“Komwos In Sang Kulo”

“A lela misla lun Kraist in leumi insiomwos . . . A komwos in sang kulo.”​—KOLOSSE 3:15.

1. Mea ma tia oanu sie su kut ku in liye inmaslon congregation lun met Kristian a ke fwal se inge su muta ye koko lun Setan?

KE congregation lun Met Lo lun Jeova fwin fwalu nu fon su piselos oasr ke 94,600, kut ku in koneak ngun in sang kulo. Kais sie meeting el mutamwauk a el safla ke pre su akkalemye kulo nu sin Jeova. Pal nu kemwa kut ku in long kas inge “kulo ma lulap,” “kulo pa,” ku kutupa kas su ku in longyuk nu sin met fwusr a met matu a nu sin Met Lo matu a Met Lo sasu ke pal elos tukeni nu sie in alu a aenguni. (Sam 133:1) Oiye se inge el siena liki rapku su arulanu pengpeng inmaslon met puspis su “tia akos mwosasu’! (2 Tessalonika 1:8) Kut moul misinge ke sie fwal su nukin in sang kulo. Tia me lut pa inge kut fwin nunku ke god lun fwal se inge​—Setan su Devil, el sie met su akkeye oiye koluk su tia nunku kutu met, su inse fulat a ngun in lain arulanu fwasrelik nu sin metu!​—Jon 8:44; 2 Korint 4:4; 1 Jon 5:19.

2. Kain in kas in sensen fuka kut enenu in porongo, a kain in kusensiyuk fuka kut akola in tuni?

² Ke sripen fwal lal Setan raunikutla, paenang kut enenu in taran ke oiye koluk lal. In century se meet, met sap Poul el akismakinye met Kristian in an Efesus: “In su komwos fwafwasyesr meet ke fwasr tokin inkanek lun fwal se inge, fwal nu ke leum in ku lun engyengu, ngun se su orekma inge in mwen nutin seakos. Yurolos kut nu kemwa ouyepa muta a moul in lung lun ikwe meeta, oru lun ikwe a nunuk, a kut luman met nutin mulat, oanu met ngie.” (Efesus 2:2, 3) Ma sikyuk inge arulanu paye pa ke len inge. Ke ma inge, fuka kut ku in srukye sie ngun su etu in sang kulo? Kain in me kasru fuka Jeova el wise? Ke inkanek puspis fuka kut ku in akkalemye la kut etu na paye in sang kulo?

Sripe Puspis In Sang Kulo

3. Kut sang kulo nu sin Jeova ke mea?

³ Nu sin Jeova God, Met Orekutla a Met Sang Moul Lasr, pa oasr kunokon lasr in sang kulo, yokna kut fwin nunku ke me sang yok su el ase nu sesr. (Jemes 1:17) Len nu kemwa, kut sang kulo nu sin Jeova meyen kut moul. (Sam 36:9) Ke ma puspis su raunikutla, kut ku in liye me akpayeye puspis ke orekma sakuruk lun Jeova, oanu fwat, malem, a itue puspis. Planet lasr sifwanu nenela ke me kasrup su ku in kasru kut in moul, oasr kain in gas puspis ke yen engyengu lasr su toeni lalos arulanu yok sripe, a mokuikui lun ma orekla nu kemwa sang me akpayeye ke sowemol lasr nu sin Papa tumasr in kosrao su lungse kut. “O Jeova God luk, pukanten orekma sakuruk lom su kom orala,” Togusra Devid el on, “a nunuk lom nu simem; ma inge koflanu takunyukla nu sum. Nga fwin lungse fwakak a kaskas ka, elos pus liki ku in oekyukla.”​—Sam 40:5.

4. Efu ku kut enenu in sang kulo nu sin Jeova ke asrouki mwo lasr nu ke congregation?

⁴ Fwinne kut tia muta ke sie paredais su ku in liyeyuk, tusruktu met kulansap lun Jeova elos engunkin paredais in ngun. In Kingdom Hall lasr nu kemwa a ke toeni lulap pangpang convention a assembly, kut ku in experience la fwako lun ngun mutal lun God el orekma inmaslon met lili wiesr in lalalfongi. Paye, ke pal se kut luti nu sin met su tia yok etauk lalos ke alu ku nu sin met su wangin etauk ke alu, kutu sin Met Lo elos orekmakin ma Poul el aketeye nu ke leta lal nu sin met Galetia. Elos purakak meet nunuk lun met in loang nu ke “orekma lun ikwe” a siyuk selos ke ma elos tuni a liye. (Galetia 5:19-23) Apkurun met nu kemwa elos insese la kain in oiye inge arulanu pengpeng nu sin met ke pal inge. Ke pal se akkalemyeyuk nu selos fwako lun ngun mutal lun God a suleltal in tuku nu ke Kingdom Hall in liye me akpayeye ke ma inge, met puspis elos silaklak in fwak: “God el muta inmaslomwos.” (1 Korint 14:25) A ma inge tia ku in liyeyuk mukena in Kingdom Hall ke an sum. In an nu kemwa kom som nu we, kom fwin osun nu sin kutena Met Lo lun Jeova su piselos oasr ke million onkosr kutu, kom ku in konaok ngun in insemwomwo inge su oasr yurolos nu kemwa. Paye, asrouki mwo inge su ku in musaiyuk sie met pa sripe se yok in sang kulo nu sin Jeova, el su ase nu sesr ngun mutal lal in akpayeye ma inge.​—Zefenaia 3:9; Efesus 3:20, 21.

5, 6. Fuka kut ku in akkalemye kulo lasr nu sin God ke me sang yok emeet lal ke lango?

⁵ Me sang yok emeet, a me sang sumwosmwos na paye su Jeova el sang, pa Mwen nutul, Jisus, su ke inkanek lal me sang ke lango orekla. “Met kulu, God el fwin lungsel kut ou inge,” met sap Jon el simusla, “fwal nu sesr tu kut in ouyepa lungse sie sin sie.” (1 Jon 4:11) Aok, kut akkalemye la kut etu in sang kulo ke lango tia ke lungse a sang kulo lasr mukena nu sin Jeova, a sayen ma inge, kut oru ou inge ke kut moulkin moul sie kain in inkanek su akkalemye lungse pa nu sin kutu met.​—Mattu 22:37-39.

⁶ Kut ku in akyokye lutlut lasr fuka in akkalemye kulo ke kut nunku ke inkanek in liaung lun Jeova nu sin met Israel in pal meeta. Ke inkanek lun Ma Sap lal Moses, su el sang nu sin mutanfwal se inge ke inkanek lal Moses, Jeova el luti met lal ke kain in me lutlut puspis. Ke inkanek lun “luman etauk a ma paye lun Ma Sap,” oasr ma yok su kut ku in lotela su ku in kasre kut in akos kas in kai lal Poul: “Komwos in sang kulo.”​—Rom 2:20; Kolosse 3:15.

Me Lutlut Tolu Su Tuku ke Ma Sap Lal Moses

7. Fuka akmwuk lun sie tafwu siengoul sang pal mwo nu sin met Israel in akkalemye kulo lalos nu sin Jeova?

⁷ Jeova el akkalemye ke Ma Sap lal Moses inkanek tolu fuka met Israel elos ku in akkalemye insemwomwo paye lalos ke orekma mwomwo lal. Ma se meet, oasr akmwuk lun me kasru. Sie tafwu siengoul nu kemwa ke fwokin anu, wikin “tafwungoul nu kemwa sin un kao ku un sip,” fwa ekla “mutal nu sin Jeova.” (Livitikus 27:30-32) Ke pal se met Israel nu kemwa elos akos, Jeova el akinsemwomwoyelos. “ ‘Komwos wise tafwu siengoul nu kemwa in nien fulma, tu a fwa oasr me mongo in loom sik, a srike yu inge ka,’ Jeova lun un met meun el fwak, ‘Nga fwin tia ikasla windo in kosrao nu sumwos, a okoila me insemwomwo nu fwomwos, tu a fwa tia fwal an in eis.’ ”​—Malakai 3:10.

8. Mea ma tia oanu sie inmaslon me sang su tuku ke inse a sie tafwu siengoul?

⁸ Ma se akluo, in toeni nu ke akmwuk lun sie tafwu siengoul su eneneyuk, Jeova el akmwuki nu sin met Israel in orala me sang su tuku ke insielos. El sapkin nu sel Moses in fwak kas inge nu sin met Israel: “Ke komwos sun fwal se su Nga wis komwos nu we, na e fwa te oru, ke komwos mongo me mongo lun fwal se, komwos fwa kisekin me kise tabukak nu sin Jeova.” Kutu nu ke fwako se meet lalos pa “sie kek orek ke flau” elos fwa wis ma inge oanu “sie me sang nu sin Jeova” in fwil lalos nu kemwa. Loang akmwoye meyen lupan fwokinsak se inge su elos enenu in sang tia pakiyuki. (Oekyuk 15:18-21) Aok, ke pal se met Israel elos sang me sang lalos in akkalemye kulo, elos ku in lalalfongi na paye ke me insemwomwo lun Jeova. Akmwuk siefwunnu pa orekla ke arurumu lal Ezekiel ke tempel. Kut ku in rid: “A ma se meet ke fwako se meet lun ma nu kemwa, a me kise tabukak nu kemwa lun ma nu kemwa, ke me sang lomwos nu kemwa​—fwa ma lun met tol; komwos fwa sang pa nu sin met tol ma se meet in flau lomwos su akola in orek bred, in oru sie me insemwomwo in mongle fwin loom sum.”​—Ezekiel 44:30.

9. Mea Jeova el luti ke inkanek lun esani nu sie ma lula?

⁹ Ma se aktolu, Jeova el orala akmwuk in esani ma lula. “A ke komwos kosrani ma sifweni in fwal sumwos,” God el fwak, “kom fwa tia kosrani srumwasrik in fwal sum nu fon, ke telani ma lula ke sifweni lom. A nik kom telani ma lula in nien grep lom, ma putatla. A kom fwa filiye ma inge nu sin met sikasrup a nu sin metsa. Nga Jeova God lomwos.” (Livitikus 19:9, 10) Sulpa, el tia pakiye lupan ma elos enenu in sang. Kais sie met Israel ku in oru sulela lal sifwanu ke lupan ma el lungse in sang nu sin met enenu. Togusra Solomon su lalmetmet el fwak: “El su pakomuta met sikasrup sungwun nu sin Jeova, a orekma mwo lal El fwa sifwil moli nu sel.” (Soakas 19:17) Ke ma inge Jeova el luti ke pakomuta a nunuk yok nu sin met enenu.

10. Ma upa fuka sikyuk nu sin met Israel ke pal se ma elos nukin in sang kulo?

¹⁰ Jeova el akinsemwomwoye met Israel ke pal se elos oaru in wise sie tafwu siengoul, me sang lalos, a sang nu sin met enenu. Tusruktu, ke pal se met Israel elos pilesru in akkalemye kulo lalos, elos tula insemwomwo lun Jeova. Ma inge kol nu ke ongoiye a ke saflaiye elos ekla metsa in an saye. (2 Kronikel 36:17-21) Ke ma inge, mea kut ku in lotela ke ma se inge?

Orekma Lasr in Sang Kulo

11. Mea inkanek yok emeet su kut ku in orekmakin in akkalemye kulo lasr nu sin Jeova?

¹¹ In oupanu, inkanek yok emeet su kut ku in orekmakin in akkalemye kaksak a kulo lasr nu sin Jeova pa ke inkanek lun “me kise.” Aok, oanu met Kristian paye kut tia muta ke Ma Sap lal Moses, a wangin kunokon lasr in kisekin kosro ku fwokin an’u. (Kolosse 2:14) Fwinne ou inge, met sap Poul el kaifwe nu sin met Kristian Hibru: “A lela kut in kise nu sin God ke kaksak pal e nu kemwa kel, ou inge fwako lun ngoasro, su fwakak el.” (Hibru 13:15) Ke inkanek in orekmakin ku lasr a ma oasr yurosr oanu me kise kaksak nu sin Jeova, ke pal in orekma lun forfor ku ke “toeni lun congregation” lun met lili Kristian wiesr, kut ku in akkalemye kulo lasr su tuku ke insiesr nu sin Papa tumasr in kosrao su lungse, Jeova God. (Sam 26:12) Kut fwin oru ou inge, mea kut ku in lotela ke inkanek puspis su met Israel elos orekmakin in akkalemye kulo lalos nu sin Jeova?

12. Kut fwin sramsram ke kunokon lasr oanu met Kristian, mea kut ku in lotela ke akmwuk lun sie tafwu siengoul?

¹² Ma se meet, oanu ma kut lotela tari, sie met el enenu in akos pal nu kemwa akmwuk lun sie tafwu siengoul; oasr kunokon lun kais sie met Israel ke ma se inge. Oanu met Kristian, oasr kunokon lasr in wi ke orekma lun forfor a meeting pal nu kemwa lun met Kristian. Kain in akmwuk se inge kut enenu na paye in oru. Ke kas palu yok lal ke len safla, Jisus el fwak: “A mwosasu inge lun togusrai fwa sulkakinelik fwin fwalu nu fon tu in ma lo nu sin mutanfwal nu kemwa; a na safla e fwa tuku.” (Mattu 24:14; 28:19, 20) Fwin ke meeting lun met Kristian, met sap Poul el eis kasru lun ngun mutal in simusla kas inge: “A lela kut in nunku ke sie sin sie in akkeye kut nu ke lungse a orekma mwo, a kut in tia likiye tukeni nu sie lasr in alu, oanu liye lun kutena, a kut in kaifwe sie sin sie, a akyokye, oanu komwos liye tu len apkurun me.” (Hibru 10:24, 25) Kut akkalemye kulo lasr nu sin Jeova ke pal se kut eis kunokon in fwakak a luti a ke pal se kut asrouki nu sin met lili wiesr pal nu kemwa ke meeting lun congregation, a kut nunku ma inge nu kemwa oanu me sang a me akfulat.

13. Kain in me lutlut fuka ku in tuku ke akmwuk lun me kasru su tuku ke inse a akmwuk in esani ma lula?

¹³ Sayen ma inge, kut ku in eis me insemwomwo ke kut lutlutkin pa akmwuk luo saye su met Israel nu kemwa ku in akkalemye kulo lalos​—me kasru su tuku ke insielos a akmwuk in esani ma lula. Tia oanu sie tafwu siengoul, su pakiyuki sin met a oasr kunokon lalos in oru, me sang su tuku ke insien met a akmwuk in esani ma lula tia pakiyuki lupan me sang inge. A, ma inge sang pal mwo nu sin met kulansap lun Jeova in akkalemye lupan insemwomwo lalos su moklelos in oru orekma. Ke sie inkanek su oanu ma inge, fwinne kut etu la akesrui lasr in wi forfor pal nu kemwa a in wi meeting pal nu kemwa lun met Kristian sie kunokon yok lun met kulansap nu kemwa lun Jeova, tusruktu ya kut akesrui ke ma inge ke insiesr kemwa a ke ngun in insemwomwo? Ya kut liye ma inge oanu sie pal mwo in akkalemye insemwomwo lasr ke ma nu kemwa su Jeova el oru nu sesr? Ya kut wi pal nu kemwa ke orekma se inge, fwal nu ke lupan ku lun kais sie met? Ku kut nunku ma inge oanu sie kunokon na su kut enenu na in oru? Paye, kut mukena ku in topuk ke kusensiyuk inge. Met sap Poul el fwak: “A lela kais sie met in sifwanu srike orekma lal, a na a fwa oasr sripen konkun lal kel sifwanu, a tia ke met tulan lal.”​—Galetia 6:4.

14. Mea Jeova el lungse ke orekma in kulansap lasr nu sel?

¹⁴ Jeova God el etu na paye lumasr. El etu lupan ku lasr. El aksaokye orekma lasr, yok ku srik, fwin met kulansap lal elos sang ke insielos kemwa. El tia nunku la kut nu kemwa ku in sang ke lupa siefwunnu, ku kut enenu in oru ou inge. Ke pal se el sramsram ke akmwuk in sang, met sap Poul el fwak nu sin met Kristian in an Korint: “Tu fwin nunuk akola, a fwa akinsemwomwoye fwal nu ke ma on yurin sie met, a tia fwal nu ke ma wangin yurol.” (2 Korint 8:12) Kain in akmwuk se inge fwal pa in orekmakin ke orekma in kulansap lasr nu sin God. Orekma in kulansap lasr nu sin Jeova ku in akinsemwomwoyel, tia ke lupan ma kut oru, a ke inkanek lasr in oru ou inge​—ke insemwomwo a ke insiesr kemwa.​—Sam 100:1-5; Kolosse 3:23.

Akkapye a In Srukye Ngun in Pioneer

15, 16. (a) Mea ma inge su kapsreni orekma lun pioneer nu ke oiye lasr in sang kulo? (b) Fuka met nu kemwa su tia ku in wi pioneer elos ku in akkalemye ngun lun pioneer?

¹⁵ Sie inkanek in akkalemye oiyen kulo lasr nu sin Jeova su ku in kol nu ke insemwomwo pa in sroang nu ke orekma lun forfor pal nu kemwa oanu sie pioneer. Mokleyuk ke lungse lalos nu sin Jeova a in sang kulo nu sel, met kulansap puspis su mwolela tari moul lalos elos orala ekla lulap ke moul lalos meyen elos lungse in akyokye pal in kulansap lalos nu sin Jeova. Kutu selos kulansapu oanu sie regular pioneer, orekmakin aur 70 kutu ke malem nu kemwa in fwakak peng mwo a in luti kutu met ke ma paye. Kutu met su arulanu srik pal lalos ke sripe puspis, kais kutu pal elos sun aur 50 ke orekma lun forfor oanu sie auxiliary pioneers.

¹⁶ A fuka nu sin kutu met kulansap lun Jeova su tia ku in kulansapu oanu sie regular ku auxiliary pioneer? Elos ku in akkalemye oiyen kulo lalos ke pal se elos akkapye a srukye na ngunin pioneer. Fuka elos ku in oru ou inge? Elos ku in oru ou inge, ke pal se elos akkeye kutu met su ku in wi ke orekma lun pioneer, ku ke pal se elos purakak tulik nutulos in nunku ke orekma lun pioneer oanu sie nien sun lalos, a ke inkanek in moniyuk in wi ke orekma in luti fwal nu ke ku lalos. Ma kut sang nu ke orekma lun forfor oakiyuki nu ke lupan insemwomwo lasr nu ke ma Jeova el oru in pal meeta, ke pal inge, a ke ma el e fwa oru nu sesr ke pal fwasru.

Akkalemye Oiyen Kulo Lasr ke Inkanek lun “Ma Saok Lasr”

17, 18. (a) Fuka kut ku in akkalemye oiyen kulo lasr ke inkanek lun “ma saok” lasr? (b) Mea Jisus el fwak ke me kasru lun mutan katinmas se, a efu?

¹⁷ “Akfulatye Jeova ke ma lom,” pa inge ma Soakas 3:9 el fwak, “a ke fwako se meet in ma yokelik lom nu kemwa.” Akmwuk lun sie tafwu siengoul tia sifwil enenu nu sin met kulansap lun Jeova. A, met sap Poul el sim leta nu ke congregation lun Korint: “Kutena met, oanu papu insiel, fwa sang ou inge, tia ke sromwos, ku srungesr, tu God el lungse el su insemwomwo in sang.” (2 Korint 9:7) In sang me kasru in akkeye orekma in luti ke Togusrai fwin fwalu nu fon sie pa inkanek in akkalemye kulo lasr. Insemwomwo lasr mokle kut in oru ou inge pal nu kemwa, kut ku in akola ma inge ke wik nu kemwa, oanu met Kristian in pal meeta elos oru.​—1 Korint 16:1, 2.

¹⁸ Tia lupan ma kut sang pa akkalemye kulo lasr nu sin Jeova. A, oiyen kulo lasr ku in akkalemye fwal nu ke ngun su oasr yurosr ke pal se ma kut sang. Pa inge ma Jisus el liye ke pal se ma el loang nu sin met puspis su filiye me sang lalos ke pok in kasru ke tempel. Ke pal se Jisus el liye sie mutan katinmas sikasrup el filiye nu lu “luo ipen mani srisrik,” el fwak: “Paye Nga fwak nu sumwos, Katinmas sikasrup se inge el filiye nu lu yok lukelos nu kemwa. Tu elos inge nu kemwa ke ma puspis lalos elos filiye nu lu nu ke me kise, a el ke sikasrup lal filiye me moul lal nu kemwa nu lu.”​—Luk 21:1-4.

19. Efu ku arulanu mwo in sifwil tuni inkanek lasr in akkalemye kulo?

¹⁹ Lela kalweni lasr ke me lutlut inge fuka kut ku in sang kulo mokle kut in sifwil loang akmwoye ke inkanek lasr in akkalemye kulo. Ya kut ku in akyokye me kise in kaksak lasr nu sin Jeova wekunang me kasru lasr ke orekma in luti fwin fwalu nu fon ke inkanek lun ma puspis su oasr yurosr? Fwal nu ke lupan ma kut ku in oru ke oiye se inge, kut ku in lalalfongi na paye la Papa tumasr su arulanu kulang, Jeova, e fwa arulanu insemwomwo meyen kut akkalemye kulo lasr.

Ya Kom Esam?

• Ke sripe puspis fuka kut ku in sang kulo nu sin Jeova?

• Kain in me lutlut puspis fuka kut ku in lotela ke sie tafwu siengoul, me sang su tuku ke inse, a akmwuk in esani ma lula?

• Fuka kut ku in akkapye ngunin pioneer?

• Fuka kut ku in orekmakin “ma saok” lasr in sang kulo nu sin Jeova?

[Pictures on page 27]

“Me kite mwo nu kemwa a kite fwal ma lung me, a tuku lung me

[Pictures on page 28]

Kain in me lutlut tolu fuka ke Ma Sap lal Moses akkalemyeyuk in an se inge?

[Pictures on page 30]

Kain in me sang fuka kut ku in oru?