Piye Alu se Kom Enenu in Sulela?
‘OASR kain in alu puspus wikin kain inkanek puspus su kol nu an sefwanna. Ke ma paye, oasr God sefwanna, ya tia oinge?’ Pa inge pulakin lun met puspus su pula mu in wi ke sie alu el yok sripe, tusruktu tia yok sripe la kain in alu fuka sie met fwa sulela in wi ka.
Ke pal se meet kut fwin nunku ka, kain in nunak oinge saap sumwos, ke sripen oasr God sefwanna, El su fulat-lanu. (Isaia 44:6; Jon 17:3; 1 Korint 8:5, 6) Tusruktu, kut tia ku in mulkunla la oasr ma puspus su tia oana sie su arulanu kalem—me lain puspus—lun alu puspus su fwak mu elos oru kulansap lalos nu sin God paye. Yok ma tia oana sie ke orekma a oiya lalos, lalalfongi lalos, me lutlut lalos, a me siyuk lalos. Arulanu yok ma puspus su tia oana sie paenang met puspus su wi ke sie alu upa nu selos in kalem ku in etu la mea kutu alu elos luti ku lalalfongi.
Ke oiya saye, Jisus el fwak: “God el ngun, a elos su alu nu sel fwa alu in ngun a paye.” (Jon 4:24) Ya in alu nu sin God ke ma paye ku in oasr kain in nunak puspus su tia oana sie in orek ke God, la su El, mea akwuk puspus lal, a ke inkanek fuka metu elos fwa alu nu sel ka? Ya mwo kut in lalalfongi mu tia yok sripe nu sin God Kulanu ke oiyen alu lasr nu sel?
Met Kristian Paye Ke Century Se-meet a Ke Pal Inge
Kutu pal, met Kristian puspus ke century se-meet elos nunku ke ma puspus tia oana sie. Ke sie pupulyuk, in kaskas ke met Korint, met sap Poul el fwak: “Tu kutu sin sou lal Kloe elos fwak nu sik keyumwos, met lili, tu oasr akukuin inmasrlomwos. Inge Nga ma inge, tu kais sie sumwos fwak, ‘Nga ma lal Poul,’ ‘a nga ma lal Apollus,’ ‘a nga ma lal Sifas,’ ‘a nga ma lun Kraist.’ ”—1 Korint 1:11, 12.
Ya Poul el liye ma tia oana sie inge mu tia yok sripe? Ya kais sie met elos fwasr ke inkanek lalos sifwana in eis moul? Tia oinge! Poul el akesmakinyelos: “Inge Nga kaifwe nu sumwos, met lili, ke En Leum lasr Jisus Kraist, tu komwos nukemwa in kaskas oana sie, a tu in wangin srela inmasrlomwos; a tu komwos in tukeni akfwalyeyuk tari in nunak sefwanna a in papu sefwanna.”—1 Korint1:10.
Aok, inse sefwanna ke lalalfongi tia ku in sun ku orek ke sripen inkanek lun me kaifwe koluk. Ma inge ku in eis orekla mukena fwin met se met se tuni na paye ma puspus a eis a insese pa ke ma inge. Ke sripe se inge, lutlut lun met se sifwana ke Kas lun God a kena paye in orekmakin ma el lotela tari pa inkanek yok sripe nu ke kain in inse sefwanna su Poul el kaskaskin. Ya kain in inse sefwanna inge ku in koneyukyak? Oana ma kut liye tari, pal nukemwa God el oru akwuk lal nu sin metu ke sie u. Ya kut ku in akilen u inge ke pal inge?
Ma Lane Puspus ke Asrouki nu sin sie U su Akinsemwomwoyeyuk sin God
Sie pal met sim lun sam inge Devid el siyuk: “O Jeova, su fwa muta in loom nuknuk sum? Su fwa muta fwin eol mutal sum?” Kusensiyuk inge ku in mokleak sie met in nunku ka. Devid el sang me top: “El su fwafwasryesr in sumwos, a orekma sumwosmwos a kaskas paye insiel.” (Sam 15:1, 2) Fwin oasr etauk sumwos ke Baibel ma inge ku in sang kasru yok nu sin sie met in ku in akilen alu se su sun akwuk mutal paye lun God. Oayepa, in asrouki nu sin u inge, sie met el ku in engunkin me akkeye su tuku ke asrouki mwomwo lal nu sin met puspus su alu nu sin God ke inse sefwanna a alu “ke ngun a paye.”
Met Lo lun Jeova elos akkalemye la inse sefwanna ke lalalfongi a ke orekma ku in orek fwinne fwalu wangin inse se lalos. Inmasrlolos oasr met puspus su wi meet ke alu puspus a ke sruf puspus. Kutu sin met lo elos met selalalfongi ke God ku kutu selos tia lalalfongi fwin oasr ku wangin God in pal meeta. Kutu selos tia akfulatye alu. Fwinne elos tuku ke kain in alu puspus, oiya puspus, a ke kain in lalmetmet yok lun met, ke pal inge elos engunkin inse sefwanna su tia liyeyuk ke alu puspus fwin fwalu in pal inge.
Kain in inse sefwanna inge sikyuk ke sripen akwuk mwo ke Kas lun God, Baibel. Aok, Met Lo lun Jeova elos akilen la elos tia ku in sapkin ma met elos enenu in oru. Tusruktu elos sang kulo ke kunokon mwomwo su elos ku in oru in kaifwe met puspus in lutlut ke Baibel tu elos in ku in oru sulela lalos ke alu fwal nu ke foundeson mwo. Ke inaknek inge, paenang met puspus elos ku in wi engunkin me insemwomwo su tuku ke alu su orek nu sin God ke “ngun a paye.”
Ottmar el akkeye kain in akwuk inge. Fwinne el kapek ke sie sou su alu lalos pa Catholic in an Germany, el tui in wi ke alu lalos. El aketeye la: “Pal nukemwa nga wi alu, tari nga folokla nu loom’a oasr pulakin luk mu wangin insemwomwo luk oana ke pal se nga ilyuk nu in loom alu.” Fwinne oinge, el srakna lalalfongi ke God. Tok el osun nu sin Met Lo lun Jeova a el koneak la elos met kulansap paye lun God. El akilen la mwo in asrouki nu selos. Ke ma inge el fwak: “In wi oru orekma ke sie u fwin fwalu, Nga engunkin kain in misla puspus wikin misla lun nunak. Nga eis kasru pal nukemwa ke etauk sumwos lun Baibel. Arulanu yok sripen ma inge nu sik sifwana.”
Sie Me Solsol nu selos su Suk
Met Lo lun Jeova elos oru lutlut Baibel ke wangin molo in kasru met puspus in eis kalem mwomwo ke ma God el siyuk. Yea tari’a, ke ma kalem, oasr 5,726,509 lutlut lun Baibel orek ke kais sie wik nu sin kais sie met ku nu sin kais sie u. Orekma in luti ke Baibel inge kasru million sin met in eis etauk sumwos oana foundeson mwo su ku in kasrelos in oru sulela lalos ke alu. Kom enenu in eis lutlut ke ma mutal puspus su simla tari in Baibel. Tokin kom lutlut kom ku in oru sulela lom.—Efesus 4:13; Filippai 1:9; 1 Timote 6:20; 2 Piter 3:18.
Kom fwin lungse in akinsemwomwoye God, arulanu yok sripe in wi alu—tusruktu tia ke kutena kain in alu ku u. Kom enenu in oru sulela lom fwal nu ke etauk sumwos lun Baibel, a tia fwal nu ke ma metu fwak mukena su wangin me akpayeye lun Baibel ka. (Soakas 16:25) Kom enenu in lutlut in eis etauk nu ke akwuk lun alu paye. Srike in suk ma inge ke lalalfongi lom sifwana. Tokin ma inge kom ku in oru sulela lom fwal nu ke ma kom koneak.—Duteronomi 30:19.