sripe in oasr sramsram paye orek nu sin met ke oiyen kamwuk paye. (Jon 15:15) Kut nukemwa enenu met kamwuk puspus su kut ku in akkalemye nunak lasr a pulakin lasr nu se. Sayen ma inge, kut fwin etu na paye sie sin sie, fusresr in akinsemwomwoye sie sin sie ku in sang ma enenu lun kais sie. Ke pal kut fwin akkalemye nunak paye nu sin sie sin sie ke inkanek inge, kut akkeye congregation in kapkapek ke lungse paye, a kut fwa pula a liye akpayeyen kas lun Jisus: “Insemwomwo in sang yok liki insemwomwo in eis.”—Orekma 20:35; Filippai 2:1-4.
13. Mea kut ku in oru in akkalemye la oasr lungse paye lasr nu sin met lili nukemwa wiyesr?
13 In oasr me insemwomwo puspus tuku ke lungse lasr, kut enenu in akkalemye ma inge. (Soakas 27:5) Fwin paye lungse lasr, mutasr ku in akkalemye pa ma inge, a ma inge mokle insien met puspus in akkalemye pa lungse lalos. “Kalem lun muta akenganye inse,” sie soakas in Baibel el fwak. (Soakas 15:30) Orekma mwo su akkalemye nunak paye el akkeye pa lungse paye. Fwinne wangin sie met ku in molela lungse paye, kutena me sang su tuku ke insie paye arulanu yok sripe. Fwinne sie card, sie leta, a “sie kas fwakyuk in pal fwal”—ma inge nukemwa ku in akkalemye lungse paye. (Soakas 25:11; 27:9) Ke pal se kut fwin eis inkanek in kamwuk paye nu sin kutu met, kut enenu in karunganang ma inge in akkalemye lungse paye su wangin kutasrik ka. Yokna ke pal in enenu, kut enenu in kasru met kawuk nukemwa lasr. Baibel el fwak: “Sie met kamwuk paye el lungse pal e nukemwa, a sie met lili el isusla tu lan met kasru in pal in ongoiye.”—Soakas 17:17.
14. Mea kut ku in oru fwin sie met lili el tia akkalemye insemwomwo lal ke lungse paye su kut akkalemye nu sel?
14 Paye la, kut tia ku in futoto nu sin met lili nukemwa ke congregation. Ke kutu sripe kut ku in pula mu kut futoto nu sin kutu a tia futoto nu sin kutu met. Paenang fwin kutu met elos tia lungse in kamwuk nu sum oana ma kom lungse, nik met silaklak in nunku mu oasr ma sito lom nu sin met inge. A nikmet srike in forci met inge in akkeye futoto paye lalos nu sum. Kom fwin kaifweang in akkalemye oiyen kamwuk paye nu sin met inge, saap kom e fwa engankin futoto paye lun met inge ke pal fwasru.
“Nga Insemwomwo Keim”
15. In sang kas in kaksak, ku in tia sang ma inge, mea fwokin ma inge nu sin met puspus?
15 Fuka lupan engan lal Jisus ke pal in baptais ke el long kas su tuku in kosrao me: “Nga insemwomwo keim”! (Mark 1:11) Kas inge akkalemye insemwomwo lun Papa tumal in akyokye lalalfongi lun Jisus la oasr lungse yok lun Papa tumal nu sel. (Jon 5:20) Sie me asor, fwin kutu met elos tia na long kain in kas in kaksak inge sin met su elos sunakin a lungse. “Met fwusr puspus su oana Nga pula ke sou su tia eis lalalfongi lun met Kristian,” Ann el fwak. “In loomu, kut long kas in akkoluk mukena. Ma inge oru kut arulanu asor.” Tusruktu, ke elos ekla wi ke congregation, elos liye a pula lungse lun sou in ngun su kulang a lungse in kasru—papa puspus a nine puspus a tumalel puspus a tamtael puspus ke lalalfongi.—Mark 10:29, 30; Galetia 6:10.
16. Efu ku in akkalemye sie oiye lun lungse in kaskaskin kas in akkoluk nu sin kutu met tia mwo?
16 In kutu an, papa puspus, met matou puspus, a met luti puspus elos tia wi akkalemye insemwomwo lalos nu sin met fwusr, meyen elos nunku mu kas in kaksak inge ku in oralos in tille kaifweang ke kutena oiya ku insefulat. Kain in nunak inge ku in sikyuk pa ke sou lun met Kristian a ke congregation. In sang comment nu ke sie me sramsram ku kutupa orekma ku kunokon, met matou saap elos fwak: “Kunokon lom mwo, tusruktu kom ku in oru mwo liki meeta!” Ku ke kutu pa inkanek, saap elos akkalemye oiya su tia akkalemye insemwomwo lalos nu sin met fwusr su srik lukelos. In oru oinge, met lili puspus elos lalalfongi mu elos kaifwe met fwusr in oru ma kunelos ke ku lalos kemwa. Tusruktu kain in inkanek inge tia akkeye met fwusr, a e ku in akmunasyelos, ke sripen met fwusr elos pula la elos tia ku in oru ma kunelos su siyukyuk selos in oru.
17. Efu ku kut enenu in suk pal mwo in kaksakin met puspus?
17 Tusruktu, kas in kaksak, tia akkalemyeyuk mukena oana kas in mutamwauk meet liki orek kas in kai. Kas in kaksak paye akkeye lungse paye ke sou a ke congregation, paenang met fwusr elos akkeyeyuk in sramsram nu sin brother a sister puspus su matu lukelos in suk me kai ku kas in kasru. Ke ma inge kut tia lela fasin ku oiya lun sie mutanfwal in fwak nu sesr ke inkanek fuka kut fwa asrouki nu sin met puspus, a lela kut “in nukomang met sasu, su fwal nu sin God orekla tari in sumwosna a mutal lun paye.” Sang kas in kaksak oana Jeova el oru.—Efesus 4:24.
18. (a) Met fwusr, komwos e fwa liye fuka kas in kai lun met matou puspus? (b) Efu ku met matou elos enenu in nunku a pre meet liki elos sang kas in kai?
18 Ke kutu oiya, komwos met fwusr, fwin met matou elos sang kas in aksumwos ku me kai nu sumwos, nik komwos nunku mu kalmeyen ma inge pa elos srunge komwos. (Ekklisiastis 7:9) Tia oinge! Nunak sumwos a lungse paye lalos nu sum saap moklelos in oru ma inge. Meyen fwin tia oinge, efu ku elos oru kaifweang lalos in sramsram nu sum ke ma inge? Ke sripen elos etu la mea kas puspus el ku in oru nu sin met, met matou puspus—yokna met elder ke—elos orekmakin pal yok in nunak a pre meet liki sang kas in kai, meyen elos lungse in oru ma mwo.—1 Piter 5:5.
“Jeova el Akkalemye Yok Lungse Paye”
19. Efu ku elos su pulakin me asor ku me aktoasr elos ku in ngetak nu sin Jeova ke kasru?
19 Ke sripen oasr experience puspus su tia mwo su liyeyuk ku pulakinyuk sin met puspus tokin elos akkalemye lungse paye, saap pa inge sripe paenang kutu selos nunku mu in akkalemye lungse paye ku in kol nu ke kutupa me asor. Elos enenu pulaik a lalalfongi fukoko tu elos in sifwil akkalemye ma oasr ke insielos nu sin met puspus. Tusruktu elos tia enenu in mwulkunla la Jeova “el tia loes liki kutena sesr.” El suli kut in futoto nu sel. (Orekma 17:27; Jemes 4:8) El etu sangeng lasr nu ke me akngal, a el mwolela in akkeye kut a in kasru kut. Met sim lun Sam Devid el akkeye kut: “Jeova el muta apkurun nu selos su inse musalla, el molelosla su toasr in ngun.”—Sam 34:18.
20, 21. (a) Kut etu fuka la kut ku in engankin futoto paye nu sin Jeova? (b) Mea eneneyuk in engankin futoto paye nu sin Jeova?
20 Kamwuk paye lasr nu sin Jeova pa yok sripe emeet su kut enenu in akyokye. Tusruktu ya kamwuk futoto inge ku in oasr na paye? Aok. Baibel el akkalemye ke oiyen mokul puspus a mutan sumwosmwos puspus su pulakin futoto paye lalos nu sin Papa tumasr in kosrao. Me sramsram ke lungse paye lalos inge kasre kut in lalalfongi la kut ku in futoto pa nu sin Jeova.—Sam 23, 34, 139; Jon 16:27; Rom 15:4.
21 Me siyuk lun Jeova in futoto nu sel ku met nukemwa in oru. “O Jeova, su e fwa muta in loom nuknuk sum?” Devid el siyuk. “El su fwufwasryesr in sumwos ia orekma sumwosmwos a kaskas paye insiel.” (Sam 15:1, 2; 25:14) In oana ke kut kalem ka la in kulansap nu sin God orala fwako mwomwo a kut eis kasru a karungin lal, oinge kut fwa etu tu “Jeova el oaru in akkalemye lungse paye.”—Jemes 5:11.
22. Kain in futoto fuka Jeova el lungse met kulansap lal elos in engankin?
22 Kut akinsemwomwoyeyuk ke sripen Jeova el lungse in futoto nu sin met sesumwos puspus! Ke ma inge, ya kut fwa tia akkalemye lungse paye nu sin sie sin sie? Ke kasru lun Jeova, kais sie sesr ku in akkalemye a engankin lungse paye su me akul ku oiya mwo lun un met Kristian wiyesr. Ye kolyuk lun Togusrai lun God, kais sie met fwin fwalu fwa pula a liye lungse paye inge nu tok ma patpat.
Kom Ku In Aketeye?
• Kain in oiya fuka enenu in sikyuk ke congregation lun met Kristian?
• Fuka kais sie sesr ku in akkeye lungse paye in congregation?
• Fuka kas in kaksak su tuku ke insie akkeye lungse lun met Kristian?
• Fuka lungse paye lun Jeova kasru a akkeye kut?
[Picture on page 23]
Lungse inmasrlon met Kristian yok kalmeya liki na in orek luma mukena
[Pictures on page 24, 25]
Ya kom ku in “akyokyelik” lungse lom?
[Picture on page 26]
Ya kom suk ma tafongla lun met ku sang me akkeye?