“Kom In Ouyepa Engunak In Jeova”
“Kom in ouyepa engunak in Jeova, a el fwa sot nu sum ma lungse lun insiom.”—SAM 37:4.
1, 2. Su Sropon me insemwomwo na paye, a fuka Togusra Devid elos sang me akpayeye nu ke ma inge?
“INSEMWOMWO elos su nunku pal nu kemwa ke me enenu lal in ngun, . . . insemwomwo elos su pakomuta, . . . insemwomwo elos su suk misla.” Toeni nu ke ma onkosr saye su akinsemwomwoye met, kas inge nu fon pa mutamweyen kas lun Jisus ke Me Sramsram lal Fwin Eol oanu ma met sim Mattu el simusla ke Gospel lal. (Mattu 5:3-11 New World Translation) Kas lun Jisus sang me akpayeye la kut nu kemwa ku in eis insemwomwo.
2 Sie on mutal su Togusra Devid lun an Israel el simusla kolla nunuk lun met nu sin Jeova, el su Sropon insemwomwo na paye. “Kom in ouyepa engunak in Jeova,” Devid el fwak, “a el fwa sot nu sum ma lungse lun insiom.” (Sam 37:4) Tusruktu, mea oru etauk lasr nu sin Jeova a ke oiye puspis lal ku in kol nu ke “me insemwomwo”? A fuka lutlut lasr ke ma el orala tari a ma el akola in oru in akpayeye akmwuk lal ku in sang nu sum fwinsrak in “eis ma lungse lun insiom”? Lutlut mwo ke Sam 37, fus 1 nu ke 11, ase nu sesr topuk ke kusensiyuk inge.
“Nik Kom Sifwanu Mworerelik
3, 4. Oanu ma Sam 37:1 el fwak, kain in kai fuka Devid el sang, a efu ku in porongo nu ke ma inge arulanu yok sripe ke pal inge?
3 Kut muta ke sie “pal in ma upa su arulanu upa in muteng,” a ma koluk yokyokelik. Kut liye na paye akpayeyen kas lun met sap Poul: “A met koluk a met mwosounkas elos fwa yokyokelik in ma koluk, elos fwa kiapela met a fwa sifwanu kiapeyukla.” (2 Timote 3:1, 13) Arulanu fwusesr na paye in mokleyuk nunuk lasr ke luman kapkapek a kutangla lun met koluk! Ma inge nu kemwa ku in akkolukye nunuk lasr, ku in orala ngetnget lasr ke ma lun ngun in losr. Loang akmwoye ke kas in mutamwauk lun Sam 37 meyen ma inge kasre kut in loang nu ke me sensen: “Nik kom sifwanu mworerelik ke met orek ma koluk. A nik kom sok lainelos su orek ma sesumwos.”
4 News fwin fwalu in len nu kemwa akkalemye nu sesr nununku sesumwos puspis. Met business koluk elos tia eis kai ke ma koluk lalos. Met silolel elos oru ma koluk nu sin met nukin. Met akmas elos tia konoiyukyuk ku eis kai. Me srikasrak inge nu kemwa ke nununku sesumwos purakak koskosrok a kunausla misla lun nunuk. Kapkapek lun met koluk kutupal purakak sok. Tusruktu, kut fwin koskosrok ya ma inge ku in sang kasru in akmwoye ma nu kemwa? Ya sok ke kapkapek lun met koluk ekulla saflaiyen moul lalos? Mo na mo! Aok, kut tia enenu in “mworerelik.” Efu in tia?
5. Efu ku met koluk ku in pupulyukin nu ke maa?
5 Met sim lun Sam el sang topuk lal: “Tu elos fwa sa mwotla oanu maa, a uli oanu maasrik folfol.” (Sam 37:2) Maasrik folfol luman arulanu kato, tusruktu tia pat toko el paola a masla. Ma inge e sikyuk pa nu sin met koluk. Kapkapek lalos tia ku in on nu tok. Ke pal se elos mise, me kasrup lalos tia ku in kasrelos. Nununku sumwos e fwa sun met nu kemwa ke saflaiye. “Tu molin ma koluk mise,” Poul el simusla. (Rom 6:23) Met koluk a met sesumwos nu kemwa elos fwa eis “molin ma elos oru” ke saflaiye a wanginla. Wangin sripe na paye kain moul inge!—Sam 37:35, 36; 49:16, 17.
6. Kain in me lutlut fuka kut ku in lotela in Sam 37:1, 2?
6 Ke ma inge, ya kut lela kapkapek lun met koluk ke lusen kitin pal in akkfosrye kut? Me lutlut ke fus luo meet lun Sam 37 pa: Nikmet lela kapkapek lun met koluk in kupasrla inkanek in kulansap lom nu sin Jeova su kom sulela tari. A, filiye nunuk lom me insemwomwo a nien sun ke ma lun ngun.—Soakas 23:17.
“Lalalfongi Jeova a Oru Ma Mwo”
7. Efu kut enenu in lalalfongi Jeova?
7 “Lalalfongi Jeova a oru ma mwo,” met sim lun Sam el kaifwe kut in oru ou inge. (Sa 37:3a) Ke pal se kut sun ma upa lun moul ku alollo, lalalfongi lasr enenu in oakiyuki nu sin Jeova. El mukena pa ku in ase nu sesr inse misla a oru kut in tia sangeng. “El su muta in an lukma sin El su Fulatlanu,” Moses el simusla, “el fwa muta ye lulin el su Fulatlanu.” (Sam 91:1) Ke pal se kut fosrngala ke kapkapek lun ma koluk ke akmwuk koluk se inge, kut enenu na paye in filiye lalalfongi lasr nu sin Jeova. Fwin koptelik niesr, kut arulanu insemwomwo fwin paon met kamwuk lasr kasru kut. In oupanu, kut fwin lungse in kaifweung in fwafwasyesr ke oaru, kut enenu kasru lun Jeova.—Isaia 50:10.
8. Fuka akesrui lasr ke orekma lun forfor ku in kasre kut in tia sok ke kapkapek lun met koluk?
8 Sie me kasru tu kut in tia fosrnga ke kapkapek lun met koluk pa kut enenu in kafofo ke orekma in suk a kasru met su luman sip in eis etauk sumwos ke akmwuk lun Jeova. Ye mutun ma koluk su arulanu kapkapek, kut enenu in kafofo na paye ke orekma in kasru kutu met. “A komwos in tia mulkunla in oru mwo, a sang nu sin met ngie,” met sap Poul el fwak, “tu ke kise ou inge God el insemwomwo ka.” Ma “mwo” emeet su kut ku in oru pa in sulkakin nu sin kutu met peng mwolanu lun Togusrai lun God. Orekma in luti lasr sie “me kise ke kaksak.”—Hibru 13:15, 16; Galetia 6:10.
9. Aketeye kas in kaifwe lal Devid inge “muta fwin fwalu.”
9 “Muta fwin fwalu,” Devid el tafwela, “a oru orekma oaru.” (Sam 37:3b NW.) “Fwalu” in len lal Devid pa territory nu kemwa su Jeova el sang nu sin met Israel, pa inge Fwal Mwolela. Ke lusen pal in kolyuk lal Solomon masrol nu kemwa ka sun an Dan nu Beer-sheba liyen epang. Pa inge an in muta lun met Israel. (1 Togusra 4:25) Ke len inge, fwinne kut muta fwin fwalu, kut ngetuk nu ke pal se fwalu nu fon fwa ekla nu ke sie paredais ke sie fwal sasu sumwosmwos. Ke pal inge, kut muta in misla a wangin sangeng lasr in ngun.—Isaia 65:13, 14.
10. Mea sikyuk kut fwin “oru ma mwo”?
10 Mea sikyuk kut fwin “oru orekma oaru”? Soakas su etuku ke ngun lun God el akismakinye kut: “Sie met oaru fwa eis me insemwomwo puspis.” (Soakas 28:20) Kaifweung lasr ke oaru in luti ke peng mwo in an nu kemwa su kut muta a nu sin kain in met nu kemwa ku in wise na paye me insemwomwo su tuku sin Jeova. Ke sie me pupulyuk, Frank a mutan kiel pangpang Rose, elos sroang nu ke orekma lun pioneer yiu 40 somla ke sie mura lun an northern Scotland. Met ekasr su akkalemye insemwomwo ke ma paye ke an se inge elos wanginla. Seanyen pioneer se inge tia munasla, a elos mutamwauk in oru orekma in luti a in oru met tuma lutlut. Ke pal inge oasr sie congregation su arulanu kapkapek in an we. Oasr lun seanyen se inge akinsemwomwoyeyuk na paye sin Jeova. “Me insemwomwo yok emeet,” Frank el inse pusisel in fwak, pa “kut srakna muta in ma paye a Jeova el srakna orekmakin kut.” Aok, kut fwin “oru orekma oaru,” kut eis a engunkin me insemwomwo puspis.
“Kom in Ouyepa Engunak in Jeova
11, 12. (a) Fuka kut ku in “engunak nu sin Jeova”? (b) Kain in nien sun fuka kom ku in oru ke lutlut lom sifwanu, a mea fwokin ma inge?
11 Kut fwin lungse in akkeye futoto lasr nu sin Jeova a in srukye na lalalfongi lasr nu sel, kut enenu in “engunak in Jeova.” (Sam 37:4a) Fuka kut ku in oru ou inge? Lela kut in tia arulanu kafofo ke ma sikyuk nu sesr sifwanu, fwinne ma inge luman upa, a kut enenu in loang yok nu sin Jeova. A sie inkanek in oru ou inge pa in pakiye pal in ridi Kas lal. (Sam 1:1, 2) Ya akmwuk lom in ridi Baibel akinsemwomwoye kom? Ma inge ku in akinsemwomwoye kom fwin kom ridi ma inge ke sie nien sun in akyokye etauk lom nu sin Jeova. Efu kom tia tui kitin pal tokin kom ridi sie ipen ma inge a siyuk sum sifwanu, ‘Mea me sramsram inge el luti yu kel Jeova?’ Saap kom ku in konaok la sie me kasru na paye in oasr sie notebook ku sie pepu su kom ku in orekmakin kom fwin ridi Baibel. Pal nu kemwa kom tui nunku ke kalmen ma kom ridi, simusla kutu kas su akismakinye kom ke sie oiye fulat lun God su arulanu pengpeng. Ke kutupa buk lun Sam, Devid el on: “Lela kas in oalik a nunuk insiuk in mwo ye mutom, O Jeova, eot ku luk a Met Lango luk.” (Sam 19:14) Loang yok lasr inge ke Kas lun God sie “me insemwomwo” nu sin Jeova a me insemwomwo pa nu sik.
12 Fuka kut ku in konaok insemwomwo su tuku ke lutlut a nunku ke ma kut lotela tari? Kut ku in oru sie nien sun in lutlut yok kel Jeova a ke inkanek lal. Ma inge ku in musaiyuk insemwomwo lasr kut fwin oru. Aok, Devid el akkeye met sumwosmwos, Jeova “el fwa sot ma lungse lun insiom.” (Sam 37:4b) Pa inge kain in lalalfongi su purakak met sap Jon in simusla kas inge: “A pa inge pulaik lasr nu sel, tu kut fwin siyuk ke kutena ma su fwal nu ke ma lungse lal, el long kut. A kut fwin etu tu el long kut ke kutena ma su kut siyuk sel, kut etu tu kut eis ma kut siyuk sel ka.”—1 Jon 5:14, 15.
13. Ke yiu ekasr somla, kain in kapkapek fuka ke orekma in luti ke Togusrai ku in liyeyuk in an puspis?
13 Oanu sie met su srukye oaru lasr, insemwomwo yok lasr pa in liye la sumwos lun Jeova in kol in kosrao a fwalu fwa akkeyeyuk. (Soakas 27:11) Ya insiesr tia sisisla ke insemwomwo ke pal se kut long la orekma in luti yok orekla sin met lili wiesr in an puspis su wangin sukosok in pal meeta ke sripen kolyuk lun guferment pangpang totalitarian ku dictatorial? Kut ngetuk ke insemwomwo nu ke pal se sukosok yok arulanu kapkapek meet liki saflaiyen akmwuk koluk se inge el tuku. Pus sin met kulansap lun Jeova su muta ke mutanfwal puspis in an roto arulanu kaifweung ke orekma in luti lalos nu sin tulik lutlut, met kaeng pangpang refugees, a kutupa met su muta kitin pal in an roto a engunkin sukosok in alu. Kut lungse na paye la met inge nu kemwa elos fwin folokla nu in loom selos, elos fwa tafwela in lela kalem lun ma paye in tolak in an nu kemwa su arulanu upa losr we ke sripen wangin sukosok lun orekma lasr.—Mattu 5:14-16.
“Esung Inkanek Lom Nu Sin Jeova
14. Kain in me akpayeye fuka kut ku in liye la kut ku in filiye lalalfongi lasr na paye nu sin Jeova?
14 Sie me insemwomwo na paye in etu la me forsnga lasr a ma puspis su oanu me toasr nu sesr e fwa wanginla! Ke inkanek fuka? “Esung inganek lom nu sin Jeova, kom in ouyepa lalalfongi el,” Devid el fwak, a el tafwela, “a el e fwa oru.” (Sam 37:5) In congregation lasr, oasr me akpayeye puspis lasr su akkalemye la kut ku in lalalfongi na paye Jeova ke kasru. (Sam 55:22) Elos nu kemwa su wi ke orekma lun forfor pal nu kemwa, elos su pioneer, met fwafwasyesr, missionary, ku elos su kisekin sifwanu in kulansap in Bethel, elos nu kemwa ku in sang me akpayeye ke kurungin lun Jeova su kom ku in lalalfongi. Efu ku kom tia sramsram nu sin sie met su ou inge su kom etu a siyuk selos fuka Jeova el kasrelos? Wangin alollo kom ku in long kain in experience puspis su akkalemye la fwinne ke pal in ma upa, paon Jeova su akola pal nu kemwa in kasru tia futoto. El sang pal nu kemwa me enenu lun moul.—Sam 37:25; Mattu 6:25-34.
15. Fuka sumwosmwos lun God el tolak oanu kalem?
15 Ke pal se kut tupan a filiye lalalfongi lasr nu kemwa nu sin Jeova, kut ku in pula ma paye lun kas lun met sim lun Sam: “El e fwa fwakak sumwosmwos lom oanu kalem, a nununku sumwos lom oanu infwulwen len.” (Sam 37:6) Oanu sie Met Lo lun Jeova, pal nu kemwa kut ku konaok la met puspis elos tafongla ke nunuk lalos nu sesr. Tusruktu, Jeova el ikasla mutan met fwokpap a kasrelos in akilen la orekma lun forfor lasr mokleyuk ke lungse nu sin Jeova a nu sin met tulan lasr. In pal se na, orekma sumwos lasr arulanu kalem, fwinne met puspis elos kaskas koluk lain kut. Jeova el akkeye kut in kutangla liki me lain nu kemwa a kolyai. Ke sripe se inge, sumwosmwos lun met kulansap lun God oanu kalem lun infwulwen len.—1 Piter 2:12.
“Mongle in Jeova . . . a Mongfwusesr in Tupnal”
16, 17. Fwal nu ke Sam 37:7, pal in mea pa inge, a efu?
16 Kas se toko lun met sim lun Sam pa: “Mongle in Jeova a mongfwusesr in tupnal. Nik kom sifwanu mworerelik ke met se su kapkapek inkanek lal, ke met se su oru kineuk koluk in sikyuk.” (Sam 37:7) Ke fus inge Devid el akkalemye me enenu nu sesr in sano ke mongfwusesr nu sin Jeova. Fwinne saflaiyen akmwuk se inge sonna tuku, tusruktu ma inge tia me purakak nu sin sie met in torkaskas. Ya kut tia liye la pakoten lun Jeova a mongfwusesr lal yok liki ma kut nunku meet? Ya kut ku in akkalemye pa ke pal inge la kut sano pa ke kut kafofo in luti ke peng mwo meet liki safla? (Mark 13:10) Pa inge pal in fwasr liki kain in orekma su nukin in sano meyen ma inge ku in eisla liki kut insemwomwo a inse misla ke ma lun ngun. Pa inge pal in lain ke ku me purakak koluk lun fwal lal Setan. A pa inge pal in srukye sie oiyen moul nasnas a in tia filiye ke me sensen moul sumwosmwos lasr ye mutun God. Lela kut in tafwela in sisla nunuk kosro a fwasr liki orekma sufwal nu sin mutan ku nu sin mokul a fwasr liki oiyen mokul nu sin mokul a mutan nu sin mutan.—Kolosse 3:5.
17 “Tela mulat a fwasr liki koskosrok,” Devid el kai kut. “Nik kom sifwanu mworerelik tu a fwa kol nu ke ma koluk. tu met orekma koluk fwa mwotla, a elos su tupan Jeova, elos fwa usru fwalu.” (Sam 37:8, 9) Aok, kut ku in lalalfongi a ngetuk nu ke pal fwasru—su arulanu futoto ke pal inge—ke pal se Jeova el ela ma koluk nu kemwa fwin fwalu a elos nu kemwa su sropon ma inge.
“Tu Kitin Pal Na”
18, 19. Kain in kas in akkeye fuka kom ku in eis in Sam 37:10?
18 “Tu kitin pal na, a met koluk fwa wanginla; aok, kom fwa alken in nunku ke yen sel, a wangin.” (Sam 37:10) Kas se inge arulanu akkeye kut na paye ke kut futotoeni nu ke saflaiyen akmwuk se inge a ke saflaiyen oiye sukosok liki Jeova su arulanu koluk! Kain in guferment nu kemwa ku inkanek in kol su metu elos orala arulanu sufwal na paye a tia kutangla. Ke pal inge kut futotoeni nu ke pal in sifwil folokonang kolyuk lun God, Togusrai lun Jeova ye koko lun Jisus Kraist. Fwalu nu fon el filiye ye koko lal a el kunausla met nu kemwa su lain Togusrai lun God.—Daniel 2:44.
19 Ke fwalu sasu su muta ye koko lun Togusrai lun God, fwinne kom suk, kom tia ku in konaok na paye Met koluk.” Paye, kutena met su lain Jeova in pal ingo elos fwa kunausyukla. Wangin kutena met su lain kolyuk lal ku srunga in pusisel nu ke kolyuk lal fwa ku in konoiyukyuk we. Met tulan lom nu kemwa elos nunuk siefwunnu in akinsemwomwoye Jeova. Kain in kurungin su akwanginyela—locks, kalkal, a wangin kutena ma su ku in kunausla lalalfongi a insemwomwo!—Isaia 65:20; Maika 4:4; 2 Piter 3:13.
20, 21. (a) Su “met fwokpap” in Sam 37:11, a oya elos ku in konaok “misla puspis”? (b) Kain in me insemwomwo fuka kut ku in eis kut fwin etawi Devid Lulap?
20 Aok, “met fwokpap elos fwa usru fwalu.” (Sam 37:11a) Tusruktu, su “met fwokpap” inge? Kas se inge su langasyukla nu ke “fwokpap” tuku ke kas se inge su oasr kalme “akpusisilyeyuk.” Aok, “met fwokpap” inge el lumeyuk nu sin met nu kemwa su sano Jeova ke inse pusisel in aksumwosye nununku sesumwos nu kemwa su akpusisilyelos. “A fwa sifwanu akengunyelos in misla puspis.” (Sa 37:11b) Fwinne ke pal inge kut ku in konaok misla yok ke paredais in ngun su ku in liyeyuk nu ke congregation paye lun met Kristian.
21 Fwinne kut sonna sukosok liki ma upa, tusruktu kut akkeye sie sin sie a akpwaryelos nu kemwa su keok a asor. Ke sripe se inge, insemwomwo a inse misla akkeyeyuk na paye inmaslon met kulansap lun Jeova. Brother nu kemwa su pakiyuki oanu met seperd elos kulansap ke lungse ke me enenu lasr in ngun—a kutupal ke—ikwe, ma inge kasre kut in mongfwusesr ke me keok ke sripen ma sumwos. (1 Tessalonika 2:7, 11; 1 Piter 5:2, 3) Misla el sie ma saok na paye su oasr yurosr! Oasr pa fwinsrak lasr in moul ma patpat ke sie paredais su apkurun in tuku. Ke ma inge, lela kut nu kemwa in etawi Devid Lulap, Jisus Kraist, su moniyuk lal nu sin Jeova moklel in kulansap nu sel ke oaru nu ke safla. (1 Piter 2:21) Ke pal se kut oru ou inge, kut fwa tafwela in insemwomwo, ke kut kaksakin el su wise nu sesr me insemwomwo, aok, God lasr, Jeova.
Ya Kom Ku In Topuk?
• Kain in me lutlut fuka kom lotela in Sam 37:1, 2?
• Fuka kom ku in “engunak in Jeova”?
• Kain in me akpayeye fuka akkalemye la kut ku in filiye lalalfongi lasr nu sin Jeova?
[Picture on page 21]
Met Kristian elos tia sok nu selos nu kemwa oru ma sesumwos
[Picture on page 22]
“Lalalfongi Jeova a oru mwo
[Picture on page 23]
Engunak in Jeova ke kom oru lutlut yok kel
[Picture on page 24]
“Met fwokpap elos fwa usru fwalu